Zefaniya

1 Ng’iri ijambo rya Yehova ryaje kuri Zefaniya mwene Kushi, Kushi mwene Gedaliya, Gedaliya mwene Amariya, Amariya mwene Hezekiya, mu misi ya Yosiya+ mwene Amoni+ umwami wa Yuda:

2 “Nzoherengeteza ata kabuza ikintu cose ku buringanire bw’ubutaka,” ni ko Yehova avuze+.

3 “Nzoherengeteza umuntu yakuwe mw’ivu be n’igikoko+. Nzoherengeteza ikiremwa kiguruka co mu kirere n’amafi yo mu kiyaga+, n’ibitsitaza hamwe n’ababisha+; kandi nzorandura abantu ku buringanire bw’ubutaka+,” ni ko Yehova avuze. 4 “Nzoramvura ukuboko kwanje nkubite Yuda be n’ababa i Yeruzalemu bose+, kandi aha hantu nzoharandura abasigaye ba Bayali+, izina ry’abaherezi b’imana z’inyamahanga be n’abaherezi+, 5 be n’abunamira ingabo zo mu majuru bibereye ku bisenge+, n’abunama+ bakarahira indahiro Yehova+ bakongera bakarahira indahiro bazirahira Malikamu+, 6 be n’abasubira inyuma bakareka gukurikira Yehova+, bakaba kandi batarondeye Yehova canke ngo bamusiguze+.”

7 Ceceka imbere y’Umukama Segaba Yehova+; kuko umusi wa Yehova uri hafi+, kuko Yehova yateguye ikimazi+; yejeje+ abatumire biwe.

8 “Uku ni ko bizoba ku musi w’ikimazi ca Yehova: nzokwitaho ivy’abaganwa, n’ivy’abana b’umwami+, n’ivy’abo bose bambara ivyambarwa binyamahanga+. 9 Kandi kuri uwo musi nzokwitaho ivy’umuntu wese yurira ku mukiruruko, abuzuza inzu ya ba shebuja ubukazi n’ubuhendanyi+. 10 Kandi kuri uwo musi,” ni ko Yehova avuze, “hazokwumvikana induru ivuye kw’Irembo ry’Amafi+, n’umuborogo uvuye mu gice ca kabiri c’igisagara+, n’urwamo rw’ugusenyuka gukomeye ruvuye mu mirambi+. 11 Nimuboroge+, yemwe ababa i Makiteshi, kuko abantu bose b’abacuruza banumijwe+; abapima ifeza bose baranduwe.

12 “Kandi uku ni ko bizoba ico gihe: nzoseranguza i Yeruzalemu amatara+, niteho ivy’abantu biyegeraniriza ku rutere+, bakavuga mu mutima wabo ngo: ‘Yehova nta ciza azokora, kandi nta kibi azokora+.’ 13 Kandi ubutunzi bwabo buzoba ubwo gusahurwa n’inzu zabo zibe izo kugirwa igiharabuga+. Bazokwubaka amazu, ariko ntibazoyabamwo+; bazotera imirima y’imizabibu, ariko ntibazonywa umuvinyu wayo+.

14 “Umusi uhambaye+ wa Yehova uri hafi. Uri hafi+, kandi urihuta cane+. Umuhindo w’umusi wa Yehova urarura+. Umunyenkomezi araboroga+. 15 Uwo musi ni umusi w’uburake, umusi w’amarushwa n’umubabaro mwinshi+, umusi w’ikirura n’imisaka, umusi w’umwiza n’umuzimagiza+, umusi w’ibicu n’umuzimagiza w’umuzitanya, 16 umusi w’inzamba n’ikimenyetso c’ukugabisha+, ukaba uzozira ibisagara bikingijwe ibihome be n’iminara miremire yo ku mfuruka+. 17 Kandi nzoteza abantu amarushwa, bagende koko nk’impumyi+; kuko Yehova ari we bacumuyeko+. Amaraso yabo azoseswa vy’ukuri nk’umukungugu+, amara yabo na yo nk’amayezi+. 18 Yaba ifeza yabo canke inzahabu yabo, ntibizoshobora kubarokora ku musi w’uburake bwa Yehova+; ariko isi yose izorigatwa n’umuriro w’umwete wiwe+, kuko azotikiza ababa kw’isi bose, emwe, bimwe biteye ubwoba+.”

2 Nimukoranire hamwe, egome, nimukorane+, yewe hanga riticwa n’ibimaramare+! 2 Imbere y’uko icagezwe kigira ico kivyara+, imbere y’uko wa musi uhita nk’umuguruka, imbere y’uko ishavu rirurumba rya Yehova ribazako+, imbere y’uko wa musi w’ishavu rya Yehova ubazako+, 3 nimurondere Yehova+, yemwe abatekereza bo kw’isi mwese+, abashize mu ngiro ingingo yiwe y’ubutungane*. Nimurondere ubugororotsi+, nimurondere ubutekereji+. Hari aho+ mwohishwa kuri wa musi w’ishavu rya Yehova+. 4 Kuko Gaza izocika igisagara cahebwe+; Ashikeloni na yo izoba igiharabuga+. Ashidodi+ izokwirukanwa ku mutaga w’amaminangohe+; nayo Ekuroni, izorandurwa+.

5 “Baragowe ababa mu karere k’ikiyaga, ihanga ry’Abakereti+! Ijambo rya Yehova ni mwebwe rirwanya. Ewe Kanani, wewe gihugu c’Abafilisitiya, na wewe nzokurandura ntihagire uwukubamwo+. 6 Kandi akarere k’ikiyaga kazocika koko amatongo y’uburagiriro+, afise amariba y’abungere be n’ingo zubakishijwe amabuye zigenewe intama. 7 Emwe, kazocika akarere k’abasigaye b’inzu ya Yuda+. Ni ho bazorisha. Ku mugoroba bazokwigaramangira mu mazu ya Ashikeloni. Kuko Yehova Imana yabo azobitaho+, akagarukana koko abagizwe imbohe bo muri bo+.”

8 “Narumvise agacokoro ka Mowabu+ be n’amajambo y’ibitutsi ya bene Amoni+, ivyo batutse abantu banje, bakaguma bihambaza barwanya akarere kabo. 9 Ku bw’ivyo rero, ndahiye ukubaho kwanje+,” ni ko Yehova nyen’ingabo* avuze, ya Mana ya Isirayeli, “Mowabu izocika nka Sodomu+, bene Amoni+ na bo bacike nka Gomora, ahiganziwe n’ibisuru, habe icobo c’umunyu n’igiharabuga, emwe, gushika igihe kitagira urugero*+. Bazosahurwa n’abasigaye bo mu bantu banje, kandi amasigarira y’ihanga ryanje azobigarurira+. 10 Ivyo ni vyo bazoronka mu kibanza c’ubwishime bwabo+, kuko batutse abantu ba Yehova nyen’ingabo, bakaguma babihambazako+. 11 Yehova azoba uwuteye ubwoba kuri bo+; kuko azonambisha imana zose zo kw’isi+, kandi abantu bazomwunamira+, umwe wese aho ari, amazinga yose y’amahanga+.

12 “Na mwebwe Banyetiyopiya ni kwo kw’ukwo+, muzoba abagandaguwe n’inkota yanje+.

13 “Azoramvura  ukuboko kwiwe akwerekeze mu buraruko, arandure Ashuri+. Kandi Ninewe azoyigira igiharabuga+, akarere kagadutse nk’agahinga. 14 Amasho azokwigaramangira hagati muri Ninewe, n’ibikoko vyose vyo mw’ihanga+. Ikinyoni ntamayuruzi be n’ikinyogoto+ bizokwirarira hagati y’imitwe y’inkingi zaho+. Hazoguma humvikana ijwi riririmbira mw’idirisha. Hazoba agatikizo ku rwinjiriro, kuko imbaho zo ku mpome atazobura kuzisiga amenya+. 15 Ico ni ca gisagara c’akanyamuneza ntangere, cahora ciyicariye mu mutekano+, kimwe cahora kivuga mu mutima waco ngo: ‘Ni jewe, nta wundi ariho+.’ Ewe kuntu gicitse akajoreza, aho ibikoko vyo mw’ishamba vyigaramangira! Uwuzoca iruhande yaco wese azovuza agahwa, azunze ukuboko+.”

3 Aragowe wa mugore agarariza kandi akiyanduza, ari we gisagara c’agahahazo+! 2 Ntiyumvirije ijwi+; ntiyemeye gutozwa indero+. Ntiyizigiye Yehova+. Ntiyiyegereje Imana yiwe+. 3 Abaganwa biwe hagati muri we bari intambwe ziroha+. Abacamanza biwe bari amabingira y’umugoroba adakegeta amagufa ngo ashikane mu gitondo+. 4 Abahanuzi biwe bari abatisonera, bakaba n’abantu b’ibihemu+. Abaherezi biwe barahumanije ivyari ivyeranda; bakoreye itegeko ivy’ubukazi+. 5 Hagati muri we, Yehova yari umugororotsi+; nta bitagororotse yakora+. Uko bukeye yaguma amenyesha ingingo yiwe y’ubutungane+. Ntiyigera ibura ku murango+. Ariko uwutagororotse ntiyamaramara+.

6 “Nararanduye amahanga; iminara yayo yo ku mfuruka yagizwe umusaka. Naratikije amabarabara yayo, ku buryo ata wuhaca. Ibisagara vyayo vyasizwe ari igiharabuga, ku buryo ata muntu asigarayo, ku buryo ata wubayo+. 7 Navuze nti: ‘Ni ukuri uzontinya; uzokwemera gutozwa indero+,’ kugira ngo aho aba ntiharandurwe+—ivyo vyose ni we nzobihôra+. Ni ukuri barabangutse mu kwonona ibikorwa vyabo vyose+.

8 “‘Ku bw’ivyo rero, nimugume munyiteze+,’ ni ko Yehova avuze, ‘gushika umusi nzohaguruka nkaja ku minyago+, kuko ingingo yanje y’ubutungane ari iyo gukoranya amahanga+, ngakoraniriza hamwe ubwami, kugira ngo ndabisukeko imisibo yanje+, ishavu ryanje ryose rirurumba; kuko isi yose izorigatwa n’umuriro w’umwete wanje+. 9 Kuko ico gihe nzohindura ururimi rw’ibisata vy’abantu rube ururimi rutyoroye+, kugira ngo bose bambaze izina rya Yehova+, kugira ngo bamukorere bahuje inama*+.’

10 “Abanyinginga, ari we mukobwa w’abantu banje basanzaye, bazonzanira ingabirano bavuye mu karere k’inzuzi za Etiyopiya+. 11 Kuri uwo musi ntuzomaramara kubera ibikorwa vyawe vyose wangabitanijeko+, kuko ico gihe nzokura hagati muri wewe abantu bawe bigina n’ubwibone n’akantu+; kandi ntuzopfa usubiye kugira ubwibone ku musozi wanje mweranda+. 12 Emwe, nzosigaza hagati muri wewe abantu baciye bugufi kandi batobato+, kandi bazohungira vy’ukuri mw’izina rya Yehova+. 13 Abasigaye ba Isirayeli+ nta bitagororotse bazokora+, canke ngo bavuge ikinyoma+, canke ngo mu kanwa kabo habonekemwo ururimi rw’amayeri+; kuko bazorisha bakigaramangira vy’ukuri+, kandi nta n’umwe azobajugumiza+.”

14 Niwihe akamo k’umunezero, ewe mukobwa wa Siyoni! Sesereza impundu+, ewe Isirayeli! Nezerwa wigine n’umutima wawe wose, ewe mukobwa wa Yeruzalemu+! 15 Yehova yagukuyeko imanza yari yaguciriye+. Yigije kure umwansi wawe+. Wa mwami wa Isirayeli, Yehova, ari hagati muri wewe+. Ntuzokwongera gutinya ivyago+. 16 Kuri uwo musi Yeruzalemu izobwirwa ngo: “Ntutinye, Siyoni we+! Amaboko yawe ntaregere*+. 17 Yehova Imana yawe ari hagati muri wewe. Azogukiza, kuko ari Umunyenkomezi+. Azokwigina n’umunezero kubera wewe+. Azocecekera mu rukundo rwiwe. Azokunezererwa yiha akamo k’umunezero.

18 “Abari bishwe n’intuntu+, ntibabe bahari ku kiringo cawe c’umusi mukuru, nzobakoraniriza hamwe koko+; ntibari bari kumwe nawe, kubera ko bari bikoreye iceyi kubera we+. 19 Ehe ico gihe nzohagurukira abahora baguteza amarushwa bose+; kandi umwe acumbagira nzomukiza+, n’umwe yashwiragira ndamukoranirize hamwe+. Nzobagira ishemezo n’izina mu gihugu cose bamaramariyemwo. 20 Ico gihe nzobacūra, emwe, mu gihe canje co kubakoraniriza hamwe. Kuko nzobagira izina n’ishemezo mu bisata vy’abantu vyose vyo kw’isi, ninagarukana imbohe zanyu muvyibonera,” ni ko Yehova avuze+.