Ezekiyeli

47 Arahava angarukana ku bwinjiriro bwa ya Nzu+, maze, ehe hari amazi+ asohoka avuye munsi y’urwinjiriro rw’iyo Nzu ugana mu buseruko+, kuko uruhande rw’imbere rwa nya Nzu rwari mu buseruko. Ayo mazi yamanuka avuye munsi, ku ruhande rw’iburyo rwa nya Nzu, mu bumanuko bwa ca gicaniro.

2 Arahava aransohora ancishije mu nzira y’irembo ryo mu buraruko+, aranzungurukana ancishije mu nzira yo hanze, anzana kw’irembo ryo hanze riraba amaja mu buseruko+, maze, ehe hariho amazi+ yariko atemba mu ruhande rw’iburyo.

3 Nya mugabo agiye agana mu buseruko afise mu kuboko ikamba yo gupimisha+, aca agera amatambwe igihumbi hanyuma ancisha muri ayo mazi, amazi angera ku maso y’ibirenge.

4 Arongera agera igihumbi, aca ancisha muri nya mazi, amazi angera ku mavi.

Arongera agera igihumbi, araheza ayancishamwo—amazi angera mu mafyinga.

5 Arongera agera igihumbi. Rwari uruzi rw’isumo ntashobora gucamwo, kuko amazi yari yaduze cane, aba amazi umuntu ashobora kwogamwo, uruzi rw’isumo ata wari gushobora gucamwo.

6 Aca ambwira ati: “Ivyo wabibonye ga mwana w’umuntu?”

Maze arangendagendesha, hanyuma angarukana ku nkombe y’urwo ruzi. 7 Ngarutse, erega, ehe ku nkombe ya nya ruzi hari ibiti vyinshi cane, hakuno no hakurya+. 8 Hanyuma ambwira ati: “Aya mazi ariko asohoka aja mu karere ko mu buseruko, kandi azomanuka aciye muri Araba+. Azoshika ku kiyaga*+. Ayo mazi arazanwa mu kiyaga+, amazi yaco na yo agakizwa koko. 9 Kandi vy’ukuri, igifise ubuzima cose kigwirirana+, aho hose hazoshika urwo ruzi rwiyongereyeko kabiri, kizogira ubuzima. Emwe, hazoba amafi menshi cane, kuko aho ari ho ayo mazi azoshika koko, kandi amazi y’ikiyaga azokizwa+; kandi aho urwo ruzi ruzoshika, ikintu cose kizoba kizima.

10 “Emwe, abarovyi bazohagarara vy’ukuri ku nkengera yarwo kuva i Eni-gedi+ gushika n’i Eni-egulayimu. Hazobaho imbuga yo kwanikiramwo insenga z’umukwabu. Amafi, mu bwoko bwayo, azoba menshi cane, nk’amafi ya ca Kiyaga Kinini+.

11 “Hari ibibanza vyaho bijaga be n’ibibanza vyaho vy’urushanga, kandi ntibizokizwa+. Bizoheberwa umunyu+.

12 “Kandi ku nkengera ya nya ruzi, uko inkombe yarwo igenda, hakuno no hakurya, hazomera ubwoko bwose bw’ibiti bitanga ibifungurwa+. Amababi yavyo ntazokabirana+, eka n’ivyamwa vyavyo ntibizohera+. Mu mezi yavyo, bizoza birama ivyamwa bishasha, kuko amazi abigaburira ari ayava aheranda ubwaho+. Kandi ivyamwa vyavyo bizoba ivyo kurya, amababi yavyo na yo abe ayo kuvūra+.”

13 Ibi ni vyo Umukama Segaba Yehova avuze: “Aka ni ko karere muzokwikebera bwa ntoranwa, kabe igihugu ca ya miryango cumi n’ibiri ya Isirayeli, ibipande bibiri vy’itongo bihabwe Yozefu+. 14 Kandi muzohatorana koko, umwe wese anganye na mwene wabo, kikaba ari igihugu nadugije ukuboko nkarahira+ ko nzogiha ba sogokuruza banyu+; kandi ico gihugu kizobegukira koko bwa ntoranwa biciye ku bupfindo+.

15 “Kandi uru ni rwo rubibe rw’ico gihugu mu ruhande rwo mu buraruko, kuva kuri ca Kiyaga Kinini ufashe inzira ija i Hetiloni+, umuntu aje agana Zedadi+, 16 Hamati+, Berota+, Siburayimu, ahaherereye hagati y’urubibe rwa Damasiko+ n’urubibe rwa Hamati; Hazeri-hatikoni, aherekeye urubibe rwa Hawurani+. 17 Urubibe rwo kuva ku kiyaga ruze rube Hazari-enoni+, urubibe rwa Damasiko be n’uburaruko—amaja mu buraruko, be n’urubibe rwa Hamati+. Urwo ni rwo ruhande rwo mu buraruko.

18 “Uruhande rwo mu buseruko na rwo ni kuva hagati ya Hawurani+ na Damasiko+, no hagati ya Gileyadi+ n’igihugu ca Isirayeli, ku nkokoro ya Yorodani+, kuva ku rubibe gushika ku kiyaga co mu buseruko. Urwo ni rwo ruhande rwo mu buseruko.

19 “Uruhande rwo mu bumanuko na rwo ni ururaba mu bumanuko, kuva i Tamari+ gushika ku mazi y’i Meribati-kadeshi+, no ku mwonga+ gushika kuri ca Kiyaga Kinini. Urwo ni rwo ruhande rwo mu bumanuko, amagana i Negebu.

20 “Uruhande rwo mu burengero na rwo ni ca Kiyaga Kinini, kuva ku rubibe kugenda utumbereye, gushika ku bwinjiriro bwa Hamati+. Urwo ni rwo ruhande rwo mu burengero.”

21 “Muze mugabangane ico gihugu, mu miryango cumi n’ibiri ya Isirayeli. 22 Kandi bize bigende gutya: muze mucigaburire bwa ntoranwa+, mwe na ba kavamahanga babayeho ari ba kavamahanga hagati yanyu+ bavyariye abana hagati yanyu. Kuri mwebwe baze babe nk’imvukira muri bene Isirayeli. Bazotorana hamwe namwe biciye ku bupfindo, hagati y’imiryango ya Isirayeli+. 23 Bize bigende gutya: mu muryango kavamahanga azoba abayemwo ari kavamahanga, ni ho muzomuha intoranwa yiwe,” ni ko Umukama Segaba Yehova avuze.