Ermiyaas
31 “Yeroo sanatti, ani maatiiwwan Israaʼel hundumaatiif Waaqa nan taʼa, isaanis saba koo ni taʼu” jedha Yihowaan.+
2 Yihowaan akkana jedha:
“Yeroo Israaʼel gara bakka boqonnaa isaa deemaa turetti,
Sabni goraadee irraa oole lafa onaa keessatti fudhatama ni argate.”
3 Yihowaan fagoo irraa natti mulʼatee akkana naan jedhe:
“Jaalala bara baraatiin si jaalladheera.
Jaalala amanamaadhaan kanan ofitti si harkise* kanaafi.+
4 Ammas deebisee sin ijaara, atis deebitee ni ijaaramta.+
5 Ati ammas gaarota Samaariyaa irratti muka wayinii ni dhaabbatta;+
Warri biqiltuu dhaabanis muka wayinii ni dhaabbatu, firii isaas ni nyaatu.+
6 Sababiin isaas, guyyaan waardiyyoonni gaarota Efreem irratti argaman,
‘Kaʼaa, gara Xiyoonitti, gara Waaqa keenya Yihowaatti ol haa baanu’ itti jedhan ni dhufa.”+
7 Yihowaan akkana jedha:
“Yaaqoobiif gammachuudhaan faarfadhaa.
Isin saboota kaan irra waan caaltaniif ililchaa.+
Kana labsaa; jajannaa dhiheessaa,
‘Yaa Yihowaa, saba kee warra Israaʼel keessaa hafan oolchi’ jedhaa.+
8 Ani biyya kaabaatii deebisee isaan nan fida.+
Andaara lafaa irraas walitti isaan nan qaba.+
Isaan gidduus inni qaro dhabeessii fi inni naafti,+
Dubartiin ulfaa fi ishiin daʼuu jala geesse walumaan ni jiraatu.
Isaan gumii guddaa taʼanii asitti ni deebiʼu.+
9 Isaan booʼaa ni dhufu.+
Fudhatama argachuuf yommuu kadhatanitti deebisee isaan nan fida.
Gara yaaʼaawwan bishaaniitti isaan nan fida,+
Daandii wal qixa taʼee fi isaan hin gufachiisne irra isaan nan geggeessa.
Sababiin isaas, ani Abbaa Israaʼeli, Efreemis ilma koo isa angafaa ti.”+
10 Isin saboonni, dubbii Yihowaa dhagaʼaa,
Odolawwan fagoo jiran gidduuttis akkana jedhaa labsaa:+
“Inni Israaʼeliin bittinneesse walitti isa ni qaba.
Akkuma tikseen bushaayee isaa eegutti inni isa ni eega.+
11 Sababiin isaas, Yihowaan Yaaqoobiin ni fura,+
Harka isa isa caalaa jabaa taʼe sanaa jalaas isa ni oolcha.*+
12 Isaan dhufanii iddoo ol kaʼaa Xiyoon irratti ni ililchu,+
Gaarummaa Yihowaatti,*
Midhaanitti, daadhii wayinii haaraatti,+ zayitiitti,
Ilmoolee bushaayee fi jabbileetti ni gammadu.+
Isaan akkuma iddoo biqiltuu akka gaariitti bishaan argatuu ni taʼu,+
Matumaas deebiʼanii hin laafan.”+
13 “Yeroo sanatti durbi gammachuudhaan ni shubbisti,
Dargaggoonnii fi maanguddoonnis gammachuudhaan waliin ni shubbisu.+
Gadda isaanii gara gammachuutti nan jijjiira.+
Ani isaan nan jajjabeessa, bakka gadda isaaniis gammachuu isaaniif nan kenna.+
14 Lubootaaf* nyaata hedduu* kennuudhaan isaan nan quubsa,
Sabni koos gaarummaa kootiin ni quufa”+ jedha Yihowaan.
15 “Yihowaan akkana jedha:
‘Sagaleen gaddaa fi boʼichi cimaan Raamaa+ keessaa ni dhagaʼame:
Raahel ilmaan* ishiitiif ni boosse.+
Isaan waan dhumaniif,
Duʼa ilmaan ishii irraa jajjabaachuu hin dandeenye.’”+
16 Yihowaan akkana jedha:
“‘Gocha keessaniif badhaasa waan argattaniif,
Sagalee keessan booʼicha irraa, ija keessanis imimmaan dhangalaasuu irraa dhowwaa.
Isaan biyya diinaa keessaa ni deebiʼu’ jedha Yihowaan.+
17 ‘Ati gara fuulduraatti abdii qabda.+
Ilmaan kee gara naannoo isaaniitti ni deebiʼu’ jedha Yihowaan.”+
18 “Efreem aaduu isaa ani dhugumaan dhagaʼeera,
‘Ati akkuma jabbii hin leenjifamneetti,
Na sirreessite, anis of nan sirreesse.
Ati Waaqa koo Yihowaa waan taateef,
Na deebisi, anis yeruma sana nan deebiʼa.
19 Sababiin isaas, ani ergan deebiʼee booda nan gaabbe;+
Ergan hubachiifamee boodas gaddaan tafa koo nan rukute.
Arrabsoo ijoollummaa kootti na irra gaʼe waanan baadheef,
Nan qaanaʼe, nan salphadhes.’”+
20 “Efreem ilma koo isan iddoo guddaa kennuuf, mucaa koo isa jaallatamaa mitii?+
Ani yeroo baayʼee kanan isatti dheekkamu taʼus, amma iyyuu isa nan yaadadha.
Marʼimaan koo kan isaaf raafamu kanaafi.+
Ani dhugumaan isaaf nan gadda” jedha Yihowaan.+
21 “Ofii keetiif mallattoowwan daandii dhaabi,
Utubaawwan dhagaas kaaʼi.+
Daandii guddaa isa irra deemuu qabdu sanaaf xiyyeeffannaa kenni.+
Yaa durba Israaʼel, deebiʼi, gara magaalota kee kanaatti deebiʼi.
22 Yaa durba amanamtuu hin taane nana, hamma yoomiitti asii fi achi jetta?
Sababiin isaas, Yihowaan lafa irratti wanta haaraa uumeera:
Dubartiin hawwiidhaan dhiira barbaaddatti.”
23 Waaqa Israaʼel kan taʼe Yihowaan Gooftaan Raayyaa akkana jedha: “Yommuun boojiʼamtoota isaanii deebisee walitti qabutti, isaan biyya Yihudaa fi magaalota ishii keessatti ammas irra deebiʼanii, ‘Yaa iddoo jireenyaa qajeelaa nana,+ yaa gaara qulqulluu nana,+ Yihowaan si haa eebbisu’ jedhu. 24 Yihudaanii fi magaalonni ishii hundi, akkasumas qonnaan bultoonnii fi warri bushaayee tiksan ishii keessa waliin ni jiraatu.+ 25 Sababiin isaas, ani isa* butute nan haaromsa, isa* laafe hundumaas nan quubsa.”+
26 Yeroo kanatti dammaqee ija koo nan banadhe, hirribni koos miʼaawaa ture.
27 “Kunoo, guyyaan ani mana Israaʼelii fi mana Yihudaa irratti sanyii namaa fi sanyii horii itti facaasu ni dhufa” jedha Yihowaan.+
28 “Akkuman isaan buqqisuuf, jigsuuf, diiguuf, balleessuu fi miidhaa geessisuuf isaan hordofaa turetti,+ isaan ijaaruu fi dhaabuufis isaan nan hordofa”+ jedha Yihowaan. 29 “Guyyoota sanatti isaan lammata, ‘Firii wayinii dhangaggaaʼaa kan nyaatan abbootii dha; garuu ilkaan ilmaan isaanii ni hadoode’*+ hin jedhan. 30 Kanaa mannaa, tokkoon tokkoon namaa balleessaa ofii isaatiin ni duʼa. Namni firii wayinii dhangaggaaʼaa nyaatu kam iyyuu ilkaanuma isaatu hadooda.”
31 Yihowaan akkana jedha: “Kunoo, guyyoonni ani mana Israaʼelii fi mana Yihudaa wajjin kakuu haaraa itti galu ni dhufu.+ 32 Kunis akka kakuu isa yeroon biyya Gibxiitii isaan baasuuf harka isaanii qabetti abbootii isaanii wajjin gale sanaa miti;+ ‘ani gooftaa isaanii isa dhugaa* yoon taʼe iyyuu, isaan kakuu koo cabsaniiru’ jedha Yihowaan.”+
33 “Guyyoota sana booda kakuun ani mana Israaʼelii wajjin galu isa kana. Ani seera koo isaan keessa nan kaaʼa,+ garaa isaanii keessattis nan barreessa.+ Ani Waaqa isaanii nan taʼa, isaanis saba koo ni taʼu” jedha Yihowaan.+
34 Yihowaan akkana jedha: “Sana booda isaan keessaa eenyu iyyuu, ‘Yihowaa beeki!’ jedhee nama kan biraas taʼe obboleessa isaa hin barsiisu;+ sababiin isaas, isa xinnaadhaa hamma isa guddaatti hundi isaanii iyyuu na beeku.+ Ani balleessaa isaanii isaaniif nan dhiisa, cubbuu isaaniis sana booda hin yaadadhu.”+
35 Yihowaan inni
Guyyaa ifa akka kennituuf aduu tolche,
Halkan ifa akka kennaniifis seerawwan* addeessaa fi urjiilee qopheesse,
Inni galaana sochoosee dambaliiwwan isaa warraaqsu,
Inni maqaan isaa Yihowaa Gooftaa Raayyaa taʼe akkana jedha:+
36 “‘Sanyiin Israaʼel yeroo hundumaatiif na duratti saba taʼuun isaa kan hafu,
Dambiiwwan kun yoo diigaman qofa dha’ jedha Yihowaan.”+
37 Yihowaan akkana jedha: “‘Wanta isaan raawwatan hundumaatiif sanyii Israaʼel hundumaa kanan gatu, samiiwwan ol gubbaatti argaman safaruun, hundeewwan lafaa warra gaditti argaman biras gaʼuun yoo dandaʼame qofa dha’ jedha Yihowaan.”+
38 Yihowaan akkana jedha: “Kunoo, Masaraa Hanaanʼel+ irraa jalqabee hamma Karra Golee+ sanaatti guyyaan magaalaan sun Yihowaadhaaf itti ijaaramtu ni dhufa.+ 39 Funyoon safaraa+ kallattiidhaan gara tabba Gaarebitti ol ni baʼa, achiis gara Goʼaatti ni naannaʼa. 40 Sululli* reeffotaa fi sululli daaraawwanii* hundi, akkasumas maasiiwwan hamma Sulula Qedroonitti,+ kallattii bahaatiin hamma qarqara Karra Fardaatti+ argaman hundi, Yihowaadhaaf qulqulluu ni taʼu.+ Inni matumaa lammata hin buqqifamu yookiin hin diigamu.”