Isaayyaas
40 Waaqni keessan akkana jedha: “Jajjabeessaa, saba koo jajjabeessaa.+
2 Garaa* Yerusaalemitti dubbadhaa,
Tajaajilli dirqamaa ishii raawwatamuu isaa,
Gatiin yakka ishiis kaffalamuu isaa ishiidhaaf labsaa.+
Ishiin cubbuu ishii hundumaatiif harka Yihowaa irraa gatii guutuu* argatteetti.”+
3 Lafa onaa keessaa sagaleen akkana jedhu tokko ni dhagaʼama:
“Daandii Yihowaa qopheessaa!+
Gammoojjii keessattis Waaqa keenyaaf daandii guddaa qajeelaa taʼe qopheessaa.+
4 Sululli hundi ol haa kaafamu,
Gaarrii fi tabbi hundis gad haa buʼu.
Lafti buʼaa baʼii qabu diriiraa,
Lafti wal caccaalus dirree sulula keessa jiru haa taʼu.+
5 Ulfinni Yihowaa ni mulʼata,+
Foon* hundis waliin taʼee kana ni arga,+
Sababiin isaas, afaan Yihowaa kana dubbateera.”
6 Dhagaʼi, inni tokko, “Labsi!” jechaa jira.
Inni kan biraan immoo, “Maalan labsa?” jedhee gaafata.
“Foon* hundi marga lalisaa dha.
Jaalalli isaanii inni amanamaan hundi akkuma daraaraa dirree ti.+
7 Yihowaan isa irratti hafuura isaa waan baafatuuf,+
Margi lalisaan ni goga,
Daraarichis ni coolliga.+
Dhugumaan namoonni akkuma marga lalisaa ti.
8 Margi lalisaan ni goga,
Daraarichis ni coolliga,
Dubbiin Waaqa keenyaa garuu bara baraaf jabaatee ni dhaabbata.”+
9 Yaa dubartii Xiyooniif misiraachoo fiddu nana,+
Gara gaara dheeraatti ol baʼi.
Yaa dubartii Yerusaalemiif misiraachoo fiddu nana,
Humnaan sagalee kee ol kaasii iyyi.
Sagalee kee ol kaasi, hin sodaatin.
“Waaqni keessan kunoo ti” jedhiitii magaalota Yihudaatti labsi.+
Kunoo, badhaasni isaa isa bira jira,
Gatiin inni kaffalus isa dura jira.+
11 Inni akkuma tikseetti bushaayee isaa ni kunuunsa.*+
Hoolota xobbaallaa irree isaatiin walitti ni qaba,
Qoma isaattis isaan ni baata.
Warra ilmoolee isaanii hoosisan suuta jedhee ni oofa.+
Biyyoo lafaa safartuu keessatti kan walitti qabe+
Yookiin gaarotaa fi
Tabbawwan madaalliidhaan kan madaale eenyu?
13 Hafuura Yihowaa kan safare* eenyu?
Gorsaa isaa taʼee isa barsiisuu kan dandaʼu hoo eenyu?+
14 Inni hubannaa argachuuf eenyuu wajjin mariʼate?
Yookiin daandii haqaa kan isa barsiisu
Yookiin beekumsa kan isaaf kennu
Yookiin daandii hubannaa dhugaa kan isatti argisiisu eenyu?+
15 Kunoo, saboonni akkuma copha hubboo keessaa cophuu ti,
Akkuma awwaara madaallii irra jiruuttis ni ilaalamu.+
Kunoo, inni odolawwan akkuma awwaaraatti ol ni kaasa.
16 Libaanon illee ibiddicha bobeessuuf hin gaʼu,*
Bineensonni bosonaa achi keessa jiranis aarsaa gubamuuf hin gaʼan.
17 Saboonni hundi isa duratti akkuma wanta hin jirreetti ilaalamu;+
Inni homaatti iyyuu isaan hin lakkaaʼu, akka waan gatii hin qabneetti isaan ilaala.+
18 Waaqayyoon eenyuu wajjin wal bira qabuu dandeessu?+
Maalitti isa fakkeessuu dandeessu?+
19 Ogeessi harkaa waaqa tolfamaa* ni tolcha,
Namni sibiila tumu warqii isatti ni uwwisa,+
Meetii irraas funcaa isaaf ni tolcha.
20 Aarsaa isaatiif akka taʼutti inni muka,+
Muka hin tortorre ni filata.
Fakkii bocamaa hin kufne akka isaaf tolchuufis
Ogeessa harkaa ni barbaaddata.+
21 Isin hin beektanii?
Hin dhageenyee?
Kun jalqabaa kaasee isinitti hin himamnee?
Lafti erga hundeeffamtee jalqabee isin kana hin hubannee?+
Inni akkuma huccuu haphiitti samiiwwan ni afa,
Akkuma dunkaana keessa jiraatamuuttis isaan ni diriirsa.+
23 Inni abbootii taayitaa ol aanoo ni salphisa,
Abbootii murtii* lafaas gatii kan hin qabne ni godha.
24 Isaan akkuma biqiltuu reefuu dhaabamee ti,
Isaan akkuma sanyii reefuu facaafamee ti,
Jirmi isaanii amma iyyuu lafa keessatti hidda hin godhanne,
Isaanitti qilleensaʼeera, goganiirus,
Bubbeenis akkuma galabaatti isaan fudhata.+
25 Inni Qulqulluun akkana jedha: “Isaa wajjin wal na qixxeessuuf eenyuu wajjin wal na fakkeessuu dandeessu?
26 Ija keessan gara samiitti ol kaasaatii ilaalaa.
Wantoota kana kan uume eenyu?+
Raayyaa isaanii lakkoofsaan kan gad baasu isa dha;
Inni hunda isaanii maqaa maqaadhaan ni waama.+
Jabina isaa isa guddaa fi humna isaa isa sodaachisaa+ taʼeen kan kaʼe,
Isaan keessaa tokko illee hin hirʼatu.
27 Yaa Yaaqoob, yaa Israaʼel,
‘Daandiin koo Yihowaa duraa dhokateera,
Waaqayyo irraas haqa hin argadhu’ kan jettu maaliifi?+
28 Ati hin beektuu? Hin dhageenyee?
Yihowaan inni Uumaa andaara lafaa taʼe, bara baraaf Waaqa dha.+
Inni matumaa hin dadhabu yookiin hin bututu.+
Hubannaan isaa qoramuu* hin dandaʼu.+
30 Ijoolleen dhiiraa ni dadhabu, ni bututus,
Dargaggoonni ni gufatu, ni kufus,
31 Warri Yihowaa abdatan garuu, humni isaanii ni haareffama.
Isaan akkuma risaatti qoochoodhaan ol ni baʼu.+
Ni fiigu, hin bututan;
Ni deemu, hin dadhaban.”+