Zakkaariyaas
8 Ammas dubbiin Yihowaa Gooftaa Raayyaa akkana jedhu gara koo ni dhufe: 2 “Yihowaan Gooftaan Raayyaa akkana jedha: ‘Ani Xiyooniif hinaaffaa guddaadhaan nan hinaafa;+ dheekkamsa guddaadhaanis ishiidhaaf nan hinaafa.’”
3 “Yihowaan akkana jedha: ‘Ani gara Xiyoonitti nan deebiʼa,+ Yerusaalem keessas nan jiraadha;+ Yerusaalem magaalaa amanamtuu* jedhamtee ni waamamti;+ gaarri Yihowaa Gooftaa Raayyaas gaara qulqulluu jedhamee ni waamama.’”+
4 “Yihowaan Gooftaan Raayyaa akkana jedha: ‘Jaarsoliinii fi jaartiiwwan umurii dheeraa jiraachuu isaaniitiin* kan kaʼe ammas ulee qabatanii addabaabayiiwwan Yerusaalem keessa ni taaʼu.+ 5 Addabaabayiiwwan magaalattii ijoollee dhiiraa fi ijoollee durbaa achi taphataniin ni guutamu.’”+
6 “Yihowaan Gooftaan Raayyaa akkana jedha: ‘Yeroo sanatti kun namoota saba kana keessaa hafaniif baayʼee ulfaataa yoo fakkaate illee, anatti baayʼee ulfaataa fakkaachuu qabaa?’ jedha Yihowaan Gooftaan Raayyaa.”
7 “Yihowaan Gooftaan Raayyaa akkana jedha: ‘Kunoo, ani saba koo biyyoota bahaa fi dhihaa* keessaa baasee nan fida.+ 8 Ani isaan nan fida, isaanis Yerusaalem keessa ni jiraatu;+ isaan saba koo ni taʼu, anis Waaqa isaanii isa dhugaa* fi isa qajeelaa isaaniif nan taʼa.’”+
9 “Yihowaan Gooftaan Raayyaa akkana jedha: ‘Isin warri dubbii kana afaan raajotaa keessaa dhagaʼaa jirtan,+ harka keessan jabeeffadhaa;*+ dubbiin kun manni qulqullummaa akka ijaaramuuf yeroo buʼuurri mana Yihowaa Gooftaa Raayyaa kaaʼametti dubbatamee ture. 10 Yeroo sana dura, namaafis taʼe horiidhaaf mindaan kaffalamaa hin turre;+ diinaan kan kaʼes nagaadhaan seenanii baʼuun hin jiru ture; sababiin isaas, ani namoota hundumaa wal irratti kaaseen ture.’
11 “‘Amma garuu warra saba kana keessaa hafan irratti akka baroota darbanii hin godhu’+ jedha Yihowaan Gooftaan Raayyaa. 12 ‘Sababiin isaas, sanyiin nagaa ni facaafama; mukti wayinii firii isaa ni kenna; lafti oomisha ishii ni kenniti;+ samiinis fixeensa isaa ni kenna; ani warri saba kana keessaa hafan wantoota kana hundumaa akka dhaalan nan godha.+ 13 Yaa mana Yihudaa fi mana Israaʼel, isin akkuma saboota gidduutti abaarsa taatanii turtan,+ amma ani isin nan oolcha, isinis eebba ni taatu.+ Hin sodaatinaa!+ Harka keessan jabeeffadhaa.’*+
14 “Sababiin isaas, Yihowaan Gooftaan Raayyaa akkana jedha: ‘“Abbootiin keessan waan na dheekkamsiisaniif badiisa isaan irratti fiduuf akkuman murteessee turee fi kanattis hin gaabbinetti” jedha Yihowaan Gooftaan Raayyaa,+ 15 “yeroo kanattis Yerusaalemii fi mana Yihudaatiif wanta gaarii gochuuf murteesseera.+ Hin sodaatinaa!”’+
16 “‘Wanti isin gochuu qabdan kana dha: Walii keessanitti dhugaa dubbadhaa;+ murtiin isin karra keessan irratti kennitanis dhugaa fi nagaa kan babalʼisu haa taʼu.+ 17 Garaa keessan keessatti hammina wal irratti hin yaadinaa;+ kakaa sobaa akkamii iyyuu hin jaallatinaa;+ sababiin isaas, ani wantoota kana hundumaa nan jibba’+ jedha Yihowaan.”
18 Ammas dubbiin Yihowaa Gooftaa Raayyaa akkana jedhu gara koo ni dhufe: 19 “Yihowaan Gooftaan Raayyaa akkana jedha: ‘Soomni jiʼa arfaffaa,+ soomni jiʼa shanaffaa,+ soomni jiʼa torbaffaa+ fi soomni jiʼa kurnaffaa+ mana Yihudaatiif yeroo itti ililchanii fi yeroo gammachuu, eeyyee, yeroo ayyaana gammachuu ni taʼa.+ Kanaafuu, dhugaa fi nagaa jaalladhaa.’
20 “Yihowaan Gooftaan Raayyaa akkana jedha: ‘Saboonnii fi jiraattonni magaalota hedduu dhugumaan ni dhufu; 21 jiraattonni magaalaa tokkoos jiraattota magaalaa kan biraatiin, “Kottaa, Yihowaan gaarummaa akka nutti argisiisu kadhachuu fi Yihowaa Gooftaa Raayyaa barbaaddachuuf haa dhaqnu. Nutis ni dhaqna”+ jedhu. 22 Namoonni hedduunii fi saboonni jajjaboon Yerusaalem keessatti Yihowaa Gooftaa Raayyaa barbaaddachuu+ fi Yihowaan gaarummaa akka isaanitti argisiisu kadhachuuf ni dhufu.’
23 “Yihowaan Gooftaan Raayyaa akkana jedha: ‘Bara sanatti namoonni qooqawwan sabootaa hundumaa keessaa dhufan+ kudhan uffata* nama Yihudii tokkoo qabatanii, eeyyee, cimsanii qabatanii, “Waaqayyo isinii wajjin akka jiru waan dhageenyeef,+ nuti isinii wajjin deemuu barbaanna”+ jedhu.’”