DIPALO

1 Mme Jehofa o ne a bua le Moshe mo nageng ya Sinai,+ mo tenteng ya bokopanelo,+ mo letsatsing la ntlha la kgwedi ya bobedi, mo ngwageng wa bobedi ba sena go tswa kwa lefatsheng la Egepeto.+ O ne a re: 2 “Balang+ phuthego yotlhe ya Baiseraele,* mongwe le mongwe* go ya ka malapa a bone, go ya ka dikgotla tsa bone, go ya ka palo ya maina a banna botlhe. 3 Wena le Arone lo ba kwadise go ya ka mephato ya bone,* botlhe ba dingwaga tsa bone di simololang ka 20 go ya kwa godimo+ ba ba ka nnang masole mo Iseraele.

4 “Lo tseye monna a le mongwe go tswa mo lotsong longwe le longwe; mongwe le mongwe wa bone e tla nna tlhogo ya kgotla ya bone.+ 5 Ano ke maina a banna ba ba tla lo thusang: go tswa mo lotsong lwa ga Rubene, Elisure+ morwa Shedeure; 6 go tswa mo lotsong lwa ga Simeone, Shelumiele+ morwa Surishadai; 7 go tswa mo lotsong lwa ga Juda, Nashone+ morwa Aminadabe; 8 go tswa mo lotsong lwa ga Isakare, Nethanele+ morwa Suare; 9 go tswa mo lotsong lwa ga Sebulone, Eliabe+ morwa Helone; 10 ba bomorwa Josefa: go tswa mo go Eferaime,+ Elishama morwa Amihude; go tswa mo go Manase, Gamaliele morwa Pedasure; 11 go tswa mo lotsong lwa ga Benjamine, Abidane+ morwa Gideoni; 12 go tswa mo lotsong lwa ga Dana, Ahiesere+ morwa Amishadai; 13 go tswa mo lotsong lwa ga Ashera, Pagiele+ morwa Okerane; 14 go tswa mo lotsong lwa ga Gada, Eliasafe+ morwa Duele; 15 go tswa mo lotsong lwa ga Nafetali, Ahira+ morwa Enane. 16 Bano ke ba ba biditsweng go tswa mo phuthegong. Ke dikgosana+ tsa ditso tsa borraabone, ditlhogo tsa dikete tsa Iseraele.”+

17 Ka jalo, Moshe le Arone ba ne ba tsaya banna bano ba ba neng ba tlhaotswe ka maina. 18 Ba ne ba phutha phuthego yotlhe mo letsatsing la ntlha la kgwedi ya bobedi, gore ba kwadise mongwe le mongwe go ya ka leina, ka malapa a bone le ka dikgotla tsa bone, go simolola ka ba ba nang le dingwaga di le 20 go ya kwa godimo,+ 19 fela jaaka Jehofa a ne a laetse Moshe. Ka jalo, o ne a ba kwadisa mo nageng ya Sinai.+

20 Bomorwa Rubene, ditlogolwana tsa leitibolo la ga Iseraele,+ ba ne ba kwadisiwa go ya ka maina a bone, ka malapa a bone le ka dikgotla tsa bone. Banna botlhe ba ba nang le dingwaga di le 20 go ya kwa godimo ba ba kgonang go nna masole, mongwe le mongwe wa bone o ne a balwa, 21 mme palo ya ba ba kwadisitsweng ba lotso lwa ga Rubene e ne e le 46 500.

22 Ditlogolwana tsa ga Simeone+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole, mongwe le mongwe wa bone o ne a balwa, 23 mme palo ya ba ba kwadisitsweng ba lotso lwa ga Simeone e ne e le 59 300.

24 Ditlogolwana tsa ga Gada+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 25 mme palo ya ba ba kwadisitsweng ba lotso lwa ga Gada e ne e le 45 650.

26 Ditlogolwana tsa ga Juda+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 27 mme palo ya ba ba kwadisitsweng ba lotso lwa ga Juda e ne e le 74 600.

28 Ditlogolwana tsa ga Isakare+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 29 mme palo ya ba ba kwadisitsweng ba lotso lwa ga Isakare e ne e le 54 400.

30 Ditlogolwana tsa ga Sebulone+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 31 mme palo ya ba ba kwadisitsweng ba lotso lwa ga Sebulone e ne e le 57 400.

32 Ditlogolwana tsa ga Josefa ka Eferaime+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 33 mme palo ya ba ba kwadisitsweng ba lotso lwa ga Eferaime e ne e le 40 500.

34 Ditlogolwana tsa ga Manase+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 35 mme palo ya ba ba kwadisitsweng ba lotso lwa ga Manase e ne e le 32 200.

36 Ditlogolwana tsa ga Benjamine+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 37 mme palo ya ba ba kwadisitsweng ba lotso lwa ga Benjamine e ne e le 35 400.

38 Ditlogolwana tsa ga Dana+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 39 mme palo ya ba ba kwadisitsweng ba lotso lwa ga Dana e ne e le 62 700.

40 Ditlogolwana tsa ga Ashera+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 41 mme palo ya ba ba kwadisitsweng ba lotso lwa ga Ashera e ne e le 41 500.

42 Ditlogolwana tsa ga Nafetali+ di ne tsa kwadisiwa go ya ka maina a tsone, ka malapa a tsone le ka dikgotla tsa tsone. Banna botlhe ba ba nang le dingwaga di le 20 go ya kwa godimo ba ba kgonang go nna masole ba ne ba balwa, 43 mme palo ya ba ba kwadisitsweng ba lotso lwa ga Nafetali e ne e le 53 400.

44 Bano ba ne ba kwadisiwa ke Moshe mmogo le Arone le dikgosana tse 12 tsa Iseraele, nngwe le nngwe ya tsone e emela kgotla ya bone. 45 Baiseraele botlhe go simolola ka ba ba nang le dingwaga di le 20 go ya kwa godimo ba ba kgonang go nna masole mo Iseraele, ba ne ba kwadisiwa go ya ka dikgotla tsa bone, 46 mme palo ya botlhe ba ba kwadisitsweng e ne e le 603 550.+

47 Mme Balefi+ go ya ka lotso lwa borraabone ba ne ba se ka ba kwadisiwa.+ 48 Ka jalo, Jehofa o ne a raya Moshe a re: 49 “Lotso lwa ga Lefi ke lone fela lo o se kitlang o le kwadisa e bile o se ka wa kopanya palo ya bone le ya Baiseraele ba bangwe.+ 50 O tlhome Balefi gore ba okamele motlaagana o o nang le letlole la kgolagano*+ le dilwana tsotlhe tsa one le sengwe le sengwe sa one.+ Ba tla tsaya motlaagana le dilwana tsotlhe tsa one+ e bile ba tla direla mo go one+ mme ba tla nna go dikologa motlaagana.+ 51 Nako epe fela fa motlaagana o tshwanetse go fudusiwa, Balefi ba o rutlolole;+ mme fa motlaagana o tshwanetse go tlhomiwa gape, Balefi ba o tlhome; mme motho ope yo o sa tshwanelegeng* yo o atamelang a bolawe.+

52 “Moiseraele mongwe le mongwe a tlhome tente ya gagwe mo kampeng e a e abetsweng, motho mongwe le mongwe go ya ka setlhopha sa gagwe sa ditso tse tharo*+ go ya ka mephato ya bone.* 53 Mme Balefi ba nne go dikologa motlaagana, gore phuthego ya Baiseraele e se ka ya galefelwa;+ mme Balefi ba tshwanetse go tlhokomela* motlaagana.”+

54 Batho ba Iseraele ba ne ba dira sotlhe se Jehofa a neng a se laetse Moshe. Ba ne ba dira fela jalo.

2 Jaanong Jehofa o ne a bua le Moshe le Arone a re: 2 “Baiseraele ba nne fa setlhopha sa bone sa ditso tse tharo+ se abetsweng gone, motho mongwe le mongwe a nne gaufi le letshwao la kgotla ya bone. Ba nne go lebagana le tente ya bokopanelo go e dikologa.

3 “Ba ba tla nnang ntlheng ya botlhaba, go ela kwa botlhabatsatsi, e tla nna setlhopha sa ditso tse tharo tsa kampa ya ga Juda go ya ka mephato ya bone;* kgosana ya bomorwa Juda ke Nashone+ morwa Aminadabe. 4 Ba ba kwadisitsweng mo lotsong lwa gagwe ba 74 600.+ 5 Ba ba tla nnang fa thoko ga gagwe e tla nna lotso lwa ga Isakare; kgosana ya bomorwa Isakare ke Nethanele+ morwa Suare. 6 Ba ba kwadisitsweng mo lotsong lwa gagwe ba 54 400.+ 7 Go tswa foo, go bo go latela lotso lwa ga Sebulone; kgosana ya bomorwa Sebulone ke Eliabe+ morwa Helone. 8 Ba ba kwadisitsweng mo lotsong lwa gagwe ba 57 400.+

9 “Botlhe ba ba kwadisitsweng mo ditsong tsa kampa ya ga Juda ba 186 400. E nne bone ba ntlha go tsamaya fa go fudugiwa.+

10 “Setlhopha sa ditso tse tharo tsa kampa ya ga Rubene+ go ya ka mephato ya bone* se tla nna ntlheng ya borwa; kgosana ya bomorwa Rubene ke Elisure+ morwa Shedeure. 11 Ba ba kwadisitsweng mo lotsong lwa gagwe ba 46 500.+ 12 Ba ba tla nnang fa thoko ga gagwe e tla nna lotso lwa ga Simeone; kgosana ya bomorwa Simeone ke Shelumiele+ morwa Surishadai. 13 Ba ba kwadisitsweng mo lotsong lwa gagwe ba 59 300.+ 14 Go tswa foo, go bo go latela lotso lwa ga Gada; kgosana ya bomorwa Gada ke Eliasafe+ morwa Reuele. 15 Ba ba kwadisitsweng mo lotsong lwa gagwe ba 45 650.+

16 “Botlhe ba ba kwadisitsweng mo ditsong tsa kampa ya ga Rubene ba 151 450, mme e nne bone ba bobedi go tsamaya fa go fudugiwa.+

17 “Fa tente ya bokopanelo e fudusiwa,+ kampa ya Balefi e nne mo gare ga dikampa tse dingwe.

“Ba nne ka thulaganyo e e tshwanang le ya fa ba tsamaya,+ mongwe le mongwe a le mo maemong a gagwe, go ya ka ditlhopha tsa bone tsa ditso tse tharo.

18 “Setlhopha sa ditso tse tharo tsa kampa ya ga Eferaime go ya ka mephato ya bone* se tla nna ntlheng ya bophirima; kgosana ya bomorwa Eferaime ke Elishama+ morwa Amihude. 19 Ba ba kwadisitsweng mo lotsong lwa gagwe ba 40 500.+ 20 Go bapa le ene go bo go latela lotso lwa ga Manase;+ kgosana ya bomorwa Manase ke Gamaliele+ morwa Pedasure. 21 Ba ba kwadisitsweng mo lotsong lwa gagwe ba 32 200.+ 22 Go tswa foo, go bo go latela lotso lwa ga Benjamine; kgosana ya bomorwa Benjamine ke Abidane+ morwa Gideoni. 23 Ba ba kwadisitsweng mo lotsong lwa gagwe ba 35 400.+

24 “Botlhe ba ba kwadisitsweng mo ditsong tsa kampa ya ga Eferaime ba 108 100, mme e nne bone ba boraro go tsamaya fa go fudugiwa.+

25 “Setlhopha sa ditso tse tharo tsa kampa ya ga Dana go ya ka mephato ya bone* se tla nna ntlheng ya bokone; kgosana ya bomorwa Dana ke Ahiesere+ morwa Amishadai. 26 Ba ba kwadisitsweng mo lotsong lwa gagwe ba 62 700.+ 27 Ba ba tla nnang fa thoko ga gagwe e tla nna lotso lwa ga Ashera; kgosana ya bomorwa Ashera ke Pagiele+ morwa Okerane. 28 Ba ba kwadisitsweng mo lotsong lwa gagwe ba 41 500.+ 29 Go tswa foo, go bo go latela lotso lwa ga Nafetali; kgosana ya bomorwa Nafetali ke Ahira+ morwa Enane. 30 Ba ba kwadisitsweng mo lotsong lwa gagwe ba 53 400.+

31 “Botlhe ba ba kwadisitsweng mo kampeng ya ga Dana ke 157 600. E nne bone ba bofelo go tsamaya fa go fudugiwa,+ go ya ka setlhopha sa bone sa ditso tse tharo.”

32 Bano e ne e le Baiseraele ba ba neng ba kwadisitswe go ya ka dikgotla tsa bone; palo ya botlhe ba ba neng ba kwadisitswe mo dikampeng tsa bone gore e nne masole e ne e le 603 550.+ 33 Mme Balefi ba ne ba se ka ba kwadisiwa+ le Baiseraele ba bangwe,+ fela jaaka Jehofa a ne a laetse Moshe. 34 Baiseraele ba ne ba dira sengwe le sengwe se Jehofa a neng a se laetse Moshe. Eno ke tsela e ba neng ba nna ka yone go ya ka ditlhopha tsa bone tsa ditso tse tharo+ le e ba neng ba tsamaya ka yone fa ba fuduga,+ mongwe le mongwe go ya ka malapa le go ya ka dikgotla tsa bone.

3 Jaanong ano ke masika a* ga Arone le Moshe mo letsatsing le Jehofa a neng a bua le Moshe ka lone mo Thabeng ya Sinai.+ 2 Ano e ne e le maina a bomorwa Arone: Nadabe e ne e le leitibolo, go bo go latela Abihu,+ Eliasare+ le Ithamare.+ 3 Ao e ne e le maina a bomorwa Arone, baperesiti ba ba tloditsweng ba ba neng ba tlhomiwa* gore ba direle e le baperesiti.+ 4 Le fa go ntse jalo, Nadabe le Abihu ba ne ba swela fa pele ga ga Jehofa fa ba ne ba isa molelo o o seng ka fa molaong fa pele ga ga Jehofa+ kwa nageng ya Sinai, mme ba ne ba se na bana bape ba basimane. Eliasare+ le Ithamare+ bone ba ne ba tswelela ba direla e le baperesiti mmogo le Arone rraabone.

5 Go tswa foo, Jehofa o ne a bua le Moshe a re: 6 “Atametsa lotso lwa ga Lefi+ o bo o ba emisa fa pele ga ga moperesiti Arone, mme ba tla mo direla.+ 7 Ba tla diragatsa maikarabelo a bone mo go ene le mo phuthegong yotlhe fa pele ga tente ya bokopanelo ka go dira tirelo ya bone e e amanang le motlaagana. 8 Ba tlhokomele dilwana tsotlhe+ tsa tente ya bokopanelo e bile ba diragatse maikarabelo a bone mo Baiseraeleng ka go dira ditirelo tse di amanang le motlaagana.+ 9 O ntshe Balefi mme o ba neye Arone le bomorwawe. Ke ba ba abilweng, ba a ba abetsweng go tswa mo Baiseraeleng.+ 10 O tlhome Arone le bomorwawe, mme ba dire ditiro tsa bone tsa boperesiti+ mme motho ope yo o sa tshwanelegeng* yo o atamelang a bolawe.”+

11 Jehofa o ne a tswelela a bua le Moshe a re: 12 “Fa e le nna, ke tsaya Balefi go tswa mo Baiseraeleng mo boemong jwa maitibolo otlhe* a Baiseraele,+ mme Balefi e tla nna ba me. 13 Gonne leitibolo lengwe le lengwe ke la me.+ Mo letsatsing la fa ke ne ke bolaya leitibolo lengwe le lengwe kwa lefatsheng la Egepeto,+ ke ne ka itlhaolela leitibolo lengwe le lengwe mo Iseraele gore le nne boitshepo, go simolola ka motho go fitlha ka phologolo.+ E tla nna a me. Ke nna Jehofa.”

14 Jehofa o ne a tswelela a bua le Moshe mo nageng ya Sinai+ a re: 15 “Kwadisa bomorwa Lefi go ya ka dikgotla tsa bone le go ya ka malapa a bone. O kwadise monna mongwe le mongwe go simolola ka yo o nang le kgwedi go ya kwa godimo.”+ 16 Ka jalo, Moshe o ne a ba kwadisa go ya ka taelo ya ga Jehofa, fela jaaka a ne a laetswe. 17 Ano e ne e le maina a bomorwa Lefi: Gereshone, Kohathe le Merari.+

18 Jaanong ano e ne e le maina a bomorwa Gereshone go ya ka malapa a bone: Libeni le Shimei.+

19 Bomorwa Kohathe go ya ka malapa a bone e ne e le Amerame, Isehare, Heberone le Usiele.+

20 Bomorwa Merari go ya ka malapa a bone e ne e le Maheli+ le Mushi.+

Ano e ne e le malapa a Balefi go ya ka dikgotla tsa bone.

21 Go tswa mo go Gereshone go ne ga nna le lelapa la Balibeni+ le lelapa la Bashimei. Ano e ne e le malapa a Bagereshone. 22 Palo ya banna botlhe ba bone ba ba nang le kgwedi go ya kwa godimo ba ba neng ba kwadisiwa e ne e le 7 500.+ 23 Malapa a Bagereshone a ne a nna ka fa morago ga motlaagana+ go ela kwa bophirima. 24 Kgosana ya Bagereshone ya kgotla ya bone e ne e le Eliasafe morwa Laele. 25 Boikarabelo jwa bomorwa Gereshone+ mo tenteng ya bokopanelo e ne e le go tlhokomela motlaagana le tente,+ sekhurumetso sa one,+ setswalo*+ sa kgoro ya tente ya bokopanelo, 26 matsela a a lepelelang+ a lolwapa, setswalo*+ sa kgoro ya lolwapa lo lo dikologileng motlaagana le sebeso, megala ya one ya tente le tirelo yotlhe e e amanang le tsone.

27 Go tswa mo go Kohathe go ne ga nna le lelapa la Baamerame, lelapa la Baisehare, lelapa la Baheberone le lelapa la Bausiele. Ano e ne e le malapa a Bakohathe.+ 28 Palo ya banna botlhe go simolola ka ba ba nang le kgwedi go ya kwa godimo e ne e le 8 600; boikarabelo jwa bone e ne e le go tlhokomela lefelo le le boitshepo.+ 29 Malapa a bomorwa Kohathe a ne a nna mo letlhakoreng le le ka fa borwa la motlaagana.+ 30 Kgosana ya malapa a Bakohathe ya kgotla ya bone e ne e le Elisafane morwa Usiele.+ 31 Boikarabelo jwa bone e ne e le go tlhokomela Letlole,+ tafole,+ setlhomo sa dipone,+ dibeso,+ dilwana+ tse di dirisiwang tsa go direla mo lefelong le le boitshepo, sesiro+ le tirelo yotlhe e e amanang le tsone.+

32 Tlhogo ya dikgosana tsa Balefi e ne e le Eliasare+ morwa moperesiti Arone, yo o neng a okametse ba ba neng ba tlhokomela maikarabelo a a dirwang mo lefelong le le boitshepo.

33 Go tswa mo go Merari go ne ga nna le lelapa la Bamaheli le lelapa la Bamushi. Ano e ne e le malapa a ga Merari.+ 34 Palo ya banna botlhe go simolola ka ba ba nang le kgwedi go ya kwa godimo ba ba neng ba kwadisitswe e ne e le 6 200.+ 35 Kgosana ya malapa a ga Merari ya kgotla ya bone e ne e le Suriele morwa Abihaile. Ba ne ba nna mo letlhakoreng le le ka fa bokone la motlaagana.+ 36 Boikarabelo jwa bomorwa Merari e ne e le go tlhokomela diforeimi+ tsa motlaagana, mephakalego+ ya one, dipilara+ tsa one, metheo ya one e e khuti, dilwana+ tsotlhe tsa one le tirelo yotlhe e e amanang le one,+ 37 mmogo le dipilara tse di neng di dikologile lolwapa le metheo ya tsone e e khuti,+ dipekere tsa tsone tse ditona le megala ya tsone.

38 Ba ba neng ba nna fa pele ga motlaagana go ela kwa botlhaba, fa pele ga tente ya bokopanelo go ela kwa botlhabatsatsi, e ne e le Moshe le Arone le bomorwawe. Ba ne ba na le boikarabelo jwa go tlhokomela lefelo le le boitshepo mo boemong jwa Baiseraele. Motho ope yo o sa tshwanelegeng* yo o atamelang o ne a tla bolawa.+

39 Balefi botlhe ba banna go simolola ka ba ba nang le kgwedi go ya kwa godimo, ba Moshe le Arone ba neng ba ba kwadisa go ya ka malapa a bone ka taelo ya ga Jehofa, ba ne ba le 22 000.

40 Go tswa foo, Jehofa o ne a raya Moshe a re: “Kwadisa maitibolo otlhe a Baiseraele a banna go simolola ka ba ba nang le kgwedi go ya kwa godimo,+ o ba bale o bo o kwala maina a bone. 41 O tshwanetse go ntseela Balefi mo boemong jwa maitibolo otlhe a Baiseraele+ mme o tseye diruiwa tsa Balefi mo boemong jwa maitibolo otlhe a diruiwa tsa Baiseraele. Ke nna Jehofa.”+ 42 Go tswa foo, Moshe o ne a kwadisa maitibolo otlhe a Baiseraele, fela jaaka Jehofa a ne a mo laetse. 43 Palo ya maitibolo otlhe a banna a a neng a kwadisitswe go ya ka maina, go simolola ka ba ba nang le kgwedi go ya kwa godimo, e ne e le 22 273.

44 Jehofa o ne a tswelela a bua le Moshe a re: 45 “Tsaya Balefi mo boemong jwa maitibolo otlhe a Baiseraele o bo o tseye diruiwa tsa Balefi mo boemong jwa diruiwa tsa Baiseraele mme Balefi ba tshwanetse go nna ba me. Ke nna Jehofa. 46 Mme go na le maitibolo a Baiseraele a le 273 a a fetang Balefi.+ Gore o rekolole maitibolo ano,+ 47 o tseye dishekele* di le tlhano mo boemong jwa mongwe le mongwe+ go ya ka selekanyashekele* sa lefelo le le boitshepo.* Shekele ke digera* di le 20.+ 48 O neye Arone le bomorwawe madi ao e le tlhwatlhwa ya thekololo ya ba ba fetang Balefi ka palo.” 49 Ka jalo, Moshe o ne a phutha madi a tlhwatlhwa ya thekololo go tswa mo go ba ba neng ba feta Balefi ka palo e le tlhwatlhwa ya thekololo. 50 O ne a phutha madi ao go tswa mo maitibolong a Baiseraele, dishekele di le 1 365, go ya ka selekanyashekele sa lefelo le le boitshepo. 51 Morago ga moo, Moshe o ne a naya Arone le bomorwawe madi a tlhwatlhwa ya thekololo go ya ka lefoko* la ga Jehofa, fela jaaka Jehofa a ne a laetse Moshe.

4 Jaanong Jehofa o ne a bua le Moshe le Arone a re: 2 “Go tsewe palo ya bomorwa Kohathe+ go tswa mo go bomorwa Lefi, go ya ka malapa a bone le go ya ka dikgotla tsa bone, 3 botlhe ba dingwaga tsa bone di simololang ka 30+ go ya go 50,+ ba ba mo setlhopheng se se abetsweng go direla mo tenteng ya bokopanelo.+

4 “Eno ke tirelo ya bomorwa Kohathe mo tenteng ya bokopanelo.+ Ke selo se se boitshepotshepo: 5 Fa Baiseraele ba tswa mo lefelong le lengwe ba ya kwa go le lengwe, Arone le bomorwawe ba tla tsena ba bo ba folosa sesiro sa go kgaoganya+ mme ba tla khurumetsa letlole+ la kgolagano ka sone. 6 Ba beye sekhurumetso sa matlalo a a borethe* mo godimo ga lone ba bo ba apesa letsela le le botala jwa loapi mo godimo ga lone ba bo ba tsenya dikota+ tse letlole le tsholediwang ka tsone.

7 “Gape ba ale letsela le le botala jwa loapi mo godimo ga tafole ya senkgwe se se bewang fa pele ga Modimo+ mme ba tla baya dijana, dikopi, dikotlele tse dinnye le dinkgo tsa setlhabelo sa senô+ mo godimo ga yone; senkgwe se se ntshiwang ka metlha+ se tswelele se le mo godimo ga yone. 8 Ba apese letsela le lehibidu mo godimo ga tsone ba bo ba e khurumetsa ka sekhurumetso sa matlalo a a borethe mme ba tsenye dikota+ tse tafole e tsholediwang ka tsone. 9 Go tswa foo, ba tseye letsela le le botala jwa loapi ba bo ba khurumetsa setlhomo sa dipone+ tsa go bonesa mmogo le dipone+ tsa sone, ditimalobone* tsa sone, ditsholamolelo+ tsa sone le dilwana tsotlhe tsa sone tsa leokwane tse di dirisediwang go se tlhokomela. 10 Ba se phuthele le dilwana tsotlhe tsa sone mo sekhurumetsong sa matlalo a a borethe ba bo ba se baya mo godimo ga foreimi e go rwalwang dilwana ka yone. 11 Mme ba ale letsela le le botala jwa loapi mo godimo ga sebeso sa gauta,+ ba se khurumetsa ka sekhurumetso sa matlalo a a borethe ba bo ba tsenya dikota+ tse se tsholediwang ka tsone. 12 Go tswa foo, ba tseye dilwana+ tsotlhe tsa go direla tse ba direlang ka tsone ka metlha mo lefelong le le boitshepo ba bo ba di tsenya mo letseleng le le botala jwa loapi ba bo ba di khurumetsa ka sekhurumetso sa matlalo a a borethe ba bo ba di baya mo godimo ga foreimi e go rwalwang dilwana ka yone.

13 “Ba tlose melora* mo sebesong+ mme ba ale letsela la wulu e phepole mo godimo ga sone. 14 Ba tsenye dilwana tsotlhe tsa sone mo go sone tse ba di dirisang fa ba direla mo sebesong: ditsholamolelo, diforoko, digarawe le dikotlele tse dinnye, dilwana tsotlhe tsa sebeso;+ mme ba tla apesa sekhurumetso sa matlalo a a borethe mo godimo ga sone ba bo ba tsenya dikota+ tse se tsholediwang ka tsone.

15 “Fa Baiseraele ba fuduga, Arone le bomorwawe ba tshwanetse go bo ba feditse go khurumetsa lefelo le le boitshepo+ le dilwana tsotlhe tsa lefelo le le boitshepo. Go tswa foo, bomorwa Kohathe ba tsene ba tle go di rwala,+ mme ga ba a tshwanela go kgoma lefelo le le boitshepo, go seng jalo ba tla swa.+ Dilo tseno ke boikarabelo* jwa bomorwa Kohathe jo bo amanang le tente ya bokopanelo.

16 “Eliasare+ morwa moperesiti Arone o na le boikarabelo jwa go tlhokomela leokwane la dipone,+ maswalo a a nkgang monate,+ setlhabelo sa dijo tsa ditlhaka se se ntshiwang ka metlha le leokwane la go tlotsa.+ Boikarabelo jwa gagwe ke go okamela motlaagana otlhe le sotlhe se se mo go one, go akaretsa lefelo le le boitshepo le dilwana tsa lone.”

17 Jehofa o ne a tswelela a bua le Moshe le Arone a re: 18 “Lo se ka lwa letla gore Bakohathe+ ba ba tswang mo lotsong lwa Lefi ba bolawe. 19 Mme lo ba direle seno gore ba nne ba ntse ba tshela mme ba se ka ba swa ka ntlha ya go atamela dilo tse di boitshepotshepo.+ Arone le bomorwawe ba tla tsena ba bo ba kaela mongwe le mongwe wa bone kwa tirelong ya gagwe le se a tla se rwalang. 20 Ga ba a tshwanela go tsena mme ba bona dilo tse di boitshepo, tota le fa e le ka nako e khutshwane, go seng jalo ba tla swa.”+

21 Morago ga moo, Jehofa o ne a bua le Moshe a re: 22 “O tseye palo ya bomorwa Gereshone+ go ya ka dikgotla tsa bone le ka malapa a bone. 23 O kwadise botlhe ba dingwaga tsa bone di simololang ka 30 go ya go 50, ba ba mo setlhopheng se se abetsweng go direla mo tenteng ya bokopanelo. 24 Tseno ke dilo tse malapa a Bagereshone a abetsweng go di tlhokomela:+ 25 Ba tla tsaya matsela a tente ya motlaagana,+ tente ya bokopanelo, sekhurumetso sa yone le sekhurumetso sa matlalo a a borethe se se mo godimo ga sone,+ setswalo* sa kgoro ya tente ya bokopanelo,+ 26 matsela a a lepelelang a lolwapa,+ setswalo* sa kgoro ya lolwapa+ lo lo dikologileng motlaagana le sebeso, megala ya tente ya tsone le dilwana tsotlhe tsa tsone le sengwe le sengwe se se dirisiwang mo tirelong ya motlaagana. Eno ke kabelo ya bone. 27 Tirelo yotlhe le merwalo yotlhe ya Bagereshone+ e okamelwe ke Arone le bomorwawe; lo tla ba abela merwalo eno yotlhe e le boikarabelo jwa bone. 28 Eno ke tirelo e malapa a Bagereshone a tla e dirang mo tenteng ya bokopanelo,+ mme maikarabelo a bone a okametswe ke Ithamare+ morwa moperesiti Arone.

29 “Bomorwa Merari+ le bone, o ba kwadise go ya ka malapa a bone le ka dikgotla tsa bone. 30 O ba kwadise go simolola ka ba ba nang le dingwaga di le 30 go ya go di le 50, botlhe ba ba mo setlhopheng se se abetsweng go direla mo tenteng ya bokopanelo. 31 Tseno ke dilo tse ba nang le boikarabelo jwa go di tsaya+ tse di amanang le tiro e ba e dirang mo tenteng ya bokopanelo: diforeimi+ tsa motlaagana, mephakalego+ ya one, dipilara+ tsa one, metheo ya one e e khuti;+ 32 dipilara+ tse di dikologileng lolwapa, metheo ya tsone e e khuti,+ dipekere+ tsa tsone tse ditona le megala ya tsone mmogo le didirisiwa tsotlhe tsa tsone le tirelo yotlhe e e amanang le tsone. O ba abele dilo tse ba abetsweng go di tsaya go ya ka maina a bone. 33 Eo ke tsela e malapa a bomorwa Merari+ a tla direlang ka yone mo tenteng ya bokopanelo a okametswe ke Ithamare morwa moperesiti Arone.”+

34 Go tswa foo, Moshe le Arone le dikgosana+ tsa phuthego ba ne ba kwadisa bomorwa Bakohathe+ go ya ka malapa a bone le ka dikgotla tsa bone, 35 botlhe ba dingwaga tsa bone di simololang ka 30 go ya go 50, ba ba neng ba le mo setlhopheng se se abetsweng go direla mo tenteng ya bokopanelo.+ 36 Palo ya botlhe ba ba kwadisitsweng go ya ka malapa a bone e ne e le 2 750.+ 37 Bano ba ne ba kwadisiwa go tswa mo malapeng a Bakohathe, botlhe ba ba neng ba direla mo tenteng ya bokopanelo. Moshe le Arone ba ne ba ba kwadisa go ya ka taelo ya ga Jehofa ka Moshe.+

38 Bomorwa Gereshone+ ba ne ba kwadisiwa go ya ka malapa a bone le ka dikgotla tsa bone, 39 botlhe ba dingwaga tsa bone di simololang ka 30 go ya go 50, ba ba neng ba le mo setlhopheng se se abetsweng go direla kwa tenteng ya bokopanelo. 40 Palo ya botlhe ba ba kwadisitsweng go ya ka malapa a bone le ka dikgotla tsa bone, e ne e le 2 630.+ 41 Eno ke pego ya go kwadisiwa ga malapa a bomorwa Gereshone, botlhe ba ba neng ba direla kwa tenteng ya bokopanelo. Moshe le Arone ba ne ba laela gore ba kwadisiwe go ya ka taelo ya ga Jehofa.+

42 Bomorwa Merari ba ne ba kwadisiwa go ya ka malapa a bone le ka dikgotla tsa bone, 43 botlhe ba dingwaga tsa bone di simololang ka 30 go ya go 50, ba ba neng ba le mo setlhopheng se se abetsweng go direla kwa tenteng ya bokopanelo.+ 44 Palo ya botlhe ba ba kwadisitsweng mo go bone go ya ka malapa a bone e ne e le 3 200.+ 45 Eno ke pego ya go kwadisiwa ga malapa a bomorwa Merari, ba Moshe le Arone ba neng ba ba kwadisa go ya ka taelo ya ga Jehofa ka Moshe.+

46 Moshe le Arone le dikgosana tsa Iseraele ba ne ba kwadisa Balefi bano botlhe go ya ka malapa a bone le ka dikgotla tsa bone; 47 dingwaga tsa bone di ne di simolola ka 30 go ya go 50 mme botlhe ba ne ba abetswe go direla le go rwala merwalo e e amanang le tente ya bokopanelo.+ 48 Palo ya botlhe ba ba kwadisitsweng e ne e le 8 580.+ 49 Ba ne ba kwadisiwa go ya ka taelo ya ga Jehofa ka Moshe, mongwe le mongwe go ya ka tirelo e a e abetsweng le morwalo wa gagwe; ba ne ba kwadisiwa fela jaaka Jehofa a ne a laetse Moshe.

5 Jehofa o ne a tswelela a bua le Moshe a re: 2 “Laela Baiseraele gore ba ntshetse motho mongwe le mongwe yo o nang le lepero kwa ntle ga kampa+ le monna yo o tswang boladu mo serweng sa gagwe sa tsalo le mosadi yo o elelang madi ka tsela e e sa tlwaelegang+ le mongwe le mongwe yo o itshekologileng ka ntlha ya motho yo o suleng.*+ 3 E ka tswa e le monna kgotsa mosadi, lo ba ntshetse kwa ntle. Lo ba ntshetse kwa ntle ga kampa gore ba se ka ba leswafatsa+ dikampa tsa batho ba ke nnang mo gare ga bone.”+ 4 Ka jalo, Baiseraele ba ne ba dira jalo mme ba ba ntshetsa kwa ntle ga kampa. Baiseraele ba ne ba dira fela jaaka Jehofa a ne a boleletse Moshe.

5 Jehofa o ne a tswelela a bua le Moshe a re: 6 “Bolelela Baiseraele o re, ‘Fa monna kgotsa mosadi a dira boleo bongwe jo batho ba tleng ba bo dire a bo a sa ikanyege mo go Jehofa, motho yoo o molato.+ 7 O* tshwanetse go ipolela+ boleo jo a* bo dirileng a bo a tlisa tlhwatlhwa e e feletseng e le tuelo ya molato wa gagwe, gape a ntshe karolwana* ya tlhwatlhwa eo mo godimo ga yone;+ a e neye motho yo a mo diretseng phoso. 8 Mme fa motho yo o diretsweng phoso a se na wa losika yo a atamalaneng le ene yo a ka amogelang tuelo e e ntshiwang, e busediwe kwa go Jehofa mme e tla nna ya moperesiti, ntle le phelefu ya setlhabelo sa go itshwarelwa maleo e a tla mo direlang setlhabelo ka yone.+

9 “‘Moneelo mongwe le mongwe wa dilo tse di boitshepo+ o o tswang mo Baiseraeleng o o isiwang kwa moperesiting, e nne wa gagwe.+ 10 Dilo tse di boitshepo tsa motho mongwe le mongwe e tla nna e le tsa gagwe. Sepe fela se mongwe le mongwe a se nayang moperesiti, e tla nna sa moperesiti.’”

11 Jehofa o ne a tswelela a bua le Moshe a re: 12 “Bua le Baiseraele mme o ba reye o re, ‘Seno ke se se tla dirwang fa mosadi mongwe a fapoga a bo a sa ikanyege mo monneng wa gagwe 13 e bile monna yo mongwe a tlhakanetse dikobo le ene,+ le fa go ntse jalo, monna wa gagwe a sa itse ka seno mme se bo se tswelela se sa lemogiwe, mo a neng a iteswafatsa mme go se na ope yo o mmoneng e bile a sa tshwarwa: 14 Fa monna a fufega e bile a belaela gore mosadi wa gagwe ga a ikanyege mme mosadi a iteswafaditse kgotsa fa monna wa gagwe a fufega e bile a belaela gore mosadi wa gagwe ga a ikanyege mme mosadi ene a sa iteswafatsa, 15 monna o tshwanetse go tlisa mosadi wa gagwe kwa moperesiting mmogo le setlhabelo se se tla ntshediwang mosadi, kilogerama e ka nna nngwe* ya bupi jwa barele.* Ga a tshwanela go tshela leokwane mo go yone kgotsa go baya borekhu jo bo nkgang monate* mo go sone ka gonne ke setlhabelo sa dijo tsa ditlhaka sa lefufa, e leng setlhabelo sa dijo tsa ditlhaka se se dirang gore motho a gakologelwe molato wa gagwe.

16 “‘Moperesiti a mo atametse a bo a mo emisa fa pele ga ga Jehofa.+ 17 Moperesiti a tseye metsi a a boitshepo ka sejana sa letsopa a bo a tsaya lorole fa fatshe mo teng ga motlaagana a bo a lo tsenya mo metsing ao. 18 Mme moperesiti a emise mosadi yoo fa pele ga ga Jehofa a bo a bofolola moriri wa mosadi yoo a bo a baya setlhabelo sa dijo tsa ditlhaka sa go gakologelwa molato mo diatleng tsa gagwe, e leng setlhabelo sa dijo tsa ditlhaka sa lefufa+ mme moperesiti o tla bo a tshotse metsi a a bogalaka a a tlisang phutso.+

19 “‘Go tswa foo, moperesiti a ikanise mosadi yoo mme a mo reye a re: “Fa go se na monna ope yo o tlhakanetseng dikobo le wena fa o ne o sa ntse o le mo taolong ya monna wa gago+ e bile o sa fapoga, gape o sa iteswafatsa, a metsi ano a a bogalaka a se ka a go dira sepe. 20 Mme fa o fapogile o ne o sa ntse o le mo taolong ya monna wa gago ka go iteswafatsa e bile o tlhakanetse dikobo le monna yo mongwe . . .”+ 21 Foo moperesiti a ikanise mosadi yoo ka maikano a a akaretsang phutso, mme moperesiti a reye mosadi yoo a re: “E kete Jehofa a ka dira gore batho ba gaeno ba dirise leina la gago fa ba hutsa ba bangwe le fa ba dira maikano, mme Jehofa a dire gore o se ka wa nna le bana* a bo a dire gore mpa ya gago e ruruge. 22 Metsi ano a a tlisang phutso a tla tsena mo maleng a gago gore a dire gore mpa ya gago e ruruge a bo a dire gore o se ka wa nna le bana.” Foo mosadi a bue a re: “Amen! Amen!”*

23 “‘Go tswa foo, moperesiti a kwale diphutso tseno mo bukeng a bo a di tlhatswetsa mo metsing a a bogalaka. 24 Morago ga moo, a laele mosadi yoo gore a nwe metsi ano a a bogalaka a a tlisang phutso, mme metsi a a tlisang phutso a tla tsena mo go ene a bo a dira gore a nne le ditlhabi. 25 Mme moperesiti a tseye setlhabelo sa dijo tsa ditlhaka sa lefufa+ mo seatleng sa mosadi a bo a se fokisetsa kwa morago le kwa pele fa pele ga ga Jehofa, mme a se tlise gaufi le sebeso. 26 Moperesiti a tabole setlhabelo sa dijo tsa ditlhaka ka seatla se tletse gore e nne karolo e e emelang setlhabelo sotlhe a bo a se fisa gore se kuise mosi mo sebesong,+ morago ga moo, a laele mosadi yoo gore a nwe metsi ao. 27 Fa moperesiti a laela mosadi yono gore a nwe metsi, fa e le gore o iteswafaditse e bile ga a ka a ikanyega mo monneng wa gagwe, metsi a a tlisang phutso a tla tsena mo go ene mme a tla nna selo se se bogalaka mme mpa ya gagwe e tla ruruga e bile ga a kitla a nna le bana, mme leina la mosadi yoo le tla dirisiwa ke batho ba gagabo fa ba hutsa ba bangwe. 28 Le fa go ntse jalo, fa mosadi yoo a sa iteswafatsa e bile a le phepa, foo o tla gololesega mo kotlhaong eo mme o tla kgona go ima le go tshola bana.

29 “‘Ono ke molao o o amanang le lefufa,+ fa mosadi a ka fapoga a bo a iteswafatsa fa a sa ntse a le mo taolong ya monna wa gagwe 30 kgotsa mo maemong a fa monna a fufega e bile a belaela gore mosadi wa gagwe ga a ikanyege; o tshwanetse go dira gore mosadi wa gagwe a eme fa pele ga ga Jehofa mme moperesiti o tshwanetse go diragatsa molao ono otlhe mo go ene. 31 Monna yoo o tla bo a se molato, mme mosadi wa gagwe ene o tla otlhaelwa molato wa gagwe.’”

6 Jehofa o ne a tswelela a bua le Moshe mme a re: 2 “Bua le Baiseraele mme o ba reye o re, ‘Fa monna kgotsa mosadi a dira maikano a a kgethegileng a go tshela e le Monasirite*+ wa ga Jehofa, 3 a a ithibe mo beineng le mo dinông tse dingwe tse di tagang. A se ka a nwa binika e e dirilweng ka beine kgotsa binika e e dirilweng ka sepe se se tagang.+ A se ka a nwa sepe se se dirilweng ka morara* e bile a se ka a ja morara, e ka ne e le o o sa tswang go kgetlwa kgotsa o o omisitsweng. 4 Mo malatsing otlhe a fa e le Monasirite, a se ka a ja sepe se se dirilweng ka morara, go simolola ka morara o o sa butswang go fitlha ka makape a one.

5 “‘Mo malatsing otlhe a fa a dirile maikano a Bonasirite, go se ka ga feta legare lepe mo tlhogong ya gagwe.+ A a nne a le boitshepo ka go letla moriri wa gagwe o gola go fitlha malatsi a a ikanetseng Jehofa ka one a wela. 6 Ka malatsi a a ikanetseng Jehofa ka one, ga a tshwanela go atamela* motho yo o suleng.* 7 Tota le fa rraagwe kgotsa mmaagwe kgotsa morwarraagwe kgotsa kgaitsadie ba ka swa, a se ka a iteswafatsa+ ka gonne sesupo sa gore ke Monasirite wa Modimo se mo tlhogong ya gagwe.

8 “‘O boitshepo mo go Jehofa malatsi otlhe a fa a le Monasirite. 9 Mme fa mongwe a swa ka tshoganyetso fa thoko ga gagwe+ a bo a leswafatsa moriri wa gagwe o o tshwantshetsang gore o itlhaoletse Modimo,* o tshwanetse go beola tlhogo ya gagwe+ mo letsatsing la fa a tlhomamisa gore o itshekile. A e beole mo letsatsing la bosupa. 10 Mme mo letsatsing la borobedi, a ise maeba a mabedi kgotsa maphoi a mannye a le mabedi kwa moperesiting kwa kgorong ya tente ya bokopanelo. 11 Moperesiti a ntshe le le lengwe e le setlhabelo sa boleo mme le lengwe e le setlhabelo se se fisiwang a bo a mo ntshetsa setlhabelo sa gore a itshwarelwe boleo jwa gagwe+ jo bo amanang le motho yo o suleng.* Foo o tshwanetse go dira gore tlhogo ya gagwe e nne boitshepo mo letsatsing leo. 12 Mme o tshwanetse go simolola malatsi a gagwe a go nna Monasarite wa ga Jehofa sesha, mme a tlise phelefu e potlana e e nang le ngwaga o le mongwe kgotsa kwa tlase go nna setlhabelo sa molato. Le fa go ntse jalo, malatsi a pele ga a kitla a balwa ka gonne o ne a iteswafatsa e sa ntse e le Monasirite.

13 “‘Jaanong ono ke molao o o amanang le Monasirite: Fa a wetsa malatsi a gagwe a Bonasirite,+ o tla tlisiwa kwa kgorong ya tente ya bokopanelo. 14 Fa a le koo, o tshwanetse go isetsa Jehofa mpho: phelefu e potlana e le nngwe e e itekanetseng sentle e e nang le ngwaga o le mongwe kgotsa kwa tlase e le setlhabelo se se fisiwang,+ kwanyana e namagadi e le nngwe e e itekanetseng sentle e e nang le ngwaga o le mongwe kgotsa kwa tlase e le setlhabelo sa boleo,+ phelefu e le nngwe e e itekanetseng sentle e le setlhabelo sa go abelana,+ 15 mmanki wa dinkgwe tse di se nang sebediso tse di bopegileng jaaka maseka tsa bupi jo bo boleta jo bo tlhakantsweng le leokwane, diphaphatha tse di se nang sebediso tse di tshasitsweng leokwane le setlhabelo sa tsone sa dijo tsa ditlhaka+ le ditlhabelo tsa tsone tsa senô.+ 16 Moperesiti a di ise fa pele ga ga Jehofa mme a mo isetse setlhabelo sa gagwe sa boleo le setlhabelo sa gagwe se se fisiwang. 17 A isetse Jehofa phelefu e le setlhabelo sa go abelana mmogo le mmanki wa dinkgwe tse di se nang sebediso mme moperesiti a ise setlhabelo sa tsone sa dijo tsa ditlhaka+ le setlhabelo sa tsone sa senô.

18 “‘Go tswa foo, Monasirite o tshwanetse go beolela moriri wa gagwe+ kwa kgorong ya tente ya bokopanelo, mme o tla tsaya moriri wa gagwe o o neng wa gola fa a le Monasirite a bo a o tsenya mo molelong o o ka fa tlase ga setlhabelo sa go abelana. 19 Mme moperesiti o tshwanetse go tsaya legetla le le apeilweng+ la phelefu, mme go tswa mo mmanking a tseye senkgwe se le sengwe se se se nang sebediso se se bopegileng jaaka leseka le phaphatha e le nngwe e e se nang sebediso a bo a di baya mo diatleng tsa Monasirite fa a sena go beola moriri o o supang gore ke Monasirite. 20 Mme moperesiti o tshwanetse go di fokisetsa kwa morago le kwa pele e le setlhabelo se se fokwang fa pele ga ga Jehofa.+ Di tla neelwa moperesiti e le karolo ya gagwe, mmogo le sehuba sa setlhabelo se se fokwang le leoto la moneelo.+ Morago ga moo, Monasirite a ka nna a nwa beine.

21 “‘Ono ke molao o o amanang le Monasirite+ yo o dirang maikano: Fa a ikana e bile a ka kgona go ntshetsa Jehofa mpho e e fetang dilo tse di tlhokegang mo Monasiriteng, foo o tshwanetse go diragatsa maikano a gagwe a kaelwa ke molao wa Bonasirite jwa gagwe.’”

22 Morago ga moo, Jehofa o ne a raya Moshe a re: 23 “Bolelela Arone le bomorwawe o re, ‘Eno ke tsela e lo tla segofatsang+ batho ba Iseraele ka yone. Lo ba reye lo re:

24 “E kete Jehofa a ka lo segofatsa+ a bo a lo sireletsa.

25 E kete Jehofa a ka lo phatsimisetsa sefatlhego sa gagwe,+ mme e kete a ka lo amogela.

26 E kete Jehofa a ka tsholeletsa sefatlhego sa gagwe kwa go lona a bo a lo naya kagiso.”’+

27 Mme ba tshwanetse go bitsa leina la me mo bathong ba Iseraele+ gore ke tle ke ba segofatse.”+

7 Mo letsatsing le Moshe a neng a fetsa go tlhoma motlaagana+ ka lone, o ne a o tlotsa+ a bo a o dira boitshepo mmogo le dithoto tsotlhe tsa one, sebeso le dilwana+ tsotlhe tsa motlaagana. Fa a sena go tlotsa dilo tseno le go di dira boitshepo,+ 2 dikgosana tsa Iseraele,+ ditlhogo tsa dikgotla tsa bone, di ne tsa ntsha dimpho. Dikgosana tseno tsa ditso tse di neng di okametse go kwadisiwa ga batho 3 di ne tsa tlisa fa pele ga ga Jehofa mpho ya tsone ya dikara tse di khurumeditsweng di le thataro le dipholo di le 12, dikgosana tse pedi di ne di ntshitse kara e le nngwe mme kgosana nngwe le nngwe e ne e ntshitse poo;* mme ba ne ba di tlisa fa pele ga motlaagana. 4 Jehofa o ne a raya Moshe a re: 5 “Tsaya dilo tseno mo go bone ka gonne di tla dirisiwa mo tirelong e e dirwang mo tenteng ya bokopanelo, mme o di neye Balefi, o neye mongwe le mongwe se se tlhokegang mo tirong ya gagwe.”

6 Ka jalo, Moshe o ne a tsaya dikara le dikgomo mme a di naya Balefi. 7 O ne a naya bomorwa Gereshone dikara di le pedi le dipholo di le nnê go ya ka se se neng se tlhokega mo ditirong tsa bone;+ 8 mme o ne a naya bomorwa Merari dikara di le nnê le dipholo di le robedi go ya ka se se neng se tlhokega mo ditirong tsa bone, ba okametswe ke Ithamare morwa moperesiti Arone.+ 9 Mme o ne a se ka a naya bomorwa Kohathe sepe ka gonne ditiro tsa bone di ne di akaretsa tirelo ya mo lefelong le le boitshepo+ mme ba ne ba rwala dilo tse di boitshepo mo magetleng a bone.+

10 Jaanong dikgosana di ne tsa ntsha dimpho tsa tsone fa go ne go kgakolwa*+ sebeso mo letsatsing la fa se ne se tlodiwa. Fa dikgosana di ne di tlisa dimpho tsa tsone fa pele ga sebeso, 11 Jehofa o ne a raya Moshe a re: “Mo letsatsing lengwe le lengwe kgosana e le nngwe e tlise mpho ya yone ya go kgakolwa ga sebeso, ba tle ka malatsi a a latelanang.”

12 Mo letsatsing la ntlha Nashone+ morwa Aminadabe wa lotso lwa ga Juda ke ene a neng a tlisa mpho ya gagwe. 13 Mpho ya gagwe e ne e le sejana sa selefera se le sengwe sa bokete jwa dishekele* di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele* sa lefelo le le boitshepo,*+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 14 kopi* ya gauta e le nngwe ya bokete jwa dishekele di le 10 e tletse maswalo; 15 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 16 potsane e le nngwe ya setlhabelo sa boleo;+ 17 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Nashone morwa Aminadabe.+

18 Mo letsatsing la bobedi, Nethanele+ morwa Suare, kgosana ya lotso lwa ga Isakare, o ne a tlisa mpho. 19 O ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 20 kopi ya gauta e le nngwe ya bokete jwa dishekele di le 10 e tletse maswalo; 21 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 22 potsane e le nngwe ya setlhabelo sa boleo;+ 23 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Nethanele morwa Suare.

24 Mo letsatsing la boraro, kgosana ya bomorwa Sebulone, Eliabe+ morwa Helone, 25 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 26 kopi ya gauta e le nngwe ya bokete jwa dishekele di le 10 e tletse maswalo; 27 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 28 potsane e le nngwe ya setlhabelo sa boleo;+ 29 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Eliabe+ morwa Helone.

30 Mo letsatsing la bonê, kgosana ya bomorwa Rubene, Elisure+ morwa Shedeure, 31 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 32 kopi ya gauta e le nngwe ya bokete jwa dishekele di le 10 e tletse maswalo; 33 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 34 potsane e le nngwe ya setlhabelo sa boleo;+ 35 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Elisure+ morwa Shedeure.

36 Mo letsatsing la botlhano, kgosana ya bomorwa Simeone, Shelumiele+ morwa Surishadai, 37 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 38 kopi ya gauta e le nngwe ya bokete jwa dishekele di le 10 e tletse maswalo; 39 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 40 potsane e le nngwe ya setlhabelo sa boleo;+ 41 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Shelumiele+ morwa Surishadai.

42 Mo letsatsing la borataro, kgosana ya bomorwa Gada, Eliasafe+ morwa Duele, 43 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 44 kopi ya gauta e le nngwe ya bokete jwa dishekele di le 10 e tletse maswalo; 45 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 46 potsane e le nngwe ya setlhabelo sa boleo;+ 47 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Eliasafe+ morwa Duele.

48 Mo letsatsing la bosupa, kgosana ya bomorwa Eferaime, Elishama+ morwa Amihude, 49 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 50 kopi ya gauta e le nngwe ya bokete jwa dishekele di le 10 e tletse maswalo; 51 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 52 potsane e le nngwe ya setlhabelo sa boleo;+ 53 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Elishama+ morwa Amihude.

54 Mo letsatsing la borobedi, kgosana ya bomorwa Manase, Gamaliele+ morwa Pedasure, 55 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 56 kopi ya gauta e le nngwe ya bokete jwa dishekele di le 10 e tletse maswalo; 57 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 58 potsane e le nngwe ya setlhabelo sa boleo;+ 59 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Gamaliele+ morwa Pedasure.

60 Mo letsatsing la borobongwe, kgosana+ ya bomorwa Benjamine, Abidane+ morwa Gideoni, 61 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 62 kopi ya gauta e le nngwe ya bokete jwa dishekele di le 10 e tletse maswalo; 63 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 64 potsane e le nngwe ya setlhabelo sa boleo;+ 65 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Abidane+ morwa Gideoni.

66 Mo letsatsing la bolesome, kgosana ya bomorwa Dana, Ahiesere+ morwa Amishadai, 67 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 68 kopi ya gauta e le nngwe ya bokete jwa dishekele di le 10 e tletse maswalo; 69 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 70 potsane e le nngwe ya setlhabelo sa boleo;+ 71 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Ahiesere+ morwa Amishadai.

72 Mo letsatsing la bo11, kgosana ya bomorwa Ashera, Pagiele+ morwa Okerane, 73 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 74 kopi ya gauta e le nngwe ya bokete jwa dishekele di le 10 e tletse maswalo; 75 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 76 potsane e le nngwe ya setlhabelo sa boleo;+ 77 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Pagiele+ morwa Okerane.

78 Mo letsatsing la bo12, kgosana ya bomorwa Nafetali, Ahira+ morwa Enane, 79 o ne a tlisa mpho ya gagwe e le sejana sa selefera se le sengwe sa bokete jwa dishekele di le 130 le sekotlele se sennye sa selefera se le sengwe sa bokete jwa dishekele di le 70 go ya ka selekanyashekele sa lefelo le le boitshepo,+ tsoopedi di tletse bupi jo bo boleta jo bo tlhakantsweng le leokwane gore e nne setlhabelo sa dijo tsa ditlhaka;+ 80 kopi ya gauta e le nngwe ya bokete jwa dishekele di le 10 e tletse maswalo; 81 powana e le nngwe, phelefu e le nngwe le kwanyana e tonanyana e le nngwe e e nang le ngwaga o le mongwe kgotsa kwa tlase, e le tsa setlhabelo se se fisiwang;+ 82 potsane e le nngwe ya setlhabelo sa boleo;+ 83 gape o ne a ntsha dikgomo tse pedi, diphelefu tse tlhano, diphoko tse tlhano le dikwanyana tse ditonanyana di le tlhano nngwe le nngwe ya tsone e na le ngwaga o le mongwe, e le tsa setlhabelo sa go abelana.+ Eno e ne e le mpho ya ga Ahira+ morwa Enane.

84 Eno e ne e le mpho e e tswang mo dikgosaneng tsa Iseraele ya go kgakolwa+ ga sebeso fa se ne se tlodiwa: dijana tsa selefera di le 12, dikotlele tse dinnye tsa selefera di le 12, dikopi tsa gauta di le 12;+ 85 sejana sengwe le sengwe sa selefera se ne se le bokete jwa dishekele di le 130 le sekotlele sengwe le sengwe se sennye se ne se le bokete jwa dishekele di le 70, selefera yotlhe ya dilwana tseno e ne e le dishekele di le 2 400 go ya ka selekanyashekele sa lefelo le le boitshepo;+ 86 nngwe le nngwe ya dikopi tsa gauta di le 12 tse di tletseng maswalo e ne e le bokete jwa dishekele di le 10 go ya ka selekanyashekele sa lefelo le le boitshepo, gauta yotlhe ya dikopi e ne e le dishekele di le 120. 87 Diruiwa tsotlhe tsa setlhabelo se se fisiwang e ne e le dipoo tse 12, diphelefu tse 12, dikwanyana tse ditonanyana di le 12 nngwe le nngwe ya tsone e na le ngwaga o le mongwe le ditlhabelo tsa tsone tsa dijo tsa ditlhaka le dipotsane di le 12 tsa setlhabelo sa boleo; 88 mme diruiwa tsotlhe tsa setlhabelo sa go abelana e ne e le dipoo tse 24, diphelefu tse 60, diphoko tse 60 le dikwanyana tse ditonanyana di le 60 nngwe le nngwe ya tsone e na le ngwaga o le mongwe. Eno e ne e le mpho ya go kgakolwa+ ga sebeso fa se sena go tlodiwa.+

89 Nako epe fela fa Moshe a ne a tsena mo tenteng ya bokopanelo a ya go bua le Modimo,*+ o ne a tle a utlwe lentswe le tlotla le ene le tswa mo godimo ga sekhurumelo+ sa letlole la kgolagano, le tswa mo gare ga ditšheruba tse pedi;+ mme Modimo o ne a tle a bue le ene.

8 Jehofa o ne a bua le Moshe a re: 2 “Bua le Arone mme o mo reye o re, ‘Fa o tshuba dipone, dipone tse supa di bonese mo lefelong le le fa pele ga setlhomo sa dipone.’”+ 3 Ka jalo, Arone o ne a dira jaana: O ne a tshuba dipone tsa sone, a di tshubela lefelo le le fa pele ga setlhomo sa dipone,+ fela jaaka Jehofa a ne a laetse Moshe. 4 Eno ke tsela e setlhomo sa dipone se neng se dirilwe ka yone: E ne e le sa gauta e e papetlilweng; go tswa kwa kutung ya sone go ya kwa malômông* a sone, e ne e le sa gauta e e papetlilweng.+ Setlhomo seno sa dipone se ne se dirilwe go ya ka ponatshegelo+ e Jehofa a neng a e bontshitse Moshe.

5 Jehofa o ne a bua gape le Moshe a re: 6 “Tsaya Balefi mo Baiseraeleng mme o ba dire phepa.+ 7 Eno ke tsela e o tla ba dirang phepa ka yone: Ba kgatšhe ka metsi a a tlhatswang boleo, mme ba tshwanetse go beola mebele yotlhe ya bone ka legare, ba tlhatswe diaparo tsa bone ba bo ba dira gore ba nne phepa.+ 8 Morago ga moo, ba tseye powana+ le setlhabelo sa yone sa dijo tsa ditlhaka+ sa bupi jo bo boleta jo bo tlhakantsweng le leokwane, mme o tseye powana e nngwe gore e nne setlhabelo sa boleo.+ 9 Mme o ise Balefi fa pele ga tente ya bokopanelo o bo o phutha phuthego yotlhe ya Baiseraele.+ 10 Fa o isa Balefi fa pele ga ga Jehofa, Baiseraele ba beye diatla tsa bone mo Balefing.+ 11 Mme Arone o tshwanetse go tlisa* Balefi fa pele ga ga Jehofa e le setlhabelo se se fokwang+ se se tswang mo Baiseraeleng, mme ba tla dira tirelo ya ga Jehofa.+

12 “Go tswa foo, Balefi ba beye diatla tsa bone mo ditlhogong tsa dipoo.+ Morago ga moo, o ntshe poo e nngwe e le setlhabelo sa boleo e nngwe yone e le setlhabelo se se fisiwang se se yang kwa go Jehofa gore o direle Balefi setlhabelo sa go itshwarelwa maleo.+ 13 Mme o laele Balefi gore ba eme fa pele ga ga Arone le bomorwawe o bo o ba ntsha* e le setlhabelo se se fokwang se se yang kwa go Jehofa. 14 O tshwanetse go tlhaola Balefi mo Baiseraeleng, mme Balefi e tla nna ba me.+ 15 Morago ga moo, Balefi ba tla tsena gore ba direle mo tenteng ya bokopanelo. Eno ke tsela e o tla ba dirang phepa ka yone le go ba ntsha* e le setlhabelo se se fokwang. 16 Gonne ke ba ba abilweng, ba ke ba abetsweng go tswa mo Baiseraeleng. Ke tla ba itseela mo boemong jwa maitibolo* otlhe a Baiseraele.+ 17 Gonne leitibolo lengwe le lengwe mo Baiseraeleng ke la me, la motho mmogo le la phologolo.+ Ke ne ka a itlhaolela gore a nne boitshepo mo letsatsing la fa ke ne ke bolaya leitibolo lengwe le lengwe kwa lefatsheng la Egepeto.+ 18 Ke tla tsaya Balefi mo boemong jwa maitibolo otlhe mo Baiseraeleng. 19 Ke tla ntsha Balefi go tswa mo Baiseraeleng ke bo ke ba naya Arone le bomorwawe e le ba ba abilweng, gore ba dire tirelo kwa tenteng ya bokopanelo+ mo boemong jwa Baiseraele le gore ba ntshetse Baiseraele setlhabelo sa go itshwarelwa maleo, gore Baiseraele ba se ka ba tlelwa ke petso epe+ ka gonne batho ba Iseraele ba atametse lefelo le le boitshepo.”

20 Moshe le Arone le phuthego yotlhe ya Baiseraele ba ne ba dira sotlhe se Jehofa a neng a laetse Moshe gore se dirwe ka Balefi. 21 Ka jalo, Balefi ba ne ba iitshekisa ba bo ba tlhatswa diaparo tsa bone+ mme morago ga moo, Arone o ne a ba ntsha* e le setlhabelo se se fokwang fa pele ga ga Jehofa.+ Go tswa foo, Arone o ne a ntsha setlhabelo sa gore maleo a bone a phimolwe mme ba nne phepa.+ 22 Morago ga moo, Balefi ba ne ba tsena gore ba dire tiro e ba e dirang mo tenteng ya bokopanelo fa pele ga ga Arone le bomorwawe. Mme batho ba ne ba dira fela jaaka Jehofa a ne a laetse Moshe gore go dirwe ka Balefi.

23 Jaanong Jehofa o ne a bua le Moshe a re: 24 “Eno ke thulaganyo e e amanang le Balefi: Monna yo dingwaga tsa gagwe di simololang ka 25 go ya kwa godimo, a tsene mo setlhopheng sa ba ba direlang mo tenteng ya bokopanelo. 25 Mme fa a sena go feta dingwaga di le 50, a tswe mo setlhopheng sa ba ba direlang mme ga a kitla a tlhola a direla. 26 A ka nna a direla bomorwarraagwe ba ba nang le maikarabelo kwa tenteng ya bokopanelo, mme ga a tshwanela go dira tirelo epe koo. Seno ke se o tla se dirang ka Balefi le maikarabelo a bone.”+

9 Jehofa o ne a bua le Moshe kwa nageng ya Sinai mo kgweding ya ntlha+ mo ngwageng wa bobedi ba sena go tswa kwa lefatsheng la Egepeto, a re: 2 “Baiseraele ba baakanye setlhabelo sa Tlolaganyo+ ka nako ya yone e e tlhomilweng.+ 3 Lo se baakanye ka nako ya yone e e tlhomilweng, mo letsatsing la bo14 la kgwedi eno ka lotlatlana.* Lo se baakanye go ya ka melao yotlhe ya Tlolaganyo le dithulaganyo tsotlhe tsa yone tse di tlhomilweng.”+

4 Ka jalo, Moshe o ne a bolelela Baiseraele gore ba baakanye setlhabelo sa Tlolaganyo. 5 Ba ne ba baakanya setlhabelo sa Tlolaganyo mo kgweding ya ntlha, mo letsatsing la bo14 la kgwedi ka lotlatlana,* mo nageng ya Sinai. Baiseraele ba ne ba dira go ya ka fa go sotlhe se Jehofa a neng a se laetse Moshe.

6 Jaanong go ne go na le banna ba ba neng ba itshekologile ka ntlha ya go tshwara setopo+ mme ba ne ba se ka ba kgona go baakanya setlhabelo sa Tlolaganyo mo letsatsing leo. Ka jalo, banna bao ba ne ba tla fa pele ga ga Moshe le Arone mo letsatsing leo+ 7 mme ba mo raya ba re: “Re itshekologile ka gonne re ne ra tshwara setopo. Ke ka ntlha yang fa re tshwanetse go thibelwa go isetsa Jehofa setlhabelo ka nako ya sone e e tlhomilweng re na le Baiseraele ba bangwe?”+ 8 Ka yone nako eo, Moshe o ne a ba raya a re: “Letang fano, mme mma ke utlwe se Jehofa a tla se laelang ka lona.”+

9 Foo Jehofa o ne a raya Moshe a re: 10 “Bolelela Baiseraele o re, ‘Le fa motho ope mo go lona kgotsa mo dikokomaneng tsa lona tse di tla latelang a ka itshekologa ka ntlha ya go tshwara setopo+ kgotsa a tsere loeto lo loleele, le ene o sa ntse a tshwanelwa ke go baakanyetsa Jehofa setlhabelo sa Tlolaganyo. 11 Ba se baakanye mo kgweding ya bobedi,+ mo letsatsing la bo14 ka lotlatlana.* Ba se je mmogo le senkgwe se se se nang sebediso le merogo e e galakang.+ 12 Ga ba a tshwanela go sadisa sepe sa sone go fitlha mo mosong+ e bile ba se ka ba roba lerapo lepe mo go sone.+ Ba se baakanye go ya ka molao otlhe o o amanang le Tlolaganyo. 13 Mme gone, fa motho a ne a itshekile kgotsa a ne a sa tsaya loeto a bo a itlhokomolosa go baakanya setlhabelo sa Tlolaganyo, motho yoo o tshwanetse go bolawa+ ka gonne ga a ka a isa setlhabelo sa ga Jehofa ka nako ya sone e e tlhomilweng. Motho yoo o tla rwala boleo jwa gagwe.

14 “‘Mme fa motswakwa mongwe a agile le lona, le ene a baakanyetse Jehofa setlhabelo sa Tlolaganyo.+ A dire jalo go ya ka molao wa Tlolaganyo le thulaganyo ya yone e e tlhomilweng.+ Go nne le molao o le mongwe fela mo go lona, mo mothong yo e leng motswakwa mmogo le mo mothong wa lefatshe la lona.’”+

15 Jaanong mo letsatsing la fa motlaagana o ne o tlhomiwa,+ leru le ne la khurumetsa motlaagana o o nang le letlole la kgolagano* mme mo maitseboeng se se neng se bonala e kete molelo se ne sa tswelela se le mo godimo ga motlaagana go fitlha mo mosong.+ 16 Seno ke se se neng se nna se direga: Leru le ne le o khurumetsa motshegare, mme bosigo go ne go bonala se e keteng molelo.+ 17 Nako epe fela fa leru le ne le tsholetsega le tswa mo tenteng, ka yone nako eo Baiseraele ba ne ba fuduga,+ mme mo lefelong le leru le neng le ema mo go lone, ke gone kwa Baiseraele ba neng ba tla nna gone.+ 18 Baiseraele ba ne ba fuduga ka taelo ya ga Jehofa e bile ba ne ba nna ka taelo ya ga Jehofa.+ Fa fela leru le ne le le mo godimo ga motlaagana, ba ne ba tla tswelela ba le gone foo. 19 Fa leru le ne le nna mo godimo ga motlaagana malatsi a le mantsi, Baiseraele ba ne ba ikobela Jehofa mme ba ne ba sa fuduge.+ 20 Ka dinako tse dingwe leru le ne le tswelela le le mo godimo ga motlaagana malatsi a le mmalwa. Ba ne ba tswelela ba le mo kampeng ka taelo ya ga Jehofa e bile ba ne ba fuduga ka taelo ya ga Jehofa. 21 Ka dinako tse dingwe leru le ne le ema fela go tloga maitseboa go fitlha mo mosong, mme fa leru le ne le tsholetsega mo mosong, ba ne ba tsamaya. Le fa leru le ne le ka tsholetsega motshegare kgotsa bosigo, ba ne ba fuduga.+ 22 E ka tswa e ne e le malatsi a mabedi, kgwedi kgotsa go feta, fa fela leru le ne le sa ntse le le mo godimo ga motlaagana, Baiseraele ba ne ba tswelela ba le mo kampeng mme ba ne ba sa fuduge. Le fa go ntse jalo, fa le ne le tsholetsega, ba ne ba fuduga. 23 Ba ne ba kampa ka taelo ya ga Jehofa e bile ba ne ba fuduga ka taelo ya ga Jehofa. Ba ne ba ikobela Jehofa ka go diragatsa se Jehofa a neng a se laetse ka Moshe.

10 Go tswa foo, Jehofa o ne a raya Moshe a re: 2 “Itirele diterompeta di le pedi;+ o di dire ka selefera e e papetlilweng mme o di dirisetse go bitsa phuthego le go fudusa dikampa. 3 Fa tsoopedi di lediwa, phuthego yotlhe e tshwanetse go phuthegela kwa go wena kwa kgorong ya tente ya bokopanelo.+ 4 Fa go lediwa e le nngwe, dikgosana, e leng ditlhogo tsa ba ba dikete ba Iseraele, ke tsone fela tse di tla phuthegelang kwa go wena.+

5 “Fa lo letsa modumo wa terompeta o o fetofetogang, dikampa tse di kwa botlhaba+ di fuduge. 6 Fa lo letsa modumo wa terompeta o o fetofetogang lekgetlo la bobedi, dikampa tse di kwa borwa+ di fuduge. Ba letse medumo ya terompeta ka tsela eno nako le nako fa kampa nngwe e fuduga.

7 “Jaanong fa lo bitsa phuthego, lo letse diterompeta+ tseno, mme lo se ka lwa di letsa ka modumo o o fetofetogang. 8 Bomorwa Arone, e bong baperesiti, ba letse diterompeta+ tseno mme lo tla di dirisa e le molao o o tla nnelang ruri mo go lona mo dikokomaneng tsotlhe tsa lona.

9 “Fa lo le mo lefatsheng la lona mme lo ya ntweng lo ya go lwa le mogateledi yo o lo bogisang, lo letse mokgosi wa ntwa ka diterompeta+ tseno mme Jehofa, Modimo wa lona, o tla lo gakologelwa a bo a lo boloka mo babeng ba lona.

10 “Gape le mo dipakeng tsa lona tsa go itumela,+ e leng meletlo+ ya lona le mo tshimologong ya dikgwedi tsa lona, lo letse diterompeta tseno fa lo tlisa ditlhabelo tsa lona tse di fisiwang+ le ditlhabelo tsa lona tsa go abelana;+ di tla dira gore Modimo wa lona a lo gopole. Ke nna Jehofa, Modimo wa lona.”+

11 Jaanong mo ngwageng wa bobedi, mo kgweding ya bobedi, mo letsatsing la bo20 la kgwedi eo,+ leru le ne la tsholetsega la tswa mo godimo ga motlaagana+ o o nang le letlole la kgolagano.* 12 Ka jalo, Baiseraele ba ne ba simolola go fuduga ba tswa mo nageng ya Sinai ka thulaganyo e ba neng ba e diretswe gore ba e latele fa ba fuduga,+ mme leru la nna mo nageng ya Parana.+ 13 Leno e ne e le lekgetlo la ntlha ba fuduga ba latela thulaganyo ya ga Jehofa e a neng a e laetse Moshe.+

14 Ka jalo, setlhopha sa ditso tse tharo tsa kampa ya bomorwa Juda se ne sa tsamaya pele go ya ka mephato ya sone,* mme Nashone+ morwa Aminadabe o ne a okametse mophato wa sone. 15 Mophato wa lotso lwa bomorwa Isakare o ne o okametswe ke Nethanele+ morwa Suare. 16 Mophato wa lotso lwa bomorwa Sebulone o ne o okametswe ke Eliabe+ morwa Helone.

17 E ne e re fa motlaagana o tlhatlhamololwa,+ bomorwa Gereshone+ le bomorwa Merari,+ ba ba neng ba tsaya motlaagana, ba ne ba tsamaya.

18 Go tswa foo, setlhopha sa ditso tse tharo tsa kampa ya ga Rubene se ne se tsamaya go ya ka mephato ya sone,* mme Elisure+ morwa Shedeure o ne a okametse mophato wa sone. 19 Mophato wa lotso lwa bomorwa Simeone o ne o okametswe ke Shelumiele+ morwa Surishadai. 20 Mophato wa lotso lwa bomorwa Gada o ne o okametswe ke Eliasafe+ morwa Duele.

21 Morago ga moo, go ne go tsamaya Bakohathe, ba ba neng ba tsaya dilwana tsa lefelo le le boitshepo.+ Motlaagana o ne o tla bo o tlhomilwe ka nako ya fa ba goroga.

22 Go tswa foo, setlhopha sa ditso tse tharo tsa kampa ya bomorwa Eferaime se ne sa tsamaya go ya ka mephato ya sone,* mme Elishama+ morwa Amihude o ne a okametse mophato wa sone. 23 Mophato wa lotso lwa bomorwa Manase o ne o okametswe ke Gamaliele+ morwa Pedasure. 24 Mophato wa lotso lwa bomorwa Benjamine o ne o okametswe ke Abidane+ morwa Gideoni.

25 Morago ga moo, setlhopha sa ditso tse tharo tsa kampa ya bomorwa Dana se ne sa tsamaya go ya ka mephato ya sone,* e ne ya nna sone se se sireletsang dikampa tsotlhe kwa morago, mme Ahiesere+ morwa Amishadai o ne a okametse mophato wa sone. 26 Mophato wa lotso lwa bomorwa Ashera o ne o okametswe ke Pagiele+ morwa Okerane. 27 Mophato wa lotso lwa bomorwa Nafetali o ne o okametswe ke Ahira+ morwa Enane. 28 Eno e ne e le thulaganyo ya go fuduga e Baiseraele le mephato ya bone* ba neng ba e latela fa ba ne ba fuduga.+

29 Foo Moshe o ne a raya Hobabe morwa Reuele*+ wa Momidiana, mogwegadiagwe Moshe a re: “Re fudugela kwa lefelong le Jehofa a neng a bua ka lone a re, ‘Ke tla le lo naya.’+ Tsamaya le rona,+ mme re tla go tshwara sentle ka gonne Jehofa o solofeditse Iseraele dilo tse di molemo.”+ 30 Mme ene a mo raya a re: “Ga nkitla ke tsamaya le lona. Ke tla boela kwa nageng ya gaetsho le kwa go ba losika lwa me.” 31 Foo Moshe o ne a mo raya a re: “Tsweetswee, o se ka wa re tlogela ka gonne o itse kwa re yang go nna gone mo nageng e bile o ka nna mokaedi wa* rona. 32 Mme fa o ka tsamaya le rona,+ molemo ope fela o Jehofa a tla re o bontshang, ruri le rona re tla go o bontsha.”

33 Ka jalo, ba ne ba simolola go tswa kwa thabeng ya ga Jehofa+ ba tsamaya malatsi a le mararo mme letlole+ la kgolagano ya ga Jehofa le ne le tsamaya kwa pele ga bone mo loetong lono lwa malatsi a le mararo gore le ba batlele lefelo la boikhutso.+ 34 Mme leru la ga Jehofa+ le ne le le kwa godimo ga bone motshegare fa ba ne ba tswa mo kampeng.

35 Nako epe fela fa Letlole le ne le fudusiwa, Moshe o ne a tle a re: “Dira sengwe tlhe Jehofa,+ mme o gasamise baba ba gago, a ba ba go tlhoileng ba tshabe fa pele ga gago.” 36 Mme fa le ne le ema, o ne a tle a re: “Boela mo diketeketeng tsa Baiseraele tse di se nang palo* tlhe Jehofa.”+

11 Jaanong batho ba ne ba simolola go ngongorega fa pele ga ga Jehofa. Fa Jehofa a utlwa seno, o ne a galefa fela thata mme molelo o o tswang kwa go Jehofa o ne wa simolola go ba tukela o bo o laila bangwe ba bone kwa thoko ga kampa. 2 Fa batho ba simolola go lelela kwa go Moshe, o ne a rapela Jehofa ka tlhoafalo+ mme molelo wa tima. 3 Ka jalo, lefelo leo le ne la bidiwa Tabera,* ka gonne molelo o o tswang kwa go Jehofa o ne o ba tuketse.+

4 Morago ga moo, boidiidi jwa batho ba ba farologaneng*+ ba ba neng ba na le bone ba ne ba nna le keletso ya bopelotshetlha,+ mme Baiseraele le bone ba ne ba simolola go lela gape mme ba re: “Ke mang yo o tla re nayang nama gore re je?+ 5 Ruri re gakologelwa tlhapi e re neng re tle re e je mahala kwa Egepeto, le dikomokomore,* magapu, diliki, dieie le kaliki!*+ 6 Mme jaanong re nna bokoa. Ga go na sepe se re se bonang fa e se mana+ ano fela.”

7 Mme gone, mana+ a ne a tshwana le peo ya koriandere+ e bile a ne a lebega jaaka borekhu jwa beteleuma. 8 Batho ba ne ba tle ba tswe ba ye go a sela ba bo ba a sila mo malwaleng kgotsa ba a thuga mo kikeng. Go tswa foo, ba ne ba a bedisa mo dipitseng tse di apeelang kgotsa ba dira dinkgwe tse di kgolokwe+ ka one, mme mo ganong a ne a utlwala jaaka kuku e e botshe e e tsentsweng leokwane. 9 Fa monyo o ne o wela mo kampeng bosigo, mana le one a ne a wela mo go yone.+

10 Moshe o ne a utlwa batho ba lela, mo lelapeng lengwe le lengwe, monna mongwe le mongwe kwa kgorong ya tente ya gagwe. Mme Jehofa o ne a galefa fela thata,+ Moshe le ene o ne a hutsafala fela thata. 11 Foo Moshe o ne a raya Jehofa a re: “Ke ka ntlha yang fa o bogisitse motlhanka wa gago? Ke ka ntlha yang fa o sa nkamogela mo e leng gore o ne wa baya morwalo wa batho bano botlhe mo go nna?+ 12 A ke ne ka ima batho bano botlhe? A ke ne ka ba tshola, mo o ka nthayang wa re, ‘Ba tshole mo sehubeng sa gago, fela jaaka motlhokomedi* a kuka losea lo lo anyang,’ o ba ise kwa lefatsheng le o neng wa ikana gore o tla le naya borraabonemogolo?+ 13 Ke tla tsaya kae nama gore ke e neye batho bano botlhe? Gonne ba nnetse go lela fa pele ga me ba re, ‘Re neye nama re je!’ 14 Ga ke kgone go tlhokomela batho bano botlhe ke le nosi; ke tiro e ntsi thata mo go nna.+ 15 Fa e le gore ke kafa o tlileng go ntshwara ka teng, tsweetswee mpolaye gone jaanong.+ Fa e le gore o a nkamogela, dira gore ke se ka ka bona masetlapelo a a oketsegileng.”

16 Jehofa o ne a araba Moshe a re: “Mphuthela banna ba le 70 go tswa mo bagolwaneng ba Iseraele, banna ba o ba tsayang e le* bagolwane e bile e le badiredi ba batho,+ mme o ba ise kwa tenteng ya bokopanelo o bo o ba laela gore ba eme koo le wena. 17 Ke tla fologa+ ke tla go bua le wena koo+ mme ke tla tsaya moya+ mongwe o o mo go wena ke bo ke o baya mo go bone, mme ba tla go thusa go dira tiro e e boima ya go tlhokomela batho bano gore o se ka wa tshwanelwa ke go ba tlhokomela o le nosi.+ 18 O reye batho o re, ‘Kamoso lo iphepafatse*+ ka gonne ruri lo tlile go ja nama, ka ntlha ya gore Jehofa o ne a lo reeditse+ fa lo ne lo lela mme lo re: “Ke mang yo o tla re nayang nama gore re je? Re ne re tshela botoka kwa Egepeto.”+ Ruri Jehofa o tlile go lo naya nama, mme lo tla ja.+ 19 Lo tla ja, e seng letsatsi le le lengwe kgotsa malatsi a le 2 kgotsa malatsi a le 5 kgotsa malatsi a le 10 kgotsa malatsi a le 20, 20 mme lo tla e ja kgwedi yotlhe, go fitlha e tswa ka dinko e bo e nna selo se se lo tenang+ ka gonne lo ne lwa gana Jehofa, yo o mo gare ga lona e bile lo ne lwa lela fa pele ga gagwe lo re: “Ke ka ntlha yang fa re ne re tswa kwa Egepeto?”’”+

21 Go tswa foo, Moshe o ne a re: “Batho ba ke leng mo gare ga bone ke banna ba le 600 000+ ba ba tsamayang ka dinao, mme le fa go ntse jalo wena o rile, ‘Ke tla ba naya nama, mme ba tla ja e e lekaneng kgwedi yotlhe’! 22 Fa matsomane le metlhape yotlhe e ne e ka tlhabiwa, a e ne e tla ba lekana? Kgotsa fa ditlhapi tsotlhe tsa lewatle di ne di ka tshwarwa, a di ne di tla ba lekana?”

23 Morago ga moo, Jehofa o ne a raya Moshe a re: “A seatla sa ga Jehofa se sekhutshwane thata?+ Jaanong o tla bona gore a se ke se buang se tla go diragalela kgotsa nnyaa.”

24 Ka jalo, Moshe o ne a tswa mme a bolelela batho mafoko a ga Jehofa. Gape o ne a phutha banna ba le 70 go tswa mo bagolwaneng ba batho a bo a ba laela gore ba eme go dikologa tente.+ 25 Go tswa foo, Jehofa o ne a fologa a le mo lerung+ mme a bua le ene+ a bo a tsaya moya mongwe+ o o neng o le mo go ene a o baya mo go mongwe le mongwe wa bagolwane bao ba ba 70. E rile fela fa moya o nna mo go bone, ba ne ba simolola go porofeta,+ mme gone ga ba a ka ba dira jalo gape.

26 Go ne go na le banna ba le babedi ba ba neng ba sa ntse ba le mo kampeng. Maina a bone e ne e le Eledade le Medade. Mme moya o ne wa nna mo go bone ka gonne e ne e le bangwe ba maina a bone a neng a kwadilwe, mme gone ba ne ba sa ya kwa tenteng. Ka jalo, ba ne ba itshwara ka tsela e baporofeti ba itshwarang ka yone. 27 Mme lekawana lengwe le ne la siana la ya go begela Moshe la re: “Eledade le Medade ba itshwara jaaka baporofeti mo kampeng!” 28 Foo Joshua+ morwa Nune, yo e neng e le modiredi wa ga Moshe go tloga a sa le mosha, o ne a araba a re: “Moshe morena wa me, ba thibele!”+ 29 Le fa go ntse jalo, Moshe o ne a mo raya a re: “A o tshwenyegile ka gore seno se tla nkama jang?* Ke eletsa e kete batho botlhe ba ga Jehofa e ka bo e le baporofeti le gore Jehofa o ne a ka baya moya wa gagwe mo go bone!” 30 Moragonyana Moshe o ne a boela kwa kampeng a na le bagolwane ba Iseraele.

31 Morago ga moo, go ne ga tsoga phefo e e tswang kwa go Jehofa mme e ne ya tlisa dinonyane tsa maphurwana* go tswa kwa lewatleng mme ya dira gore di wele mo kampeng yotlhe,+ mo e ka nnang loeto lwa letsatsi mo ntlheng eno le mo e ka nnang loeto lwa letsatsi mo ntlheng e nngwe, go dikologa kampa yotlhe, mme di ne di le bogodimo jwa disentimetara di le 89* go tswa fa fatshe. 32 Ka jalo, mo letsatsing leo lotlhe le bosigo jotlhe le mo letsatsing lotlhe le le latelang, batho ba ne ba nna ba sa robale ba phutha maphurwana.* Ga go ope yo o neng a phuthile selekanyo se se kwa tlase ga dinkgo tse ditona* di le lesome, mme ba ne ba nna ba a ikanegela mo kampeng yotlhe. 33 E rile nama e sa ntse e le mo menong a bone, pele ga ba ka e tlhafuna, Jehofa o ne a galefela batho fela thata mme Jehofa o ne a simolola go itaya batho ka petso e kgolo e e bolayang.+

34 Ka jalo, ba ne ba bitsa lefelo leo Kiberothe-hataafa*+ ka gonne ke gone kwa ba neng ba fitlhela batho ba ba neng ba nna le keletso ya bopelotshetlha.+ 35 Batho ba ne ba fuduga kwa Kiberothe-hataafa ba ya kwa Haserothe, mme ba nna kwa Haserothe.+

12 Jaanong Miriame le Arone ba ne ba simolola go ngongorega ka Moshe ka ntlha ya mosadi wa Mokushe yo a neng a mo nyetse, ka gonne o ne a tsere mosadi wa Mokushe.+ 2 Ba ne ba re: “A Jehofa o buile ka Moshe a le nosi fela? A ga a bua le ka rona?”+ Mme Jehofa o ne a reeditse.+ 3 Jaanong monna yono e bong Moshe o ne a le boikokobetso thata go gaisa batho botlhe*+ mo lefatsheng.

4 Ka yone nako eo, Jehofa o ne a raya Moshe le Arone le Miriame a re: “Yang kwa tenteng ya bokopanelo ka boraro jwa lona.” Ka jalo, ba ne ba tsamaya ka boraro jwa bone. 5 Mme Jehofa o ne a fologa a le mo pilareng ya leru+ a bo a ema fa kgorong ya tente, mme o ne a bitsa Arone le Miriame. Boobabedi ba ne ba atamela. 6 Go tswa foo, o ne a re: “Tsweetswee, utlwang mafoko a me. Fa go ne go na le moporofeti wa ga Jehofa mo go lona, ke ne ke tla mo ikitsise mo ponatshegelong+ e bile ke ne ke tla bua le ene mo torong.+ 7 Mme ga go a nna jalo ka motlhanka wa me Moshe! O na le boikarabelo jwa go tlhokomela batho ba me.*+ 8 Ke bua le ene re lebane difatlhego*+ ke gololesegile, e seng ka dithamalakane; mme o kgona go bona ponalo ya ga Jehofa. Ke ka ntlha yang fa lo ne lwa se ka lwa boifa go ngongorega ka motlhanka wa me Moshe?”

9 Ka jalo, bogale jwa ga Jehofa bo ne jwa ba tukela mme a tswa fa go bone. 10 Leru le ne la tswa mo godimo ga tente, mme Miriame o ne a iteilwe ka lepero a le mosweu jaaka kapoko.+ Foo Arone o ne a retologela kwa go Miriame mme o ne a bona gore o iteilwe ka lepero.+ 11 Ka yone nako eo, Arone o ne a raya Moshe a re: “Ke a go kopa morena wa me! Tsweetswee, o se ka wa re balela boleo jono! Re dirile bomatla tota. 12 Tsweetswee, o se ka wa mo tlogela gore a nne jaaka mongwe yo o suleng, yo nama ya gagwe e ngathogileng fa a ne a tsholwa!” 13 Mme Moshe o ne a simolola go goela kwa go Jehofa a re: “Ao tlhe Modimo, tsweetswee mo fodise! Tsweetswee!”+

14 Jehofa o ne a araba Moshe a re: “Fa rraagwe a ne a ka mo kgwela mathe mo sefatlhegong, a o ne a se kitla a kokobediwa malatsi a le supa? A a bewe a le esi kwa ntle ga kampa malatsi a le supa+ mme morago ga moo a ka nna a letlwa go tsena.” 15 Ka jalo, Miriame o ne a bewa a le esi kwa ntle ga kampa malatsi a le supa+ mme batho ba ne ba se ka ba fuduga go fitlha Miriame a letlwa go tsena. 16 Go tswa foo, batho ba ne ba fuduga mo Haserothe+ mme ba ya go nna kwa nageng ya Parana.+

13 Jaanong Jehofa o ne a bua le Moshe a re: 2 “Romela banna gore ba ye go tlhola* lefatshe la Kanana, le ke tla le nayang Baiseraele. Lo romele monna a le mongwe gore a emele lotso lwa ga rraagwe, mongwe le mongwe e le kgosana+ ya bone.”+

3 Ka jalo, Moshe o ne a ba roma go tswa mo nageng ya Parana+ ka taelo ya ga Jehofa. Banna bano botlhe e ne e le ditlhogo tsa Baiseraele. 4 Ano ke maina a bone: wa lotso lwa ga Rubene, Shammua morwa Sakure; 5 wa lotso lwa ga Simeone, Shafate morwa Hori; 6 wa lotso lwa ga Juda, Kalebe+ morwa Jefune; 7 wa lotso lwa ga Isakare, Igale morwa Josefa; 8 wa lotso lwa ga Eferaime, Hoshea+ morwa Nune; 9 wa lotso lwa ga Benjamine, Palati morwa Rafu; 10 wa lotso lwa ga Sebulone, Gadiele morwa Sodi; 11 wa lotso lwa ga Josefa,+ yo o emelang lotso lwa ga Manase,+ Gadi morwa Susi; 12 wa lotso lwa ga Dana, Amiele morwa Gemali; 13 wa lotso lwa ga Ashera, Sethure morwa Mikaele; 14 wa lotso lwa ga Nafetali, Nabi morwa Fofesi; 15 wa lotso lwa ga Gada, Geuele morwa Maki. 16 Ano ke maina a banna ba Moshe a neng a ba roma go ya go tlhola lefatshe. Mme Moshe o ne a bitsa Hoshea morwa Nune a re Joshua.*+

17 Fa Moshe a ne a ba roma go ya go tlhola lefatshe la Kanana, o ne a ba raya a re: “Tlhatlogang lo tsene mo Negebe, go tswa foo, lo tlhatlogele kwa kgaolong e e dithaba.+ 18 Lo ye go tlhola lefatshe leo gore le ntse jang+ le gore a batho ba ba nnang mo go lone ba nonofile kgotsa ba bokoa, a ba mmalwa kgotsa ba bantsi, 19 le gore a lefatshe le ba nnang mo go lone le molemo kgotsa le bosula le gore a metse e ba nnang mo go yone ke dikampa kgotsa e ageletswe ka dipota. 20 Gape lo tlhole gore a lefatshe leo le humile* kgotsa le humanegile,*+ le gore a go na le ditlhare mo go lone kgotsa nnyaa. Lo tshwanetse go nna pelokgale+ mme lo tseye mangwe a maungo a lefatshe leo.” Jaanong e ne e le ka paka ya morara* o o buduleng pele.+

21 Ka jalo, ba ne ba tlhatloga mme ba tlhola lefatshe go tswa kwa nageng ya Tsine+ go ya kwa Rehobe,+ gaufi le Lebo-hamathe.*+ 22 Fa ba tlhatlogela kwa Negebe, ba ne ba goroga kwa Heberone,+ kwa Ahimane, Sheshai le Talemai,+ ba e leng Baanake,+ ba neng ba nna gone. Mme Heberone e ne e agilwe dingwaga di le supa pele ga Soane e e kwa Egepeto. 23 Fa ba fitlha mo Mokgatšheng* wa Eshekole,+ ba ne ba kgaola kala ya morara, e banna ba le babedi mo go bone ba neng ba tshwanelwa ke go e rwala ka kota, mmogo le digaranata le difeige.+ 24 Ba ne ba bitsa lefelo leo Mokgatšha* wa Eshekole,*+ ka ntlha ya kala e Baiseraele ba neng ba e kgaotse koo.

25 Kwa bokhutlong jwa malatsi a le 40,+ ba ne ba boa ba tswa go tlhola lefatshe. 26 Ka jalo, ba ne ba boela kwa go Moshe le Arone le kwa phuthegong yotlhe ya Baiseraele kwa nageng ya Parana, kwa Kadeshe.+ Ba ne ba tlisa pego kwa phuthegong yotlhe e bile ba ne ba ba bontsha maungo a lefatshe leo. 27 Eno ke pego e ba neng ba e bolelela Moshe: “Re ne ra tsena mo lefatsheng le o neng o re romile kwa go lone, mme ruri le elela mashi le tswina ya dinotshe+ e bile ano ke maungo a lone.+ 28 Le fa go ntse jalo, batho ba ba nnang mo lefatsheng leo ba nonofile e bile metse ya bone e e sireletsegileng e megolo thata. Gape re bone Baanake koo.+ 29 Baamaleke+ ba nna mo lefatsheng la Negebe,+ mme Bahite, Bajebuse+ le Baamore+ ba nna mo kgaolong e e dithaba, mme Bakanana+ ba nna gaufi le lewatle+ le fa thoko ga Joredane.”

30 Foo Kalebe o ne a leka go ritibatsa batho fa ba ntse ba eme fa pele ga ga Moshe, a re: “A re tlhatlogeng ka bonako, mme re tla le rua, ka gonne ruri re ka kgona go le gapa.”+ 31 Le fa go ntse jalo, banna ba ba neng ba tsamaile le ene ba ne ba re: “Re ka se kgone go tlhatloga re ya go tlhasela batho bao ka gonne ba nonofile go re feta.”+ 32 Mme ba ne ba nna ba naya Baiseraele pego e e sa siamang+ ka lefatshe le ba neng ba ile go le tlhola, ba re: “Lefatshe le re neng ra tsamaya mo go lone re le tlhola, ke lefatshe le le jang banni ba lone, mme batho botlhe ba re ba boneng mo go lone ke banna ba bogolo jo bo sa tlwaelegang.+ 33 Gape re bone Banefilime gone, bomorwa Anake,+ ba ba tswang mo* Banefilimeng, mme fa re ipapisa le bone re ne re ntse jaaka ditsiakgope fela, le bone ba ne ba re bona re ntse jaaka ditsiakgope.”

14 Go tswa foo, phuthego yotlhe e ne ya tsholetsa lentswe la yone, mme batho ba tswelela ba goa e bile ba lela bosigo joo jotlhe.+ 2 Baiseraele botlhe ba ne ba simolola go ngongorega ka Moshe le Arone,+ mme phuthego yotlhe e ne ya ngongorega ka bone e re: “Bogolo re ka bo re ile ra swela kwa lefatsheng la Egepeto kgotsa bogolo re ka bo re ile ra swela mo nageng eno! 3 Ke ka ntlha yang fa Jehofa a re tlisa mo lefatsheng leno gore re we ka tšhaka?+ Basadi ba rona le bana ba rona ba tla gapiwa.+ A ga go botoka gore re boele kwa Egepeto?”+ 4 Tota e bile ba ne ba raana ba re: “A re tlhomeng moeteledipele mme re boeleng kwa Egepeto!”+

5 Foo Moshe le Arone ba ne ba wela fa fatshe ka difatlhego fa pele ga phuthego yotlhe ya Baiseraele e e neng e phuthegile. 6 Joshua+ morwa Nune le Kalebe+ morwa Jefune, ba ba neng ba le mo gare ga ba ba neng ba ile go tlhola lefatshe, ba ne ba gagoganya diaparo tsa bone, 7 mme ba ne ba raya phuthego yotlhe ya Baiseraele ba re: “Lefatshe le re neng ra tsamayatsamaya mo go lone re le tlhola ke lefatshe le le molemo fela thata.+ 8 Fa e le gore Jehofa o a re itumelela, ruri o tla re tsenya mo lefatsheng leo a bo a le re naya, lefatshe le le elelang mashi le tswina ya dinotshe.+ 9 Mme ga lo a tshwanela go tlhanogela Jehofa e bile ga lo a tshwanela go boifa batho ba lefatshe leo+ ka gonne re tla ba nyeletsa.* Tshireletsego ya bone e tlositswe mo go bone mme Jehofa o na le rona.+ Lo se ka lwa ba boifa.”

10 Le fa go ntse jalo, phuthego yotlhe e ne ya re e tla ba kgobotletsa ka maje.+ Mme kgalalelo ya ga Jehofa e ne ya bonala mo tenteng ya bokopanelo batho botlhe ba Iseraele ba lebile.+

11 Morago ga moo, Jehofa o ne a raya Moshe a re: “Batho bano ga ba kitla ba ntlotla ka lobaka lo lo kae+ e bile ga ba kitla ba dumela mo go nna ka lobaka lo lo kae le fa gone ba bone ditshupo tsotlhe tse ke neng ka di dira mo go bone?+ 12 Mma ke ba iteye ka bolwetse jwa leroborobo ke bo ke ba leleke, mme mma ke go dire setšhaba se segolo le se se thata go ba feta.”+

13 Le fa go ntse jalo, Moshe o ne a raya Jehofa a re: “Mme Baegepeto, ba o ntshitseng batho bano mo go bone ka maatla a gago, ba tla utlwa seo,+ 14 mme ba tla bolelela banni ba lefatshe leno ka gone. Bano le bone ba utlwile gore wena, Jehofa, o na le batho bano+ le gore o iponaditse mo go bone lo lebane difatlhego.+ O Jehofa, mme leru la gago le eme mo godimo ga bone e bile o tsamaya fa pele ga bone ka pilara ya leru motshegare le ka pilara ya molelo bosigo.+ 15 Fa o bolaya batho bano botlhe ka nako e le nngwe,* ditšhaba tse di utlwileng ka go tuma ga gago di tla bua jaana: 16 ‘Jehofa o ne a sa kgone go tlisa batho bano mo lefatsheng le a neng a ikana gore o tla le ba naya, ka jalo o ba bolaetse mo nageng.’+ 17 Tsweetswee, jaanong Jehofa, a maatla a gago a nne magolo fela jaaka o solofeditse fa o ne o re: 18 ‘Jehofa, yo o sa galefeng ka bonako le yo o nang le lorato lo logolo lo lo sa kgaotseng,*+ yo o itshwarelang phoso le molato, mme le ka motlha a se kitla a tlogela ba ba molato ba sa otlhaiwa, yo o otlhaelang bana ba basimane molato wa borraabone, mo kokomaneng ya boraro le mo kokomaneng ya bonê.’+ 19 Tsweetswee, itshwarele molato wa batho bano go ya ka lorato lwa gago lo logolo lo lo sa kgaotseng, fela jaaka o itshwaretse batho bano go tswa kwa Egepeto go tla go fitlha jaanong.”+

20 Foo Jehofa o ne a re: “Ke a ba itshwarela go ya ka lefoko la gago.+ 21 Mme ka fa letlhakoreng le lengwe, ke ikana ka nna gore lefatshe lotlhe le tla tlala kgalalelo ya me, nna Jehofa.+ 22 Le fa go ntse jalo, ga go ope wa banna ba ba boneng kgalalelo ya me le ditshupo+ tsa me tse ke di dirileng kwa Egepeto le mo nageng eno, mme gone a ile a tswelela a nteka+ makgetlo ano a le lesome e bile a sa reetsa lentswe la me+ 23 yo o tla bonang lefatshe le ke neng ka le ikanela borraabone. Nnyaa, botlhe ba ba sa ntlotleng ga ba kitla ba le bona.+ 24 Mme gone, e re ka motlhanka wa me Kalebe+ a ne a farologane le ba bangwe* e bile a ile a nna a ntshala morago ka pelo yotlhe, ruri ke tla mo tlisa mo lefatsheng le a neng a ya kwa go lone, mme bana ba gagwe ba tla le rua.+ 25 E re ka Baamaleke le Bakanana+ ba nna mo mokgatšheng,* kamoso lo boele kwa morago mme lo ye kwa nageng ka tsela ya Lewatle le Lehibidu.”+

26 Go tswa foo, Jehofa o ne a raya Moshe le Arone a re: 27 “Phuthego eno e e bosula e tla nna e ngongorega ka nna ka lobaka lo lo kae?+ Ke utlwile se Baiseraele ba se ngongoregelang ka nna.+ 28 Lo ba reye lo re, ‘“Ruri ke ikana ka nna,” go bua nna Jehofa, “ke tla lo dira sone se ke utlwileng lo se bua!+ 29 Ditopo tsa lona di tla wela mo nageng+ eno, lotlhe fela go simolola ka ba ba nang le dingwaga di le 20 go ya kwa godimo ba ba neng ba kwadisitswe, lona lotlhe ba lo neng lo ngongorega ka nna.+ 30 Ga go ope wa lona yo o tla tsenang mo lefatsheng le ke neng ka ikana* gore ke tla lo le naya gore lo age mo go lone,+ kwantle ga ga Kalebe morwa Jefune le Joshua morwa Nune.+

31 “‘“Mme ke tla tsenya bana ba lona mo lefatsheng leo, ba lo neng lo re ba tla gapiwa,+ mme ba tla itse lefatshe le lo neng lwa le gana.+ 32 Ditopo tsa lona tsone di tla wela mo nageng eno. 33 Jaanong bomorwaalona ba tla nna badisa mo nageng eno dingwaga di le 40+ mme ba tla tshwanelwa ke go duelela ditiro tsa lona tsa go sa ikanyege* go fitlha setopo sa bofelo sa lona se wela mo nageng eno.+ 34 Lo tla duelela melato ya lona dingwaga di le 40+ go ya ka palo ya malatsi a lo neng lwa ya go tlhola lefatshe ka one, e leng malatsi a le 40,+ ka gonne letsatsi le emelwa ke ngwaga, letsatsi le emelwa ke ngwaga, mme lo tla itse diphelelo tsa go ntlhanogela.*

35 “‘“Nna Jehofa, ke buile. Seno ke se ke tla se dirang phuthego eno yotlhe e e bosula, ba ba phuthegileng mmogo gore ba se ka ba inkobela: Ba tla felela mo nageng eno e bile ba tla swela fano.+ 36 Banna ba Moshe a neng a ba roma go ya go tlhola lefatshe, ba ba ileng ba dira gore phuthego yotlhe e mo ngongoregele fa ba ne ba boa ka pego e e sa siamang ka lefatshe leo,+ 37 bone banna ba ba neng ba tlisa pego e e sa siamang, ba tla itewa mme ba tla swela fa pele ga ga Jehofa.+ 38 Mme Joshua morwa Nune le Kalebe morwa Jefune, ba ba neng ba ile go tlhola lefatshe, ruri ba tla tswelela ba tshela.”’”+

39 Fa Moshe a ne a bua mafoko ano le Baiseraele botlhe, batho ba ne ba simolola go hutsafala fela thata. 40 Mo godimo ga moo, ba ne ba tsoga phakela thata mme ba leka go tlhatlogela kwa godimo ga thaba, ba re: “Ke rona bano re ipaakanyeditse go ya kwa lefelong le Jehofa a buileng ka lone ka gonne re leofile.”+ 41 Mme Moshe o ne a re: “Ke ka ntlha yang fa lo tlola taelo ya ga Jehofa? Seno ga se kitla se atlega. 42 Lo se ka lwa tlhatloga, ka gonne Jehofa ga a na le lona; mme baba ba lona ba tlile go lo fenya.+ 43 Gonne Baamaleke le Bakanana ba teng koo gore ba lwe le lona,+ mme lo tla wa ka tšhaka. E re ka lo sa ikobela Jehofa, Jehofa ga a kitla a nna le lona.”+

44 Le fa go ntse jalo, ba ne ba ikgogomosa ba bo ba tlhatlogela kwa godimo ga thaba,+ mme letlole la kgolagano ya ga Jehofa le ne la se ka la tswa mo gare ga kampa, Moshe le ene o ne a se ka a tswa.+ 45 Foo Baamaleke le Bakanana ba ba neng ba nna mo thabeng eo ba ne ba fologa mme ba ba kgemetha, ba ba gasamisa go ya go fitlha kwa Horema.+

15 Jehofa o ne a bua gape le Moshe a re: 2 “Bua le Baiseraele mme o ba reye o re, ‘Fa lo setse lo gorogile mo lefatsheng le ke le lo nayang gore lo age mo go lone+ 3 mme lo isetsa Jehofa setlhabelo se se dirwang ka molelo go tswa mo motlhapeng kgotsa mo letsomaneng, e ka tswa e le setlhabelo se se fisiwang+ kgotsa setlhabelo sa go dira maikano a a kgethegileng kgotsa se se ntshiwang ka go rata+ kgotsa setlhabelo se se ntshiwang ka nako ya meletlo ya lona ya dipaka,+ gore lo dire lonko lo lo itumedisang* lo lo yang kwa go Jehofa,+ 4 motho yo o isang setlhabelo sa gagwe, gape o tshwanetse go isetsa Jehofa setlhabelo sa dijo tsa ditlhaka sa bupi jo bo boleta,+ jwa kilogerama e ka nna nngwe* bo tlhakantswe le leokwane la selekanyo sa litara e le nngwe.* 5 Gape o ise beine ya selekanyo sa litara e le nngwe e le setlhabelo sa senô, mmogo le setlhabelo se se fisiwang+ kgotsa le setlhabelo sa kwanyana nngwe le nngwe e tonanyana. 6 Kgotsa fa o isa phelefu, o dire setlhabelo sa dijo tsa ditlhaka sa bupi jo bo boleta jwa dikilogerama di ka nna pedi jo bo tlhakantsweng le leokwane la selekanyo sa litara e le nngwe.* 7 Mme o ise beine e le setlhabelo sa senô, sa litara e le nngwe e le lonko lo lo itumedisang* lo lo yang kwa go Jehofa.

8 “‘Mme gone, fa o isetsa Jehofa phologolo e tonanyana e e tswang mo motlhapeng e le setlhabelo se se fisiwang+ kgotsa e le setlhabelo sa go dira maikano a a kgethegileng+ kgotsa e le ditlhabelo tsa go abelana,+ 9 gape o ise phologolo eo e tonanyana e e tswang mo motlhapeng mmogo le setlhabelo sa dijo tsa ditlhaka+ sa bupi jo bo boleta jwa dikilogerama di ka nna tharo le halofo jo bo tlhakantsweng le leokwane la dilitara di le tharo le halofo. 10 O ise le beine e le setlhabelo sa senô,+ dilitara di ka nna pedi, e le setlhabelo se se dirwang ka molelo, e le lonko lo lo itumedisang* lo lo yang kwa go Jehofa. 11 Seno ke se se tla dirwang fa go ntshiwa poo nngwe le nngwe kgotsa phelefu nngwe le nngwe kgotsa kwanyana nngwe le nngwe e tonanyana kgotsa podi nngwe le nngwe. 12 Le fa lo ka tswa lo ntsha palo e e kana kang, seo ke se se tla dirwang fa go ntshiwa nngwe le nngwe ya tsone, go ya ka palo ya tsone. 13 Eno ke tsela e Moiseraele mongwe le mongwe a tla isang setlhabelo se se dirwang ka molelo ka yone, e le lonko lo lo itumedisang* lo lo yang kwa go Jehofa.

14 “‘Fa motswakwa yo o agileng le lona kgotsa mongwe yo o ntseng a na le lona mo dikokomaneng tsa lona tse dintsi le ene a isa setlhabelo se se dirwang ka molelo, e le lonko lo lo itumedisang* lo lo yang kwa go Jehofa, a dire fela jaaka lo dira.+ 15 Lona ba phuthego le motswakwa yo o agileng le lona lo tla nna le molao o le mongwe fela. E tla nna molao o o tla nnelang ruri mo dikokomaneng tsotlhe tsa lona. Motswakwa o tla tshwana fela le lona fa pele ga ga Jehofa.+ 16 Go nne le molao o le mongwe le tshwetso e le nngwe ya boatlhodi mo go lona le mo mothong yo o agileng le lona e le motswakwa.’”

17 Jehofa o ne a tswelela a bua le Moshe a re: 18 “Bua le Baiseraele mme o ba reye o re, ‘Fa lo goroga mo lefatsheng le ke lo tlisang mo go lone 19 mme lo ja senkgwe* sa lefatshe leo,+ lo ntshetse Jehofa moneelo. 20 Lo ntshe moneelo wa mabutswapele+ a bupi jwa lona jo bo seng boleta e le dinkgwe tse di bopegileng jaaka maseka. Lo o ntshe fela jaaka fa lo ntsha moneelo wa seboana. 21 Lo ntshe mangwe a mabutswapele a bupi jwa lona jo bo seng boleta e le moneelo o o yang kwa go Jehofa go ya le dikokomana tsotlhe tsa lona.

22 “‘Jaanong fa lo dira phoso mme lo palelwa ke go ikobela ditaelo tseno tsotlhe tse Jehofa a di buileng le Moshe, 23 sotlhe se Jehofa a neng a se lo laela ka Moshe go tloga ka letsatsi le Jehofa a neng a laela ka lone le go ya pele le dikokomana tsotlhe tsa lona, 24 mme fa phoso eo e sa dirwa ka boomo e bile phuthego e sa itse ka yone, phuthego yotlhe e tshwanetse go ntsha powana e le nngwe e le setlhabelo se se fisiwang gore e nne lonko lo lo itumedisang* lo lo yang kwa go Jehofa, mmogo le setlhabelo sa sone sa dijo tsa ditlhaka le setlhabelo sa sone sa senô go ya ka fa thulaganyong ya ka metlha+ le potsane e le nngwe e le setlhabelo sa boleo.+ 25 Moperesiti a ntshetse phuthego yotlhe ya Baiseraele setlhabelo sa go itshwarelwa maleo, mme ba tla itshwarelwa+ ka gonne e ne e le phoso, e bile ba ile ba tlisetsa Jehofa setlhabelo sa bone, e le setlhabelo se se dirwang ka molelo, gape ba ile ba tlisa setlhabelo sa bone sa boleo fa pele ga ga Jehofa ka ntlha ya phoso ya bone. 26 Phuthego yotlhe ya Baiseraele e tla itshwarelwa go akaretsa le motswakwa yo o agileng mo go bone, ka gonne e ne e le phoso ya batho botlhe.

27 “‘Fa motho a leofa ka phoso, foo o tshwanetse go isa podi e namagadi e e nang le ngwaga o le mongwe kgotsa kwa tlase e le setlhabelo sa boleo.+ 28 Mme moperesiti o tla ntsha setlhabelo sa go itshwarelwa maleo, a se ntshetsa motho yo o dirileng phoso ka go leofela Jehofa e se ka boomo, mme o tla itshwarelwa.+ 29 Baiseraele le motswakwa yo o agileng le bone, ba kaelwe ke molao o le mongwe o o amanang le kgang ya go dira sengwe e se ka boomo.+

30 “‘Mme motho yo o dirang sengwe ka boomo,+ e ka tswa e le motho wa mo lefelong la lona kgotsa motswakwa, o tlhapatsa Jehofa mme o tshwanetse go bolawa. 31 E re ka motho yoo a nyaditse lefoko la ga Jehofa e bile a tlodile taelo ya gagwe, o tshwanetse go bolawa.+ O tshwanetse go otlhaelwa molato wa gagwe.’”+

32 Fa Baiseraele ba ne ba sa ntse ba le mo nageng, ba ne ba fitlhela motho a rwalela dikgong ka letsatsi la Sabata.+ 33 Ba ba neng ba mo fitlhela a rwalela dikgong ba ne ba mo tlisa kwa go Moshe le Arone le kwa phuthegong yotlhe. 34 Ba ne ba mo tsenya mo kgolegelong+ ka gonne go ne go ise go tlhalosiwe gore a dirwe eng.

35 Mme Jehofa o ne a raya Moshe a re: “Monna yoo o tshwanetse go bolawa+ mme phuthego yotlhe e mo kgobotletse ka maje kwa ntle ga kampa.”+ 36 Ka jalo, phuthego yotlhe e ne ya mo ntshetsa kwa ntle ga kampa mme ya mo kgobotletsa ka maje mme a swa, fela jaaka Jehofa a ne a laetse Moshe.

37 Jehofa o ne a tswelela a raya Moshe a re: 38 “Bua le Baiseraele mme o ba bolelele gore ba tshwanetse go itirela makgabenyana mo momenong o o kwa tlase mo diaparong tsa bone go ya le dikokomana tsotlhe tsa bone, mme ba rokelele thapo e e botala jwa loapi mo godimo ga makgabenyana a seaparo.+ 39 ‘Lo tshwanetse go nna le makgabenyana ano gore lo nne lo a bona mme lo gakologelwe ditaelo tsotlhe tsa ga Jehofa lo bo lo di boloke.+ Ga lo a tshwanela go sala dipelo tsa lona le matlho a lona morago, tse di dirang gore lo se ka lwa ikanyega mo go nna.*+ 40 Seno se tla lo thusa gore lo gakologelwe mme lo tla ikobela ditaelo tsa me tsotlhe e bile lo tla nna boitshepo mo Modimong wa lona.+ 41 Ke nna Jehofa, Modimo wa lona, yo o lo ntshitseng kwa lefatsheng la Egepeto gore ke itshupe ke le Modimo wa lona.+ Ke nna Jehofa, Modimo wa lona.’”+

16 Go tswa foo, Kora+ morwa Isehare,+ morwa Kohathe,+ morwa Lefi,+ o ne a ema mmogo le Dathane le Abirame bomorwa Eliabe+ le One morwa Pelethe, ba ba tswang mo go bomorwa Rubene.+ 2 Ba ne ba ganetsana le Moshe, ba na le banna ba Baiseraele ba le 250, dikgosana tsa phuthego, ba ba tlhophilweng mo phuthegong, banna ba ba itsegeng. 3 Ka jalo, ba ne ba phuthega mmogo+ mme ba ya kwa go Moshe le Arone ba bo ba ba raya ba re: “Re utlwile ke lona! Phuthego yotlhe e boitshepo,+ botlhe fela, e bile Jehofa o na le bone.+ Ke ka ntlha yang fa lo ikgodisetsa phuthego ya ga Jehofa?”

4 Fa Moshe a utlwa seno, ka yone nako eo o ne a wela fa fatshe ka sefatlhego. 5 Go tswa foo, o ne a raya Kora le botlhe ba ba neng ba mo eme nôkeng a re: “Mo mosong Jehofa o tla itsise gore ke mang yo e leng wa gagwe+ le gore ke mang yo o boitshepo le gore ke mang yo o tla mo atamelang,+ mme ope fela yo a tla mo tlhophang+ o tla mo atamela. 6 Dirang seno: Itseeleng ditsholamolelo,+ wena Kora le botlhe ba ba go emeng nôkeng,+ 7 mme lo tsenye molelo mo go tsone lo bo lo baya maswalo mo go tsone fa pele ga ga Jehofa kamoso, mme motho yo Jehofa a tla mo tlhophang,+ ke ene yo o boitshepo. Go lekane ka lona bomorwa Lefi!”+

8 Morago ga moo, Moshe o ne a raya Kora a re: “Tsweetswee, reetsang lona bomorwa Lefi. 9 A lo tsaya seno e le selo se sennye mo go lona go bo Modimo wa Iseraele a lo tlhaotse mo phuthegong ya Iseraele+ e bile a lo letlile gore lo mo atamele gore lo dire tirelo ya mo motlaaganeng wa ga Jehofa le gore lo eme fa pele ga phuthego lo e direle,+ 10 le go bo a lo atameditse gaufi le ene mmogo le bomorwarraalona botlhe, e bong bomorwa Lefi? A jaanong lo leka go tsaya le boperesiti?+ 11 Ka lebaka leno, wena le botlhe ba ba go emeng nôkeng ba ba phuthegileng mmogo, lo ganetsana le Jehofa. Fa e le Arone ene, tota ke mang go bo lo ngongorega ka ene?”+

12 Moragonyana Moshe o ne a roma gore go bidiwe Dathane le Abirame+ bomorwa Eliabe, mme ba ne ba re: “Ga re na go tla! 13 A ke selo se sennye jalo go bo o re ntshitse kwa lefatsheng le le elelang mashi le tswina ya dinotshe go tla go re bolaela mo nageng?+ Jaanong, a gape o batla go itira mmusi o le nosi mo go rona?* 14 Tota e bile, ga o a re tlisa mo lefatsheng lepe le le elelang mashi le tswina ya dinotshe+ e bile ga o a re naya boswa bope jwa tshimo le tshimo ya morara.* A o batla go gonya matlho a banna bao? Ga re na go tla!”

15 Ka jalo, Moshe o ne a galefa fela thata mme a raya Jehofa a re: “O se ka wa retologa wa leba setlhabelo sa bone sa dijo tsa ditlhaka. Ga ke a tsaya tonki epe mo go bone e bile ga ke a gobatsa ope wa bone.”+

16 Go tswa foo, Moshe o ne a raya Kora a re: “Wena le botlhe ba ba go emeng nôkeng, lo tle fa pele ga ga Jehofa kamoso, wena le bone le Arone. 17 Mongwe le mongwe a tseye setsholamolelo sa gagwe a bo a tsenya maswalo mo go sone, mme mongwe le mongwe o tla isa setsholamolelo sa gagwe fa pele ga ga Jehofa, ditsholamolelo di le 250, mmogo le wena le Arone, mongwe le mongwe a tshotse setsholamolelo sa gagwe.” 18 Ka jalo, mongwe le mongwe wa bone o ne a tsaya setsholamolelo sa gagwe mme ba ne ba tsenya molelo le maswalo mo go tsone ba bo ba ema fa kgorong ya tente ya bokopanelo mmogo le Moshe le Arone. 19 Fa Kora a sena go phuthela botlhe ba ba mo emeng nôkeng+ ba ba ganetsanang le Moshe le Arone kwa tenteng ya bokopanelo, kgalalelo ya ga Jehofa e ne ya bonala mo phuthegong yotlhe.+

20 Jaanong Jehofa o ne a raya Moshe le Arone a re: 21 “Tswang mo gare ga setlhopha seno, gore ke tle ke ba nyeletse ka ponyo ya leitlho.”+ 22 Foo ba wela fa fatshe ka difatlhego mme ba re: “Ao tlhe Modimo, Modimo yo o nayang batho botlhe botshelo,*+ a boleo jwa motho a le mongwe fela bo tla dira gore o galefele phuthego yotlhe?”+

23 Go tswa foo, Jehofa o ne a bua le Moshe a re: 24 “Bua le phuthego eno mme o ba reye o re, ‘Tswang mo tikologong ya ditente tsa ga Kora, Dathane le Abirame!’”+

25 Morago ga moo, Moshe o ne a ema mme a ya kwa go Dathane le Abirame, mme bagolwane+ ba Iseraele ba ne ba tsamaya le ene. 26 O ne a raya phuthego a re: “Tsweetswee, katogelang kgakala le ditente tsa banna bano ba ba bosula mme lo se ka lwa kgoma sepe sa bone, gore lo se ka lwa gogolwa mo boleong jotlhe jwa bone.” 27 Ka yone nako eo, ba ne ba tloga fa ditenteng tsa ga Kora, Dathane le Abirame, mo matlhakoreng otlhe, mme Dathane le Abirame ba ne ba tswa, ba ema fa kgorong ya ditente tsa bone mmogo le basadi ba bone, le bomorwaabone le bana ba bone ba bannye.

28 Go tswa foo, Moshe o ne a re: “Lo tla itse ka seno gore Jehofa o nthomile gore ke dire dilo tseno tsotlhe, gore ga se tse di tswang mo pelong ya me:* 29 Fa e le gore batho bano ba tla swa loso lo lo tshwanang le lwa batho botlhe e bile fa kotlhao ya bone e tshwana le ya batho botlhe, foo Jehofa e tla bo e se ene a nthomileng.+ 30 Mme fa Jehofa a dira sengwe se se sa tlwaelegang ka bone mme lefatshe le bulega* le bo le ba kometsa le sengwe le sengwe sa bone mme ba fologela mo teng ga Lebitla* ba tshela, ruri lo tla itse gore banna bano ba ne ba se ka ba tlotla Jehofa.”

31 Fela fa a fetsa go bua mafoko ano otlhe, lefatshe le ne la phatloga ka fa tlase ga bone.+ 32 Mme lefatshe le ne la bulega* le bo le ba kometsa mmogo le ba matlo a bone le mongwe le mongwe yo e neng e le wa ga Kora+ le dithoto tsotlhe tsa bone. 33 Ka jalo, bone le botlhe ba e neng e le ba bone ba ne ba fologela mo Lebitleng* ba tshela mme lefatshe le ne la ba khurumetsa, mo ba neng ba nyelela ba tswa mo phuthegong.+ 34 Fa ba goa, Baiseraele botlhe ba ba neng ba ba dikologile ba ne ba tshaba, ka gonne ba ne ba re: “Re boifa gore lefatshe le ka nna la re kometsa!” 35 Go tswa foo, molelo o ne wa tswa kwa go Jehofa+ mme wa laila banna ba ba 250 ba ba neng ba isa maswalo.+

36 Jaanong Jehofa o ne a raya Moshe a re: 37 “Raya Eliasare morwa moperesiti Arone o re a ntshe ditsholamolelo+ mo molelong, ka gonne di boitshepo. Gape o mmolelele gore a gasetse molelo oo kgakala. 38 Ditsholamolelo tsa banna bano ba ba neng ba leofa mme ba bolawa, di papetliwe di nne ditshesane gore di manegwe mo sebesong,+ ka gonne ba ne ba di isa fa pele ga ga Jehofa mme di ne tsa nna boitshepo. Di nne sesupo mo Baiseraeleng.”+ 39 Ka jalo, moperesiti Eliasare o ne a tsaya ditsholamolelo tsa kopore, tse di neng di tlisitswe ke ba ba neng ba fisiwa mme a di papetla gore go manegwe sebeso ka tsone, 40 fela jaaka Jehofa a ne a mmoleletse ka Moshe. E ne ya nna selo se se gopotsang Baiseraele gore motho ope yo o sa tshwanelegeng* yo e seng wa losika lwa ga Arone a se ka a atamela gore a fise maswalo fa pele ga ga Jehofa,+ le gore ope a se ka a tshwana le Kora le ba ba neng ba mo eme nôkeng.+

41 Mo letsatsing le le latelang, phuthego yotlhe ya Baiseraele e ne ya simolola go ngongorega ka Moshe le Arone,+ e re: “Lona ba babedi, lo bolaile batho ba ga Jehofa.” 42 Fa phuthego e sena go phuthega mmogo gore e ganetsane le Moshe le Arone, foo ba ne ba retologela kwa tenteng ya bokopanelo, mme leru le ne le e khurumeditse, mme kgalalelo ya ga Jehofa e ne ya simolola go bonala.+

43 Moshe le Arone ba ne ba ya fa pele ga tente ya bokopanelo+ 44 mme Jehofa o ne a raya Moshe a re: 45 “Tswang mo phuthegong eno, gore ke e fedise ka ponyo ya leitlho.”+ Fa ba utlwa seno ba wela fa fatshe ka difatlhego.+ 46 Go tswa foo, Moshe o ne a raya Arone a re: “Tsaya setsholamolelo mme o tseye molelo mo sebesong+ o o tsenye mo go sone o bo o baya maswalo mo go sone mme o itlhaganelele kwa bathong o ye go kopa gore ba itshwarelwe maleo a bone+ ka gonne Jehofa o galefile. Petso e setse e simologile!” 47 Ka yone nako eo, Arone o ne a se tsaya fela jaaka Moshe a ne a mmoleletse a bo a sianela kwa bathong mme petso e ne e setse e simolotse. Ka jalo, o ne a baya maswalo mo setsholamolelong e le gore a kope gore ba itshwarelwe maleo a bone. 48 O ne a tswelela a eme fa gare ga baswi le batshedi mme la bofelo petso e ne ya emisiwa. 49 Ba ba neng ba swa ka ntlha ya petso ba ne ba le 14 700, kwantle ga ba ba suleng ka ntlha ya ga Kora. 50 Fa Arone a boela kwa go Moshe kwa kgorong ya tente ya bokopanelo, petso e ne e setse e emisitswe.

17 Jaanong Jehofa o ne a raya Moshe a re: 2 “Bua le Baiseraele mme o tseye thobane e le nngwe mo go bone e e emelang lotso longwe le longwe lwa bone, go tswa mo dikgosaneng tsa lotso longwe le longwe lwa bone,+ tsotlhe e le dithobane di le 12. O kwale leina la mongwe le mongwe wa bone mo thobaneng ya gagwe. 3 O kwale leina la ga Arone mo thobaneng ya ga Lefi, ka gonne tlhogo nngwe le nngwe ya lotso lwa bone e na le thobane e le nngwe. 4 O beye dithobane tseo mo tenteng ya bokopanelo fa pele ga letlole la kgolagano,*+ kwa ke nnang ke itlhagisa teng mo go lona.+ 5 Mme thobane ya monna yo ke mo tlhophang+ e tla ntsha matlhogela, mme ruri ke tla emisa dingongorego tsa Baiseraele ka nna,+ tse gape ba di ngongoregang ka lona.”+

6 Ka jalo, Moshe o ne a bua le Baiseraele mme dikgosana tsotlhe tsa bone tsa mo naya dithobane, kgosana nngwe le nngwe ya mo naya thobane e le nngwe ya lotso lwa bone, dithobane di le 12, mme thobane ya ga Arone e ne e le mo gare ga dithobane tsa bone. 7 Go tswa foo, Moshe o ne a baya dithobane tseo fa pele ga ga Jehofa mo tenteng e e nang le letlole la kgolagano.*

8 Mo letsatsing le le latelang, fa Moshe a ne a tsena mo tenteng, thobane ya ga Arone e e emelang lotso lwa ga Lefi e ne e tlhogile, mme e ne e ntsha matlhogela le malômô* e bile e ntsha maungo a a buduleng a dithamane. 9 Foo Moshe o ne a ntsha dithobane tsotlhe fa pele ga ga Jehofa a di isa kwa bathong botlhe ba Iseraele. Ba ne ba di leba mme monna mongwe le mongwe a tsaya thobane ya gagwe.

10 Morago ga moo, Jehofa o ne a raya Moshe a re: “Busetsa thobane ya ga Arone+ fa pele ga letlole la kgolagano gore e nne selo se se tshwanetseng go bolokwa gore e nne sesupo+ mo batlhanoging bano,+ gore dingongorego tsa bone ka nna di fele le gore ba se ka ba swa.” 11 Ka yone nako eo, Moshe o ne a dira fela jaaka Jehofa a ne a mo laetse. O ne a dira fela jalo.

12 Go tswa foo, Baiseraele ba ne ba raya Moshe ba re: “Jaanong re tlile go swa, ruri re tlile go nyelela, re tlile go nyelela rotlhe fela! 13 Ope fela yo o tla tlang gaufi le motlaagana wa ga Jehofa o tla swa!+ A re tla tshwanelwa ke go swa ka tsela eo?”+

18 Go tswa foo, Jehofa o ne a raya Arone a re: “Wena le bomorwao le ba kgotla ya lona, lo tla rwala molato ope fela o o direlwang lefelo le le boitshepo+ e bile wena le bomorwao lo tla rwala molato ope fela o o direlwang boperesiti jwa lona.+ 2 Gape o atametse bomorwarrago ba lotso lwa ga Lefi, lotso lwa ga rrago, gore ba kopane le wena mme ba direle wena+ le bomorwao fa pele ga tente e e nang le letlole la kgolagano.*+ 3 Ba diragatse maikarabelo a bone mo go wena le mo tenteng yotlhe.+ Le fa go ntse jalo, ga ba a tshwanela go atamela dilwana tsa lefelo le le boitshepo le sebeso, gore bone kgotsa wena lo se ka lwa swa.+ 4 Ba tla kopana le wena mme ba tla diragatsa maikarabelo a bone a a amanang le tente ya bokopanelo le tirelo yotlhe ya tente, mme motho ope yo o sa tshwanelegeng* a se ka a lo atamela.+ 5 Lo tshwanetse go diragatsa boikarabelo jwa lona jo bo amanang le lefelo le le boitshepo+ le sebeso,+ gore batho ba Iseraele ba se ka ba galefelwa+ gape. 6 Nna ke tsere bomorwarraalona, e bong Balefi, go tswa mo Baiseraeleng e le mpho ya lona.+ Ba abetswe Jehofa gore ba dire tirelo ya mo tenteng ya bokopanelo.+ 7 Wena le bomorwao lo na le boikarabelo jwa go dira ditiro tsa boperesiti tse di amanang le sebeso le tse di amanang le se se mo teng ga sesiro,+ mme lo tshwanetse go dira tirelo eno.+ Ke lo neile tirelo ya boperesiti e le mpho, mme motho ope yo o sa tshwanelegeng* yo o atamelang a bolawe.”+

8 Jehofa o ne a bua gape le Arone a re: “Nna ke go tlhomile gore o tlhokomele meneelo e ke e ntshediwang.+ Ke neile wena le bomorwao karolo ya dilo tsotlhe tse di boitshepo tse Baiseraele ba di ntshitseng e le moneelo gore e nne kabelo e e tla nnelang ruri.+ 9 Eno e tla nna kabelo ya gago go tswa mo ditlhabelong tse di boitshepotshepo tse di dirwang ka molelo: setlhabelo sengwe le sengwe se ba se ntshang, go akaretsa ditlhabelo tsa bone tsa dijo tsa ditlhaka+ le ditlhabelo tsa bone tsa boleo+ le ditlhabelo tsa bone tsa molato+ tse ba di tlisang kwa go nna. Ke selo se se boitshepotshepo se se tla newang wena le bomorwao. 10 O e jele mo lefelong le le boitshepotshepo.+ Monna mongwe le mongwe a ka nna a e ja. E tla nna selo se se boitshepo mo go wena.+ 11 Tseno le tsone e tla nna tsa gago: dimpho tse ba di ntshang e le moneelo+ mmogo le ditlhabelo tsotlhe tse di fokwang+ tsa Baiseraele. Ke di neile wena le bomorwao le bomorwadio e le kabelo e e tla nnelang ruri.+ Mongwe le mongwe yo o itshekileng mo ntlong ya gago a ka nna a e ja.+

12 “Leokwane le le a gaisang otlhe le beine e ntšha e e di gaisang tsotlhe le dijo tsa ditlhaka, e leng mabutswapele+ a tsone, tse ba di nayang Jehofa, ke a di go naya.+ 13 Maungo a a buduleng pele a sengwe le sengwe se se tswang mo lefatsheng la bone a ba tla a tlisang kwa go Jehofa, e tla nna a gago.+ Mongwe le mongwe yo o itshekileng mo ntlong ya gago a ka nna a a ja.

14 “Sengwe le sengwe se se tlhaotsweng* mo Iseraele e nne sa gago.+

15 “Leitibolo lengwe le lengwe la ditshedi tsotlhe,*+ le ba tla le ntshetsang Jehofa, e ka tswa e le motho kgotsa phologolo, e nne la gago. Le fa go ntse jalo, o tshwanetse go rekolola leitibolo la batho,+ gape o rekolole le leitibolo la diphologolo tse di itshekologileng.+ 16 Fa le na le kgwedi e le nngwe go ya kwa godimo, o le rekolole ka tlhwatlhwa ya go rekolola, tlhwatlhwa e e beilweng ya dishekele* tsa selefera di le tlhano,+ go ya ka selekanyashekele* sa lefelo le le boitshepo.* Ke digera* di le 20. 17 Leitibolo la poo kgotsa leitibolo le letonanyana la kwanyana kgotsa leitibolo la podi ke one fela a o se kitlang o a rekolola.+ A boitshepo. O kgatšhe madi a one mo sebesong,+ mme o fise mafura a one gore a kuise mosi e le setlhabelo se se dirwang ka molelo gore e nne lonko lo lo itumedisang* lo lo yang kwa go Jehofa.+ 18 Nama ya one e nne ya gago. E nne ya gago, fela jaaka sehuba sa setlhabelo se se fokwang le jaaka leoto la moja.+ 19 Meneelo yotlhe e e boitshepo e Baiseraele ba tla e ntshetsang Jehofa,+ ke e neile wena le bomorwao le bomorwadio gore e nne kabelo e e tla nnelang ruri.+ Ke kgolagano ya letswai e e tla nnelang ruri* fa pele ga ga Jehofa e e diretsweng wena le bana ba gago.”

20 Jehofa o ne a tswelela a raya Arone a re: “Ga o kitla o nna le boswa mo lefatsheng la bone e bile ga go na karolo epe ya naga mo go bone e e tla nnang ya gago.+ Ke nna karolo ya gago le boswa jwa gago mo Baiseraeleng.+

21 “Jaanong itse gore ke neile bomorwa Lefi karolo nngwe le nngwe ya bolesome+ mo Iseraele gore e nne boswa jwa bone e le tuelo ya tirelo e ba e dirang, tirelo ya mo tenteng ya bokopanelo. 22 Batho ba Iseraele ba se ka ba tlhola ba atamela tente ya bokopanelo, go seng jalo ba tla ipakela boleo mme ba tla swa. 23 Balefi ke bone ba ba tla dirang tirelo ya mo tenteng ya bokopanelo e bile ke bone ba ba tla rwalang molato wa bone.+ Molao wa gore ba se ka ba nna le boswa mo gare ga Baiseraele,+ o tla nnela ruri mo dikokomaneng tsotlhe tsa lona. 24 Gonne ke neile Balefi karolo ya bolesome e e ntshitsweng ke batho ba Iseraele, e ba tla e ntshetsang Jehofa e le moneelo, gore e nne boswa jwa bone. Ke gone ka moo ke ba reileng ka re, ‘Ba se ka ba nna le boswa mo Baiseraeleng.’”+

25 Morago ga moo, Jehofa o ne a raya Moshe a re: 26 “O reye Balefi o re, ‘Lo tla amogela karolo ya bolesome go tswa mo Baiseraeleng e ke lo e neileng e tswa mo go bone gore e nne boswa jwa lona,+ mme go tswa mo go yone lo ntshe karolo ya bolesome e le moneelo o o yang kwa go Jehofa.+ 27 Mme e tla tsewa e le moneelo wa lona, jaaka e kete e ne e le dijo tsa ditlhaka tsa seboana+ sa lona, beine ya lona kgotsa leokwane la lona. 28 Ka tsela eno le lona lo tla ntshetsa Jehofa moneelo go tswa mo dikarolong tsotlhe tsa bolesome tse lo di amogelang go tswa mo Baiseraeleng, mme go tswa mo go tsone lo tla ntshetsa Jehofa moneelo lo bo lo o naya moperesiti Arone. 29 Lo tla ntshetsa Jehofa moneelo wa mofuta mongwe le mongwe go tswa mo go tse di di gaisang tsotlhe tsa dimpho tsotlhe tse lo di neilweng+ e le selo se se boitshepo.’

30 “Mme o tshwanetse go ba raya o re, ‘Fa lona Balefi lo ntsha moneelo wa tse di di gaisang tsotlhe, foo o tla tsewa jaaka e kete e ne e le dijo tsa ditlhaka tsa seboana sa lona, beine ya lona kgotsa leokwane la lona. 31 Lona le ba malapa a lona, lo ka nna lwa o jela mo lefelong lepe fela, ka gonne ke tuelo ya lona ya tirelo e lo e dirang mo tenteng ya bokopanelo.+ 32 Ga lo kitla lo ipakela boleo ka seno fa fela lo ntsha moneelo wa tse di di gaisang tsotlhe go tswa mo go tsone, mme ga lo a tshwanela go leswafatsa dilo tse di boitshepo tsa Baiseraele, go seng jalo lo tla swa.’”+

19 Jehofa o ne a bua gape le Moshe le Arone a re: 2 “Ono ke molao o Jehofa a o laetseng, ‘Bolelela Baiseraele gore ba go tseele kgomo e khunou e e itekanetseng sentle e e se nang bogole bope+ le e e iseng e rwale jokwe epe. 3 O e neye moperesiti Eliasare mme a e ise kwa ntle ga kampa, mme e tlhabelwe fa pele ga gagwe. 4 Go tswa foo, moperesiti Eliasare a tseye mangwe a madi a yone ka monwana a bo a kgatšha madi a yone makgetlo a le supa go lebagana le kgoro ya tente ya bokopanelo.+ 5 Morago ga moo, kgomo eno e fisiwe a ntse a e lebile. Letlalo la yone le nama ya yone le madi a yone mmogo le boloko jwa yone di fisiwe.+ 6 Mme moperesiti a tseye logong lwa mosedara, mosiama+ le letsela le lehibidu a bo a di latlhela mo molelong o kgomo e fisediwang mo go one. 7 Go tswa foo, moperesiti a tlhatswe diaparo tsa gagwe a bo a tlhapa mmele wa gagwe* ka metsi, morago ga moo a ka nna a tsena mo kampeng; mme gone, moperesiti o tla itshekologa go fitlha maitseboa.

8 “‘Motho yo o neng a fisa kgomo a tlhatswe diaparo tsa gagwe ka metsi a bo a tlhapa mmele wa gagwe* ka metsi, mme o tla itshekologa go fitlha maitseboa.

9 “‘Motho yo o itshekileng a kokoanye melora ya kgomo+ eo a bo a e tshela kwa ntle ga kampa mo lefelong le le phepa mme phuthego ya Baiseraele e boloke melora eo gore go dirwe metsi a a tla dirisediwang go phepafatsa.+ Ke setlhabelo sa boleo. 10 Motho yo o kokoanyang melora ya kgomo a tlhatswe diaparo tsa gagwe mme o tla itshekologa go fitlha maitseboa.

“‘Ono e tla nna molao o o tla nnelang ruri mo Baiseraeleng le mo mothong yo e leng motswakwa yo o agileng mo go bone.+ 11 Ope fela yo o kgomang motho yo o suleng* o tla itshekologa malatsi a le supa.+ 12 Motho yoo a iitshekise ka metsi* mo letsatsing la boraro, mme mo letsatsing la bosupa o tla bo a itshekile. Mme fa a sa iitshekise mo letsatsing la boraro, mo letsatsing la bosupa o tla bo a sa itsheka. 13 Mongwe le mongwe yo o kgomang motho yo o suleng a bo a sa iitshekise o leswafaditse motlaagana wa ga Jehofa,+ mme motho yoo o tshwanetse go bolawa.+ E re ka a sa kgatšhiwa ka metsi a a phepafatsang,+ ga a phepa e bile o tla tswelela a se phepa.

14 “‘Ono ke molao o o dirang fa motho a swela mo tenteng: Mongwe le mongwe yo o tsenang mo tenteng le mongwe le mongwe yo o neng a setse a le mo tenteng eo o tla itshekologa malatsi a le supa. 15 Sejana sengwe le sengwe se se sa khurumelwang, se se se nang sekhurumelo se se bofeletsweng mo go sone se itshekologile.+ 16 Mongwe le mongwe yo o kwa nageng yo o kgomang motho yo o bolailweng ka tšhaka kgotsa setopo kgotsa lerapo la motho kgotsa lebitla, o tla itshekologa malatsi a le supa.+ 17 Ba tseele motho yo o itshekologileng melora mengwe ya setlhabelo sa boleo se se neng se fisitswe ba bo ba tshela metsi a motswedi mo go yone mo sejaneng. 18 Go tswa foo, monna yo o itshekileng+ a tseye setlhatshana sa mosiama+ a bo a se ina mo metsing mme a a kgatšhe mo tenteng eo le mo dijaneng tsotlhe le mo bathong ba ba neng ba le moo le mo go yo o neng a kgoma lerapo kgotsa motho yo o bolailweng kgotsa setopo kgotsa lebitla. 19 Motho yo o itshekileng a kgatšhe yo o itshekologileng ka one mo letsatsing la boraro le mo letsatsing la bosupa, mme a mo itshekise mo boleong mo letsatsing la bosupa;+ go tswa foo, a tlhatswe diaparo tsa gagwe a bo a tlhape ka metsi, mme mo maitseboeng o tla itsheka.

20 “‘Mme motho yo o itshekologileng le yo o se kitlang a iitshekisa, motho yoo o tshwanetse go bolawa+ ka gonne o leswafaditse lefelo le le boitshepo la ga Jehofa. O ne a se ka a kgatšhiwa ka metsi a a phepafatsang, ka jalo o itshekologile.

21 “‘Ono e tla nna molao o o tla nnelang ruri mo go bone: Motho yo o kgatšhang metsi a a phepafatsang+ a tlhatswe diaparo tsa gagwe mme motho yo o kgomang metsi a a phepafatsang o tla itshekologa go fitlha maitseboa. 22 Sepe fela se motho yo o itshekologileng a se kgomang se tla itshekologa, mme motho yo o se kgomang o tla itshekologa go fitlha maitseboa.’”+

20 Mo kgweding ya ntlha, phuthego yotlhe ya Baiseraele e ne ya tla mo nageng ya Tsine, mme batho ba ne ba simolola go nna mo Kadeshe.+ Ke gone kwa Miriame+ a neng a swela gone a bo a fitlhelwa gone.

2 Jaanong phuthego e ne e se na metsi,+ mme ba ne ba phuthega mmogo go ganetsana le Moshe le Arone. 3 Batho ba ne ba omanya Moshe+ ba re: “Bogolo re ka bo re ile ra swa fa bomorwarraarona ba ne ba swa fa pele ga ga Jehofa! 4 Ke ka ntlha yang fa lo tlisitse phuthego ya ga Jehofa mo nageng eno gore rona le diruiwa tsa rona re tle go swela fano?+ 5 Gape ke ka ntlha yang fa lo re ntshitse kwa Egepeto lwa re tlisa mo lefelong leno le le bosula?+ Ga se lefelo le go ka jalwang peo le difeige le morara* le digaranata mo go lone e bile ga go na metsi a go nwa.”+ 6 Foo Moshe le Arone ba ne ba tswa fa pele ga phuthego ba ya kwa kgorong ya tente ya bokopanelo mme ba wela fa fatshe ka difatlhego, mme kgalalelo ya ga Jehofa e ne ya simolola go bonala mo go bone.+

7 Morago ga moo, Jehofa o ne a raya Moshe a re: 8 “Tsaya thobane o bo o phutha phuthego, wena le Arone mogoloo, mme o bue le lefika ba ntse ba go lebile gore le ntshe metsi a lone, mme o ba ntshetse metsi mo lefikeng o bo o naya phuthego le diruiwa tsa bone sengwe sa go nwa.”+

9 Ka jalo, Moshe o ne a tsaya thobane fa pele ga ga Jehofa,+ fela jaaka a ne a mo laetse. 10 Go tswa foo, Moshe le Arone ba ne ba phuthela phuthego fa pele ga lefika mme a ba raya a re: “Jaanong, utlwang batlhanogi ke lona! A re tla lo ntshetsa metsi mo lefikeng leno?”+ 11 Foo Moshe o ne a tsholetsa seatla a bo a itaya lefika ka thobane ya gagwe gabedi, mme metsi a mantsi a ne a simolola go tswa, mme phuthego le diruiwa tsa yone tsa simolola go nwa.+

12 Moragonyana Jehofa o ne a raya Moshe le Arone a re: “E re ka lo ne lwa se ka lwa bontsha tumelo mo go nna e bile lo sa ntlotla fa pele ga batho ba Iseraele, ga lo kitla lo tsenya phuthego eno mo lefatsheng le ke tla le e nayang.”+ 13 Ano ke metsi a Meriba,*+ kwa Baiseraele ba neng ba omanya Jehofa gone, mme o ne a ba bontsha gore o boitshepo.

14 Morago ga moo, Moshe o ne a romela barongwa kwa kgosing ya Edoma+ ba tswa kwa Kadeshe, a re: “Seno ke se morwarrago Iseraele+ a se buang, ‘O itse mathata otlhe a re neng ra lebana le one. 15 Borraarona ba ne ba ya kwa Egepeto,+ mme re ne ra nna kwa Egepeto dingwaga* di le dintsi+ mme Baegepeto ba ne ba re tshwara setlhogo, rona le borraarona.+ 16 La bofelo re ne ra lelela kwa go Jehofa,+ mme o ne a re utlwa a bo a roma moengele+ a re ntsha kwa Egepeto, mme jaanong re mo Kadeshe, motse o o mo molelwaneng wa naga ya gago. 17 Tsweetswee, mma re kgabaganye mo lefatsheng la gago. Ga re kitla re ralala tshimo epe kgotsa lefelo le o jetseng morara* mo go lone e bile ga re kitla re nwa metsi a sediba sepe. Re tla tsamaya mo Tseleng ya Kgosi re sa fapogele ka fa mojeng kgotsa ka fa molemeng go fitlha re kgabaganya naga ya gago.’”+

18 Le fa go ntse jalo, Edoma o ne a mo raya a re: “O se ka wa kgabaganya mo nageng ya rona. Fa o ka dira jalo, ke tla tswa ke tla go go kgatlhantsha ka tšhaka.” 19 Mme Baiseraele ba ne ba mo raya ba re: “Re tla tlhatloga ka tsela e kgolo, mme fa rona le diruiwa tsa rona re ka nwa metsi a gago, re tla a duelela.+ Re batla fela go kgabaganya ka dinao.”+ 20 O ne a nna a re: “O se ka wa kgabaganya.”+ Foo Edoma o ne a tswa a ya go mo kgatlhantsha a na le batho ba bantsi le masole* a a nonofileng. 21 Ka jalo, Edoma o ne a se ka a letla Iseraele go kgabaganya mo nageng ya gagwe; ka jalo, Iseraele o ne a tswa mo go ene.+

22 Batho ba Iseraele, phuthego eo yotlhe, ba ne ba tswa mo Kadeshe mme ba tla mo Thabeng ya Hore.+ 23 Morago ga moo, Jehofa o ne a raya Moshe le Arone mo Thabeng ya Hore gaufi le molelwane wa lefatshe la Edoma a re: 24 “Arone o tla phuthelwa kwa bathong ba gagabo.*+ Ga a kitla a tsena mo lefatsheng le ke tla le nayang Baiseraele ka gonne loobabedi lo ne lwa se ka lwa ikobela taelo e ke neng ka lo e naya ka metsi a Meriba.+ 25 Tsaya Arone le Eliasare morwawe mme o ba tlise mo Thabeng ya Hore. 26 O apole Arone diaparo+ tsa gagwe o bo o di apesa Eliasare+ morwawe mme Arone o tla swela gone.”*

27 Ka jalo, Moshe o ne a dira fela jaaka Jehofa a ne a laetse, mme ba ne ba palama Thaba ya Hore phuthego yotlhe e ba lebile. 28 Go tswa foo, Moshe o ne a apola Arone diaparo tsa gagwe a bo a di apesa Eliasare morwawe. Morago ga moo, Arone o ne a swela koo kwa godimo ga thaba.+ Mme Moshe le Eliasare ba ne ba fologa thaba. 29 Fa phuthego yotlhe e lemoga gore Arone o ne a sule, Baiseraele botlhe ba ne ba lelela Arone malatsi a le 30.+

21 Fa kgosi ya Mokanana ya kwa Arada,+ e e neng e nna kwa Negebe, e utlwa gore Baiseraele ba ne ba tlile ka tsela ya Atharime, e ne ya tlhasela Baiseraele ya bo ya gapa bangwe ba bone ya ba isa botshwarwa. 2 Ka jalo, Baiseraele ba ne ba ikanela Jehofa ba re: “Fa o ka tsenya batho bano mo diatleng tsa rona, ruri re tla nyeletsa metse ya bone.” 3 Ka jalo, Jehofa o ne a reetsa lentswe la Baiseraele mme a tsenya Bakanana mo diatleng tsa bone, mme ba ne ba ba nyeletsa le metse ya bone. Ka jalo, ba ne ba bitsa lefelo leo Horema.*+

4 Fa ba ntse ba tsweletse le loeto lwa bone go tswa kwa Thabeng ya Hore+ ba tsamaya ka tsela ya Lewatle le Lehibidu gore ba dikologe lefatshe la Edoma,+ batho ba ne ba lapisiwa ke loeto. 5 Mme batho ba ne ba nna ba ngongorega ka Modimo le Moshe+ ba re: “Ke ka ntlha yang fa lo re ntshitse kwa Egepeto gore re tle go swela mo nageng? Ga go na dijo, gape ga go na metsi+ e bile re setse re ila* senkgwe seno se se nyatsegang.”+ 6 Ka jalo, Jehofa o ne a romela dinoga tse di nang le botlhole* mo gare ga batho mme di ne tsa nna tsa loma batho, mo Baiseraele ba le bantsi ba neng ba swa.+

7 Ka jalo, batho ba ne ba tla kwa go Moshe mme ba re: “Re leofile ka go ngongorega ka Jehofa le ka go ngongorega ka wena.+ Re buelele mo go Jehofa gore a tlose dinoga tseno mo go rona.” Mme Moshe o ne a buelela batho.+ 8 Go tswa foo, Jehofa o ne a raya Moshe a re: “Dira sefikantswe sa noga e e nang le botlhole* o bo o se pega mo koteng. Mme fa motho ope a lomilwe, o tla tshwanelwa ke go leba kwa go sone gore a tswelele a tshela.” 9 Ka yone nako eo, Moshe o ne a dira noga ya kopore+ a bo a e pega mo koteng,+ mme nako epe fela fa motho a ne a lomilwe ke noga a bo a leba noga eo ya kopore, o ne a tshela.+

10 Morago ga moo, Baiseraele ba ne ba fuduga mme ba nna kwa Obothe.+ 11 Go tswa foo, ba ne ba fuduga mo Obothe mme ba nna kwa Aye-abarime,+ mo nageng e e lebaganeng le Moabe, go ela kwa botlhaba. 12 Ba ne ba fuduga koo mme ba nna gaufi le Mokgatšha* wa Serede.+ 13 Ba ne ba fuduga ba tswa koo mme ba nna mo kgaolong ya Arenone,+ e e mo nageng e e simololang mo molelwaneng wa Baamore, ka gonne Arenone ke molelwane wa Moabe, fa gare ga Moabe le Baamore. 14 Ke gone ka moo buka ya Dintwa Tsa ga Jehofa e buang ka “Fahebe kwa Sufahe le mekgatšha* ya Arenone 15 le mokgokolosa* wa mekgatšha,* o o yang ntlheng ya motse wa Ara e bile o kopana le molelwane wa Moabe.”

16 Go tswa koo ba ne ba ya kwa Beere. Seno ke sediba se Jehofa a neng a bolelela Moshe ka sone a re: “Phutha batho gore ke ba neye metsi.”

17 Ka nako eo, Baiseraele ba ne ba opela pina eno:

“Pomponyega wena sediba! (Se arabeng!)*

Go tswa foo, ba ne ba tswa mo nageng ba ya kwa Matana, 19 go tswa kwa Matana ba ne ba ya kwa Nahaliele, mme go tswa kwa Nahaliele ba ne ba ya kwa Bamothe.+ 20 Ba ne ba tswa mo Bamothe ba ya kwa mokgatšheng o o mo nageng ya Moabe,+ kwa godimo ga Pisega,+ e e okameng Jeshimone.*+

21 Jaanong Baiseraele ba ne ba romela barongwa kwa go Sihone kgosi ya Baamore mme ba re:+ 22 “Mma re kgabaganye mo lefatsheng la gago. Ga re kitla re fapogela mo tshimong epe kgotsa mo lefelong le o jetseng morara* mo go lone. Ga re kitla re nwa metsi a sediba sepe. Re tla tsamaya mo Tseleng ya Kgosi go fitlha re kgabaganya naga ya gago.”+ 23 Mme Sihone o ne a se ka a letla Baiseraele go kgabaganya mo nageng ya gagwe. Go na le moo, Sihone o ne a phutha batho botlhe ba gagwe mme a tswa a ya go tlhasela Baiseraele kwa nageng, mme o ne a goroga kwa Jahase a bo a simolola go tlhabana le Baiseraele.+ 24 Mme gone, Baiseraele ba ne ba mo kgemetha ka tšhaka+ ba bo ba gapa lefatshe la gagwe+ go tswa kwa Arenone+ go fitlha kwa Jaboke,+ gaufi le Baamone, ka gonne Jasere+ e bapile le naga ya Baamone.+

25 Ka jalo, Baiseraele ba ne ba gapa metse eno yotlhe, mme ba ne ba simolola go nna mo metseng yotlhe ya Baamore,+ kwa Heshebone le metsana yotlhe e e e dikologileng. 26 Gonne Heshebone e ne e le motse wa ga Sihone, kgosi ya Baamore, yo o neng a tlhabana le kgosi ya Moabe a bo a gapa lefatshe lotlhe la gagwe mo go ene go ya go fitlha kwa Arenone. 27 Ke sone se se neng sa dira gore go nne le seane sa tshotlo se se reng:

“Tlang mo Heshebone.

A motse wa ga Sihone o agiwe o bo o tiisiwe thata.

28 Gonne molelo o ne wa tswa mo Heshebone, kgabo ya molelo ya tswa mo motseng wa ga Sihone.

O ne wa laila Ara wa Moabe, barena ba mafelo a a kwa godimo a a boitshepo a Arenone.

29 Ruri go latlhega wena Moabe! Lo tla senngwa, lona batho ba ga Kemoshe!+

O dira bomorwawe batshabi le bomorwadie batshwarwa ba ga Sihone, kgosi ya Baamore.

31 Ka jalo, Baiseraele ba ne ba simolola go nna mo lefatsheng la Baamore. 32 Go tswa foo, Moshe o ne a roma banna bangwe go ya go tlhola Jasere.+ Ba ne ba gapa metsana ya yone e e e dikologileng ba bo ba leleka Baamore ba ba neng ba nna mo go yone. 33 Morago ga moo, ba ne ba tsamaya ka Tsela ya Bashana. Mme Oge+ kgosi ya Bashana o ne a tswa le batho botlhe ba gagwe go ya go ba kgatlhantsha gore ba tlhabane le bone kwa Ederei.+ 34 Jehofa o ne a raya Moshe a re: “O se ka wa mmoifa+ ka gonne ke tla mo tsenya mo seatleng sa gago,+ ene le batho botlhe ba gagwe le lefatshe la gagwe mme o tla mo dira fela jaaka o dirile Sihone, kgosi ya Baamore, yo o neng a nna kwa Heshebone.”+ 35 Ka jalo, ba ne ba nna ba mo kgemetha, mmogo le bomorwawe le batho botlhe ba gagwe, go fitlha go se na ope wa batho ba gagwe yo o falotseng,+ mme ba ne ba gapa lefatshe la gagwe.+

22 Go tswa foo, Baiseraele ba ne ba fuduga mme ba nna mo sekakeng sa Moabe ka kwa letlhakoreng le lengwe la Joredane go lebagana le Jeriko.+ 2 Jaanong Balake+ morwa Sipore o ne a utlwela ka sotlhe se Baiseraele ba neng ba se dirile Baamore, 3 mme Moabe o ne a boifa fela thata ka ntlha ya batho bano ka gonne ba ne ba le bantsi; ruri Moabe o ne a aparelwa ke letshogo ka ntlha ya Baiseraele.+ 4 Moabe o ne a raya bagolwane ba Midiana+ a re: “Jaanong phuthego eno e tla kometsa tikologo yotlhe ya rona fela jaaka poo e kometsa bojang mo nageng.”

Balake morwa Sipore e ne e le kgosi ya Moabe ka nako eo. 5 O ne a romela barongwa kwa go Balaame morwa Beore kwa Pethore,+ e e fa Nokeng* kwa lefatsheng la gagabo. O ne a laela gore a bidiwe, a re: “Setšhaba se dule kwa Egepeto. Se khurumeditse sefatlhego* sa lefatshe*+ leno e bile se nna fela fa pele ga me. 6 Tsweetswee, jaanong tla kwano mme o mphutsetse batho bano+ ka gonne ba maatla go mpheta. Gongwe nka ba fenya mme ka ba leleka mo lefatsheng leno ka gonne ke itse sentle gore yo o mo segofatsang o segofetse e bile yo o mo hutsang o hutsegile.”

7 Ka jalo, bagolwane ba Moabe le bagolwane ba Midiana ba ne ba tsamaya ba tshotse tuelo ya go duelela boitseanape mme ba ya kwa go Balaame+ ba bo ba mmolelela molaetsa wa ga Balake. 8 Foo o ne a ba raya a re: “Robalang fano bosigo jono mme ke tla tla go lo bolelela lefoko lepe fela le Jehofa a le buang le nna.” Ka jalo, dikgosana tsa Moabe di ne tsa nna le Balaame.

9 Go tswa foo, Modimo o ne a tla kwa go Balaame mme a re:+ “Banna bano ba ba nang le wena ke bomang?” 10 Balaame o ne a raya Modimo wa boammaaruri a re: “Balake morwa Sipore, kgosi ya Moabe, o nthomeletse molaetsa a re, 11 ‘Batho ba ba tswang kwa Egepeto ba khurumeditse sefatlhego* sa lefatshe* leno. Jaanong tla kwano, mme o ba mphutsetse.+ Gongwe nka kgona go tlhabana le bone ke bo ke ba leleka.’” 12 Mme Modimo o ne a raya Balaame a re: “O se ka wa tsamaya le bone. O se ka wa hutsa batho bao ka gonne ba segofaditswe.”+

13 Balaame o ne a tsoga mo mosong mme a raya dikgosana tsa ga Balake a re: “Yang kwa nageng ya lona, ka gonne Jehofa o ganne gore ke tsamaye le lona.” 14 Ka jalo, dikgosana tsa Moabe di ne tsa tsamaya tsa boela kwa go Balake mme tsa mo raya tsa re: “Balaame o ganne go tla le rona.”

15 Le fa go ntse jalo, Balake o ne a romela dikgosana tse dingwe gape, di le dintsi ka palo e bile di tlotlega go gaisa setlhopha sa ntlha. 16 Di ne tsa tla mo go Balaame mme tsa mo raya tsa re: “Seno ke se Balake morwa Sipore a se buileng, ‘Tsweetswee, o se ka wa letla sepe se go thibela go tla kwa go nna, 17 ka gonne ke tla go tlotlomatsa fela thata e bile ke tla dira sengwe le sengwe se o mpolelelang gore ke se dire. Ka jalo, tsweetswee tla kwano mme o mphutsetse batho bano.’” 18 Mme gone, Balaame o ne a araba batlhanka ba ga Balake a re: “Le fa Balake a ne a ka nnaya ntlo ya gagwe e tletse selefera le gauta, ke ne nka se dire sepe se se sa dumalaneng le taelo ya ga Jehofa, Modimo wa me, se ka tswa se le sennye kgotsa se le segolo.+ 19 Mme tsweetswee, le lona nnang fano bosigo jono, gore ke tle ke utlwe gore ke eng gape se Jehofa a tla se buang le nna.”+

20 Go tswa foo, Modimo o ne a tla mo go Balaame bosigo mme a mo raya a re: “Fa e le gore banna bano ba tlile go go bitsa, tsamaya le bone. Mme gone, o bue fela mafoko a ke go bolelelang gore o a bue.”+ 21 Ka jalo, Balaame o ne a tsoga mo mosong mme a belesa tonki ya gagwe a bo a tsamaya le dikgosana tsa Moabe.+

22 Le fa go ntse jalo, Modimo o ne a mo galefela fela thata ka gonne a ile a tsamaya, mme moengele wa ga Jehofa o ne a ema mo tseleng gore a mo thibele. Jaanong Balaame o ne a palame tonki ya gagwe, mme batlhokomedi ba gagwe ba le babedi ba ne ba na le ene. 23 Fa tonki e ne e bona moengele wa ga Jehofa a eme mo tseleng a somotse tšhaka a e tshwere ka seatla, e ne ya leka go fapoga mo tseleng gore e ye mo nageng. Mme Balaame o ne a simolola go itaya tonki gore a e busetse mo tseleng. 24 Go tswa foo, Moengele wa ga Jehofa o ne a ema mo tselaneng e tshesane fa gare ga masimo a mabedi a morara* go na le dipota tsa maje mo matlhakoreng oomabedi. 25 E rile tonki e bona moengele wa ga Jehofa, e ne ya simolola go ipatisa* mo loboteng mme ya patisa lonao lwa ga Balaame le lobota, mme Balaame o ne a simolola go e itaya gape.

26 Jaanong moengele wa ga Jehofa o ne a feta gape a bo a ema mo lefelong le le pitlaganeng, le go neng go se na tsela ya go fapogela ka fa mojeng kgotsa ka fa molemeng. 27 E rile tonki e bona moengele wa ga Jehofa, ya rapama fa fatshe Balaame a ntse a e palame, ka jalo Balaame o ne a tlala bogale mme a nna a itaya tonki ka thobane. 28 La bofelo Jehofa o ne a dira gore tonki e bue*+ mme e ne ya raya Balaame ya re: “Ke go dirile eng se se dirang gore o ntiteye makgetlo ano a mararo?”+ 29 Balaame o ne a araba tonki a re: “Ke ka gonne o ntirile sematla. Fa nkabo ke tshotse tšhaka mo seatleng sa me, nkabo ke go bolaya!” 30 Foo tonki e ne ya raya Balaame ya re: “A ga ke tonki ya gago e o ntseng o e palama botshelo jotlhe jwa gago go fitlha gompieno? A nkile ka go tshwara jaana pele?” O ne a araba jaana: “Nnyaa!” 31 Go tswa foo, Jehofa o ne a bula matlho a ga Balaame,+ mme o ne a bona moengele wa ga Jehofa a eme mo tseleng a somotse tšhaka a e tshwere ka seatla sa gagwe. Ka yone nako eo, o ne a inama mme a obama sefatlhego sa gagwe se lebile fa fatshe.

32 Foo moengele wa ga Jehofa o ne a mo raya a re: “Ke ka ntlha yang fa o ne o itaya tonki ya gago makgetlo ano a mararo? Ke tlile go go thibela ka gonne tsela ya gago ga e dumalane le thato ya me.+ 33 Tonki eno e ne ya mpona mme ya leka go fapoga e tswa fa go nna makgetlo ano a mararo.+ A re tseye gore e ne e sa fapoga ya tswa fa go nna! Gone jaanong nkabo ke go bolaile mme ka tlogela tonki e tshela.” 34 Balaame o ne a raya moengele wa ga Jehofa a re: “Ke leofile, ka gonne ke ne ke sa itse gore e ne e le wena yo o emeng mo tseleng go tla go nkgatlhantsha. Mme jaanong, fa e le gore seno se bosula mo matlhong a gago, ke tla boela morago.” 35 Mme moengele wa ga Jehofa o ne a raya Balaame a re: “Tsamaya le banna bano, mme gone o bue fela mafoko a ke go a bolelelang.” Ka jalo, Balaame o ne a tswelela a tsamaya le dikgosana tsa ga Balake.

36 Fa Balake a ne a utlwa gore Balaame o tlile, ka yone nako eo o ne a tswa a ya go mo kgatlhantsha kwa motseng wa Moabe, o o fa losing lwa Arenone mo molelwaneng wa naga eno. 37 Balake o ne a raya Balaame a re: “A ga ke a ka ka laela gore o bidiwe? Ke ka ntlha yang fa o ne o sa tle kwa go nna? A o ne o akanya gore nka se kgone go go tlotlomatsa thata?”+ 38 Balaame o ne a araba Balake a re: “Jaanong ke tlile mo go wena. A mme gone ke tla letlwa go bua sengwe? Ke tla bua fela mafoko a Modimo a a tsenyang mo molomong wa me.”+

39 Ka jalo, Balaame o ne a tsamaya le Balake mme ba tla mo Kiriathe-husothe. 40 Balake o ne a ntsha dikgomo le dinku setlhabelo a bo a romela dingwe tsa tsone kwa go Balaame le dikgosana tse di neng di na le ene. 41 Mo mosong Balake o ne a tsaya Balaame mme a mo tlhatlosetsa kwa Bamothe-baale; fa a le koo o ne a kgona go bona batho botlhe.+

23 Go tswa foo, Balaame o ne a raya Balake a re: “Nkagela dibeso di le supa+ mo lefelong leno o bo o mpaakanyetse dipoo di le supa le diphelefu di le supa.” 2 Ka yone nako eo, Balake o ne a dira fela jaaka Balaame a ne a buile. Mme Balake le Balaame ba ntsha setlhabelo ka poo le phelefu mo sebesong sengwe le sengwe.+ 3 Morago ga moo, Balaame o ne a raya Balake a re: “Nna fano fa setlhabelong sa gago se se fisiwang, mme nna ke tla tsamaya. Gongwe Jehofa o tla ikgolaganya le nna. Sepe fela se a se ntshenolelang, ke tla se go bolelela.” Ka jalo, o ne a ya kwa thoteng e e se nang sepe.

4 Modimo o ne a ikgolaganya le Balaame,+ mme Balaame o ne a mo raya a re: “Ke tlhomile dibeso di le supa, mme ke ne ka ntsha setlhabelo ka poo le phelefu mo sebesong sengwe le sengwe.” 5 Jehofa o ne a tsenya lefoko leno mo molomong wa ga Balaame:+ “Boela kwa go Balake mme seno ke se o tla se buang.” 6 Ka jalo, o ne a boa mme a fitlhela Balake le dikgosana tsotlhe tsa Moabe ba eme fa setlhabelong sa gagwe se se fisiwang. 7 Go tswa foo, o ne a bua polelo eno ya seane:+

‘Tla kwano gore o mphutsetse Jakobe.

Ee, tla o atlhole Iseraele.’+

 8 Nka hutsa jang ba Modimo a sa ba hutsang?

E bile nka atlhola jang ba Jehofa a sa ba atlholang?+

11 Go tswa foo, Balake o ne a raya Balaame a re: “O ntirile eng? Ke go bileditse gore o tle go hutsa baba ba me, mme jaanong ke fano o ba segofaditse.”+ 12 O ne a araba a re: “A ga ke a tshwanela go bua sepe fela se Jehofa a se tsenyang mo molomong wa me?”+

13 Balake o ne a mo raya a re: “Tsweetswee, tla le nna kwa lefelong le lengwe le o ka ba bonang o le kwa go lone. O tla bona fela karolo ya bone; ga o kitla o ba bona botlhe. Ba mphutsetse o le koo.”+ 14 Foo o ne a mo isa kwa nageng ya Sofime, kwa godimo ga Pisega,+ mme o ne a aga dibeso di le supa a bo a ntsha setlhabelo ka poo le phelefu mo sebesong sengwe le sengwe.+ 15 Ka jalo, Balaame o ne a raya Balake a re: “Nna fano fa setlhabelong sa gago se se fisiwang fa ke sa ntse ke ya go ikgolaganya le Modimo fale.” 16 Mme Jehofa o ne a ikgolaganya le Balaame a bo a tsenya lefoko leno mo molomong wa gagwe:+ “Boela kwa go Balake, mme seno ke se o tla se buang.” 17 Ka jalo, o ne a tla fa go ene mme a mo fitlhela a letile fa setlhabelong sa gagwe se se fisiwang, mme dikgosana tsa Moabe di ne di na le ene. Balake o ne a mmotsa a re: “Jehofa o go reile a reng?” 18 Ene o ne a bua polelo eno ya seane:+

“Ema Balake, mme o reetse.

Ntheetsa, wena morwa Sipore.

Fa a bua sengwe, a ga a kitla a se dira?

Fa a solofetsa sengwe, a ga a kitla a se diragatsa?+

22 Modimo o ba ntshitse kwa Egepeto.+

O ntse jaaka dinaka tsa poo ya naga mo go bone.+

Mo nakong eno go ka buiwa ka Jakobe le Iseraele go twe:

‘Bona se Modimo a se dirileng!’

25 Foo Balake o ne a raya Balaame a re: “Fa e le gore ka fa letlhakoreng le lengwe ga o kgone go mo hutsa ka gope, ka jalo, le ka fa letlhakoreng le lengwe, o se ka wa mo segofatsa.” 26 Balaame o ne a araba Balake a re: “A ga ke a go raya ka re, ‘Ke tla dira sotlhe se Jehofa a se buang’?”+

27 Balake o ne a raya Balaame a re: “Tsweetswee, tla kwano mme mma ke go ise kwa lefelong le lengwe gape. Gongwe Modimo wa boammaaruri o tla bona go siame gore o mphutsetse setšhaba seno o le koo.”+ 28 Ka jalo, Balake o ne a isa Balaame kwa godimo ga Peore, e e lebileng ntlheng ya Jeshimone.*+ 29 Go tswa foo, Balaame o ne a raya Balake a re: “Nkagela dibeso di le supa mo lefelong leno o bo o mpaakanyetse dipoo di le supa le diphelefu di le supa.”+ 30 Ka jalo, Balake o ne a dira fela jaaka Balaame a ne a buile, mme o ne a ntsha setlhabelo ka poo le phelefu mo sebesong sengwe le sengwe.

24 Fa Balaame a ne a bona gore Jehofa o itumedisiwa ke* go segofatsa Iseraele, ga a ka a tsamaya gape go ya go batla ditshupo tsa bomadimabe,+ go na le moo o ne a lebisa sefatlhego sa gagwe kwa nageng. 2 E rile Balaame a tsholetsa matlho mme a bona Baiseraele ba kampile go ya ka ditso tsa bone,+ moya wa Modimo o ne wa tla mo go ene.+ 3 Go tswa foo, o ne a bua polelo eno ya seane:+

10 Foo Balake o ne a galefela Balaame fela thata. Balake o ne a opa diatla tsa gagwe ka tshotlo a bo a raya Balaame a re: “Ke ne ke go bileditse go tla go hutsa baba ba me,+ mme jaanong ke fano o ba segofaditse makgetlo ano a mararo. 11 Boela kwa gaeno gone jaanong. Ke ne ke batla go go tlotlomatsa thata,+ mme jaanong Jehofa o go thibetse gore o se ka wa tlotlomadiwa.”

12 Balaame o ne a araba Balake a re: “A ga ke a ka ka raya barongwa ba o neng o ba rometse kwa go nna ka re, 13 ‘Le fa Balake a ne a ka nnaya ntlo ya gagwe e tletse selefera le gauta, ke ne nka se dire sepe se ke se ratang* se se sa dumalaneng le taelo ya ga Jehofa, se ka tswa se le molemo kgotsa se le bosula. Ke tla bua fela se Jehofa a tla se mpolelelang’?+ 14 Mme jaanong ke a tsamaya ke ya kwa bathong ba gaetsho. Tla kwano mme mma ke go bolelele se setšhaba seno se tla se dirang batho ba gago mo nakong e e tlang.”* 15 Ka jalo, o ne a bua polelo eno ya seane:+

20 Fa a bona Amaleke, o ne a tswelela ka polelo ya gagwe ya seane a re:

21 E rile a bona Bakene,+ o ne a tswelela ka polelo ya gagwe ya seane a re:

“Lefelo la gago le sireletsegile e bile bonno jwa gago bo tlhomilwe mo lefikeng.

22 Mme mongwe o tla fisa Kaine.

E tla nna lobaka lo lo kae pele Asiria a go isa botshwarwa?”

23 Mme o ne a tswelela ka polelo ya gagwe ya seane a re:

“Ijoo! Ke mang yo o tla falolang fa Modimo a dira seno?

Mme le ene o tla nyelediwa setlhogo.”

25 Go tswa foo, Balaame+ o ne a ema mme a boela kwa lefelong la gagabo. Balake le ene o ne a tsamaya.

25 Fa Baiseraele ba ne ba nna kwa Shitime,+ batho ba ne ba simolola go dira boitsholo jo bo sa siamang jwa tlhakanelodikobo le bomorwadia Moabe.+ 2 Basadi bano ba ne ba laletsa batho kwa ditlhabelong tsa medimo ya bone,+ mme batho ba ne ba simolola go ja le go ikobela medimo ya bone.+ 3 Ka jalo, Baiseraele ba ne ba kopanela mo kobamelong ya ga* Baale wa Peore,+ mme Jehofa o ne a galefela Baiseraele fela thata. 4 Jehofa o ne a raya Moshe a re: “Tsaya baeteledipele* botlhe ba batho bano ba ba leofileng mme o ba kaletse fa pele ga ga Jehofa letsatsi le penne,* gore bogale jo bo tukang jwa ga Jehofa bo tswe mo Iseraele.” 5 Foo Moshe o ne a raya baatlhodi ba Iseraele+ a re: “A mongwe le mongwe wa lona a bolaye banna ba gagwe ba ba neng ba kopanela mo kobamelong ya ga* Baale wa Peore.”+

6 Mme ka yone nako eo, Moiseraele mongwe o ne a tlisa mosadi wa Momidiana+ gaufi le bomorwarraagwe fa pele ga matlho a ga Moshe le phuthego yotlhe ya Baiseraele, fa ba ne ba ntse ba lela kwa kgorong ya tente ya bokopanelo. 7 E rile Finease+ morwa Eliasare morwa moperesiti Arone a bona seno, o ne a tswa mo phuthegong ka bonako a bo a tsaya lerumo.* 8 Go tswa foo, o ne a sala monna wa Moiseraele morago a tsena mo tenteng a bo a ba tlhaba boobabedi, monna wa Moiseraele le mosadi yoo mo dirweng tsa gagwe tsa tsalo. Mme petso eo e ne ya emisiwa mo Baiseraeleng.+ 9 Ba ba neng ba swa ka ntlha ya petso ba ne ba le 24 000.+

10 Morago ga moo, Jehofa o ne a raya Moshe a re: 11 “Finease+ morwa Eliasare morwa moperesiti Arone o tlositse tšhakgalo ya me mo bathong ba Iseraele ka gonne ga a ka a ba letlelela gore ba obamele Modimo ope kwantle ga me.+ Ka jalo, ga ke a fedisa Baiseraele le fa gone ke batla gore batho ba nkobamele ke le esi.+ 12 Ka ntlha ya seno, o mo reye o re, ‘Ke mo naya kgolagano ya me ya kagiso. 13 Mme e tla nna kgolagano ya boperesiti jo bo tla nnelang ruri mo go ene le mo baneng ba gagwe ba ba tla tlang morago ga gagwe,+ ka gonne ga a ka a ba letlelela gore ba obamele Modimo+ ope kwantle ga me. Se a se dirileng se ne sa dira gore Baiseraele ba itshwarelwe maleo.’”

14 Mme leina la monna wa Moiseraele yo o neng a bolawa mmogo le mosadi wa Momidiana e ne e le Simeri morwa Salu, kgosana ya kgotla nngwe ya Basimeone. 15 Leina la mosadi wa Momidiana yo o neng a bolawa e ne e le Kosebi morwadia Sure;+ Sure e ne e le moeteledipele wa malapa a kgotla ya bone kwa Midiana.+

16 Moragonyana Jehofa o ne a raya Moshe a re: 17 “Lo tshwenye Bamidiana lo bo lo ba kgemethe,+ 18 ka gonne ba ntse ba lo tshwenya ka go dirisana le lona ka boferefere mo tiragalong e e amanang le Peore+ le mo tiragalong e e amanang le Kosebi morwadia kgosana ya Midiana, kgaitsadiabone yo o neng a bolawa+ mo letsatsing la petso e e neng ya tla ka ntlha ya tiragalo e e amanang le Peore.”+

26 Morago ga petso,+ Jehofa o ne a raya Moshe le Eliasare morwa moperesiti Arone a re: 2 “Balang phuthego yotlhe ya Baiseraele go simolola ka ba ba nang le dingwaga di le 20 go ya kwa godimo, go ya ka dikgotla tsa bone, lo bale botlhe ba ba ka nnang masole mo Iseraele.”+ 3 Ka jalo, Moshe le moperesiti Eliasare+ ba ne ba bua le batho mo sekakeng sa Moabe+ gaufi le Joredane kwa Jeriko,+ ba re: 4 “Tsayang palo ya botlhe go simolola ka ba ba nang le dingwaga di le 20 go ya kwa godimo, fela jaaka Jehofa a laetse Moshe.”+

Jaanong bomorwa Iseraele ba ba neng ba tswa mo lefatsheng la Egepeto e ne e le: 5 Rubene,+ leitibolo la ga Iseraele; bomorwa Rubene+ e ne e le: ba ga Hanoke, lelapa la Bahanoke; ba ga Palu, lelapa la Bapalu; 6 ba ga Heserone, lelapa la Baheserone; ba ga Karami, lelapa la Bakarami. 7 Ano e ne e le malapa a Barubene, mme ba ba kwadisitsweng ba bone ba ne ba le 43 730.+

8 Morwa Palu e ne e le Eliabe. 9 Mme bomorwa Eliabe e ne e le Nemuele, Dathane le Abirame. Dathane yono le Abirame e ne e le ba ba tlhophilweng ba phuthego, ba ba neng ba lwa le Moshe+ le Arone ba na le setlhopha sa ga Kora+ fa ba ne ba lwa le Jehofa.+

10 Mme lefatshe le ne la bulega,* la ba kometsa. Kora ene, o ne a swa le ba ba neng ba mo eme nôkeng fa molelo o ne o laila banna ba le 250.+ Mme ba ne ba nna sekao se se tlhagisang.+ 11 Le fa go ntse jalo, bomorwa Kora ba ne ba se ka ba swa.+

12 Bomorwa Simeone+ go ya ka malapa a bone e ne e le: ba ga Nemuele, lelapa la Banemuele; ba ga Jamine, lelapa la Bajamine; ba ga Jakine, lelapa la Bajakine; 13 ba ga Sera, lelapa la Basera; ba ga Shaulo, lelapa la Bashaulo. 14 Ano e ne e le malapa a Basimeone: Ba ne ba le 22 200.+

15 Bomorwa Gada+ go ya ka malapa a bone e ne e le: ba ga Sefone, lelapa la Basefone; ba ga Hagi, lelapa la Bahagi; ba ga Shuni, lelapa la Bashuni; 16 ba ga Oseni, lelapa la Baoseni; ba ga Eri, lelapa la Baeri; 17 ba ga Arode, lelapa la Baarode; ba ga Areli, lelapa la Baareli. 18 Ano e ne e le malapa a bomorwa Gada, mme ba ba kwadisitsweng ba bone ba ne ba le 40 500.+

19 Bomorwa Juda+ e ne e le Ere le Onane.+ Le fa go ntse jalo, Ere le Onane ba ne ba swela mo lefatsheng la Kanana.+ 20 Mme bomorwa Juda go ya ka malapa a bone e ne e le: ba ga Shela,+ lelapa la Bashela; ba ga Perese,+ lelapa la Baperese; ba ga Sera,+ lelapa la Basera. 21 Mme bomorwa Perese e ne e le: ba ga Heserone,+ lelapa la Baheserone; ba ga Hamule,+ lelapa la Bahamule. 22 Ano e ne e le malapa a ga Juda, mme ba ba kwadisitsweng ba bone ba ne ba le 76 500.+

23 Bomorwa Isakare+ go ya ka malapa a bone e ne e le: ba ga Tola,+ lelapa la Batola; ba ga Pufa, lelapa la Bapune; 24 ba ga Jashube, lelapa la Bajashube; ba ga Shimerone, lelapa la Bashimerone. 25 Ano e ne e le malapa a ga Isakare, mme ba ba kwadisitsweng ba bone ba ne ba le 64 300.+

26 Bomorwa Sebulone+ go ya ka malapa a bone e ne e le: ba ga Serede, lelapa la Baserede; ba ga Elone, lelapa la Baelone; ba ga Jahaleele, lelapa la Bajahaleele. 27 Ano e ne e le malapa a Basebulone, mme ba ba kwadisitsweng ba bone ba ne ba le 60 500.+

28 Bomorwa Josefa+ go ya ka malapa a bone e ne e le: Manase le Eferaime.+ 29 Bomorwa Manase+ e ne e le: ba ga Makire,+ lelapa la Bamakire; mme Makire o ne a nna rraagwe Gileade; ba ga Gileade, lelapa la Bagileade.+ 30 Bano e ne e le bomorwa Gileade: ba ga Iesere, lelapa la Baiesere; ba ga Heleke, lelapa la Baheleke; 31 ba ga Aseriele, lelapa la Baaseriele; ba ga Shekema, lelapa la Bashekema; 32 ba ga Shemida, lelapa la Bashemida; ba ga Hefere, lelapa la Bahefere. 33 Jaanong Selofehade morwa Hefere o ne a se na bana ba basimane, mme o ne a na le bana ba basetsana fela,+ mme maina a bomorwadia Selofehade+ e ne e le Mahela, Noa, Hogola, Mileka le Tiresa. 34 Ano e ne e le malapa a ga Manase, mme ba ba kwadisitsweng ba bone ba ne ba le 52 700.+

35 Bano e ne e le bomorwa Eferaime+ go ya ka malapa a bone: ba ga Shuthela,+ lelapa la Bashuthela; ba ga Bekere, lelapa la Babekere; ba ga Tahane, lelapa la Batahane. 36 Mme bano e ne e le bomorwa Shuthela: ba ga Erane, lelapa la Baerane. 37 Ano e ne e le malapa a bomorwa Eferaime, mme ba ba kwadisitsweng ba bone ba ne ba le 32 500.+ Bano e ne e le bomorwa Josefa go ya ka malapa a bone.

38 Bomorwa Benjamine+ go ya ka malapa a bone e ne e le: ba ga Bela,+ lelapa la Babela; ba ga Ashebele, lelapa la Baashebele; ba ga Ahirame, lelapa la Baahirame; 39 ba ga Shefufame, lelapa la Bashufame; ba ga Hufame, lelapa la Bahufame. 40 Bomorwa Bela e ne e le Arede le Naamane:+ ba ga Arede, lelapa la Baarede; ba ga Naamane, lelapa la Banaamane. 41 Bano e ne e le bomorwa Benjamine go ya ka malapa a bone, mme ba ba kwadisitsweng ba bone ba ne ba le 45 600.+

42 Bano e ne e le bomorwa Dana+ go ya ka malapa a bone: ba ga Shuhame, lelapa la Bashuhame. Ano e ne e le malapa a ga Dana go ya ka malapa a bone. 43 Ba ba kwadisitsweng mo malapeng otlhe a Bashuhame ba ne ba le 64 400.+

44 Bomorwa Ashera+ go ya ka malapa a bone e ne e le: ba ga Imina, lelapa la Baimina; ba ga Ishefi, lelapa la Baishefi; ba ga Beria, lelapa la Baberia; 45 ba bomorwa Beria: ba ga Hebere, lelapa la Bahebere; ba ga Malekiele, lelapa la Bamalekiele. 46 Leina la ga morwadia Ashera e ne e le Sera. 47 Ano e ne e le malapa a bomorwa Ashera, mme ba ba kwadisitsweng ba bone ba ne ba le 53 400.+

48 Bomorwa Nafetali+ go ya ka malapa a bone e ne e le: ba ga Jahaseele, lelapa la Bajahaseele; ba ga Guni, lelapa la Baguni; 49 ba ga Jesere, lelapa la Bajesere; ba ga Shileme, lelapa la Bashileme. 50 Ano e ne e le malapa a ga Nafetali go ya ka malapa a bone, mme ba ba kwadisitsweng ba bone ba ne ba le 45 400.+

51 Baiseraele botlhe ba ba neng ba kwadisitswe ba ne ba le 601 730.+

52 Morago ga moo, Jehofa o ne a raya Moshe a re: 53 “Bano ba kgaoganyediwe lefatshe gore e nne boswa go ya ka lenaane la maina a bone.*+ 54 O oketse boswa jwa ditlhopha tse dikgolo, mme o fokotse boswa jwa ditlhopha tse dinnye.+ Boswa jwa setlhopha sengwe le sengwe bo abiwe go lekana le palo ya ba ba kwadisitsweng. 55 Le fa go ntse jalo, lefatshe le kgaoganngwe ka bola.+ Ba amogele boswa jwa bone go ya ka maina a ditso tsa borraabone. 56 Boswa bongwe le bongwe bo tla sekasekiwa ka bola mme bo tla kgaoganyediwa ditlhopha tse dikgolo le ditlhopha tse dinnye.”

57 Jaanong bano e ne e le ba ba kwadisitsweng ba Balefi+ go ya ka malapa a bone: ba ga Gereshone, lelapa la Bagereshone; ba ga Kohathe,+ lelapa la Bakohathe; ba ga Merari, lelapa la Bamerari. 58 Ano e ne e le malapa a Balefi: lelapa la Balibeni,+ lelapa la Baheberone,+ lelapa la Bamaheli,+ lelapa la Bamushi,+ lelapa la Bakora.+

Kohathe o ne a nna rraagwe Amerame.+ 59 Mme leina la mosadi wa ga Amerame e ne e le Jokebede,+ morwadia Lefi, yo Lefi a neng a mo tsholelwa ke mosadi wa gagwe kwa Egepeto. Fa nako e ntse e tsamaya, Jokebede o ne a tsholela Amerame Arone, Moshe le Miriame kgaitsadiabone.+ 60 Mme Arone o ne a tsholelwa Nadabe, Abihu, Eliasare le Ithamare.+ 61 Mme gone, Nadabe le Abihu ba ne ba swa ka ntlha ya go isa molelo o o seng ka fa molaong fa pele ga ga Jehofa.+

62 Palo ya botlhe ba ba kwadisitsweng e ne e le 23 000, banna botlhe go simolola ka ba ba nang le kgwedi go ya kwa godimo.+ Gonne ba ne ba sa kwadisiwa mo Baiseraeleng+ ka ntlha ya gore ba ne ba sa tshwanela go newa boswa bope mo Baiseraeleng.+

63 Bano ke ba ba neng ba kwadisiwa ke Moshe le moperesiti Eliasare fa ba ne ba kwadisa Baiseraele kwa sekakeng sa Moabe gaufi le Joredane kwa Jeriko. 64 Mme mo go bone, go ne go se na ope yo o neng a kwadisitswe ke Moshe le moperesiti Arone fa ba ne ba bala Baiseraele kwa nageng ya Sinai.+ 65 Gonne Jehofa o ne a buile ka ga bone a re: “Ruri ba tla swela mo nageng.”+ Ka jalo, go ne go se na monna ope wa bone yo o neng a setse, kwantle ga ga Kalebe morwa Jefune le Joshua morwa Nune.+

27 Go tswa foo, bomorwadia Selofehade,+ morwa Hefere, morwa Gileade, morwa Makire, morwa Manase, ba malapa a ga Manase morwa Josefa, ba ne ba atamela. Maina a bomorwadie e ne e le Mahela, Noa, Hogola, Mileka le Tiresa. 2 Ba ne ba ema fa pele ga ga Moshe, moperesiti Eliasare, dikgosana+ le phuthego yotlhe kwa kgorong ya tente ya bokopanelo mme ba re: 3 “Rraarona o swetse kwa nageng, mme gone o ne a se mo setlhopheng sa ba ba neng ba ikopanya mmogo gore ba ganetsane le Jehofa, ba ba neng ba eme Kora+ nôkeng, mme gone o ne a swela boleo jwa gagwe mme o ne a se na bana bape ba basimane. 4 Ke ka ntlha yang fa leina la ga rraarona le tshwanetse go nyelela mo lelapeng la gagwe ka gonne a ne a se na ngwana wa mosimane? Re neyeng boswa jwa naga jo bo tshwanang le jwa bomorwarraagwe rraarona.” 5 Ka jalo, Moshe o ne a isa kgang ya bone fa pele ga ga Jehofa.+

6 Go tswa foo, Jehofa o ne a raya Moshe a re: 7 “Bomorwadia Selofehade ba nepile. O tshwanetse go ba naya naga e le boswa jo bo tshwanang le jwa bomorwarraagwe rraabone, mme o fetisetse boswa jwa ga rraabone mo go bone.+ 8 Mme o reye Baiseraele o re, ‘Fa monna a swa a se na ngwana wa mosimane, lo tshwanetse go dira gore boswa jwa gagwe bo fetele mo go morwadie. 9 Fa a se na ngwana wa mosetsana, lo tla naya bomorwarraagwe boswa jwa gagwe. 10 Mme fa a se na bomorwarraagwe, lo tla naya bomorwarraagwe rraagwe boswa jwa gagwe. 11 Fa rraagwe a se na bomorwarraagwe, boswa joo lo tla bo naya wa losika lwa gagwe yo o gaufi thata le ene mo lelapeng la gagabo, mme e tla nna jwa gagwe. Ono e tla nna molao mo Baiseraeleng go ya ka tshwetso ya boatlhodi, fela jaaka Jehofa a laetse Moshe.’”

12 Morago ga moo, Jehofa o ne a raya Moshe a re: “Tlhatlogela mo thabeng eno ya Abarime+ mme o lebe lefatshe le ke tla le nayang Baiseraele.+ 13 Fa o sena go le bona, le wena o tla phuthelwa kwa bathong ba gaeno,*+ fela jaaka Arone mogoloo,+ 14 ka gonne fa phuthego e ne e nkomanya kwa nageng ya Tsine, lo ne lwa se ka lwa ikobela taelo ya me ya gore lo bontshe gore ke boitshepo fa pele ga bone ka metsi.+ Ke raya metsi a Meriba+ kwa Kadeshe+ kwa nageng ya Tsine.”+

15 Foo Moshe o ne a raya Jehofa a re: 16 “Mma Jehofa, Modimo yo o nayang batho botlhe botshelo,* a tlhome monna yo o tla okamelang phuthego 17 yo o tla tswang a bo a tsena fa pele ga bone le yo o tla ba kaelang fa ba tswa a bo a ba tsenya, gore phuthego ya ga Jehofa e se ka ya nna jaaka dinku tse di se nang modisa.” 18 Ka jalo, Jehofa o ne a raya Moshe a re: “Tsaya Joshua morwa Nune, monna yo moya o leng mo go ene, mme o beye seatla sa gago mo go ene.+ 19 Go tswa foo, o mo emise fa pele ga ga moperesiti Eliasare le fa pele ga phuthego yotlhe, mme o tshwanetse go mo tlhoma ba ntse ba lebile.+ 20 Mme o mo neye bontlhanngwe jwa taolo* ya gago,+ gore phuthego yotlhe ya Baiseraele e tle e mo reetse.+ 21 A eme fa pele ga ga moperesiti Eliasare, yo a tla mmoletsang fa pele ga ga Jehofa a dirisa Urime.+ Ba tla tswa ka taelo ya gagwe e bile ba tla tsena ka taelo ya gagwe, ene mmogo le Baiseraele botlhe le phuthego yotlhe.”

22 Ka jalo, Moshe o ne a dira fela jaaka Jehofa a ne a mo laetse. O ne a tsaya Joshua a bo a mo emisa fa pele ga ga moperesiti Eliasare le fa pele ga phuthego yotlhe, 23 mme o ne a baya diatla tsa gagwe mo go ene a bo a mo tlhoma,+ fela jaaka Jehofa a ne a buile ka Moshe.+

28 Morago ga moo, Jehofa o ne a raya Moshe a re: 2 “Laela Baiseraele mme o ba reye o re, ‘Lo tlhomamise gore lo ntlisetsa setlhabelo sa me, senkgwe sa me. Ditlhabelo tsa me tse di dirwang ka molelo e le lonko lo lo itumedisang* lo lo tlang mo go nna, di tshwanetse go dirwa ka dinako tsa tsone tse di tlhomilweng.’+

3 “Mme o ba reye o re, ‘Seno ke setlhabelo se se dirwang ka molelo se lo tla se ntshetsang Jehofa: ka letsatsi, lo ntshe dikwanyana tse pedi tse ditonanyana tse di itekanetseng sentle, tse di nang le ngwaga o le mongwe e le setlhabelo se se fisiwang se se ntshiwang ka metlha.+ 4 Lo ntshe kwanyana e tonanyana mo mosong, mme kwanyana e nngwe e tonanyana lo e ntshe ka lotlatlana,*+ 5 mmogo le bupi jo bo boleta jwa kilogerama e ka nna nngwe* jo bo tlhakantsweng le leokwane la selekanyo sa litara* e le nngwe, e le setlhabelo sa dijo tsa ditlhaka.+ 6 Ke setlhabelo se se fisiwang se se ntshiwang ka metlha,+ se se neng sa tlhomiwa kwa Thabeng ya Sinai e le lonko lo lo itumedisang,* setlhabelo se se dirwang ka molelo se se yang kwa go Jehofa, 7 mmogo le setlhabelo sa sone sa senô, litara e le nngwe, e ntshiwe nako le nako fa go ntshiwa kwanyana e tonanyana.+ Lo tshele bojalwa mo lefelong le le boitshepo e le setlhabelo sa senô se se yang kwa go Jehofa. 8 Mme lo ntshe kwanyana e nngwe e tonanyana ka lotlatlana.* Lo e ntshe le setlhabelo se se tshwanang le sa mo mosong le setlhabelo sa sone sa senô se se tshwanang, e le setlhabelo se se dirwang ka molelo e le lonko lo lo itumedisang* lo lo yang kwa go Jehofa.+

9 “‘Le fa go ntse jalo, ka letsatsi la Sabata,+ go ntshiwe dikwanyana tse ditonanyana di le pedi tse di itekanetseng sentle tse di nang le ngwaga o le mongwe le bupi jo bo boleta jwa dikilogerama di ka nna pedi jo bo tlhakantsweng le leokwane e le setlhabelo sa dijo tsa ditlhaka, mmogo le setlhabelo sa sone sa senô. 10 Seno ke setlhabelo se se fisiwang se se ntshiwang ka Sabata, mmogo le setlhabelo se se fisiwang se se ntshiwang ka metlha le setlhabelo sa sone sa senô.+

11 “‘Kwa tshimologong ya kgwedi nngwe le nngwe* lo ntshetse Jehofa setlhabelo se se fisiwang ka dipowana di le pedi, phelefu e le nngwe le dikwanyana tse ditonanyana di le supa tse di itekanetseng sentle nngwe le nngwe e na le ngwaga o le mongwe+ 12 le bupi jo bo boleta jwa dikilogerama di ka nna tharo le halofo jo bo tlhakantsweng le leokwane e le setlhabelo sa dijo tsa ditlhaka+ se se ntshiwang le poo nngwe le nngwe, le bupi jo bo boleta jwa dikilogerama di ka nna pedi jo bo tlhakantsweng le leokwane, e le setlhabelo sa dijo tsa ditlhaka se se ntshiwang le phelefu e le nngwe+ 13 le bupi jo bo boleta jwa kilogerama e ka nna nngwe jo bo tlhakantsweng le leokwane e le setlhabelo sa dijo tsa ditlhaka se se ntshiwang le kwanyana nngwe le nngwe e tonanyana, e le setlhabelo se se fisiwang, lonko lo lo itumedisang,*+ setlhabelo se se dirwang ka molelo se se yang kwa go Jehofa. 14 Mme ditlhabelo tsa tsone tsa senô e nne beine ya dilitara tse pedi e e ntshiwang le poo+ mme litara e le nngwe e ntshiwe le phelefu+ mme litara e nngwe e ntshiwe le kwanyana e tonanyana.+ Seno ke setlhabelo se se fisiwang se se ntshiwang kgwedi nngwe le nngwe mo ngwageng otlhe. 15 Gape, go ntshiwe potsane e le nngwe e le setlhabelo sa boleo se se yang kwa go Jehofa kwantle ga setlhabelo se se fisiwang se se ntshiwang ka metlha mmogo le setlhabelo sa sone sa senô.

16 “‘Mo kgweding ya ntlha, ka letsatsi la bo14 la kgwedi eo, e tla nna Tlolaganyo ya ga Jehofa.+ 17 Mme mo letsatsing la bo15 la kgwedi eo, go tla nna le moletlo. Go tla jewa senkgwe se se se nang sebediso malatsi a le supa.+ 18 Mo letsatsing la ntlha go tla nna le kopano e e boitshepo. Ga lo a tshwanela go dira tiro epe fela e e boima. 19 Mme lo ntshetse Jehofa setlhabelo se se fisiwang se se dirwang ka molelo ka dipowana di le pedi, phelefu e le nngwe le dikwanyana di le supa tse ditonanyana nngwe le nngwe e na le ngwaga o le mongwe. Lo ntshe diphologolo tse di itekanetseng sentle.+ 20 Lo di ntshe le ditlhabelo tsa tsone tsa dijo tsa ditlhaka tsa bupi jo bo boleta jo bo tlhakantsweng le leokwane,+ dikilogerama di ka nna tharo le halofo di ntshiwe le poo mme dikilogerama di ka nna pedi di ntshiwe le phelefu. 21 Kwanyana nngwe le nngwe e tonanyana ya dikwanyana tse supa tse ditonanyana, lo e ntshe le kilogerama e ka nna nngwe, 22 mmogo le podi e le nngwe ya setlhabelo sa boleo gore lo itshwarelwe maleo. 23 Lo di ntshe kwantle ga setlhabelo se se fisiwang sa mo mosong, e leng setlhabelo se se fisiwang se se ntshiwang ka metlha. 24 Lo di ntshe ka tsela e e tshwanang letsatsi le letsatsi malatsi a le supa e le dijo,* setlhabelo se se dirwang ka molelo e le lonko lo lo itumedisang* lo lo yang kwa go Jehofa. Se ntshiwe mmogo le setlhabelo se se fisiwang se se ntshiwang ka metlha le setlhabelo sa sone sa senô. 25 Mo letsatsing la bosupa lo tshware kopano e e boitshepo.+ Ga lo a tshwanela go dira tiro epe fela e e boima.+

26 “‘Mo letsatsing la maungo a a buduleng pele,+ fa lo ntshetsa Jehofa setlhabelo sa dijo tsa ditlhaka tse disha,+ lo tshware kopano e e boitshepo mo moletlong wa lona wa dibeke.+ Ga lo a tshwanela go dira tiro epe fela e e boima.+ 27 Lo ntshe setlhabelo se se fisiwang ka dipowana di le pedi, phelefu e le nngwe le dikwanyana tse ditonanyana di le supa nngwe le nngwe e na le ngwaga o le mongwe,+ e le lonko lo lo itumedisang* lo lo yang kwa go Jehofa, 28 mme lo ntshe setlhabelo sa sone sa dijo tsa ditlhaka sa bupi jo bo boleta jo bo tlhakantsweng le leokwane, dikilogerama di ka nna tharo le halofo di ntshiwe le poo nngwe le nngwe, dikilogerama di ka nna pedi di ntshiwe le phelefu e le nngwe, 29 kilogerama e ka nna nngwe e ntshiwe le kwanyana nngwe le nngwe e tonanyana ya dikwanyana tse supa tse ditonanyana, 30 mmogo le potsane e le nngwe gore lo itshwarelwe maleo.+ 31 Lo di ntshe kwantle ga setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka. E nne diphologolo tse di itekanetseng sentle,+ mmogo le ditlhabelo tsa tsone tsa senô.

29 “‘Mme mo kgweding ya bosupa, ka letsatsi la ntlha la kgwedi eo, lo tshware kopano e e boitshepo. Ga lo a tshwanela go dira tiro epe e e boima.+ Mo letsatsing leo, lo tla letsa terompeta.+ 2 Lo ntshe setlhabelo se se fisiwang gore e nne lonko lo lo itumedisang* lo lo yang kwa go Jehofa ka powana e le nngwe, phelefu e le nngwe le dikwanyana di le supa tse ditonanyana nngwe le nngwe ya tsone e na le ngwaga o le mongwe, tsotlhe e le tse di itekanetseng sentle, 3 le setlhabelo sa tsone sa dijo tsa ditlhaka sa bupi jo bo boleta jo bo tlhakantsweng le leokwane, dikilogerama di ka nna tharo le halofo* di ntshiwe le poo, dikilogerama di ka nna pedi* di ntshiwe le phelefu 4 mme kilogerama e ka nna nngwe* e ntshiwe le kwanyana nngwe le nngwe e tonanyana ya dikwanyana tse supa tse ditonanyana 5 le potsane e tonanyana e le nngwe e le ya setlhabelo sa boleo gore lo itshwarelwe maleo. 6 Seno se ntshiwe kwantle ga setlhabelo se se fisiwang se se ntshiwang kgwedi le kgwedi le setlhabelo sa sone sa dijo tsa ditlhaka+ le setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka,+ mmogo le ditlhabelo tsa tsone tsa senô,+ go ya ka thulaganyo ya ka metlha e di e diretsweng. Se ntshiwe e le lonko lo lo itumedisang,* setlhabelo se se dirwang ka molelo se se yang kwa go Jehofa.

7 “‘Mme mo letsatsing la bolesome la kgwedi eno ya bosupa, lo tshware kopano e e boitshepo,+ mme lo ipogise.* Ga lo a tshwanela go dira tiro epe.+ 8 Mme lo tla ntshetsa Jehofa setlhabelo se se fisiwang e le lonko lo lo itumedisang* ka powana e le nngwe, phelefu e le nngwe le dikwanyana tse ditonanyana di le supa nngwe le nngwe ya tsone e na le ngwaga o le mongwe, tsotlhe di itekanetse sentle.+ 9 Mme lo ntshe setlhabelo sa tsone sa dijo tsa ditlhaka sa bupi jo bo boleta jo bo tlhakantsweng le leokwane, dikilogerama di ka nna tharo le halofo di ntshiwe le poo, dikilogerama di ka nna pedi di ntshiwe le phelefu e le nngwe, 10 kilogerama e ka nna nngwe e ntshiwe le kwanyana nngwe le nngwe e tonanyana ya dikwanyana tse supa tse ditonanyana, 11 mmogo le potsane e le nngwe e le ya setlhabelo sa boleo, kwantle ga setlhabelo sa boleo se se ntshiwang ka letsatsi la go ntsha ditlhabelo tsa go itshwarelwa maleo+ le setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka, mmogo le ditlhabelo tsa tsone tsa senô.

12 “‘Mme mo letsatsing la bo15 la kgwedi ya bosupa, lo tshware kopano e e boitshepo. Ga lo a tshwanela go dira tiro epe e e boima, mme lo tshwanetse go ketekela Jehofa moletlo malatsi a le supa.+ 13 Mme lo ntshe setlhabelo se se fisiwang,+ setlhabelo se se dirwang ka molelo e le lonko lo lo itumedisang* lo lo yang kwa go Jehofa, ka dipowana di le 13, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle.+ 14 Mme lo ntshe setlhabelo sa tsone sa dijo tsa ditlhaka sa bupi jo bo boleta jo bo tlhakantsweng le leokwane, dikilogerama di ka nna tharo le halofo di ntshiwe le poo nngwe le nngwe ya dipoo tse 13, dikilogerama di ka nna pedi di ntshiwe le phelefu nngwe le nngwe ya diphelefu tse 2, 15 mme kilogerama e ka nna nngwe e ntshiwe le kwanyana nngwe le nngwe e tonanyana ya dikwanyana tse 14 tse ditonanyana, 16 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha, setlhabelo sa sone sa dijo tsa ditlhaka le setlhabelo sa sone sa senô.+

17 “‘Mme mo letsatsing la bobedi, lo ntshe dipowana di le 12, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle,+ 18 le setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le dipoo, diphelefu le dikwanyana tse ditonanyana ka fa palong ya tsone go ya ka thulaganyo ya ka metlha, 19 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka, mmogo le ditlhabelo tsa tsone tsa senô.+

20 “‘Mme mo letsatsing la boraro, lo ntshe dipoo di le 11, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle,+ 21 le setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le dipoo, diphelefu le dikwanyana tse ditonanyana ka fa palong ya tsone go ya ka thulaganyo ya ka metlha, 22 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka le setlhabelo sa sone sa senô.+

23 “‘Mme mo letsatsing la bonê, lo ntshe dipoo di le 10, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle,+ 24 setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le dipoo, diphelefu le dikwanyana tse ditonanyana ka fa palong ya tsone go ya ka thulaganyo ya ka metlha, 25 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha, setlhabelo sa sone sa dijo tsa ditlhaka le setlhabelo sa sone sa senô.+

26 “‘Mme mo letsatsing la botlhano, lo ntshe dipoo di le 9, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle,+ 27 le setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le dipoo, diphelefu le dikwanyana tse ditonanyana ka fa palong ya tsone go ya ka thulaganyo ya ka metlha, 28 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka le setlhabelo sa sone sa senô.+

29 “‘Mme mo letsatsing la borataro, lo ntshe dipoo di le 8, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle,+ 30 le setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le dipoo, diphelefu le dikwanyana tse ditonanyana ka fa palong ya tsone go ya ka thulaganyo ya ka metlha, 31 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha, setlhabelo sa sone sa dijo tsa ditlhaka le ditlhabelo tsa tsone tsa senô.+

32 “‘Mme mo letsatsing la bosupa, lo ntshe dipoo di le 7, diphelefu di le 2 le dikwanyana tse ditonanyana di le 14 nngwe le nngwe ya tsone e na le ngwaga o le mongwe, tsotlhe e le tse di itekanetseng sentle,+ 33 le setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le dipoo, diphelefu le dikwanyana tse ditonanyana ka fa palong ya tsone go ya ka thulaganyo ya ka metlha e di e tlhometsweng, 34 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha, setlhabelo sa sone sa dijo tsa ditlhaka le setlhabelo sa sone sa senô.+

35 “‘Mme mo letsatsing la borobedi, lo tshware kopano e e kgethegileng. Lo se ka lwa dira tiro epe e e boima.+ 36 Lo ntshe setlhabelo se se fisiwang, setlhabelo se se dirwang ka molelo e le lonko lo lo itumedisang* lo lo yang kwa go Jehofa, ka poo e le nngwe, phelefu e le nngwe le dikwanyana tse ditonanyana di le supa nngwe le nngwe ya tsone e na le ngwaga o le mongwe, tsotlhe di itekanetse sentle,+ 37 le setlhabelo sa tsone sa dijo tsa ditlhaka le ditlhabelo tsa tsone tsa senô tse di ntshiwang le poo, phelefu le dikwanyana tse ditonanyana ka fa palong ya tsone go ya ka thulaganyo ya ka metlha, 38 mmogo le potsane e le nngwe e le ya setlhabelo sa boleo, kwantle ga setlhabelo se se fisiwang se se ntshiwang ka metlha le setlhabelo sa sone sa dijo tsa ditlhaka le setlhabelo sa sone sa senô.+

39 “‘Tseno lo di ntshetse Jehofa kwa meletlong ya lona ya dipaka,+ kwantle ga ditlhabelo tsa lona tsa maikano+ le ditlhabelo tse di ntshiwang ka go rata,+ e le ditlhabelo tsa lona tse di fisiwang+ le ditlhabelo tsa lona tsa dijo tsa ditlhaka+ le ditlhabelo tsa lona tsa senô+ le ditlhabelo tsa lona tsa go abelana.’”+ 40 Moshe o ne a bolelela Baiseraele sengwe le sengwe se Jehofa a neng a se mo laetse.

30 Go tswa foo, Moshe o ne a bua le ditlhogo+ tsa ditso tsa Iseraele a re: “Jehofa o laetse jaana: 2 Fa monna a ikanela+ Jehofa kgotsa a dira maikano,+ a itirela maitlamo* a gore ga a kitla a dira sengwe, ga a tshwanela go tlola lefoko la gagwe.+ A dire sengwe le sengwe se a ikanneng gore o tla se dira.+

3 “Mme fa mosadi a ikanela Jehofa kgotsa a dira maitlamo a gore ga a kitla a dira sengwe, a sa ntse a le monnye e bile a nna mo ntlong ya ga rraagwe, 4 mme rraagwe a bo a utlwa maikano a gagwe kgotsa maitlamo a gagwe a gore ga a kitla a dira sengwe a a a dirileng mme rraagwe a bo a sa mo thibele, maikano otlhe a gagwe ga a kitla a fetoga, le maitlamo mangwe le mangwe a gore ga a kitla a dira sengwe ga a kitla a fetoga. 5 Mme fa rraagwe a utlwa maikano a a a dirileng kgotsa maitlamo a gore ga a kitla a dira sengwe a bo a mo thibela, a tla fetoga. Jehofa o tla mo itshwarela ka gonne rraagwe o ne a mo thibela.+

6 “Le fa go ntse jalo, fa a ka nyalwa a sa ntse a dirile maikano kgotsa a dirile tsholofetso ya lepotlapotla, 7 mme monna wa gagwe a bo a utlwa ka seo mme a bo a sa mo thibele ka letsatsi le a utlwileng ka lone, maikano a mosadi yono kgotsa maitlamo a a a dirileng a gore ga a kitla a dira sengwe, ga a kitla a fetoga. 8 Mme fa monna wa gagwe a mo thibela ka letsatsi le a utlwileng seno ka lone, a ka nna a fedisa maikano kgotsa tsholofetso ya lepotlapotla e mosadi wa gagwe a neng a e dirile,+ mme Jehofa o tla itshwarela mosadi yoo.

9 “Mme fa motlholagadi kgotsa mosadi yo o tlhadilweng a dira maikano, sengwe le sengwe se a ikanneng gore o tla se dira, o tla tshwanelwa ke go se diragatsa.

10 “Le fa go ntse jalo, fa mosadi a dira maikano kgotsa maitlamo a gore ga a kitla a dira sengwe, a sa ntse a nna mo ntlong ya monna wa gagwe, 11 mme monna wa gagwe a utlwile ka seno a bo a sa mo thibele kgotsa a sa gane, maikano otlhe a gagwe kgotsa maitlamo a gore ga a kitla a dira sengwe, ga a kitla a fetoga. 12 Mme fa e le gore mo letsatsing le monna wa gagwe a a utlwileng ka lone o ile a fedisa gotlhelele maikano ape a mosadi a a dirileng kgotsa maitlamo a gore ga a kitla a dira sengwe, a tla fetoga.+ Monna wa gagwe o a fedisitse, mme Jehofa o tla itshwarela mosadi yoo. 13 Mme fa e le maikano ape kgotsa maitlamo ape a mosadi a a dirileng a a akaretsang gore ga a kitla a dira sengwe e le gore a itime dilo dingwe,* monna wa gagwe o tla dira tshwetso ya gore mosadi a diragatse maikano ao kgotsa a se ka a a diragatsa. 14 Mme fa letsatsi le letsatsi monna wa gagwe a sa mo thibele gotlhelele, le ene o a bo a letla mosadi wa gagwe go diragatsa maikano a gagwe otlhe kgotsa maitlamo otlhe a a a dirileng a gore ga a kitla a dira sengwe. O mo letlile go dira seno ka gonne o ne a se ka a mo thibela ka letsatsi le a neng a mo utlwa a a dira. 15 Mme gone fa a a fedisa moragonyana, nako nngwe morago ga letsatsi le a mo utlwileng a a dira, o tla rwala ditlamorago tsa molato wa mosadi wa gagwe.+

16 “Eno ke melao e Jehofa a neng a e laela Moshe e e amanang le monna le mosadi wa gagwe, le e e amanang le rre le morwadie yo monnye yo o sa ntseng a nna mo ntlong ya ga rraagwe.”

31 Go tswa foo, Jehofa o ne a raya Moshe a re: 2 “Otlhaya+ Bamidiana ka ntlha ya se ba se dirileng Baiseraele.+ Morago ga moo, o tla phuthelwa kwa bathong ba gaeno.”*+

3 Ka jalo, Moshe o ne a bua le batho a re: “Rulaganyang banna go tswa mo go lona gore ba ye ntweng* ba ye go tlhabana le Bamidiana ba bo ba diragatse pusoloso ya ga Jehofa mo Bamidianeng. 4 Go tswa mo lotsong longwe le longwe lwa ditso tsotlhe tsa Iseraele, lo romele banna ba le 1 000 gore ba ye bosoleng.” 5 Ka jalo, go tswa mo diketeng tsa Iseraele+ go ne ga ntshiwa banna ba le 1 000 mo lotsong longwe le longwe, banna ba le 12 000 ba ba neng ba ipaakanyeditse ntwa.*

6 Foo Moshe o ne a romela banna ba le 1 000 go tswa mo lotsong longwe le longwe gore ba ye bosoleng, mmogo le Finease+ morwa moperesiti Eliasare gore a tsamaye le masole, yo o neng a tshotse dilwana tse di boitshepo le diterompeta tsa go naya sesupo.+ 7 Ba ne ba tlhabana le Bamidiana, fela jaaka Jehofa a ne a laetse Moshe, mme ba bolaya monna mongwe le mongwe. 8 Mo go ba ba neng ba bolailwe, ba ne ba bolaile le dikgosi tsa Bamidiana e bong, Efi, Rekeme, Sure, Hure le Reba, dikgosi di le tlhano tsa Bamidiana. Gape ba ne ba bolaya Balaame+ morwa Beore ka tšhaka. 9 Mme Baiseraele ba ne ba isa basadi le bana ba Bamidiana botshwarwa. Gape ba ne ba gapa diruiwa tsotlhe tsa bone, leruo lotlhe la bone le dithoto tsotlhe tsa bone. 10 Mme ba ne ba fisa metse yotlhe e ba neng ba nna mo go yone le dikampa* tsotlhe tsa bone. 11 Ba ne ba tsaya dilo tsotlhe tse batho ba neng ba na le tsone le diphologolo tsotlhe tsa bone, gape ba ne ba tsaya batho gore e nne magolegwa. 12 Go tswa foo, ba ne ba tla kwa kampeng kwa go Moshe le moperesiti Eliasare le phuthego ya Baiseraele kwa sekakeng sa Moabe+ gaufi le Joredane kwa Jeriko, mme ba ne ba tlisa batshwarwa le dilo tse ba di gapileng.

13 Moshe le moperesiti Eliasare le dikgosana tsotlhe tsa phuthego ba ne ba tswa ba ya go ba kgatlhantsha kwa ntle ga kampa. 14 Mme Moshe o ne a galefela banna ba ba tlhomilweng ba mephato ya sesole, baokamedi ba dikete le baokamedi ba makgolo ba ba neng ba goroga ba tswa kwa ntweng. 15 Moshe o ne a ba raya a re: “A lo tlogetse basadi botlhe ba tshela? 16 Ke bone ba ba neng ba tlhotlheletsa Baiseraele gore ba direle Jehofa ka go tlhoka boikanyegi+ go ya ka lefoko la ga Balaame mo tiragalong e e amanang le Peore,+ mo petso e neng ya wela phuthego ya ga Jehofa.+ 17 Jaanong bolayang ngwana mongwe le mongwe wa mosimane lo bo lo bolaye mosadi mongwe le mongwe yo o kileng a tlhakanela dikobo le monna. 18 Mme gone, lo ka nna lwa tlogela basetsana botlhe ba bannye ba ba iseng ba tlhakanele dikobo le monna ope.+ 19 Mme lo nne kwa ntle ga kampa malatsi a le supa. Mongwe le mongwe wa lona yo o bolaileng motho le mongwe le mongwe wa lona yo o kgomileng motho yo o bolailweng,+ a iitshekise+ mo letsatsing la boraro le mo letsatsing la bosupa, lona le batshwarwa ba lona. 20 Mme seaparo sengwe le sengwe, sengwe le sengwe se se dirilweng ka letlalo, sengwe le sengwe se se dirilweng ka boboa jwa dipodi le sengwe le sengwe se se dirilweng ka logong, lo se phepafatse.”

21 Go tswa foo, moperesiti Eliasare o ne a raya banna ba masole ba ba neng ba ile ntweng a re: “Ono ke molao o Jehofa a neng a o laela Moshe, 22 ‘Gauta, selefera, kopore, tshipi, thini le lloto, 23 sengwe le sengwe se se sa senngweng ke molelo, lo se fetise mo molelong mme se tla nna phepa. Mme gape se tlhatswiwe ka metsi.*+ Sengwe le sengwe se se senngwang ke molelo, lo se tlhatswe ka metsi. 24 Mme lo tlhatswe diaparo tsa lona mo letsatsing la bosupa, lo nne phepa, go tswa foo lo ka nna lwa tsena mo kampeng.’”+

25 Morago ga moo, Jehofa o ne a bolelela Moshe jaana: 26 “Bala dilo tsotlhe tse di gapilweng, o bale batho ba ba dirilweng batshwarwa le diphologolo; o dire seno le moperesiti Eliasare le ditlhogo tsa dikgotla tsa bone tsa phuthego. 27 O kgaoganye se se gapilweng ka dikarolo di le pedi gore se kgaoganyediwe ba ba mo sesoleng ba ba neng ba nna le seabe mo ntweng le phuthego yotlhe.+ 28 Go tswa mo masoleng a a neng a ile ntweng, o tseye motho a le mongwe mo setlhopheng sa batho ba le 500, kgomo e le nngwe mo dikgomong di le 500, tonki e le nngwe mo ditonking di le 500 le nku e le nngwe mo dinkung di le 500 gore e nne lekgetho la ga Jehofa. 29 Lo le tseye mo karolong e ba e neilweng mme lo le neye moperesiti Eliasare e le moneelo wa ga Jehofa.+ 30 Go tswa mo karolong e e neilweng Baiseraele, lo tseye motho a le mongwe mo go ba le 50, kgomo e le nngwe mo dikgomong di le 50, tonki e le nngwe mo ditonking di le 50, nku e le nngwe mo dinkung di le 50 le seruiwa sa mofuta mongwe le mongwe, mme lo di neye Balefi+ ba ba dirang maikarabelo a a amanang le motlaagana wa ga Jehofa.”+

31 Ka jalo, Moshe le moperesiti Eliasare ba ne ba dira fela jaaka Jehofa a ne a laetse Moshe. 32 Dilo tsotlhe tse di gapilweng tse batho ba ba neng ba dule letsholo ba neng ba di tsere, e ne ya nna dinku di le 675 000, 33 dikgomo di le 72 000 34 le ditonki di le 61 000. 35 Basadi ba ba neng ba ise ba tlhakanele dikobo le monna ope+ ba ne ba le 32 000. 36 Karolo e e neng e le kabelo ya ba ba neng ba ile ntweng e ne ya nna dinku di le 337 500. 37 Lekgetho le le ntshediwang Jehofa e ne e le dinku di le 675. 38 Mme dikgomo di ne di le 36 000, mme go ne ga ntshiwa di le 72 mo go tsone gore e nne lekgetho la ga Jehofa. 39 Mme ditonki di ne di le 30 500, mme go ne ga ntshiwa di le 61 mo go tsone gore e nne lekgetho la ga Jehofa. 40 Mme batho ba ne ba le 16 000, mme go ne ga ntshiwa batho ba le 32 mo go bone gore e nne lekgetho la ga Jehofa. 41 Go tswa foo, Moshe o ne a naya moperesiti Eliasare+ lekgetho leno e le moneelo wa ga Jehofa, fela jaaka Jehofa a ne a laetse Moshe.

42 Go tswa mo karolong e e abetsweng Baiseraele, e Moshe a neng a e kgaogantse le karolo ya banna ba ba neng ba ile ntweng, 43 mo karolong eo go ne go na le dinku di le 337 500, 44 le dikgomo di le 36 000, 45 le ditonki di le 30 500, 46 le batho ba le 16 000. 47 Foo Moshe o ne a tsaya motho a le mongwe mo go ba le 50 le phologolo e le nngwe mo go di le 50 go tswa mo karolong e e neng e le ya Baiseraele a bo a di naya Balefi+ ba ba nang le boikarabelo jwa go tlhokomela motlaagana wa ga Jehofa,+ fela jaaka Jehofa a ne a laetse Moshe.

48 Go tswa foo, banna ba ba tlhomilweng ba ba neng ba okametse dikete tsa mophato wa sesole,+ baokamedi ba dikete le baokamedi ba makgolo, ba ne ba atamela Moshe, 49 mme ba ne ba raya Moshe ba re: “Rona batlhanka ba gago re badile banna ba re ba okametseng ba ba neng ba ile ntweng, mme ga go ope wa bone yo go begilweng gore ga a yo.+ 50 Ka jalo, mma mongwe le mongwe wa rona a ntshe se a se boneng gore e nne mpho ya ga Jehofa, dilwana tsa gauta, dibaga tsa maoto, maseka, dipalamonwana tse di tshwayang, manyena le dibenyane tse dingwe gore Jehofa a kgone go re itshwarela maleo.”

51 Ka jalo, Moshe le moperesiti Eliasare ba ne ba amogela gauta go tswa mo go bone, dibenyane tseo tsotlhe. 52 Gauta yotlhe e ba neng ba e ntshetsa Jehofa e le moneelo e ne ya fitlha go dishekele* di le 16 750, e tswa mo balaoding ba dikete le mo balaoding ba makgolo. 53 Mongwe le mongwe wa banna ba mophato wa sesole o ne a itseetse se se gapilweng. 54 Moshe le moperesiti Eliasare ba ne ba amogela gauta go tswa mo balaoding ba dikete le ba makgolo, mme ba ne ba e tlisa mo tenteng ya bokopanelo gore e nne segopotso* mo bathong ba Iseraele fa pele ga ga Jehofa.

32 Jaanong bomorwa Rubene+ le bomorwa Gada+ ba ne ba na le leruo le lentsi thata, mme ba ne ba bona gore lefatshe la Jasere+ le la Gileade e ne e le kgaolo e e siametseng leruo. 2 Ka jalo, bomorwa Gada le bomorwa Rubene ba ne ba ya kwa go Moshe, moperesiti Eliasare le dikgosana tsa phuthego ba bo ba re: 3 “Atarothe, Dibone, Jasere, Nimera, Heshebone,+ Eleale, Sebame, Nebo+ le Beone,+ 4 lefatshe le Jehofa a neng a le fenya fa pele ga phuthego ya Iseraele,+ ke lefatshe le le siametseng leruo mme rona batlhanka ba lona re na le leruo le lentsi.”+ 5 Ba ne ba tswelela ba re: “Fa e le gore lo a re amogela, mma re newe lefatshe leno gore re nne mo go lone. Lo se ka lwa dira gore re kgabaganye Joredane.”

6 Foo Moshe o ne a raya bomorwa Gada le bomorwa Rubene a re: “A bomorwarraalona ba tla ya ntweng lona lo setse fano? 7 Ke ka ntlha yang fa lo kgoba batho ba Iseraele marapo gore ba se ka ba kgabaganyetsa kwa lefatsheng le Jehofa a tla le ba nayang? 8 Seo ke se borraalona ba neng ba se dira fa ke ne ke ba roma go tswa kwa Kadeshe-barenea gore ba ye go tlhola lefatshe.+ 9 E rile ba tlhatlogela kwa Mokgatšheng* wa Eshekole+ mme ba bona lefatshe leo, ba ne ba kgoba batho ba Iseraele marapo gore ba se ka ba tsena mo lefatsheng le Jehofa a neng a tla le ba naya.+ 10 Mo letsatsing leo, Jehofa o ne a galefa fela thata mo a neng a ikana a re:+ 11 ‘Banna ba ba neng ba tswa kwa Egepeto go simolola ka ba ba nang le dingwaga di le 20 go ya kwa godimo ga ba kitla ba bona lefatshe+ le ke neng ka le ikanela Aborahame, Isake le Jakobe,+ ka gonne ga ba a ntshala morago ka pelo yotlhe, 12 kwantle ga ga Kalebe+ morwa Jefune wa Mokenise le Joshua+ morwa Nune, ka gonne bone ba setse Jehofa morago ka pelo yotlhe.’+ 13 Ka jalo, Jehofa o ne a galefela Baiseraele fela thata mme a dira gore ba kgarakgatshege mo nageng dingwaga di le 40,+ go fitlha kokomana yotlhe e e neng e dira bosula mo matlhong a ga Jehofa e fela.+ 14 Lona banna ke lona ba ba nang le boleo lo dira fela jaaka borraalona ba ne ba dira, lo oketsa bogale jwa ga Jehofa jo bo tukelang Iseraele. 15 Fa lo tlogela go mo sala morago, ruri o tla ba tlogela gape mo nageng, mme lo tla dira gore batho bano botlhe ba fedisiwe.”

16 Moragonyana ba ne ba mo atamela mme ba re: “Mma re agele leruo la rona masaka a maje fano le bana ba rona re ba agele metse fano. 17 Mme re tla tswelela re ipaakanyeditse ntwa+ e bile re tla tsamaya fa pele ga Baiseraele go fitlha re ba isa kwa lefelong la bone, fa bana ba rona bone ba tla bo ba nna mo metseng e e sireletsegileng, ba sireletsegile mo bathong ba ba nnang mo lefatsheng leno. 18 Ga re kitla re boela kwa matlong a rona go fitlha mongwe le mongwe wa Baiseraele a amogela karolo ya gagwe ya naga e le boswa.+ 19 Gonne ga re kitla re amogela boswa mmogo le bone ka kwa letlhakoreng le lengwe la Joredane le go ya pele, ka gonne re amogetse boswa jwa rona ka fa letlhakoreng le le ka fa botlhaba jwa Joredane.”+

20 Moshe o ne a ba araba a re: “Fa e le gore lo tla dira jaana: Lo tla tsaya dibetsa fa pele ga ga Jehofa lo ipaakanyetsa ntwa;+ 21 mme fa e le gore mongwe le mongwe wa lona o tla tsaya dibetsa a bo a kgabaganya Joredane fa pele ga ga Jehofa fa a ntse a leleka baba ba gagwe fa pele ga gagwe+ 22 go fitlha lefatshe le fentswe fa pele ga ga Jehofa,+ morago ga moo, lo ka nna lwa boa+ mme lo tla bo lo se na molato fa pele ga ga Jehofa le Iseraele. Foo lefatshe leno e tla nna la lona fa pele ga ga Jehofa.+ 23 Mme gone fa lo sa dire seo, lo tla bo lo leofetse Jehofa. Mme lo itse gore boleo jwa lona bo tla lo tshwara. 24 Ka jalo, lo ka nna lwa agela bana ba lona metse le matsomane a lona masaka,+ mme lo tshwanetse go dira se lo se solofeditseng.”

25 Bomorwa Gada le bomorwa Rubene ba ne ba raya Moshe ba re: “Rona batlhanka ba gago, re tla dira fela jaaka morena wa rona a laela. 26 Bana ba rona, basadi ba rona, leruo la rona le diruiwa tsa rona di tla nna kwa metseng ya Gileade,+ 27 mme rona batlhanka ba gago re tla kgabaganya, monna mongwe le mongwe a ipaakanyeditse tlhabano go ya go lwa fa pele ga ga Jehofa,+ fela jaaka morena wa rona a bua.”

28 Ka jalo, Moshe o ne a naya moperesiti Eliasare, Joshua morwa Nune le ditlhogo tsa ditso tsa Iseraele tsa dikgotla tsa bone taelo. 29 Moshe o ne a ba raya a re: “Fa bomorwa Gada le bomorwa Rubene ba kgabaganya Joredane le lona, monna mongwe le mongwe a ipaakanyeditse tlhabano fa pele ga ga Jehofa, mme lefatshe le bo le fenngwa fa pele ga lona, foo lo ba neye lefatshe la Gileade gore e nne la bone.+ 30 Mme fa ba sa tseye dibetsa ba bo ba kgabaganya le lona, foo ba tla nna le lona mo lefatsheng la Kanana.”

31 Bomorwa Gada le bomorwa Rubene ba ne ba araba ba re: “Se Jehofa a se buileng le rona batlhanka ba gago, ke sone se re tla se dirang. 32 Re tla tsaya dibetsa re bo re kgabaganya fa pele ga ga Jehofa re ya kwa lefatsheng la Kanana,+ mme gone karolo e re tla e ruang e le boswa e tla nna ka fa letlhakoreng leno la Joredane.” 33 Ka jalo, Moshe o ne a naya bomorwa Gada, bomorwa Rubene+ le halofo ya lotso lwa ga Manase+ morwa Josefa bogosi jwa ga Sihone+ kgosi ya Baamore le bogosi jwa ga Oge+ kgosi ya kwa Bashana, lefatshe la metse ya bone mo dikarolong tseo tsa naga le metse ya naga e e di dikologileng.

34 Mme bomorwa Gada ba ne ba aga* Dibone,+ Atarothe,+ Aroere,+ 35 Aterothe-shofane, Jasere,+ Jogebeha,+ 36 Bethe-nimera+ le Bethe-harana,+ e leng metse e e sireletsegileng ba bo ba agela matsomane a bone masaka a maje. 37 Mme bomorwa Rubene ba ne ba aga Heshebone,+ Eleale,+ Kiriathaima,+ 38 Nebo+ le Baale-meone+ (maina a yone a ne a fetolwa) le Sibema; mme ba ne ba simolola go bitsa metse e ba neng ba e agile sesha ka maina a mangwe.

39 Bomorwa Makire+ morwa Manase ba ne ba ya go tlhasela Gileade mme ba e gapa ba bo ba leleka Baamore ba ba neng ba nna mo go yone. 40 Ka jalo, Moshe o ne a naya Makire morwa Manase Gileade, mme o ne a simolola go nna mo go yone.+ 41 Mme Jaire morwa Manase o ne a ya go lwa le bone mme a gapa metsana ya bone ya ditente, mme a simolola go e bitsa Hafotha-jaire.*+ 42 Mme Noba o ne a ya go tlhasela Kenathe a bo a e gapa le metsana ya yone e e e dikologileng, mme o ne a simolola go e bitsa ka leina la gagwe e bong Noba.

33 Tseno e ne e le dikarolo tsa loeto lwa Baiseraele fa ba ne ba tswa kwa lefatsheng la Egepeto+ go ya ka mephato ya bone*+ ba eteletswe pele ke Moshe le Arone.+ 2 Moshe o ne a nna a kwala mafelo a ba neng ba fuduga mo go one go ya ka dikarolo tsa loeto lwa bone ka taelo ya ga Jehofa, mme tseno e ne e le dikarolo tsa loeto lwa bone fa ba ne ba fuduga mo lefelong le lengwe ba ya kwa go le lengwe:+ 3 Ba ne ba fuduga mo Ramesese+ mo kgweding ya ntlha, ka letsatsi la bo15 la kgwedi eo.+ Letsatsi fela morago ga Tlolaganyo,+ Baiseraele ba ne ba tswa ba tsamaya ba le pelokgale* Baegepeto botlhe ba ba lebile. 4 Mo nakong eo, Baegepeto ba ne ba ntse ba fitlha* maitibolo otlhe a Jehofa a neng a a bolaile,+ ka gonne Jehofa o ne a atlhotse medimo ya bone.+

5 Baiseraele ba ne ba fuduga mo Ramesese mme ba nna kwa Sukothe.+ 6 Go tswa foo, ba ne ba fuduga kwa Sukothe mme ba nna kwa Ethame,+ e e kwa bofelong jwa naga. 7 Morago ga moo, ba ne ba fuduga kwa Ethame mme ba boela kwa Pihahirothe, e e lebaganeng le Baale-sefone,+ mme ba ne ba kampa fa pele ga Migedole.+ 8 Go tswa foo, ba ne ba fuduga kwa Pihahirothe ba bo ba kgabaganya lewatle+ ba ya kwa nageng+ mme ba ne ba tsamaya loeto lwa malatsi a le mararo mo nageng ya Ethame+ mme ba nna kwa Mara.+

9 Fa ba fuduga kwa Mara ba ne ba tla mo Elime. Jaanong go ne go na le metswedi ya metsi e le 12 kwa Elime le ditlhare tsa mokolane di le 70, ka jalo ba ne ba nna gone.+ 10 Morago ga moo, ba ne ba fuduga kwa Elime mme ba nna gaufi le Lewatle le Lehibidu. 11 Go tswa foo, ba ne ba fuduga fa Lewatleng le Lehibidu mme ba nna mo nageng ya Sine.+ 12 Morago ga moo, ba ne ba fuduga mo nageng ya Sine mme ba nna kwa Dofeka. 13 Moragonyana ba ne ba fuduga kwa Dofeka mme ba nna kwa Alushe. 14 Go tswa foo, ba ne ba fuduga kwa Alushe mme ba nna kwa Refidime,+ kwa go neng go se na metsi a batho ba ka a nwang. 15 Morago ga moo, ba ne ba fuduga kwa Refidime mme ba nna mo nageng ya Sinai.+

16 Ba ne ba fuduga mo nageng ya Sinai mme ba nna kwa Kiberothe-hataafa.+ 17 Go tswa foo, ba ne ba fuduga kwa Kiberothe-hataafa mme ba nna kwa Haserothe.+ 18 Morago ga moo, ba ne ba fuduga kwa Haserothe mme ba nna kwa Rithema. 19 Fa ba fuduga kwa Rithema ba ne ba nna kwa Rimone-perese. 20 Go tswa foo, ba ne ba fuduga kwa Rimone-perese mme ba nna kwa Libena. 21 Ba ne ba fuduga kwa Libena mme ba nna kwa Risa. 22 Morago ga moo, ba ne ba fuduga kwa Risa mme ba nna kwa Kehelatha. 23 Go tswa foo, ba ne ba fuduga kwa Kehelatha mme ba nna fa Thabeng ya Shefere.

24 Morago ga moo, ba ne ba fuduga fa Thabeng ya Shefere mme ba nna kwa Harada. 25 Go tswa foo, ba ne ba fuduga kwa Harada mme ba nna kwa Makhelothe. 26 Morago ga moo, ba ne ba fuduga+ kwa Makhelothe mme ba nna kwa Tahathe. 27 Go tswa foo, ba ne ba fuduga kwa Tahathe mme ba nna kwa Tera. 28 Morago ga moo, ba ne ba fuduga kwa Tera mme ba nna kwa Mitheka. 29 Moragonyana ba ne ba fuduga kwa Mitheka mme ba nna kwa Hashemona. 30 Morago ga moo, ba ne ba fuduga kwa Hashemona mme ba nna kwa Moserothe. 31 Go tswa foo, ba ne ba fuduga kwa Moserothe mme ba nna kwa Bene-jaakane.+ 32 Mme ba ne ba fuduga kwa Bene-jaakane ba ya go nna kwa Horo-hagidegade. 33 Morago ga moo, ba ne ba fuduga kwa Horo-hagidegade mme ba nna kwa Jotebatha.+ 34 Moragonyana ba ne ba fuduga kwa Jotebatha mme ba nna kwa Aberona. 35 Go tswa foo, ba ne ba fuduga kwa Aberona mme ba nna kwa Esione-gebere.+ 36 Morago ga moo, ba ne ba fuduga kwa Esione-gebere mme ba nna kwa nageng ya Tsine,+ e leng Kadeshe.

37 Moragonyana ba ne ba fuduga kwa Kadeshe mme ba nna fa Thabeng ya Hore,+ mo molelwaneng wa lefatshe la Edoma. 38 Mme moperesiti Arone o ne a tlhatlogela kwa Thabeng ya Hore ka taelo ya ga Jehofa mme o ne a swela gone mo ngwageng wa bo40 fa Baiseraele ba sena go tswa kwa lefatsheng la Egepeto, mo kgweding ya botlhano, ka letsatsi la ntlha la kgwedi eo.+ 39 Arone o ne a na le dingwaga di le 123 fa a ne a swela kwa Thabeng ya Hore.

40 Jaanong kgosi ya Arada,+ Mokanana mongwe yo o neng a nna mo Negebe mo lefatsheng la Kanana, o ne a utlwa gore Baiseraele ba etla.

41 Fa nako e ntse e tsamaya, ba ne ba fuduga fa Thabeng ya Hore+ mme ba nna kwa Salemona. 42 Morago ga moo, ba ne ba fuduga kwa Salemona mme ba nna kwa Punone. 43 Go tswa foo, ba ne ba fuduga kwa Punone mme ba nna kwa Obothe.+ 44 Morago ga moo, ba ne ba fuduga kwa Obothe mme ba nna kwa Aye-abarime fa molelwaneng wa Moabe.+ 45 Moragonyana ba ne ba fuduga kwa Aime mme ba nna kwa Dibone-gade.+ 46 Morago ga moo, ba ne ba fuduga kwa Dibone-gade mme ba nna kwa Alemona-dibelathaime. 47 Go tswa foo, ba ne ba fuduga kwa Alemona-dibelathaime mme ba nna kwa dithabeng tsa Abarime+ fa pele ga Nebo.+ 48 La bofelo ba ne ba fuduga kwa dithabeng tsa Abarime mme ba nna mo sekakeng sa Moabe gaufi le Joredane kwa Jeriko.+ 49 Ba ne ba tswelela ba kampile fa thoko ga Joredane, go simolola kwa Bethe-jeshimothe go fitlha kwa Abele-shitime,+ mo sekakeng sa Moabe.

50 Jehofa o ne a bua le Moshe mo sekakeng sa Moabe gaufi le Joredane kwa Jeriko a re: 51 “Bua le Baiseraele o ba reye o re, ‘Lo kgabaganya Joredane lo tsena mo lefatsheng la Kanana.+ 52 Lo tshwanetse go leleka banni botlhe ba lefatshe leo fa pele ga lona lo bo lo senye dilo tsotlhe tsa bone tse di betlilweng ka maje+ le difikantswe tsotlhe tsa bone tse di bopilweng+ e bile lo senye mafelo otlhe a bone a a kwa godimo a a boitshepo.+ 53 Mme lo tla gapa lefatshe leo lo bo lo nna mo go lone, ka gonne ruri ke tla lo naya lefatshe leo gore e nne la lona.+ 54 Lo tshwanetse go kgaoganyetsa malapa a lona lefatshe ka bola+ gore e nne la bone. Ditlhopha tse dikgolo lo di okeletse boswa, mme ditlhopha tse dinnye lo fokotse boswa jwa tsone.+ Boswa jwa mongwe le mongwe bo tla nna kwa bola jwa gagwe bo welang gone. Lo tla amogela karolo ya lona ya naga e le boswa go ya ka ditso tsa borraalona.+

55 “‘Le fa go ntse jalo, fa lo sa leleke banni ba lefatshe leo fa pele ga lona,+ ba lo tla ba tlogelang ba tla nna jaaka sengwe se se fatlhang mo matlhong a lona le jaaka mmitlwa mo matlhakoreng a lona, mme ba tla lo bogisa kwa lefatsheng le lo tla nnang kwa go lone.+ 56 Mme ke tla lo dira se ke neng ke ikaeletse go se ba dira.’”+

34 Mme Jehofa o ne a tswelela a bua le Moshe a re: 2 “Naya Baiseraele ditaelo tseno: ‘Fa lo tsena mo lefatsheng la Kanana,+ leno ke lefatshe le e tla nnang la lona e le boswa, lefatshe la Kanana go ya ka melelwane ya lone.+

3 “‘Molelwane wa lona o o kwa borwa o tla simologa kwa nageng ya Tsine go bapa le Edoma, mme molelwane wa lona o o kwa borwa ka fa botlhaba o tla simologa kwa bofelelong jwa Lewatle la Letswai.*+ 4 Molelwane wa lona o tla fapoga o bo o ya go feta ka fa borwa jwa thotana ya Akarabime+ mme o fetele kwa Tsine, mme o tla felela kwa borwa jwa Kadeshe-barenea.+ Go tswa foo, o tla fetela kwa Hasare-adare+ o bo o ya kwa Asemone. 5 Molelwane oo o tla fapoga kwa Asemone o bo o ya kwa Molapong wa Egepeto, mme o tla felela kwa Lewatleng.*+

6 “‘Molelwane wa lona o o kwa bophirima e tla nna Lewatle le Legolo* le lotshitshi. Ono e tla nna molelwane wa lona o o kwa bophirima.+

7 “‘Jaanong ono e tla nna molelwane wa lona o o kwa bokone: Go tswa kwa Lewatleng le Legolo lo tla tshwaya molelwane wa lona go ya go fitlha kwa Thabeng ya Hore. 8 Go tswa kwa Thabeng ya Hore, lo tla tshwaya molelwane go ya go fitlha kwa Lebo-hamathe,*+ mme molelwane oo o tla felela kwa Sedade.+ 9 Mme molelwane oo o tla ya kwa Siferone, mme o tla felela kwa Hasare-enane.+ Ono e tla nna molelwane wa lona o o kwa bokone.

10 “‘Morago ga moo, lo tshwaye molelwane wa lona o o kwa botlhaba go simologa kwa Hasare-enane go ya go fitlha kwa Shefame. 11 Molelwane oo o tla tswa kwa Shefame o bo o fetela kwa Ribela ka fa botlhaba jwa Aine, mme o tla fologela o bo o kgabaganya mokgokolosa o o ka fa botlhaba jwa Lewatle la Kinerethe.*+ 12 Molelwane oo o tla fetela kwa Joredane, mme o tla felela kwa Lewatleng la Letswai.+ Leno e tla nna lefatshe la lona+ le melelwane e e le dikologileng.’”

13 Ka jalo, Moshe o ne a laela Baiseraele a re: “Leno ke lefatshe le lo tla le kgaoganyang ka bola+ gore e nne la lona, fela jaaka Jehofa a laetse gore o tla le naya ditso di le robongwe le halofo. 14 Gonne lotso lwa Barubene go ya ka dikgotla tsa bone, lotso lwa Bagada go ya ka dikgotla tsa bone le halofo ya lotso lwa ga Manase ba setse ba tsere boswa jwa bone.+ 15 Ditso tseno tse pedi le halofo di setse di tsere boswa jwa tsone kwa kgaolong e e kwa botlhaba jwa Joredane gaufi le Jeriko go ela kwa botlhabatsatsi.”+

16 Jehofa o ne a tswelela a bua le Moshe a re: 17 “Ano ke maina a banna ba ba tla lo kgaoganyetsang lefatshe gore lo nne mo go lone: moperesiti Eliasare+ le Joshua+ morwa Nune. 18 Mme lo tla tsaya kgosana e le nngwe mo lotsong longwe le longwe gore e kgaoganye lefatshe gore e nne boswa jwa lona.+ 19 Maina a banna bao ke ano: go tswa mo lotsong lwa ga Juda,+ Kalebe+ morwa Jefune; 20 go tswa mo lotsong lwa bomorwa Simeone,+ Shemuele morwa Amihude; 21 go tswa mo lotsong lwa ga Benjamine,+ Elidade morwa Kiselone; 22 go tswa mo lotsong lwa bomorwa Dana,+ kgosana Buki morwa Jogeli; 23 go tswa mo go bomorwa Josefa,+ yo o tswang mo lotsong lwa bomorwa Manase,+ kgosana Haniele morwa Efode; 24 yo o tswang mo lotsong lwa bomorwa Eferaime,+ kgosana Kemuele morwa Shifetane; 25 go tswa mo lotsong lwa bomorwa Sebulone,+ kgosana Elisafane morwa Paranake; 26 go tswa mo lotsong lwa bomorwa Isakare,+ kgosana Palatiele morwa Asane; 27 go tswa mo lotsong lwa bomorwa Ashera,+ kgosana Ahihude morwa Shelomi; 28 go tswa mo lotsong lwa bomorwa Nafetali,+ kgosana Pedahele morwa Amihude.” 29 Bano ke bone ba Jehofa a neng a ba laela gore ba kgaoganyetse Baiseraele lefatshe mo lefatsheng la Kanana.+

35 Jehofa o ne a tswelela a bua le Moshe mo sekakeng sa Moabe gaufi le Joredane+ kwa Jeriko, a re: 2 “Laela Baiseraele gore go tswa mo karolong e e tla nnang boswa jwa bone,+ ba neye Balefi metse e ba tla nnang mo go yone ba bo ba ba neye mafulo a a dikologileng metse eo.+ 3 Ba tla nna mo metseng eo mme mafulo one e tla nna a leruo la bone, a dithoto tsa go tlhokomela leruo la bone le a diphologolo tse dingwe tsotlhe tsa bone. 4 Mafulo a metse e lo tla e nayang Balefi, a katoge lobota lwa motse ka dimetara di ka nna 44* go o dikologa. 5 Lo lekanye* dimetara di ka nna 89* ka kwa ntle ga motse ka fa botlhaba, dimetara di ka nna 89 ka fa borwa, dimetara di ka nna 89 ka fa bophirima le dimetara di ka nna 89 ka fa bokone, motse o le fa gare. Ano e tla nna mafulo a metse ya bone.

6 “Metse e lo tla e nayang Balefi e nne metse ya botshabelo e le 6,+ e lo tla e ntshang gore mmolai a tshabele kwa go yone,+ mmogo le metse e mengwe e le 42. 7 Lo neye Balefi metse e le 48 mmogo le mafulo a yone.+ 8 Metse e lo e ba nayang e tla tswa mo karolong e e leng boswa jwa Baiseraele.+ Mo setlhopheng se segolo, lo tseye e le mentsi mme mo setlhopheng se sennye lo tseye e le mmalwa.+ Setlhopha sengwe le sengwe se neye Balefi mengwe ya metse ya sone go lekana le boswa jo se bo amogelang.”

9 Jehofa o ne a tswelela a bua le Moshe a re: 10 “Bua le Baiseraele mme o ba reye o re, ‘Lo kgabaganya Joredane lo ya kwa lefatsheng la Kanana.+ 11 Lo itlhophele metse e e lo siametseng gore e nne metse ya botshabelo, kwa mmolai yo o bolayang motho* e se ka boomo a tla tshabelang teng.+ 12 Metse eno e tla nna e lo tshabelang mmusolosi wa madi+ kwa go yone, gore mmolai a se ka a bolawa go fitlha a sekisiwa fa pele ga phuthego.+ 13 Metse e merataro ya botshabelo e lo tla e tlhophang, e tla dirisediwa boikaelelo jono. 14 Lo tlhophe metse e meraro ka fa letlhakoreng leno la Joredane+ e bile lo tlhophe metse e meraro kwa lefatsheng la Kanana+ gore e nne metse ya botshabelo. 15 Metse eno e merataro e tla nna botshabelo jwa Baiseraele, batswakwa+ le motho yo o agileng mo go bone, gore ope yo o bolayang motho e se ka boomo a tshabele teng.+

16 “‘Mme gone fa a mo itaya ka sedirisiwa sengwe sa tshipi a bo a swa, ke mmolai. Mmolai yoo o tshwanetse go bolawa.+ 17 Mme fa a mo itaya ka leje le le ka mmolayang a bo a swa, ke mmolai. Mmolai yoo o tshwanetse go bolawa. 18 Mme fa a mo itaya ka sedirisiwa sa logong se se ka mmolayang a bo a swa, ke mmolai. Mmolai yoo o tshwanetse go bolawa.

19 “‘Mmusolosi wa madi ke ene yo o tla bolayang mmolai yoo. Fa a kopana le ene, a mmolaye. 20 Fa e le gore motho yoo o ne a swa ka gonne a mo kgoromeditse ka ntlha ya letlhoo kgotsa a mo konopile ka sengwe ka maikaelelo a a bosula*+ 21 kgotsa a mo iteile ka seatla ka ntlha ya letlhoo a bo a swa, motho yo o mo iteileng o tshwanetse go bolawa. Ke mmolai. Mmusolosi wa madi o tla bolaya mmolai yoo fa a kopana le ene.

22 “‘Mme fa e le gore o mo kgoromeditse e se ka boomo e bile e se ka ntlha ya letlhoo kgotsa a mo konopile ka selo sepe fela e se ka maikaelelo a a bosula,*+ 23 kgotsa fa e le gore o ne a sa mmone a bo a digela leje mo go ene mme gone e ne e se mmaba wa gagwe kgotsa a ne a sa batle go mo utlwisa botlhoko mme motho yoo a bo a swa, 24 foo phuthego e atlhole fa gare ga mmolai yoo le mmusolosi wa madi, go dumalana le dikatlholo tseno.+ 25 Go tswa foo, phuthego e sireletse mmolai yoo mo seatleng sa mmusolosi wa madi, mme e mmusetse kwa motseng wa gagabo wa botshabelo o a neng a tshabetse kwa go one, mme o tshwanetse go nna kwa go one go fitlha moperesiti yo mogolo yo o neng a tloditswe ka leokwane le le boitshepo a swa.+

26 “‘Mme gone, fa mmolai a tswa mo molelwaneng wa motse wa gagabo wa botshabelo o a tshabetseng kwa go one, 27 mme mmusolosi wa madi a mo fitlhela ka kwa ntle ga molelwane wa motse wa gagabo wa botshabelo a bo a bolaya mmolai yoo, ga a na molato wa madi. 28 Gonne mmolai yoo o tshwanetse go nna mo motseng wa gagabo wa botshabelo go fitlha moperesiti yo mogolo a swa. Mme morago ga loso lwa moperesiti yo mogolo, mmolai yoo a ka nna a boela kwa lefatsheng la gagwe.+ 29 Dilo tseno e tla nna molao wa go atlhola mo dikokomaneng tsotlhe tsa lona mo mafelong otlhe a lo nnang mo go one.

30 “‘Ope fela yo o bolayang motho a bolawe ka ntlha ya go bo e le mmolai+ ka bosupi* jwa basupi;+ mme gone, motho ope ga a kitla a bolawa ka bosupi jwa motho a le mongwe fela. 31 Ga lo a tshwanela go tsaya thekololo epe e e ntshediwang botshelo jwa mmolai yo o tshwanelwang ke loso, ka gonne o tshwanetse go bolawa.+ 32 Gape ga lo a tshwanela go tsaya thekololo ya motho yo o tshabetseng kwa motseng wa gagabo wa botshabelo, lo mo letla gore a ye go tswelela a nna mo lefatsheng la gagwe pele ga moperesiti yo mogolo a swa.

33 “‘Ga lo a tshwanela go kgotlela lefatshe le lo nnang mo go lone, ka gonne madi a kgotlela lefatshe,+ mme molato wa madi a a tshololetsweng mo lefatsheng o ka nna wa se ka wa phimoga, kwantle ga fa o phimolwa ka madi a motho yo o a tsholotseng.+ 34 Ga lo a tshwanela go kgotlela lefatshe le lo agileng mo go lone, lefatshe le ke agileng mo go lone; ka gonne nna Jehofa, ke agile mo gare ga batho ba Iseraele.’”+

36 Ditlhogo tsa malapa a ditlogolwana tsa ga Gileade morwa Makire+ morwa Manase tsa malapa a bomorwa Josefa, di ne tsa atamela mme tsa bua fa pele ga ga Moshe le dikgosana, e leng ditlhogo tsa malapa a Baiseraele. 2 Di ne tsa re: “Morena wa me, Jehofa o ne a go laela gore o kgaoganye lefatshe ka bola+ gore e nne boswa jwa Baiseraele; mme Jehofa o ne a go laela gore o neye bomorwadia Selofehade morwarraarona boswa jwa gagwe.+ 3 Fa ba nyalwa ke banna ba lotso lo longwe lwa Iseraele, boswa jwa basadi bano le jone bo tla ntshiwa mo bosweng jwa borraarona bo bo bo tsenngwa mo bosweng jwa lotso lo ba tla nyalwang mo go lone, ka jalo bo tla bo bo ntshiwa mo bosweng jwa rona jo re bo abetsweng ka bola. 4 Jaanong fa batho ba Iseraele ba nna le Jubile,+ boswa jwa basadi bano le jone bo tla tsenngwa mo bosweng jwa lotso lo ba tla nyalwang mo go lone, ka jalo boswa jwa bone bo tla bo bo ntshiwa mo bosweng jwa lotso lwa borraarona.”

5 Foo Moshe o ne a laela Baiseraele ka taelo ya ga Jehofa, a re: “Se lotso lwa bomorwa Josefa lo se buang se a utlwala. 6 Seno ke se Jehofa a neng a se laela bomorwadia Selofehade: ‘Ba ka nna ba nyalwa ke mongwe le mongwe yo ba mo ratang. Le fa go ntse jalo, ba nyalwe ke mongwe yo o tswang mo lelapeng la lotso lwa ga rraabone. 7 Go se ka ga nna le boswa bope jwa Baiseraele jo bo tswang mo lotsong lo longwe bo fetela kwa lotsong lo longwe, ka gonne Baiseraele ba tshwanetse go ngaparela boswa jwa lotso lwa borraabonemogolo. 8 Mme ngwana mongwe le mongwe wa mosetsana yo o abetsweng boswa mo ditsong tsa Iseraele, a nyalwe ke setlogolwana se se tswang mo lelapeng la lotso lwa ga rraagwe,+ gore Baiseraele ba tswelele ba ngaparetse boswa jwa borraabonemogolo. 9 Go se ka ga nna le boswa bope jo bo tswang mo lotsong lo longwe bo fetela kwa lotsong lo longwe, ka gonne ditso tsa Iseraele di tshwanetse go ngaparela boswa jwa tsone.’”

10 Bomorwadia Selofehade ba ne ba dira fela jaaka Jehofa a ne a laetse Moshe.+ 11 Ka jalo, Mahela, Tiresa, Hogola, Mileka le Noa, bomorwadia Selofehade,+ ba ne ba nyalwa ke barwa ba bomorwarraagwe rraabone. 12 Ba ne ba nyalwa ke banna ba ba tswang mo malapeng a ga Manase morwa Josefa, gore boswa jwa bone bo tswelele bo le mo lotsong lwa lelapa la ga rraabone.

13 Tseno ke ditaelo le ditshwetso tsa boatlhodi tse Jehofa a neng a di naya Baiseraele ka Moshe mo sekakeng sa Moabe gaufi le Joredane kwa Jeriko.+