Gusubira mu vyagezwe
29 Aya ni yo majambo y’isezerano Yehova yategetse Musa ngo agiranire n’Abisirayeli mu gihugu ca Mowabu, yiyongera kw’isezerano yagiraniye na bo i Horebu+.
2 Nuko Musa ahamagara Abisirayeli bose ababwira ati: «Mwariboneye n’amaso yanyu ibintu vyose Yehova yakoreye mu Misiri, abikorera Farawo n’abasuku biwe bose hamwe n’igihugu ciwe cose+, 3 vya bihano* bikomeye, ni ukuvuga vya bimenyetso n’ibitangaro bikomeye mwibonera n’amaso yanyu+. 4 Ariko Yehova ntiyabahaye umutima wo gutahura, amaso yo kubona n’amatwi yo kwumva gushika n’uyu musi+. 5 Yavuze ati: “Mu myaka 40 namaze ndabayobora mu bugaragwa+, impuzu zanyu ntizabahereyeko kandi n’ibirato* vyanyu ntivyabahereyeko+. 6 Nta mukate mwariye, kandi nta n’umuvinyu canke izindi nzoga mwanyoye, kugira mumenye ko ndi Yehova Imana yanyu.” 7 Mwahavuye mushika ng’aha, hanyuma Sihoni umwami wa Heshiboni+ na Ogi umwami wa Bashani+ baca baza kudutera, ariko twarabatsinze+. 8 Twaciye dufata igihugu cabo maze tugiha Abarubeni, Abagadi n’igice c’umuryango w’Abamanase kugira kibe intoranwa yabo+. 9 Nimwubahirize rero amajambo y’iri sezerano kandi muyagamburuke, kugira ngo ivyo mukora vyose bize bibagendere neza+.
10 Uyu musi mwese muhagaze imbere ya Yehova Imana yanyu: abakuru b’imiryango yanyu, abashingantahe banyu, abarongozi banyu, abagabo bose bo muri Isirayeli, 11 abana banyu, abagore banyu+ na ba kavamahanga+ baba mw’ikambi yanyu, kuva ku wubasenyera inkwi gushika ku wubavomera amazi. 12 Muri ng’aha kugira mugiranire isezerano na Yehova Imana yanyu biciye ku ndahiro, iryo Yehova Imana yanyu agiraniye namwe uno musi+, 13 kugira abagire ihanga ryiwe+ yongere abe Imana yanyu+, nk’uko yabibasezeraniye kandi akabirahira ba sokuruza banyu Aburahamu+, Izahaki+ na Yakobo+.
14 Iri sezerano rero sindarigiraniye na mwebwe mwenyene gusa, 15 ariko ndarigiraniye n’abahagararanye natwe ng’aha uyu musi imbere ya Yehova Imana yacu hamwe n’abatari kumwe natwe uyu musi. 16 (Kuko muzi neza ingene twabaye mu gihugu ca Misiri n’ingene twaciye mu mahanga atandukanye mu rugendo rwacu+. 17 Kandi mwarabonye ibintu bishisha hamwe n’ibigirwamana bisesemye*+ bikozwe mu biti no mu mabuye no mw’ifeza n’inzahabu vyari hagati yabo.) 18 Muri mwebwe muri hano uyu musi, mwiyubare ntihaze hagire uwuheba Yehova Imana yacu ngo aje gukorera imana z’ayo mahanga+, yaba umugabo canke umugore, urugo canke umuryango. Ntihaze haboneke muri mwebwe umuzi wama icamwa c’ubumara n’umururazi*+.
19 Ariko umuntu niyumva amajambo y’iyi ndahiro, hanyuma akirata mu mutima wiwe akibwira ati: “Nta co nzoba naho noguma nikorera ivyo nishakiye”, bigatuma yonona ibiri mu nzira yiwe vyose*, 20 Yehova ntazokwigera amubabarira+. Yehova azomushavurira cane kandi imivumo yose yanditswe muri iki gitabu izomuzako+. Emwe, Yehova azozimanganya izina ryiwe munsi y’ijuru. 21 Yehova azomutandukanya n’iyindi miryango yose y’Abisirayeli kugira amuteze ivyago. Imivumo yose ishikira abarenze kw’isezerano ryanditswe muri iki gitabu c’amategeko izomuzako.
22 Abazobakomokako mu nyuma hamwe n’abanyamahanga bava mu gihugu ca kure bazobona ivyago n’indwara Yehova azoba yarateje ico gihugu. 23 Bazobona kandi ingene gisigaye cuzuyemwo amazuku*, umunyu n’umuriro ku buryo ata kintu na kimwe cohamera, ata n’icatsi kiharangwa, hasigaye hameze nk’ibisagara vya Sodomu na Gomora+, Adima na Zeboyimu+, bimwe Yehova yatikiza yarakaye. 24 Abazobakomokako na ba kavamahanga hamwe n’amahanga yose bazovuga bati: “Kubera iki Yehova yagiriye gutya iki gihugu+? Ni igiki catumye arungura n’ishavu uku kwose?” 25 Maze abantu bazobishura bati: “Ni kubera barenze kw’isezerano bagiraniye na Yehova+ Imana ya ba sekuruza babo, iryo yagiraniye na bo igihe yabakura mu Misiri+. 26 Bagiye gukorera izindi mana bongera barazunamira, imana batigeze bamenya kandi akaba atari yarabemereye kuzisenga+. 27 Yehova yaciye ashavurira cane abantu bo muri iki gihugu, maze akizanako imivumo yose yanditswe muri iki gitabu+. 28 Yehova yaciye abarandura muri co n’ishavu n’akantu+, abangariza mu kindi gihugu kandi ni yo bakiri gushika n’uyu musi+.”
29 Ibintu bihishijwe ni ivya Yehova Imana yacu+, ariko ibihishuwe ni ivyacu n’uruvyaro rwacu ibihe bidahera, kugira dukurikize ibiri muri aya mategeko vyose+.