Ndị Rom
3 Gịnịzi ka onye Juu ji ka mma,+ ma ọ bụ, olee uru ibi úgwù bara?+ 2 Ọ bara uru nke ukwuu n’ụzọ ọ bụla. Nke mbụ, n’ihi na ọ bụ ha ka e nyefere okwu dị nsọ nke Chineke n’aka.+ 3 Ọ̀ bụzi ka gịnị mee? Ọ bụrụ na ụfọdụ egosighị okwukwe,+ enweghị okwukwe ha ọ̀ ga-eme, ma eleghị anya, ka ikwesị ntụkwasị obi+ nke Chineke ghara ịdị irè?+ 4 Tụfịakwa! Kama ka Chineke bụrụ onye eziokwu,+ ọ bụ ezie na mmadụ niile bụ ndị ụgha,+ ọbụna dị ka e dere, sị: “Ka e wee gosi na ị bụ onye ezi omume n’okwu gị, ka i wee merie mgbe a na-ekpe gị ikpe.”+ 5 Otú ọ dị, ọ bụrụ na ajọ omume anyị emee ka ezi omume nke Chineke+ pụta ìhè, gịnị ka anyị ga-ekwu? Chineke ọ̀ na-ekpe ikpe na-ezighị ezi+ mgbe ọ na-egosi ọnụma ya? (Ana m ekwu dị ka mmadụ.+) 6 Tụfịakwa! Ma ọ́ bụghị otú ahụ, olee otú Chineke ga-esi kpee ụwa ikpe?+
7 Ma ọ bụrụ na e si n’okwu ụgha m mee ka a mara eziokwu nke Chineke+ nke ọma karị, wee nye ya otuto, gịnị mere a ka jikwa na-ama m ikpe na m bụ onye mmehie?+ 8 Gịnị mere na anyị agaghị asị, dị nnọọ ka a na-ebo anyị ebubo ụgha,+ dịkwa nnọọ ka ụfọdụ ndị na-asị na anyị na-ekwu: “Ka anyị mee ihe ọjọọ ka ihe ọma wee bịa”?+ Ikpe+ a mara ndị ahụ bụ ikpe ziri ezi.+
9 Ọ̀ bụ ka gịnị mee? Ànyị ka ha mma?+ Ọ dịghị ma ọlị! N’ihi na anyị ekwuwo na mbụ na ndị Juu na ndị Grik nọcha n’okpuru mmehie;+ 10 dị nnọọ ka e dere, sị: “Ọ dịghị onye ezi omume dịnụ, ọbụnadị otu onye;+ 11 ọ dịghị onye nwere nghọta ọ bụla, ọ dịghị onye na-achọ Chineke.+ 12 Mmadụ niile agahiewo, ha niile aghọwo ndị na-abaghị uru; ọ dịghị onye nwere obiọma, e nweghị ọbụna otu onye.”+ 13 “Akpịrị ha bụ ili e meghere emeghe, ha ejiriwo ire ha ghọọ aghụghọ.”+ “Nsí agwọ dị n’okpuru egbugbere ọnụ ha.”+ 14 “Ọnụ ha jupụtakwara n’ịbụ ọnụ na okwu ọjọọ.”+ 15 “Ụkwụ ha dị ngwa ịwụfu ọbara.”+ 16 “Mbibi na nhụsianya dị n’ụzọ ha,+ 17 ha amaghịkwa ụzọ udo.”+ 18 “Ha adịghị atụ egwu Chineke.”+
19 Ma anyị maara na ihe niile Iwu+ ahụ na-ekwu, ọ bụ ndị nọ n’okpuru Iwu ahụ ka ọ na-agwa, ka e wee mechie ọnụ niile,+ ka Chineke wee nye ụwa dum+ ntaramahụhụ.+ 20 Ya mere, a gaghị esi n’ọrụ nke iwu kpọọ anụ ahụ́ ọ bụla onye ezi omume+ n’ihu ya, n’ihi na ọ bụ iwu+ na-eme ka a mata nke ọma ihe bụ́ mmehie.+
21 Ma ugbu a, e mewo ka ọ pụta ìhè na mmadụ pụrụ ịbụ onye ezi omume n’ihu Chineke+ n’adabereghị n’iwu, dị ka Iwu+ ahụ na Akwụkwọ Ndị Amụma+ na-agba àmà ya;+ 22 ee, mmadụ pụrụ ịbụ onye ezi omume n’ihu Chineke site n’inwe okwukwe n’ebe Jizọs Kraịst nọ,+ ya bụ, ndị niile nwere okwukwe.+ N’ihi na ọ dịghị ihe dị iche.+ 23 N’ihi na mmadụ niile emehiewo,+ ha adịghịkwa eru ebube Chineke,+ 24 a na-akpọkwa ha ndị ezi omume,+ nke bụ́ onyinye e nyere n’efu,+ site n’obiọma ya na-erughịrị mmadụ site ná ntọhapụ nke si n’ihe mgbapụta+ ahụ Kraịst Jizọs kwụrụ. 25 Chineke wepụtara ya dị ka àjà ime udo;+ udo a na-abịa site n’inwe okwukwe n’ọbara ya.+ Nke a bụ iji gosi ezi omume nke ya, n’ihi na ọ na-agbaghara mmehie+ ndị e mere n’oge gara aga mgbe Chineke nọ na-enwe ndidi;+ 26 iji gosi ezi omume nke ya n’oge a a kara aka, ka o wee bụrụ onye ezi omume+ ọbụna mgbe ọ na-akpọ onye nwere okwukwe n’ebe Jizọs nọ onye ezi omume.+
27 Ọ̀ dị ihe mere anyị ga-eji na-anya isi?+ Ọ dịghị. Olee iwu mere ka ọ dị otú a?+ Ọ̀ bụ iwu nke ọrụ?+ Ọ dịghị ma ọlị, kama ọ bụ iwu nke okwukwe.+ 28 N’ihi na anyị na-ewere ya na a na-akpọ mmadụ onye ezi omume site n’okwukwe nke na-agụnyeghị ọrụ nke iwu.+ 29 Ka ọ̀ bụ Chineke nke naanị ndị Juu?+ Ọ́ bụghịkwa nke ndị mba ọzọ?+ Ee, ọ bụkwa nke ndị mba ọzọ,+ 30 ma ọ bụrụ n’ezie na Chineke bụ otu,+ bụ́ onye ga-akpọ ndị e biri úgwù+ ndị ezi omume n’ihi okwukwe, kpọọkwa ndị a na-ebighị úgwù+ ndị ezi omume site n’okwukwe ha. 31 Ànyị ga-esitezi n’okwukwe anyị mee ka iwu ghara ịdị?+ Tụfịakwa! Kama nke ahụ, anyị na-eme ka iwu guzosie ike.+