Isaayyaas
30 Yihowaan akkana jedha: “Ilmaan mata jabeeyyii taʼan,+
Warra cubbuu irratti cubbuu dabaluuf jedhanii
Karoora isa kan koo hin taane raawwataniif,+
Akkasumas hafuura kootiin alatti michummaa uumaniif* wayyoo.
2 Isaan eegumsa* Faraʼoon jalatti gaaddisa argachuuf,
Gaaddidduu Gibxii jalattis dahoo argachuuf,
3 Eegumsi Faraʼoon irraa argamu qaanii,
Dahoon gaaddidduu Gibxii jalatti argamus salphina isinitti fida.+
4 Sababiin isaas, bulchitoonni isaa Zoʼaan+ keessa jiru,
Ergamtoonni isaas Hanees bira gaʼaniiru.
5 Saba faayidaa isaaniif argamsiisuu hin dandeenyeen,
Warra isaan gargaaruu fi isaan fayyaduu hin dandeenyeen,
Kanaa mannaa, warra qaanii fi salphina qofa isaanitti fidaniin
Hundi isaanii iyyuu ni qaaneffamu.”+
6 Murtii bineensota kibbaa irratti dabarfame:
Isaan qabeenya isaanii dugda harrootaa,
Miʼawwan isaaniis gooba gaalotaa irratti feʼanii,
Biyya dhiphinnii fi rakkinni,
Biyya leenci, jechuunis leenci baroodu,
Biyya buutiin, akkasumas biyya bofti barrisuu fi ibidda baasu* keessatti argamu keessa ni deemu.
Taʼus wantoonni kun sabicha hin fayyadan.
7 Sababiin isaas, gargaarsi Gibxii homaa faayidaa hin qabu.+
Kanaafuu ani, “Rahaab,+ ishii hojii malee akkanumaan teessu” jedhee ishii nan waame.
8 “Inni guyyaa gara fuulduraatiif
Ragaa dhaabbataa akka taʼutti,+
Dhaqiitii isaan duratti gabatee irratti barreessi,
Kitaaba keessattis isa galmeessi.+
10 Isaan warra mulʼata arganiin, ‘Mulʼata hin ilaalinaa’ jedhu.
Raajotaanis akkana jedhu: ‘Mulʼata dhugaa nutti hin himinaa.+
Wanta nu gammachiisu* nutti himaa; abjuu sobaas nuuf ilaalaa.+
11 Karaa isa sirrii irraa goraa; daandii isa sirrii irraa maqaa.
Isa Qulqulluu kan Israaʼel nu dura kaaʼuu keessan dhiisaa.’”+
12 Kanaafuu, Inni Qulqulluun kan Israaʼel akkana jedha:
“Isin dubbii kana tuffattanii+
Gowwoomsaa fi sobatti waan amanamtaniif,
Wantoota kana irrattis waan hirkattaniif,+
13 Balleessaan kun akka dallaa baqaqee,
Akka dallaa dheeraa jiguuf jedhuus isinitti ni taʼa.
Inni akkuma tasaa dafee ni jiga.
14 Akkuma hubboo guddaatti ni caccaba,
Guutummaatti waan caccabuufis qiraaciin
Iddoo ibiddaatii ibidda fudhachuuf
Yookiin bishaan kuufamaa* keessaa bishaan budduqsuuf oolu illee isa irraa hin argamu.”
15 Sababiin isaas, Yihowaan Gooftaa Ol Aanaan, Inni Qulqulluun kan Israaʼel,
“Isin gara kootti deebiʼuu fi boqochuudhaan ni ooltu;
Tasgabbaaʼuu fi anatti amanamuudhaanis jabina ni argattu”+ jedha.
Isin garuu tole hin jenne.+
16 Kanaa mannaa, “Hin taʼu, fardeeniin ni baqanna!” jettan.
Kanaafuu, isin ni baqattu.
“Fardeen saffisa qabaniinis ni gulufna!”+ jettan.
Kanaafuu, warri isin ariʼan saffisa ni qabaatu.+
17 Doorsisa nama tokkootiin namni kumni ni romʼa;+
Akkuma utubaa fiixee gaaraa irra jiruu,
Akkuma jirma mallattoo tabba irra jiruus taatanii hamma haftanitti,
Isin doorsisa namoota shaniitiin ni baqattu.+
18 Yihowaan garuu gaarummaa isinitti argisiisuuf obsaan* eegaa jira,+
Gara laafina isinitti argisiisuufis ni kaʼa.+
Sababiin isaas, Yihowaan Waaqa haqa qabeessa taʼe dha.+
Warri abdiidhaan* isa eeggatan hundi gammadoo dha.+
19 Sabichi Xiyoon keessa, jechuunis Yerusaalem keessa yommuu jiraatu+ ati matumaa hin boossu.+ Ati yommuu gargaarsa argachuuf iyyitu, inni dhugumaan gaarummaa sitti ni argisiisa; iyya kee akkuma dhagaʼeenis deebii siif ni kenna.+ 20 Yihowaan nyaata dhiphinaa fi bishaan cunqursaa kan isiniif kennu yoo taʼe illee,+ Barsiisaan kee Inni Guddichi kana booda si duraa hin dhokatu; atis ijuma keetiin Barsiisaa kee Isa Guddicha+ ni argita. 21 Ati gara mirgaatti yookiin gara bitaatti yoo gorte,+ duuba keetiin gurri kee sagalee, “Karichi isa kana.+ Isa irra deemaa” jedhu ni dhagaʼa.
22 Atis meetii fakkiiwwan kee warra bocamanitti uwwifamee fi warqii siidaawwan sibiilaa kee* irratti maxxanfame ni xureessita.+ Akkuma huccuu laguutti isaan gattee, “Asii badaa!”* isaaniin jetta.+ 23 Innis sanyii ati lafa irratti facaasteef bokkaa siif ni roobsa;+ nyaanni lafattii irraa argamus hedduu fi baʼeessa* ni taʼa.+ Guyyaa sanatti horiin kee iddoo dheedichaa balʼaa taʼe keessa ni dheedu.+ 24 Loonii fi harroonni laficha qotanis gafara miʼeeffamee qophaaʼe isa laayidaa* fi qoorbiidhaan* qulqulleeffame ni nyaatu. 25 Guyyaa namoonni hedduun ajjeefamanitti yommuu masaraawwan jiganitti, gaara dheeraa hundumaa irrattii fi tabba dheeraa hundumaa irratti lageenii fi boʼoowwan bishaanii ni jiraatu.+ 26 Ifni addeessa guutuu akkuma ifa aduu ni taʼa; guyyaa Yihowaan caba saba isaa hidhuttii+ fi madaa cimaa rukuttaa isaatiin isaanitti dhufe fayyisutti,+ ifni aduu akkuma ifa guyyaa torbaatti dachaa torba cimaa ni taʼa.+
27 Kunoo, maqaan Yihowaa
Dheekkamsa isaatiin gubaa, akkasumas duumessa cimaadhaan marfamee fagoodhaa dhufaa jira.
Afaan isaa dheekkamsaan guutameera,
Arrabni isaas akkuma ibidda gubuu ti.+
28 Hafuurri isaa akkuma lolaa morma bira gaʼuu ti,
Inni saboota gingilchaa badiisaatiin* ni gingilcha;
Mangaagaa namootaa keessas luugamni karaa irraa isaan jalʼisu ni jiraata.+
29 Haa taʼu malee, faarfannaan keessan akkuma faarfannaa
Yeroo ayyaanaaf qophooftaniitti*+ halkan faarfatamu sanaa ni taʼa;
Garaan keessanis akkuma nama
Gara gaara Yihowaa isa Qarsaa Israaʼel+ taʼe sanaa
Ulullee qabatee* deemuutti ni gammada.
30 Yihowaan sagaleen+ isaa inni ulfina qabeessa taʼe akka dhagaʼamu ni godha,
Inni labooba ibiddaa gubuun,+
Bokkaa yandoodhaan,+ bubbee kakawwee qabuu fi cabbii guguddaadhaan+
Irreen isaa+ aarii guddaadhaan+ yommuu gad buʼu ni argisiisa.
32 Yommuu Yihowaan waraana irratti irree isaa isaan irratti kaasutti+
Uleen adabaa isaa
Asoor irratti yeroo dhufu hundumaatti,
Dibbeenii fi baganaan ni rukutama.+
Inni iddoo tuullaa qoraanii gad fagoo fi balʼaa taʼe,
Akkasumas ibiddaa fi qoraan hedduu qopheesseera.
Hafuurri Yihowaa akkuma lolaa dinyiitti
Ibidda isatti ni qabsiisa.