Saamuʼel Lammaffaa

12 Kanaafuu, Yihowaan Naataaniin+ gara Daawititti erge. Innis gara isaatti ol seenee+ akkana isaan jedhe: “Magaalaa tokko keessa namoonni lama jiru turan; inni tokko sooressa, inni tokko immoo hiyyeessa ture. 2 Namichi sooressi sun hoolotaa fi loon baayʼee hedduu qaba ture;+ 3 namichi hiyyeessi sun garuu hoolaa goromtii xinnoo bitate tokko qofa malee homaa hin qabu ture.+ Innis ishii kunuunsa ture; ishiinis isaa fi ilmaan isaa wajjin jiraachaa isa biratti guddatte. Ishiin nyaata xinnoo inni qabu irraa nyaatti, xoofoo isaa keessaa dhugdi, bobaa isaa jalas ni ciisti turte. Ishiin isaaf akkuma intala isaa turte. 4 Boodas keessummaan tokko namicha sooressa sanatti dhufe; haa taʼu malee, inni imaltuu isa bira dhufe sanaaf nyaata qopheessuuf hoolotaa fi loon isaa keessaa tokko illee hin fudhanne. Kanaa mannaa, hoolaa namicha hiyyeessa sanaa fuudhee qopheessee namicha gara isaatti dhufe sanaaf dhiheesse.”+

5 Yeroo kanatti Daawit namichatti baayʼee aaree Naataaniin akkana jedhe: “Yihowaa isa jiraataa taʼeen nan kakadha,+ namichi kana godhe duʼatu isaaf mala! 6 Inni kana waan godheef, akkasumas gara laafina waan hin argisiisneef, bakka hoolaa sanaa dachaa afur kaffaluu qaba.”+

7 Achiis Naataan Daawitiin akkana jedhe: “Namichi sun si dha! Yihowaan Waaqni Israaʼel akkana jedha: ‘Ani Israaʼel irratti mootii akka taatu si dibeera;+ harka Saaʼol jalaas si oolcheera.+ 8 Mana gooftaa keetii+ fi haadhotii manaa gooftaa keetii siif kenneera;+ mana Israaʼelii fi mana Yihudaas siif kenneera.+ Kun utuu sitti hanqateera taʼee, kana caalaa siif gochuuf fedhii qaban ture.+ 9 Ati wanta ija isaa duratti hamaa taʼe gochuudhaan dubbii Yihowaa kan tuffatte maaliifi? Uuriyaa Heeticha goraadeedhaan ni ajjeeste!+ Goraadee Amoonotaatiin erga isa ajjeestee+ booda haadha manaa isaa fudhattee haadha manaa godhatte.+ 10 Ammas haadha manaa Uuriyaa fudhattee haadha manaa godhachuudhaan waan na tuffatteef, matumaa goraadeen mana kee irraa hin deebiʼu.’+ 11 Yihowaan akkana jedha: ‘Kunoo, ani manuma kee keessaa rakkina sitti nan fida;+ ijuma kee duratti haadhotii manaa kee fuudhee nama kan biraatiif nan kenna;+ innis guyyuma saafaa* haadhotii manaa kee wajjin ni ciisa.+ 12 Ati kana kan goote dhoksaatti taʼus,+ ani Israaʼelota hundumaa durattii fi guyyaa saafaa* kana nan godha.’”

13 Yeroo kanatti Daawit Naataaniin, “Ani Yihowaa irratti cubbuu hojjedheera” jedhe.+ Naataanis deebisee Daawitiin akkana jedhe: “Yihowaanis cubbuu kee siif dhiisa.*+ Ati hin duutu.+ 14 Haa taʼu malee, dhimma kana ilaalchisee ati akka malee Yihowaa waan tuffatteef, ilmi amma siif dhalate ni duʼa.”

15 Achiis Naataan gara mana isaa deeme.

Yihowaanis ilma haati manaa Uuriyaa Daawitiif deesse ni rukute; innis ni dhukkubsate. 16 Daawitis mucichaaf cimsee Waaqa dhugaa kadhate. Daawit ni soome; gara kutaa isaatti seenees halkan guutuu lafa irra ciise.+ 17 Kanaafuu, jaarsoliin mana isaa keessa jiran isa bira dhaabbatanii lafaa isa kaasuuf yaalii godhan; inni garuu ni dide; isaanii wajjinis nyaata hin nyaanne. 18 Guyyaa torbaffaattis mucichi ni duʼe; tajaajiltoonni Daawit garuu mucichi duʼuu isaa isatti himuu sodaatan. Isaanis, “Mucichi utuu lubbuudhaan jiruu nuti isa haasofsiisnee turre; inni garuu nu hin dhaggeeffanne. Maarree, mucichi duʼuu isaa akkamitti itti himuu dandeenya? Yoo itti himne waa of gochuu dandaʼa” jedhan.

19 Daawit tajaajiltoonni isaa yommuu walitti hasaasan argee mucichi duʼuu isaa hubate. Tajaajiltoota isaas, “Mucichi ni duʼee?” jedhee gaafate. Isaanis, “Eeyyee ni duʼe” jedhanii isaaf deebisan. 20 Kanaafuu, Daawit lafaa ni kaʼe. Achiis, dhiqatee, zayitii dibatee,+ uffata isaas jijjiirratee, gara mana Yihowaa dhaqee+ sagade. Sana booda gara mana* isaatti deebiʼee nyaanni akka isaaf dhihaatu gaafatee nyaate. 21 Tajaajiltoonni isaas akkana jedhanii isa gaafatan: “Maaliif akkana goote? Mucichi utuu lubbuudhaan jiruu ni soomte, ni boosses; akkuma mucichi duʼeen garuu ni kaate, nyaatas ni nyaatte.” 22 Innis akkana jedhee isaaniif deebise: “Mucichi utuu lubbuudhaan jiruu, ‘Yihowaan garaa naa laafee mucichi akka jiraatu kan godhu yoo taʼe maaltu beeka?’+ jedhee waanan yaadeef nan soome,+ nan booʼes. 23 Amma inni duʼeera; maaliifan sooma ree? Isa deebisuu nan dandaʼaa?+ Anatu gara isaa dhaqa malee,+ inni gara kootti hin deebiʼu.”+

24 Achiis Daawit haadha manaa isaa Baat Sheebaa+ ni jajjabeesse. Innis gara ishiitti seenee ishii wajjin ciise. Ishiinis yeroo booda ilma ni deesse; innis Solomoon*+ jedhee maqaa isaaf moggaase. Yihowaanis mucicha ni jaallate;+ 25 karaa Naataan+ raajichaa ergaa ergee akka fedhii Yihowaatti maqaa isaa Yidiidiyaa* jedhee akka moggaasu godhe.

26 Yoʼaabis magaalaa Amoonotaa+ Raabaa+ waraanuu isaa itti fufe; magaalaa moototaas* ni qabate.+ 27 Kanaafuu, Yoʼaab ergamtoota gara Daawititti ergee akkana isaan jedhe: “Ani Raabaa+ waraanee magaalaa bishaanotaa* qabadheera. 28 Ammas loltoota hafan walitti qabiitii magaalattiitti marsii ishii qabadhu. Taʼuu baannaan, ani magaalattii nan qabadha; ulfinni isaas anaaf taʼa.”*

29 Kanaafuu, Daawit loltoota hundumaa erga walitti qabee booda gara Raabaa deemee waraanee ishii qabate. 30 Achiis gonfoo Maalkaam mataa isaa irraa ni fuudhe. Ulfaatinni isaa warqii taalaantii* tokko ture; achi irras dhagoonni gatii guddaa qaban jiru turan; innis mataa Daawit irra ni kaaʼame. Kana malees, inni magaalattii+ keessaa boojuu hedduu ni fudhate.+ 31 Achiis namoota achi keessa jiran gad baasee, dhagaa akka muran, meeshaawwan sibiilaa qara qabanii fi qottoodhaan akka hojjetan, akkasumas xuubii akka tolchan isaan godhe. Magaalota Amoonotaa hundumaattis akkanuma godhe. Dhuma irrattis Daawitii fi loltoonni hundi gara Yerusaalemitti deebiʼan.