Lakkoofsa

32 Ilmaan Ruubenii+ fi ilmaan Gaad+ horii hedduu qabu turan; isaanis biyyi Yaazeerii+ fi biyyi Giiliyaad naannoo horiidhaaf gaarii taʼe taʼuu isaa ni argan. 2 Kanaafuu, ilmaan Gaadii fi ilmaan Ruuben gara Musee, gara Eleʼazaar lubichaa fi gara ajajjoota yaaʼichaa dhufanii akkana isaaniin jedhan: 3 “Ataarot, Diboon, Yaazeer, Nimraan, Heshboon,+ Eleʼaaleen, Seebaam, Neboonii+ fi Beʼoon,+ 4 biyyi Yihowaan yaaʼii Israaʼel duratti injifate sun+ biyya horiidhaaf gaarii taʼe dha; nuti tajaajiltoonni kee immoo horii hedduu qabna.”+ 5 Achiis itti fufuudhaan, “Nuti si duratti fudhatama arganneerra yoo taʼe, lafti kun nu tajaajiltoota keetiif dhaalaan haa kennamu. Yordaanos gamatti akka ceenu hin godhin” jedhan.

6 Achiis Museen ilmaan Gaadii fi ilmaan Ruubeniin akkana jedhe: “Isin utuma as jiraattanii obboloonni keessan gara waraanaa dhaquu qabuu? 7 Sabni Israaʼel gara biyya Yihowaan dhugumaan isaaniif kennutti akka hin ceene abdii kan isaan kutachiistan maaliifi? 8 Ani biyyattii akka ilaalaniif Qaadesh Barneʼaa keessaa yommuun isaan ergetti wanti abbootiin keessan godhan kanuma ture.+ 9 Isaan yeroo gara Sulula* Eshkoolitti ol baʼanii+ biyyattii ilaalanii turanitti, gara biyya Yihowaan isaaniif kennuuf turetti akka hin galle saba Israaʼel abdii kutachiisanii turan.+ 10 Guyyaa sanatti aariin Yihowaa waan bobaʼeef inni akkana jedhee kakate:+ 11 ‘Isaan garaa isaanii guutuudhaan ana duukaa waan hin buuneef, namoota biyya Gibxiitii baʼan keessaa warri umuriin isaanii waggaa 20 fi isaa ol taʼe biyya ani, Abrahaam, Yisihaaqii fi Yaaqoobiif kakadhe sana+ hin argan;+ 12 Kaaleb+ ilmi Yofunee Qeenizichaa fi Iyyaasuun+ ilmi Nuun garaa isaanii guutuudhaan Yihowaa duukaa waan buʼaniif,+ isaan qofatu biyyattii arga.’ 13 Kanaafuu, aariin Yihowaa Israaʼel irratti ni bobaʼe; innis hamma dhaloonni Yihowaa duratti wanta hamaa gochaa ture sun hundi dhumutti,+ waggaa 40f lafa onaa keessa akka jooran ni godhe.+ 14 Ammas isin sanyii namoota cubbamoo warra aariin Yihowaa Israaʼel irratti akka dabalu godhan sanaa taʼuudhaan abbootii keessan bakka buutanii kaataniittu. 15 Isin isa duukaa buʼuu irraa yoo deebitan, inni dhugumaan ammas lafa onaa keessatti sabicha ni dhiisa; isinis guutummaa sabichaa irratti badiisa ni fiddu.”

16 Boodas isaan gara isaa deemanii akkana jedhan: “Bakka kanatti horiiwwan keenyaaf dallaa dhagaa, ijoollee keenyaaf immoo magaalota haa ijaarru. 17 Haa taʼu malee, waraanaaf qophaaʼuu keenya itti fufna;+ hamma gara biyya isaaniitti isaan galchinuttis Israaʼelota dura ni deemna; yeroo kanatti ijoolleen keenya magaalota dallaa dhagaa qabanii fi jiraattota biyyattii irraa eegumsa itti argatan keessa ni jiraatu. 18 Israaʼelonni tokkoon tokkoon isaanii lafa isaanii dhaalaan hamma fudhatanitti gara mana keenyaatti hin deebinu.+ 19 Nuti dhaala keenya isa Yordaanos irraa gara bahaatti argamu waan fudhanneef, isaanii wajjin dhaala Yordaanos irraa gara kallattii isa kaaniitti argamuu fi isa booda jiru hin fudhannu.”+

20 Museenis akkana jedhee isaaniif deebise: “Taanaan akkana godhaa: Yihowaa duratti waraanaaf hidhadhaa;+ 21 Yommuu inni diinota isaa of duraa ariʼutti+ tokkoon tokkoon keessan waraanaaf yoo hidhattanii fi Yihowaa dura Yordaanos gamatti yoo ceetan, 22 hamma biyyattiin Yihowaadhaaf bitamtuttis+ akkana yoo gootan, sana booda deebiʼuu ni dandeessu;+ Yihowaa fi Israaʼel durattis yakka irraa bilisa ni taatu. Biyyi kunis Yihowaa duratti dhaala keessan ni taati.+ 23 Kana hin gootan taanaan garuu, isin Yihowaa irratti cubbuu hojjettu. Cubbuu keessaniifis akka adabamtan beekaa. 24 Kanaafuu, ijoollee keessaniif magaalota, bushaayeewwan keessaniif immoo dallaa dhagaa ijaaruu ni dandeessu;+ garuu waadaa galtan raawwachuu qabdu.”

25 Ilmaan Gaadii fi ilmaan Ruubenis Museedhaan akkana jedhan: “Nuti tajaajiltoonni kee akkuma gooftaan keenya ajaje ni goona. 26 Ijoolleen keenya, haadhotiin manaa keenya, horiiwwan keenyaa fi beeladoonni keenya hundi magaalota Giiliyaad keessa ni taaʼu;+ 27 Haa taʼu malee, akkuma gooftaan keenya jedhe tajaajiltoonni kee, jechuunis dhiironni Yihowaa duratti waraana irratti hirmaachuuf hidhatan hundi ni ceʼu.”+

28 Kanaafuu, Museen isaaniin ilaalchisee Eleʼazaar lubichaaf, Iyyaasuu ilma Nuunii fi dura buutota manneen abbootii gosoota Israaʼeliif ajaja ni kenne. 29 Museen akkana isaaniin jedhe: “Ilmaan Gaadii fi ilmaan Ruuben keessaa dhiironni Yihowaa duratti waraanaaf hidhatan hundi isinii wajjin Yordaanos gamatti yoo ceʼanii fi biyyattiin toʼannaa keessan jala yoo galte, isin biyya Giiliyaad akka dhaalaatti isaaniif ni kennitu.+ 30 Isaan waraanaaf hidhatanii isinii wajjin hin ceʼan taanaan garuu, biyya Kanaʼaan keessa isin gidduu ni jiraatu.”

31 Yeroo kanatti ilmaan Gaadii fi ilmaan Ruuben akkana jedhanii deebisan: “Wanta Yihowaan nu tajaajiltoota keetti dubbate ni raawwanna. 32 Nuti waraanaaf hidhannee Yihowaa dura gara biyya Kanaʼaanitti ni ceena;+ biyyi nuti dhaallu garuu isa Yordaanos irraa gamanatti argamu taʼa.” 33 Kanaafuu, Museen bulchiinsa Sihoon+ isa mootii Amoorotaa taʼe sanaa fi bulchiinsa Oog+ isa mootii Baashaan taʼe sanaa, jechuunis biyya isa naannoowwan sana keessatti qabeenya magaalota isaa taʼee fi magaalota biyya isa isatti marsee argamu sanaa isaaniif, jechuunis ilmaan Gaadii fi ilmaan Ruubeniif,+ akkasumas walakkaa gosa Minaasee+ isa ilma Yoseef taʼeef ni kenne.

34 Ilmaan Gaad magaalota Diboon,+ Ataarot,+ Aroʼer,+ 35 Atroot Shoofaan, Yaazeer,+ Yogbehaa,+ 36 Beet Nimraa+ fi Beet Kaaraan+ warra dallaa dhagaa qaban ni ijaaran;* akkasumas bushaayeewwan isaaniitiif dallaawwan dhagaa ni ijaaran. 37 Ilmaan Ruuben immoo magaalota Heshboon,+ Eleʼaalee,+ Qiriyaataayim,+ 38 Neboo+ fi Baʼaal Meʼoon+ warra maqaan isaanii jijjiirame, akkasumas Sibmaa ni ijaaran; magaalota deebisanii ijaaran sanas maqaa isaanii ni jijjiiran.

39 Ilmaan Maakiir+ isa ilma Minaasee taʼe sanaa Giiliyaad irratti duulanii ishii qabachuudhaan Amoorota achi keessa turan ni ariʼan. 40 Kanaafuu, Museen Giiliyaadiin Maakiir isa ilma Minaasee taʼeef ni kenne; innis ishii keessa jiraachuu jalqabe.+ 41 Achiis Yaaʼir ilmi Minaasee isaan irratti duulee gandeen isaanii warra dunkaanaan ijaaraman ni qabate; maqaa isaaniis Hawoot Yaaʼir* jedhee moggaase.+ 42 Nobaanis Qeenaat irratti duulee ishii fi magaalota ishii jalatti* argaman ni qabate; maqaa ishiis maqaa ofii isaatiin Nobaa jedhee moggaase.