Ọ́bá Akwụkwọ Anyị NKE DỊ N'ỊNTANET
Ọ́bá Akwụkwọ Anyị
NKE DỊ N'ỊNTANET
Igbo
Ọ
  • Á
  • á
  • À
  • à
  • É
  • é
  • È
  • è
  • Ì
  • ì
  • Í
  • í
  • Ị
  • ị
  • Ị̀
  • ị̀
  • Ị́
  • ị́
  • Ḿ
  • ḿ
  • M̀
  • m̀
  • Ṅ
  • ṅ
  • Ò
  • ò
  • Ó
  • ó
  • Ọ
  • ọ
  • Ọ̀
  • ọ̀
  • Ọ́
  • ọ́
  • Ù
  • ù
  • Ú
  • ú
  • Ụ
  • ụ
  • Ụ̀
  • ụ̀
  • Ụ́
  • ụ́
  • BAỊBỤL
  • AKWỤKWỌ NDỊ ANYỊ NWERE
  • ỌMỤMỤ IHE
  • nwt Zekaraya 1:1-14:21
  • Zekaraya

O nweghị vidio dị maka ihe a ị họọrọ.

Ewela iwe, o nwetụrụ nsogbu gbochiri vidio a ịkpọ.

  • Zekaraya
  • Baịbụl Nsọ nke Nsụgharị Ụwa Ọhụrụ
Baịbụl Nsọ nke Nsụgharị Ụwa Ọhụrụ
Zekaraya

ZEKARAYA

1 N’ọnwa nke asatọ, n’afọ nke abụọ n’ọchịchị Darayọs,+ Jehova gwara onye amụma bụ́ Zekaraya*+ nwa Berekaya nwa Ido, sị: 2 “Jehova wesara nna unu hà na ndị nna nna unu oké iwe.+

3 “Gwa ha na ọ bụ ihe a ka Jehova nke ụsụụ ndị agha kwuru: ‘Abụ m Jehova nke ụsụụ ndị agha. Lọghachikwutenụ m, m ga-alọghachikwutekwa unu.’+ Ọ bụ mụnwa, bụ́ Jehova nke ụsụụ ndị agha, na-agwa unu ihe a.”

4 “Jehova kwuru, sị: ‘Unu emela ka nna unu hà na ndị nna nna unu, ndị ndị amụma oge mbụ gwara, sị: “Ihe a bụ ihe Jehova nke ụsụụ ndị agha kwuru, ‘Biko, hapụnụ ụzọ ọjọọ unu na omume ọjọọ unu.’”’*+

“‘Ma ha egeghị ntị, ha aṅaghịkwa m ntị.’+

5 “‘Olee ebe nna unu hà na ndị nna nna unu nọ ugbu a? Ndị amụma ahụ hà dị ndụ ruo ebighị ebi? 6 Ma, ọ̀ bụ na ihe m gwara ndị amụma, bụ́ ndị ohu m, ka ha gwa nna unu hà na ndị nna nna unu emezughị n’isi ha mgbe ha nupụụrụ iwu m isi?’+ Ha wee lọghachikwute m ma sị: ‘Jehova nke ụsụụ ndị agha emeela anyị ihe o kwuru ọ ga-eme anyị n’ihi omume anyị na ụzọ anyị.’”+

7 N’abalị iri abụọ na anọ n’ọnwa nke iri na otu, ya bụ, n’ọnwa Shibat,* n’afọ nke abụọ n’ọchịchị Darayọs,+ Jehova gwara onye amụma bụ́ Zekaraya nwa Berekaya nwa Ido okwu. 8 Zekaraya wee kwuo, sị: “Ahụrụ m ọhụụ n’abalị. E nwere otu nwoke na-agba ịnyịnya na-acha ọbara ọbara. O wee kwụrụ otu ebe n’ebe e nwere osisi metụl ndị dị na ndagwurugwu. N’azụ ya, e nwere ịnyịnya ndị na-acha uhie uhie, ndị na-acha nchara nchara, nakwa ndị na-acha ọcha.”

9 M wee sị: “Onyenwe m, ole ndị ka ndị a bụ?”

Mmụọ ozi ahụ nke na-agwa m okwu zara m, sị: “M ga-egosi gị ndị ha bụ.”

10 Nwoke ahụ nke kwụ otu ebe n’ebe ahụ e nwere osisi metụl wee sị: “Ha bụ ndị Jehova zipụrụ ka ha gagharịa n’ụwa.” 11 Ha gwara mmụọ ozi Jehova nke kwụ otu ebe n’ebe ahụ e nwere osisi metụl, sị: “Anyị agagharịala n’ụwa. Lee, ụwa niile dị jụụ, e nweghịkwa nsogbu na ya.”+

12 Mmụọ ozi Jehova wee sị: “Jehova nke ụsụụ ndị agha, olee mgbe ị ga-anọru tupu gị emeere Jeruselem na obodo ndị dị na Juda ebere,+ bụ́ ndị ị na-ewesa iwe kemgbe afọ iri asaa a?”+

13 Jehova zara mmụọ ozi ahụ nọ na-agwa m okwu. Ọ gwara ya okwu dị mma, nke na-akasi obi. 14 Mmụọ ozi ahụ nke nọ na-agwa m okwu sịrị m: “Jiri olu dara ụda kwuo, sị, ‘Ihe a bụ ihe Jehova nke ụsụụ ndị agha kwuru: “Ihe gbasara Jeruselem na Zayọn na-anụsi m ọkụ n’obi ike.+ 15 M na-ewesa mba ndị chere na e nweghị ihe ọ bụla ga-eme ha oké iwe.+ M wesatụrụ ndị m iwe,+ ma mba ndị ahụ mere ka ọdachi dakwasịrị ha ka njọ.”’+

16 “N’ihi ya, Jehova kwuru, sị: ‘“M ga-alọghachikwute Jeruselem ka m meere ya ebere.”+ Jehova nke ụsụụ ndị agha kwukwara, sị: “A ga-arụghachi ụlọ m n’ime ya,+ a ga-ejikwa eriri e ji atụ̀ ihe tụọ Jeruselem.”’+

17 “Jiri olu dara ụda kwuo ọzọ, sị, ‘Ihe a bụ ihe Jehova nke ụsụụ ndị agha kwuru: “Ịdị mma m ga-ejupụta n’obodo m dị iche iche. Jehova ga-akasi Zayọn obi ọzọ,+ ọ ga-ahọrọkwa Jeruselem ọzọ.”’”+

18 M wee lelie anya hụ mpi anọ.+ 19 M jụziri mmụọ ozi ahụ nọ na-agwa m okwu, sị: “Gịnị ka ihe ndị a bụ?” Ọ zara, sị: “Ha bụ mpi ndị chụsasịrị Juda,+ Izrel,+ na Jeruselem.”+

20 Jehova wee gosi m ndị omenkà anọ. 21 M jụrụ, sị: “Gịnị ka ndị a na-abịa ime?”

Ọ sịrị: “Ndị a bụ mpi ndị chụsasịrị Juda nke na o nweghị onye welitere isi elu. Ndị nke ọzọ a ga-abịa ka ha menye ha ụjọ, ka ha kụjisie mpi mba ndị sọrọ ala Juda mpi iji chụsasịa ya.”

2 M leliri anya hụ otu nwoke ji ụdọ e ji atụ̀ ihe+ n’aka. 2 M jụrụ ya, sị: “Ebee ka ị na-aga?”

Ọ zara m, sị: “M na-aga ịtụ̀ Jeruselem ka m mata otú ọ hà n’obosara na otú ọ hà n’ogologo.”+

3 Ma, mmụọ ozi ahụ nke na-agwa m okwu pụwara, mmụọ ozi ọzọ abịakwute ya. 4 O wee sị ya: “Gbaga ebe ahụ, gwa nwa okorobịa ahụ, sị, ‘“A ga-ebi na Jeruselem+ otú e si ebi n’ime obodo na-enweghị mgbidi n’ihi na ndị mmadụ na anụ ụlọ niile nọ n’ime ya ga-adị ọtụtụ.+ 5 M ga-abụrụ ya mgbidi ọkụ gburugburu ya,+ ebube m ga-adịkwa n’ime ya.”’”+ Ọ bụ ihe Jehova kwuru.

6 Jehova kwuru, sị, “Bịanụ! Bịanụ! Sinụ n’ala dị n’ebe ugwu gbapụ,+

N’ihi na m chụsasịrị unu n’ebe niile.”*+ Ọ bụ ihe Jehova kwuru.

7 “Zayọn, bịa! Gbapụnụ, unu ndị bi na Babịlọn.+ 8 Mgbe e mechara ka Jehova nke ụsụụ ndị agha dị ebube, o zigara m ná mba ndị nọ na-ebukọrọ ihe unu.+ O kwuru, sị: ‘Onye ọ bụla na-emetụ unu aka na-emetụ mkpụrụ anya m aka.+ 9 N’ihi na ugbu a, m ga-eweli aka m mesie ha ike, ndị ohu ha ga-ebukọrọkwa ihe ha.’+ Unu ga-amata na ọ bụ Jehova nke ụsụụ ndị agha zitere m.”

10 Jehova kwuru, sị, “Tie mkpu ọṅụ, Zayọn,*+ n’ihi na m na-abịa,+ m ga-ebikwa n’ime gị.+ 11 Ọtụtụ mba ga-esonyere Jehova n’ụbọchị ahụ,+ ha ga-aghọkwa ndị m. M ga-ebikwa n’ime gị.” Ị ga-amata na ọ bụ Jehova nke ụsụụ ndị agha zitere m ka m bịakwute gị. 12 Jehova ga-eweghara Juda ka ọ bụrụ òkè ya n’ala dị nsọ, ọ ga-ahọrọkwa Jeruselem ọzọ.+ 13 Mmadụ* niile, nọrọnụ jụụ n’ihu Jehova, n’ihi na o si n’ebe obibi ya dị nsọ na-abịa ka o mee ihe.

3 O wee gosi m Joshụa+ nnukwu onye nchụàjà ka o guzo n’ihu mmụọ ozi Jehova, Setan+ guzokwa n’aka nri Joshụa ka o megide ya. 2 Mmụọ ozi Jehova wee sị Setan: “Ka Jehova baara gị mba, Setan.+ Ka Jehova, onye họọrọ Jeruselem,+ baara gị mba! Ọ̀ bụ na onye a abụghị nkụ ka na-enwu enwu a lọpụtara n’ọkụ?”

3 Ma Joshụa yi uwe ruru unyi guzoro n’ihu mmụọ ozi ahụ. 4 Mmụọ ozi ahụ gwara ndị guzo n’ihu ya, sị, “Yipụnụ ya uwe ya ruru unyi.” O wee sị ya: “Lee, ewepụla m mmehie gị,* a ga-eyiwekwa gị uwe dị mma.”*+

5 M wee sị: “Keenụ ya ákwà dị ọcha n’isi.”+ Ha wee kee ya ákwà dị ọcha n’isi, yiwekwa ya uwe; mmụọ ozi Jehova guzokwa n’akụkụ. 6 Mmụọ ozi Jehova gwaziri Joshụa, sị: 7 “Jehova nke ụsụụ ndị agha kwuru, sị, ‘Ọ bụrụ na ị ga-eje ije n’ụzọ m ma rụọ ọrụ niile m nyere gị ka ị rụọrọ m, ị ga-abụ onyeikpe n’ụlọ m+ ma na-elekọta ogige m.* M ga-emekwa ka ị na-abata n’ihu m mgbe ọ bụla otú ndị a guzo ebe a si eme.’

8 “‘Joshụa Nnukwu Onye Nchụàjà, biko, nụrụ, gị na ndị nchụàjà nọ ọdụ n’ihu gị, n’ihi na ha bụ ihe àmà. Lee, m na-akpọbata ohu m+ aha ya bụ Ome.+ 9 Lee nkume m dowere n’ihu Joshụa. Anya asaa dị na nkume ahụ. M ga-akanye akara na ya, m ga-ewepụkwa mmehie ala ahụ n’otu ụbọchị.’+ Ọ bụ ihe Jehova nke ụsụụ ndị agha kwuru.

10 “‘N’ụbọchị ahụ, onye ọ bụla n’ime unu ga-akpọ onye agbata obi ya ka ọ bịa n’okpuru osisi vaịn ya nakwa n’okpuru osisi fig ya.’+ Ọ bụ ihe Jehova nke ụsụụ ndị agha kwuru.”

4 Mmụọ ozi ahụ nke na-agwa m okwu bịaghachiri kpọtee m otú e si akpọte onye nọ n’ụra. 2 O wee jụọ m, sị: “Gịnị ka ị na-ahụ?”

M wee sị ya: “M na-ahụ ihe e ji adọsa ọkụ.* Ọ bụ naanị ọlaedo ka e ji rụọ ya,+ otu efere dịkwa n’elu ya. Ọkụ* asaa dị na ya.+ N’eziokwu, ha dị asaa. Ọkụ ndị ahụ dị n’elu ya nwekwara okporo asaa mmanụ ọkụ si abanye na ha. 3 Osisi oliv abụọ dịkwa n’akụkụ ya.+ Otu dị n’aka nri efere ahụ, otu adịrị n’aka ekpe ya.”

4 M wee jụọ mmụọ ozi ahụ na-agwa m okwu, sị: “Onyenwe m, gịnị ka ihe ndị a pụtara?” 5 Mmụọ ozi ahụ na-agwa m okwu wee jụọ m, sị: “Ọ̀ bụ na ị maghị ihe ihe ndị a pụtara?”

M zara ya, sị: “Mba, onyenwe m.”

6 Ọ sịziri m: “Jehova gwara Zerubabel, sị: ‘“Ọ bụghị ìgwè ndị agha ga-eme ihe ndị a, ọ bụghịkwa ike mmadụ,+ kama ọ bụ mmụọ m+ ga-eme ha.” Ọ bụ ihe Jehova nke ụsụụ ndị agha kwuru. 7 Nnukwu ugwu, ònye ka ị bụ? Ị ga-abụ ala dị larịị+ n’ihu Zerubabel.+ Ọ ga-ewepụtakwa nkume ga-adị n’elu elu mgbe a ga na-eti mkpu, sị: “Ọ mara ezigbo mma! Ọ mara ezigbo mma!”’”

8 Jehova gwara m okwu ọzọ, sị: 9 “Ọ bụ aka Zerubabel tọrọ ntọala ụlọ a,+ ọ bụkwa aka ya ga-arụcha ya.+ Unu ga-amarakwa na ọ bụ Jehova nke ụsụụ ndị agha zitere m ka m bịakwute unu. 10 È nwere onye ledara ụbọchị ihe ji nke nta nke nta malite* anya?+ N’ihi na ha ga-aṅụrị ọṅụ, hụkwa eriri e ji atụ̀ ihe* n’aka Zerubabel. Ha* asaa bụ anya Jehova. Ha na-elezu ụwa* niile.”+

11 M wee jụọ ya, sị: “Gịnị ka osisi oliv abụọ a dị n’aka nri na n’aka ekpe ihe a e ji adọsa ọkụ* pụtara?”+ 12 M jụkwara ya nke ugboro abụọ, sị: “Gịnị ka alaka* ndị dị n’osisi oliv abụọ a pụtara, bụ́ ndị na-agbapụta mmanụ na-acha ọlaedo ọlaedo ndị na-esi n’okporo abụọ e ji ọlaedo rụọ na-asọba n’efere?”

13 O wee jụọ m, sị: “Ọ̀ bụ na ị maghị ihe ihe ndị a pụtara?”

M zara ya, sị: “Mba, onyenwe m.”

14 Ọ sịrị: “Ha bụ ndị e tere mmanụ. Ha dị abụọ, ha guzokwa n’akụkụ Onyenwe elu ụwa niile.”+

5 M leliri anya ọzọ hụ akwụkwọ mpịakọta na-efe efe. 2 Mmụọ ozi ahụ jụrụ m, sị: “Gịnị ka ị na-ahụ?”

M zara, sị: “M na-ahụ akwụkwọ mpịakọta na-efe efe. Ọ dị kubit* iri abụọ n’ogologo, dịkwa kubit iri n’obosara.”

3 O wee sị m: “Ihe a bụ ọbụbụ ọnụ nke na-agagharị n’elu ụwa niile, n’ihi na a taghị ndị na-ezu ohi+ ahụhụ n’agbanyeghị na e dere n’ihu akwụkwọ a na izu ohi bụ arụ. A taghịkwa ndị na-aṅụ iyi ụgha+ ahụhụ n’agbanyeghị na e dere n’azụ akwụkwọ a na mmadụ ịṅụ iyi ụgha bụ arụ. 4 Jehova nke ụsụụ ndị agha kwuru, sị, ‘Ezipụla m ya. Ọ ga-abanye n’ụlọ onye ohi nakwa n’ụlọ onye ji aha m aṅụ iyi ụgha. Ọ ga-anọgide n’ime ụlọ ahụ ma bibie ya na osisi ya nakwa nkume ya.’”

5 Mmụọ ozi ahụ nke na-agwa m okwu wee bịakwute m ma sị m: “Biko, lelie anya hụ ihe na-apụta.”

6 M wee jụọ ya, sị: “Gịnị ka ọ bụ?”

Ọ zara, sị: “Ọ bụ ihe e ji atụ̀ ihe* na-apụta.” Ọ sịkwara: “Ọ bụ otú a ka ha dị n’ụwa niile.” 7 M wee hụ na e buliri okwuchi ya dị okirikiri nke e ji nkume led* rụọ, e nwekwara otu nwaanyị nọ ọdụ n’ime ya. 8 O wee sị: “Ihe a bụ Ajọ Omume.” O nubaghachiri ya n’ime ihe ahụ e ji atụ̀ ihe, buruzie okwuchi ahụ e ji nkume led* rụọ kwuchie ọnụ ya.

9 M leliri anya hụ ụmụ nwaanyị abụọ ndị na-abịa, ha na-efekwa efe n’ikuku. Ha nwere nku yiri nku ụgbala ọcha.* Ha wee bulie ihe ahụ e ji atụ̀ ihe elu n’agbata eluigwe na ụwa. 10 M wee jụọ mmụọ ozi ahụ na-agwa m okwu, sị: “Ebee ka ha na-ebuga ihe ahụ e ji atụ̀ ihe?”

11 Ọ zara, sị: “Ọ bụ n’ala Shaịna,*+ ka a gaa rụọrọ nwaanyị ahụ ụlọ. A rụchaa ya, a ga-ekusa ya ebe ahụ, n’ebe o kwesịrị ịnọ.”

6 M wee lelie anya ọzọ hụ ụgbọ ịnyịnya anọ si n’agbata ugwu abụọ na-abịa. Ugwu ndị ahụ bụ ugwu ọla kọpa. 2 Ọ bụ ịnyịnya ndị na-acha ọbara ọbara dọkpụ ụgbọ ịnyịnya nke mbụ, ịnyịnya ndị na-eji oji adọkpụrụ ụgbọ ịnyịnya nke abụọ.+ 3 Ịnyịnya ndị na-acha ọcha dọkpụ ụgbọ ịnyịnya nke atọ, ịnyịnya ndị tụrụ àgwà na ndị nwere ụcha dị iche iche adọkpụrụ ụgbọ ịnyịnya nke anọ.+

4 M jụrụ mmụọ ozi ahụ na-agwa m okwu, sị: “Onyenwe m, gịnị bụ ihe ndị a?”

5 Mmụọ ozi ahụ zara m, sị: “Ha bụ mmụọ anọ+ nke eluigwe, ndị na-apụ mgbe ha guzochara n’ihu Onyenwe ụwa niile.+ 6 Nke ahụ* ịnyịnya ndị na-eji oji dọkpụ na-aga n’ala dị n’ebe ugwu.+ Ndị nke na-acha ọcha na-aga n’ala dị n’ebe ọdịda anyanwụ.* Ndị nke tụrụ àgwà na-aga n’ala dị n’ebe ndịda. 7 Ndị nke nwere ụcha dị iche iche chọrọ ka ha gaa gagharịa n’ụwa.” O wee sị: “Gawanụ, gagharịanụ n’ụwa.” Ha wee malite ịgagharị n’ụwa.

8 O wee kpọọ m, sị m: “Lee, ndị nke na-aga n’ala dị n’ebe ugwu emeela ka mmụọ Jehova dịrị n’ala dị n’ebe ugwu.”

9 Jehova wee gwa m okwu ọzọ, sị: 10 “Nara Heldaị, Tobaịja, na Jedeya ihe ndị a dọọrọ n’agha nyere ha. N’ụbọchị ahụ, ị ga-aga n’ụlọ Josaya nwa Zefanaya, gị na ndị a si Babịlọn lọta. 11 Were ọlaọcha na ọlaedo kpụọ okpueze* ma kpuwe ya n’isi nnukwu onye nchụàjà bụ́ Joshụa+ nwa Jehozadak. 12 Sịkwa ya,

“‘Ihe a bụ ihe Jehova nke ụsụụ ndị agha kwuru: “Ọ bụ nwoke a ka aha ya bụ Ome.+ Ọ ga-esi n’ebe ọ nọ pulite, ọ ga-arụkwa ụlọ nsọ Jehova.+ 13 Ọ bụ ya ga-arụ ụlọ nsọ Jehova, ọ bụkwa ya ga-enweta ebube. Ọ ga-anọ n’ocheeze ya na-achị, ọ ga-abụkwa onye nchụàjà n’ocheeze ya.+ Ọrụ abụọ ahụ* ga na-agakọ ọnụ. 14 Okpueze* ahụ ga-abụ ihe a ga-eji na-echeta Hilem, Tobaịja, Jedeya,+ na Hen nwa Zefanaya n’ụlọ nsọ Jehova. 15 Ndị nọ n’ebe dị anya ga-abịa soro rụọ ụlọ nsọ Jehova.” Unu ga-amatakwa na ọ bụ Jehova nke ụsụụ ndị agha zitere m ka m bịakwute unu. Ihe a ga-eme ma ọ bụrụ na unu egee ntị n’olu Jehova bụ́ Chineke unu.’”

7 N’afọ nke anọ n’ọchịchị Eze Darayọs, Jehova gwara Zekaraya+ okwu n’abalị anọ n’ọnwa nke itoolu, ya bụ, n’ọnwa Kislev.* 2 Ndị Betel zipụrụ Shariza na Rigem-melek na ndị obodo ya ka ha gaa rịọ Jehova ka o meere ha amara.* 3 Ha sịrị ndị nchụàjà nọ n’ụlọ* Jehova nke ụsụụ ndị agha na ndị amụma: “Ọ̀ bụ anyị* bee ákwá n’ọnwa nke ise,+ gharakwa iri nri, otú anyị* merela ọtụtụ afọ?”

4 Jehova nke ụsụụ ndị agha gwara m okwu ọzọ, sị: 5 “Gwa ndị niile bi n’ala a na ndị nchụàjà, sị, ‘Mgbe unu buru ọnụ ma bee ákwá arịrị n’ọnwa nke ise nakwa n’ọnwa nke asaa+ ruo afọ iri asaa,+ ọ̀ bụ m ka unu buuru ya n’eziokwu? 6 Mgbe unu riri ihe ma ṅụọ mmanya, ọ́ bụghị onwe unu ka unu riiri ya ma ṅụọrọ ya? 7 Ọ̀ bụ na unu ekwesịghị irube isi n’okwu Jehova si n’ọnụ ndị amụma oge mbụ kwuo+ mgbe ndị mmadụ bi na Jeruselem nakwa n’obodo ya ndị gbara ya gburugburu, mgbe ha nọkwa n’udo, mgbe ndị mmadụ bikwa na Negeb* nakwa na Shefila?’”*

8 Jehova gwara Zekaraya okwu ọzọ, sị: 9 “Ihe a bụ ihe Jehova nke ụsụụ ndị agha kwuru, ‘Na-ekpenụ ikpe ziri ezi.+ Na-ahụnụ ibe unu n’anya,*+ na-emekwaranụ ibe unu ebere. 10 Unu erigbula nwaanyị di ya nwụrụ ma ọ bụ nwa na-enweghị nna,*+ onye ala ọzọ+ ma ọ bụ ogbenye.+ Unu akpakwala nkata ọjọọ n’obi unu ka unu mee ibe unu ihe ọjọọ.’+ 11 Ma ha ekweghị ege ntị.+ Ha mere isi ike,+ ha kpọchikwara ntị ha ka ha ghara ịnụ ihe.+ 12 Ha mere ka obi ha sie ike ka dayamọnd.*+ Ha erubeghị isi n’iwu* nakwa n’okwu Jehova nke ụsụụ ndị agha ji mmụọ ya mee ka ndị amụma oge mbụ kwuo.+ Jehova nke ụsụụ ndị agha wee wee oké iwe.”+

13 “Jehova nke ụsụụ ndị agha kwuru, sị, ‘Otú ahụ ha na-egeghị ntị mgbe m* kpọrọ ha,+ agaghịkwa m ege ntị ma ha kpọọ m.+ 14 M wee jiri oké ifufe fesasịa ha ná mba niile ha na-amaghị.+ Ala ha wee tọgbọrọ chakoo mgbe ha pụchara. E nweghị onye si na ya na-agafe, e nweghịkwa onye na-alọghachi na ya+ n’ihi na ha mere ka ala ahụ mara mma bụrụ ala na-atụ ụjọ.’”

8 Jehova nke ụsụụ ndị agha gwara m okwu ọzọ, sị: 2 “Ihe a bụ ihe Jehova nke ụsụụ ndị agha kwuru, ‘M ga-anụrụ Zayọn ọkụ n’obi,+ m ga-ejikwa oké iwe gbachitere ya ma chebe ya.’”

3 “Ihe a bụ ihe Jehova kwuru, ‘M ga-alaghachi na Zayọn,+ birikwa na Jeruselem.+ A ga-akpọ Jeruselem obodo eziokwu,*+ kpọọkwa ugwu Jehova nke ụsụụ ndị agha ugwu nsọ.’”+

4 “Ihe a bụ ihe Jehova nke ụsụụ ndị agha kwuru, ‘Ndị agadi nwoke na ndị agadi nwaanyị ga-anọdụ ala ọzọ n’ámá ndị dị na Jeruselem. Onye ọ bụla n’ime ha ga-eji mkpara ya n’aka maka na ọ dịteela ndụ aka.+ 5 Ụmụaka ga-eju n’ámá ndị dị n’obodo na-egwuri egwu.’”+

6 “Ihe a bụ ihe Jehova nke ụsụụ ndị agha kwuru, ‘Ọ bụ eziokwu na n’oge ahụ, o nwere ike ịdị ndị fọrọ n’ime ndị a ka ihe siri ezigbo ike, ò kwesịrị ịbụrụ mụnwa ihe siri ezigbo ike?’ Ọ bụ ihe Jehova nke ụsụụ ndị agha kwuru.”

7 “Ihe a bụ ihe Jehova nke ụsụụ ndị agha kwuru, ‘M na-azọpụta ndị m n’ala ndị dị n’ebe ọwụwa anyanwụ nakwa n’ala ndị dị n’ebe ọdịda anyanwụ.+ 8 M ga-akpọbata ha, ha ga-ebirikwa na Jeruselem.+ Ha ga-abụ ndị m, m ga-abụkwara ha Chineke+ onye eziokwu* na onye ezi omume.’”

9 “Ihe a bụ ihe Jehova nke ụsụụ ndị agha kwuru, ‘Nweenụ obi ike,*+ unu ndị na-anụ okwu ndị a ndị amụma na-ekwu,+ bụ́ otu okwu ahụ e kwuru n’ụbọchị a tọrọ ntọala ụlọ Jehova nke ụsụụ ndị agha maka ịrụ ụlọ nsọ. 10 N’ihi na tupu oge ahụ, a naghị akwụ ma mmadụ ma anụmanụ ụgwọ ọrụ.+ E nweghị onye na-apụ ma na-abata n’udo n’ihi onye iro, maka na m mere ka mmadụ niile na-emegide ibe ha.’

11 “Jehova nke ụsụụ ndị agha kwuru, sị, ‘Ma ugbu a, agaghị m emeso ndị fọrọ ná ndị a otú m mere n’ụbọchị ndị gara aga.+ 12 N’ihi na a ga-agha mkpụrụ udo. Osisi vaịn ga-amị mkpụrụ ya. Ala ga-emepụta ihe,+ eluigwe ga-emekwa ka igirigi daa. M ga-eme ka ndị fọrọ ná ndị a nweta ihe a niile.+ 13 Otú ahụ unu bụụrụ mba dị iche iche ihe e ji abụ ọnụ,+ unu ụlọ Juda na ụlọ Izrel, otú ahụ ka m ga-azọpụta unu, unu abụrụzie ngọzi.+ Unu atụla egwu.+ Nweenụ obi ike.’*+

14 “N’ihi na ihe a bụ ihe Jehova nke ụsụụ ndị agha kwuru, ‘“Otú ahụ mụnwa bụ́ Jehova nke ụsụụ ndị agha kpebiri ime ka ọdachi dakwasị unu maka na ndị nna nna unu kpasuru m iwe, agbanweghịkwa m obi m,+ 15 otú ahụ ka m kpebiri n’oge a imere Jeruselem na ụlọ Juda ihe ọma.+ Unu atụla egwu.”’+

16 “‘Ihe ndị a ka unu ga na-eme: Na-agwanụ ibe unu eziokwu.+ Mgbe unu na-ekpe ikpe n’ọnụ ụzọ ámá, na-ekwunụ eziokwu, na-emekwanụ ka udo dịrị.+ 17 Unu akpala nkata n’ime obi unu ka unu mee ibe unu ihe ọjọọ,+ unu aṅụkwala iyi ụgha,+ n’ihi na m kpọrọ ihe a niile asị.’ Ọ bụ ihe Jehova kwuru.”+

18 Jehova nke ụsụụ ndị agha gwara m okwu ọzọ, sị: 19 “Ihe a bụ ihe Jehova nke ụsụụ ndị agha kwuru, ‘Ọnụ unu na-ebu n’ọnwa nke anọ,+ ọnụ unu na-ebu n’ọnwa nke ise,+ ọnụ unu na-ebu n’ọnwa nke asaa,+ na ọnụ unu na-ebu n’ọnwa nke iri+ ga-abụrụ ụlọ Juda oge obi ụtọ na ọṅụ, oge ememme obi ụtọ.+ N’ihi ya, hụnụ eziokwu na udo n’anya.’

20 “Ihe a bụ ihe Jehova nke ụsụụ ndị agha kwuru, ‘N’eziokwu, ndị dị iche iche na ndị bi n’ọtụtụ obodo ga-abịa. 21 Ndị bi n’otu obodo ga-agakwuru ndị bi n’obodo ọzọ, sị: “Ka anyị jiri obi anyị niile gaa rịọ Jehova ka o meere anyị amara* ma chọọ Jehova nke ụsụụ ndị agha. Anyị* ga-agakwa.”+ 22 Ọtụtụ ndị na mba ndị dị ike ga-abịa chọọ Jehova nke ụsụụ ndị agha na Jeruselem,+ rịọkwa Jehova ka o meere ha amara.’*

23 “Ihe a bụ ihe Jehova nke ụsụụ ndị agha kwuru, ‘N’oge ahụ, mmadụ iri ndị na-asụ asụsụ* niile e nwere ná mba dị iche iche+ ga-ejide uwe* onye Juu.* N’eziokwu, ha ga-ejide ya, sị: “Anyị ga-eso unu,+ n’ihi na anyị anụla na Chineke nọnyeere unu.”’”+

9 Ihe Chineke kpebiri ime:

“Jehova ekwuola ihe ọ ga-eme ala Hedrak.

Ọ bụ Damaskọs ka ọ ga-eme ya,+

N’ihi na anya Jehova na-ahụ ụmụ mmadụ+

Nakwa ebo niile e nwere n’Izrel.

 2 Ọ ga-emekwa ya Hemat,+ nke ya na ya gbara ókè,

Meekwa ya Taya+ na Saịdọn+ n’ihi na ha ma ihe nke ukwuu.+

 3 Taya rụụrụ onwe ya mgbidi siri ike.

O kpokọtara ọlaọcha ka ájá,

Kpokọtakwa ọlaedo ka apịtị dị n’okporo ámá.+

 4 Lee, Jehova ga-anapụ ya ihe ndị o nwere.

Ọ ga-ebibi ndị agha ya n’oké osimiri,+

Ọkụ ga-erepịakwa ya.+

 5 Ashkelọn ga-ahụ ya ma tụọ egwu.

Ọ ga-ewute Gaza nke ukwuu,

Wutekwa Ekrọn maka na e menyela ihe ọ tụkwasịrị obi ihere.

Eze Gaza ga-anwụ,

E nweghịkwa onye ga-ebi n’Ashkelọn.+

 6 Onye mba ọzọ ga-ebi n’Ashdọd,

M ga-ebibikwa ihe onye Filistia ji anya isi.+

 7 M ga-ewepụ ihe ndị dị ya n’ọnụ ọbara tetọrọ,

Wepụkwa ihe ndị na-asọ oyi dị ya n’ezé.

A ga-ahapụ ya ka ọ fọdụrụ Chineke anyị.

Ọ ga-adị ka onyeisi na Juda,+

Onye Ekrọn ga-adịkwa ka onye Jebus.+

 8 M ga-eguzoro n’ihu ụlọ m na-eche ya nche,+

Ka a ghara inwe onye ga-esi na ya na-apụ apụ ma ọ bụ na-abata abata.

E nweghị onyeisi ọrụ* ga-esi na ya gafere ọzọ,+

N’ihi na m jirila anya m hụ ya* ugbu a.

 9 Zayọn,* ṅụrịa nnukwu ọṅụ.

Jeruselem,* tie mkpu mmeri.

Lee! Eze gị na-abịakwute gị.+

Ọ bụ onye ezi omume. Ọ na-eweta nzọpụta.*

Ọ dị umeala n’obi,+ ọ nọkwa n’elu jakị,

N’elu nwa jakị,* nwa nne jakị mụrụ.+

10 M ga-ewepụ ụgbọ ịnyịnya agha n’Ifrem,

Wepụkwa ịnyịnya na Jeruselem.

A ga-ewepụ ụta agha.

Ọ ga-agwakwa mba dị iche iche na udo ga-adịrị ha.+

Ọchịchị ya ga-amalite n’oké osimiri ruo n’oké osimiri,

Malitekwa n’Osimiri Yufretis ruo n’ebe niile ụwa sọtụrụ.+

11 Ma gị, nwaanyị,* n’ihi ọbara ọgbụgba ndụ mụ na gị,

M ga-akpọpụta ndị gị a tụrụ mkpọrọ n’olulu nke mmiri na-adịghị.+

12 Unu ndị mkpọrọ ndị nwere olileanya, laghachinụ n’ebe a rụsiri ike.+

Taa, ana m asị gị,

‘Nwaanyị, m ga-akwụ gị ụgwọ okpukpu abụọ.+

13 M ga-ekwe Juda* ka ụta m.

M ga-eji Ifrem mere akụ́ ụta m.

Zayọn, m ga-akpọte ụmụ gị

Ka ha megide ụmụ Gris,

M ga-emekwa ka ị dị ka mma agha onye agha.’

14 Jehova ga-eme ka a mara na ya nọnyeere ha,

Akụ́ ọ ga-agba ga-apụ ngwa ngwa ka àmụ̀mà.

Ọkaakaa Onyenwe anyị Jehova ga-afụ opi,+

Ọ ga-esorokwa ifufe nke si n’ebe ndịda gawa.

15 Jehova nke ụsụụ ndị agha ga-echebe ha.

Ha ga-emeri ndị iro ha ndị ji èbè* na-agba ha nkume.+

Ha ga-aṅụrị ọṅụ ma na-eti mkpu ka à ga-asị na ha ṅụrụ mmanya.

Ha ga-adị ka efere mmanya juru,

Dịkwa ka akụkụ ebe ịchụàjà nke ọbara juru na ya.+

16 Jehova bụ́ Chineke ha ga-azọpụta ha n’ụbọchị ahụ

Otú onye ọzụzụ atụrụ si azọpụta atụrụ ya;+

N’ihi na ha ga na-egbuke egbuke n’ala ya ka ọmarịcha nkume ndị na-adị n’okpueze.+

17 N’ihi na otú o si dị mma enweghị atụ,+

Ọ makwara ezigbo mma.

Nri ga-eme ka ụmụ okorobịa na-eme nke ọma,

Mmanya ọhụrụ ga-emekwa ka ụmụ agbọghọ* na-eme nke ọma.”+

10 “Rịọnụ Jehova ka o mee ka mmiri zoo n’ụla mmiri.

Ọ bụ Jehova na-eme ka mmiri ruo n’ígwé ojii.

Ọ na-eme ka mmiri zooro ndị mmadụ,+

Na-emekwa ka ala mepụtara onye ọ bụla ihe.

 2 N’ihi na arụsị ezinụlọ* dị iche iche ekwuola okwu aghụghọ.*

Ndị na-agba afa ahụla ọhụụ ụgha.

Ha na-akọ nrọ na-abaghị uru.

Mbọ ha na-agba ka ha kasie ndị mmadụ obi enweghị isi.

Ọ bụ ya mere ha ga-eji wagharịa ka atụrụ.

Ha ga-ata ahụhụ n’ihi na e nweghị onye ọzụzụ atụrụ.

 3 M na-ewesa ndị ọzụzụ atụrụ iwe dị ọkụ,

M ga-emekwa ka ndị isi* obi tara mmiri zaa ajụjụ,

N’ihi na Jehova nke ụsụụ ndị agha elebarala ìgwè atụrụ ya anya,+ ya bụ, ụlọ Juda.

O meekwala ka ha sie ike ma dị ebube ka ịnyịnya o ji aga agha.

 4 E si na ya nweta onyeisi.*

E si na ya nweta onye ọchịchị na-akwado ya.*

E si na ya nweta ụta agha.

E si na ya nweta onye nlekọta* ọ bụla, ha niile.

 5 Ha ga-adịkwa ka ndị agha

Na-azọ apịtị ndị dị n’okporo ámá ụkwụ mgbe ha na-alụ agha.

Ha ga-alụ agha n’ihi na Jehova nọnyeere ha.+

A ga-emenye ndị na-agba ịnyịnya ihere.+

 6 M ga-eme ka ụlọ Juda ka ndị ọzọ ike,

M ga-azọpụtakwa ụlọ Josef.+

M ga-akpọghachi ha n’ala ha,

N’ihi na m ga-emere ha ebere.+

Ha ga-adị ka ndị ọ na-enwebeghị mgbe m chụpụrụ ha,+

N’ihi na abụ m Jehova bụ́ Chineke ha, m ga-azakwa ha.

 7 Ndị Ifrem ga-adị ka dike n’agha.

Obi ga-atọ ha ụtọ ka à ga-asị na ha ṅụrụ mmanya.+

Ụmụ ha ga-ahụ ihe a ma ṅụrịa ọṅụ.

Obi ha ga-aṅụrị ọṅụ n’ihi Jehova.+

 8 ‘M ga-afụrụ ha mkpọrọhịhị ma kpọkọta ha,

N’ihi na m ga-agbapụta ha,+ ha ga-adịkwa ọtụtụ,

Ma na-adịkwu ọtụtụ.

 9 N’agbanyeghị na m ga-aghasasị ha ka mkpụrụ n’etiti ndị dị iche iche,

Ha ga-anọ n’ebe ndị dị anya cheta m.

Ha na ụmụ ha ga-enwetaghachi ume ma lọta.

10 M ga-esi n’Ijipt kpọlata ha,

Sikwa n’Asiria kpọkọta ha.+

M ga-akpọta ha na Gilied+ nakwa na Lebanọn,

A gaghịkwa enwe ebe ga-aba ha.+

11 Ọ ga-agafere oké osimiri kpata nsogbu na ya.

Ọ ga-eti ebili mmiri ihe n’oké osimiri ahụ, ya adajụọ.+

Mmiri niile dị n’osimiri Naịl ga-ata.

A ga-eweda ihe Asiria ji anya isi ala,

Mkpanaka Ijipt agaghịkwa adị.+

12 Mụnwa bụ́ Jehova ga-eme ka ha ka ndị ọzọ ike,+

Ha ga na-azakwa aha m.’*+ Ọ bụ ihe Jehova kwuru.”

11 “Lebanọn, meghee ụzọ gị,

Ka ọkụ wee gbaa osisi sida gị.

 2 Osisi junipa, tie mkpu ákwá n’ihi na osisi sida adaala.

E bibiela oké osisi dị iche iche.

Osisi ook ndị dị na Beshan, tienụ mkpu ákwá

N’ihi na e bibiela oké ọhịa.

 3 Geenụ ntị! Ndị ọzụzụ atụrụ na-eti mkpu ákwá,

N’ihi na e bibiela ebube ha.

Geenụ ntị! Ụmụ ọdụm na-agbọ ụja,

N’ihi na e bibiela oké ọhịa ndị dị n’akụkụ Osimiri Jọdan.

4 “Jehova bụ́ Chineke m kwuru, sị, ‘Lekọtanụ ndị a, bụ́ ndị dị ka atụrụ a chọrọ igbu egbu.+ 5 Ndị na-azụrụ ha na-egbu ha,+ ma a naghị ama ha ikpe. Ndị na-ere ha+ na-asịkwa, “Otuto dịrị Jehova n’ihi na m ga-aba ọgaranya.” Ndị na-elekọta ha anaghịkwa emetere ha ebere.’*+

6 “Jehova kwuru, sị, ‘N’ihi na agaghịzi m emetere ndị bi n’ala a ebere.* N’ihi ya, m ga-eme ka onye ọ bụla megbuo onye agbata obi ya, meekwa ka eze ha megbuo ha. Ha ga-ebibi ala ha, e nweghịkwa onye m ga-anapụta n’aka ha.’”

7 M wee malite ilekọta unu, unu atụrụ ndị a na-emesi ike, atụrụ ndị a ga-egbu egbu.+ Ọ bụ ihe m meere unu. M chịịrị mkpara abụọ, kpọọ otu Ịdị Mma, kpọọkwa nke ọzọ Ịdị n’Otu.+ M wee malite ịzụ ìgwè atụrụ ahụ. 8 M chụpụrụ ndị ọzụzụ atụrụ atọ n’otu ọnwa n’ihi na edilighị m* ihe ha na-eme, ha* kpọkwara m asị. 9 M wee sị: “M ga-akwụsị ịzụ unu ka atụrụ. Nke na-anwụ anwụ, ya nwụọ. Nke a ga-ebibi ebibi, ka e bibie ya. Ndị nke fọrọ afọ, ha rie anụ ibe ha.” 10 M wee were mkpara m bụ́ Ịdị Mma+ gbujisie, si otú ahụ mebie ọgbụgba ndụ mụ na ndị m gbara. 11 E wee mebie ya n’ụbọchị ahụ. Atụrụ ndị ahụ a na-emesi ike, bụ́ ndị nọ na-ele m anya, matara na ọ bụ ihe Jehova kwuru.

12 M wee sị ha: “Ọ bụrụ na ọ dị unu mma, kwụọnụ m ụgwọ ọrụ m. Ọ bụrụkwanụ na ọ dịghị unu mma, hapụwanụ ya.” Ha wee kwụọ m ụgwọ ọrụ m,* mkpụrụ ego ọlaọcha iri atọ.+

13 Jehova wee sị m: “Wụsa ya n’ebe a na-edowe akụ̀. Ọ bụ otú m dịruru ọnụ n’anya ha.”+ M chịịrị mkpụrụ ego ọlaọcha iri atọ ahụ wụsa n’ebe a na-edowe akụ̀ n’ụlọ Jehova.+

14 M wee gbujisie mkpara m nke abụọ bụ́ Ịdị n’Otu,+ si otú ahụ mee ka Juda na Izrel gharazie ịdị n’otu.+

15 Jehova sịziri m: “Chịrị ngwá ọrụ nke onye ọzụzụ atụrụ na-abaghị uru.+ 16 N’ihi na m na-eme ka e nwee onye ọzụzụ atụrụ n’ala a. Ọ gaghị elekọta atụrụ ndị na-anwụ anwụ.+ Ọ gaghị achọ ndị nke dị obere ma ọ bụ gwọọ ndị nke merụrụ ahụ́+ ma ọ bụ nye ndị nke na-eguzoli ọtọ nri. Kama, ọ na-eri anụ ndị nke gbara agba+ ma hịọpụ atụrụ ndị ahụ ọbụ ụkwụ.+

17 Onye ọzụzụ atụrụ m na-abaghị uru,+ onye na-ahapụ ìgwè atụrụ m,+ ga-ata ahụhụ.

Mma agha ga-egbu ya n’ogwe aka nakwa n’anya aka nri ya.

Ogwe aka ya ga-akpọnwụcha,

Anya aka nri ya ga-akpọkwa.”*

12 Ihe Chineke kpebiri ime:

“Okwu Jehova kwuru banyere Izrel.” Ihe a bụ ihe Jehova kwuru,

Onye gbasara eluigwe,+

Onye tọrọ ntọala ụwa,+

Onye nyekwara mmadụ ume ndụ.*

2 “Lee, ana m eme ka Jeruselem bụrụ iko* nke na-eme ka ndị niile gbara ya gburugburu ṅagharịa. Ndị iro ga-anọchibido Juda, nọchibidokwa Jeruselem.+ 3 N’ụbọchị ahụ, m ga-eme ka Jeruselem bụrụ nkume nke ga-anyị ndị niile arọ. Ndị niile gbalịrị ka ha bulie ya ga-emerụ ezigbo ahụ́.+ Mba niile dị n’ụwa ga-ezukọta ka ha megide ya.”+ 4 Jehova kwuru, sị, “N’ụbọchị ahụ, m ga-eme ka ịnyịnya ọ bụla tụọ ụjọ, meekwa ka ara gbaa onye na-agba ya. Anya m ga-adị n’ụlọ Juda, ma m ga-eme ka ịnyịnya niile nke ndị dị iche iche kpuo ìsì. 5 Ndị isi Juda ga-ekwu n’obi ha, sị, ‘Ndị bi na Jeruselem bụ ike anyị n’ihi na Jehova nke ụsụụ ndị agha bụ Chineke ha.’+ 6 N’ụbọchị ahụ, m ga-eme ka ndị isi Juda dị ka ite na-ere ọkụ n’ọhịa, meekwa ka ha dị ka ọwa ọkụ e sonyere n’ùkwù ọka.*+ Ha ga-erepịa ndị niile gbara ha gburugburu n’aka nri nakwa n’aka ekpe.+ Ndị Jeruselem ga-ebikwa n’obodo ha,* ya bụ, na Jeruselem.+

7 “Jehova ga-ebukwa ụzọ zọpụta ụlọikwuu ndị dị na Juda, ka ebube* ụlọ Devid na ebube* nke ndị bi na Jeruselem ghara ịkarị nke Juda. 8 N’ụbọchị ahụ, Jehova ga-echebe ndị bi na Jeruselem.+ N’ụbọchị ahụ, onye ọ bụla n’ime ha nke na-ada ada* ga-adị ka Devid. Ụlọ Devid ga-adịkwa ka chi. Ọ ga-adị ka mmụọ ozi Jehova nke na-ebutere ha ụzọ.+ 9 N’ụbọchị ahụ, m ga-ebibirịrị mba niile na-alụso Jeruselem agha.+

10 “M ga-awụsa ụlọ Devid na ndị bi na Jeruselem mmụọ amara na nke arịrịọ. Ha ga-elegide onye ha mara ube anya,+ ha ga-ebekwara ya ákwá arịrị otú a na-ebe ma nwa nwoke a mụrụ naanị ya nwụọ. Ha ga-eruru ya uju otú a na-eru ma ọkpara nwụọ. 11 N’ụbọchị ahụ, ákwá arịrị a ga-ebe na Jeruselem ga-adị ukwuu. Ọ ga-adị ka ákwá arịrị e bere na Hedadrimọn nke dị na Ndagwurugwu Megido.+ 12 Ala ahụ ga-ebe ákwá arịrị. Ezinụlọ ọ bụla ga-ebe nke ya naanị ya. Ezinụlọ Devid ga-ebe nke ya naanị ya, ụmụ nwaanyị ya ga-ebekwa nke ha naanị ha. Ezinụlọ Netan+ ga-ebe nke ya naanị ya, ụmụ nwaanyị ya ga-ebekwa nke ha naanị ha. 13 Ezinụlọ Livaị+ ga-ebe nke ya naanị ya, ụmụ nwaanyị ya ga-ebekwa nke ha naanị ha. Ezinụlọ Shimiaị+ ga-ebe nke ya naanị ya, ụmụ nwaanyị ya ga-ebekwa nke ha naanị ha, 14 nakwa ezinụlọ niile fọdụrụnụ. Ezinụlọ ọ bụla ga-ebe nke ya naanị ya, ụmụ nwaanyị ha ga-ebekwa nke ha naanị ha.

13 “N’ụbọchị ahụ, a ga-egwuru ụlọ Devid na ndị bi na Jeruselem olulu mmiri maka ịsachapụ ha mmehie na unyi.”+

2 Jehova nke ụsụụ ndị agha kwuru, sị, “N’ụbọchị ahụ, m ga-ewepụ aha arụsị niile n’ala a,+ a gaghịkwa echeta ha ọzọ. M ga-ewepụkwa ndị amụma+ na ike ndị mmụọ ọjọọ n’ala a. 3 Ọ bụrụ na mmadụ ebuo amụma ọzọ, nne ya na nna ya, bụ́ ndị mụrụ ya, ga-asị ya, ‘Ị gaghị adị ndụ n’ihi na i jirila aha Jehova ghaa ụgha.’ Nne ya na nna ya, bụ́ ndị mụrụ ya, ga-ama ya mma maka amụma o buru.+

4 “N’ụbọchị ahụ, ihere ga-eme onye amụma nke ọ bụla n’ihi ọhụụ ọ na-akọ mgbe ọ na-ebu amụma ya. Ha agaghịkwa eyi uwe ha ji ebu amụma, nke e ji ajị anụ mee,+ ka ha wee ghọgbuo ndị mmadụ. 5 Onye nke ọ bụla n’ime ha ga-asị, ‘Abụghị m onye amụma. Abụ m onye ọrụ ubi n’ihi na mmadụ zụụrụ m mgbe m bụ nwata ka m gbawara ya ohu.’ 6 Ọ bụrụ na mmadụ ajụọ ya, sị, ‘Gịnị bụkwanụ ọnyá ndị a dị gị n’ahụ́?’* Ọ ga-aza, sị, ‘Ọ bụ ahụ́ e merụrụ m n’ụlọ ndị enyi m.’”*

 7 Jehova nke ụsụụ ndị agha kwuru, sị, “Mma agha, teta, gaa gbuo onye na-azụ atụrụ m,+

Gaa gbuo nwoke bụ́ enyi m.

Gbuo onye ọzụzụ atụrụ,+ ka ìgwè atụrụ ya gbasasịa.+

M ga-eweli aka m megide ndị a na-enweghị ihe e ji ha kpọrọ.”

 8 Jehova kwuru, sị, “N’ime ndị bi n’ala niile,

A ga-egbu ụzọ abụọ n’ime ụzọ atọ, bibiekwa ha.*

Ma, a ga-ahapụ otu ụzọ n’ime ụzọ atọ ka ha fọdụ n’ime ya.

 9 M ga-etinye otu ụzọ n’ime ụzọ atọ ahụ n’ọkụ.

M ga-anụcha ha otú e si anụcha ọlaọcha,

Nwaleekwa ha otú e si anwale ọlaedo.+

Ha ga-akpọku aha m,

M ga-azakwa ha.

M ga-asị, ‘Ha bụ ndị m.’+

Ha ga-asịkwa, ‘Jehova bụ Chineke anyị.’”

14 “Lee, ụbọchị na-abịa, bụ́ ụbọchị Jehova, mgbe a ga-anọ n’ime gị* kesaa ihe gị ndị a kwakọọrọ n’agha. 2 M ga-akpọkọta mba niile ka ha lụso Jeruselem agha. A ga-eweghara obodo a, kwakọrọ ihe dị n’ụlọ ndị dị na ya, dinaakwa ụmụ nwaanyị ya n’ike. A ga-adọrọ ọkara ndị bi n’obodo a n’agha, ma a ga-ahapụ ndị fọrọ afọ ka ha nọrọ n’obodo a.

3 “Jehova ga-aga lụso mba ndị ahụ agha+ otú o si alụ agha n’ụbọchị agha.+ 4 N’ụbọchị ahụ, ụkwụ ya ga-eguzo n’elu Ugwu Oliv+ nke chere Jeruselem ihu n’ebe ọwụwa anyanwụ. Ugwu Oliv ga-agbawakwa abụọ, malite n’ebe ọwụwa anyanwụ ruo n’ebe ọdịda anyanwụ,* mee ka e nwee nnukwu ndagwurugwu. Otu ọkara ugwu ahụ ga-aga n’ebe ugwu, ọkara nke ọzọ agaa n’ebe ndịda. 5 Unu ga-agbaga na ndagwurugwu nke ugwu m n’ihi na ndagwurugwu nke ugwu ahụ ga-eru n’Ezel. Unu ga-agba ọsọ otú unu gbara n’ihi ala ọma jijiji mere n’ụbọchị Eze Ọzaya nke Juda.+ Jehova bụ́ Chineke m ga-abịa, ya na ndị nsọ niile.+

6 “N’ụbọchị ahụ, ìhè nke na-enwu gbaa agaghị adị.+ Ihe dị iche iche ga-akpụkọ akpụkọ.* 7 Ọ ga-abụ ụbọchị pụrụ iche nke a ma na ọ bụ ụbọchị Jehova.+ Ọ gaghị abụ ehihie, ọ gaghịkwa abụ abalị. Ìhè ga-adịkwa ná mgbede. 8 N’ụbọchị ahụ, mmiri na-enye ndụ+ ga-esi na Jeruselem na-asọpụta.+ Otu ọkara mmiri ahụ ga na-asọba n’oké osimiri dị n’ebe ọwụwa anyanwụ,*+ ọkara nke ọzọ ana-asọba n’oké osimiri dị n’ebe ọdịda anyanwụ.*+ Ọ ga-eme n’oge okpomọkụ nakwa n’oge oyi. 9 Jehova ga-abụkwa Eze ụwa niile.+ N’ụbọchị ahụ, Jehova ga-abụ otu,+ ọ ga-enwekwa otu aha.+

10 “Ala a niile ga-adị ka Araba,+ malite na Giba+ ruo Rimọn+ nke dị n’ebe ndịda Jeruselem. Ọ* ga-ebili dịrị n’ebe ọ dịbu.+ Ndị mmadụ ga-ebikwa na ya, malite n’Ọnụ Ụzọ Ámá Benjamin+ ruo n’ebe Ọnụ Ụzọ Ámá Mbụ dị, ruokwa n’Ọnụ Ụzọ Ámá Dị n’Ebe Mgbidi Sụkọtara Isi, malitekwa n’Ụlọ Nche Hananel+ ruo n’ebe a na-azọchapụtara eze mmanya. 11 Ndị mmadụ ga-ebi na ya. A gakwaghị abụ ya ọnụ ka e wee bibie ya.+ Obi ga-erukwa ndị ga-ebi na Jeruselem ala.+

12 “Ihe a bụkwa ọrịa ọjọọ Jehova ga-eme ka ndị niile na-alụso Jeruselem agha rịa:+ Anụ ahụ́ ha ga-erekapụsị ka ha guzo ọtọ, anya ha ga-erekapụsị n’oghere anya ha, ire ha ga-erekapụsịkwa n’ime ọnụ ha.

13 “N’ụbọchị ahụ, Jehova ga-eme ka ha niile nọrọ n’ọgba aghara. Onye nke ọ bụla ga-ejide ibe ya n’aka, lụso ibe ya ọgụ.+ 14 Juda ga-eso lụọ agha na Jeruselem. A ga-achịkọta akụ̀ mba niile gbara ha gburugburu, ya bụ, ọtụtụ ọlaedo na ọlaọcha na uwe.+

15 “A ga-eme ka ịnyịnya, nnukwu jakị,* kamel, obere jakị, na anụmanụ niile nọ n’ebe ndị ahụ mara ụlọikwuu rịa ụdị ọrịa ọjọọ ahụ.

16 “Onye ọ bụla fọrọ n’ime mba niile ndị na-alụso Jeruselem agha ga na-agbago kwa afọ+ ka ọ kpọọrọ Eze, bụ́ Jehova nke ụsụụ ndị agha,+ isiala,* nakwa ka o mee Ememme Ụlọ Ndò.+ 17 Ma, ọ bụrụ na onye ọ bụla n’ezinụlọ niile dị n’ụwa agbagoghị Jeruselem ịkpọrọ Eze, bụ́ Jehova nke ụsụụ ndị agha, isiala, mmiri agaghị ezoro ya.+ 18 Ọ bụrụ na ezinụlọ Ijipt abịaghị, ọ bụrụkwa na ha abataghị, mmiri agaghị ezoro ha. Kama, Jehova ga-eme ka Ijipt rịa ọrịa ọjọọ ahụ ọ ga-eme ka mba ndị na-abịaghị mee Ememme Ụlọ Ndò rịa. 19 Ọ bụ ya bụ ahụhụ a ga-ata Ijipt na mba niile na-abịaghị mee Ememme Ụlọ Ndò. A ga-ata ha ahụhụ a maka na ọbịbịa ha na-abịaghị bụ mmehie.

20 “N’ụbọchị ahụ, a ga-ede ‘Jehova bụ Onye Dị Nsọ’+ ná mgbịrịgba ịnyịnya dị iche iche nya n’olu. Ite ndị e ji esi nri*+ n’ụlọ Jehova ga-adị ka efere+ ndị dị n’ihu ebe ịchụàjà. 21 Ite ọ bụla e ji esi nri* na Jeruselem nakwa na Juda ga-abụ ihe dị nsọ, bụrụkwa nke Jehova nke ụsụụ ndị agha. Ndị niile na-achụ àjà ga-abata were ụfọdụ n’ime ha sie ihe. N’ụbọchị ahụ, a gakwaghị enwe onye Kenan* n’ụlọ Jehova nke ụsụụ ndị agha.”+

Zekaraya pụtara “Jehova Echetala.”

Ma ọ bụ “sinụ n’ụzọ ọjọọ unu na omume ọjọọ unu lọghachi.”

Gụọ B15.

Na Hibru, “n’ifufe anọ nke eluigwe.”

Na Hibru, “ada bụ́ Zayọn.”

Na Hibru, “Anụ ahụ́.”

Ma ọ bụ “ikpe mara gị.”

Ma ọ bụ “uwe ememme.”

Ma ọ bụ “na-ahụ maka ogige m; na-eche ogige m nche.”

Ma ọ bụ “ihe e ji adọsa oriọna.”

Ma ọ bụ “Oriọna.”

Ma ọ bụ “ụbọchị ihe nta.”

Na Hibru, “okwute,” ya bụ, okwute e kegidere eriri nke e ji amata ma ihe ọ̀ kwụkwa ọtọ.

“Ha” nwere ike ịbụ ọkụ asaa ahụ ma ọ bụkwanụ anya Jehova.

Na Hibru, “na-awagharị n’ụwa.”

Ma ọ bụ “oriọna.”

Ya bụ, alaka ndị mkpụrụ mịjuru na ha n’osisi ahụ.

Otu kubit bụ sentimita 44.5 (inch 17.5). Gụọ B14.

Na Hibru, “efa.” N’amaokwu a, ọ pụtara ihe ma ọ bụ nkata ga-aba ihe dị otu efa. Otu efa bụ lita 22. Gụọ B14.

Ma ọ bụ “opu.”

Ma ọ bụ “opu.”

Ma ọ bụ “shekeleke.”

Ya bụ, Babịlonia.

Ya bụ, ụgbọ ịnyịnya.

Ma ọ bụ “n’ofe oké osimiri.”

Ma ọ bụ “okpueze pụrụ iche.”

Ya bụ, ọrụ abụọ ọ ga-arụ nke bụ́ ịbụ eze na ịbụ onye nchụàjà.

Ma ọ bụ “Okpueze pụrụ iche.”

Gụọ B15.

Ma ọ bụ “mee ka obi Jehova jụrụ.”

Ma ọ bụ “n’ụlọ nsọ.”

Na Hibru, “m.”

Na Hibru, “m.”

Ma ọ bụ “n’ebe ndịda.”

Ma ọ bụ “n’ebe ugwu.”

Ma ọ bụ “Na-egosinụ ibe unu ịhụnanya pụrụ iche.”

Ma ọ bụ “nwa na-enweghị nne na nna.”

O nwere ike ịbụ, “nkume siri ike,” dị ka nkume emụri.

Ma ọ bụ “ná ntụziaka.”

Na Hibru, “ọ.”

Ma ọ bụ “obodo a tụkwasịrị obi.”

Ma ọ bụ “a tụkwasịrị obi.”

Na Hibru, “Meenụ ka aka unu dị ike.”

Na Hibru, “Meenụ ka aka unu dị ike.”

Ma ọ bụ “gaa mee ka obi Jehova jụrụ.”

Na Hibru, “M.”

Ma ọ bụ “meekwa ka obi Jehova jụrụ.”

Na Hibru, “ndị si n’asụsụ.”

Ma ọ bụ “ọnụ ọnụ uwe.”

Na Hibru, “nwoke onye Juu.”

Ma ọ bụ “onye mmegide.”

O nwere ike ịbụ ahụhụ ndị ya na-ata.

Na Hibru, “Ada bụ́ Zayọn.”

Na Hibru, “Ada bụ́ Jeruselem.”

Ma ọ bụ “Ọ na-emeri emeri.”

Ma ọ bụ “oké jakị.”

Ya bụ, Zayọn, ma ọ bụ Jeruselem.

Na Hibru, “ga-azọ Juda ụkwụ.”

Èbè bụ ihe yiri katapọt.

Na Hibru, “ụmụ agbọghọ na-amaghị nwoke.”

Na Hibru, “terafim.”

Ma ọ bụ “okwu siri ike nkọwa; ihe dị mgbagwoju anya.”

Na Hibru, “mkpi.”

Na Hibru, “ụlọ elu dị n’isi mgbidi.” Ọ pụtara nwoke dị ezigbo mkpa.

Na Hibru, “mkpọ́.” Ọ pụtara onye na-akwado onye ọzọ; onye ọchịchị.

Ma ọ bụ “onyeisi ọrụ.”

Na Hibru, “Ha ga na-ejegharị n’aha m.”

Ma ọ bụ “enwere ha ọmịiko.”

Ma ọ bụ “enwere ndị bi n’ala a ọmịiko.”

Ma ọ bụ “mkpụrụ obi m edilighị.”

Ma ọ bụ “mkpụrụ obi ha.”

Na Hibru, “jiri ihe e ji atụ̀ ihe tụọrọ m ụgwọ ọrụ m.”

Na Hibru, “ga-agba ọchịchịrị.”

Na Hibru, “mmụọ.”

Ma ọ bụ “efere.”

Ọka a nwere ike ịbụ ọka wit ma ọ bụ ọka bali.

Ma ọ bụ “n’ebe ha kwesịrị ibi.”

Ma ọ bụ “ịma mma.”

Ma ọ bụ “ịma mma.”

Ma ọ bụ “nke ike na-adịtụdịghị.”

Na Hibru, “n’agbata aka gị abụọ?” Ya bụ, n’obi ma ọ bụ n’azụ.

Ma ọ bụ “ndị hụrụ m n’anya.”

Ma ọ bụ “ha ga-anwụkwa.”

Ya bụ, obodo e kwuru okwu ya n’amaokwu nke 2.

Na Hibru, “n’osimiri.”

Ma ọ bụ “ga-akwụrụ otu ebe,” ka à ga-asị na oyi mere ka ọ kpụkọta.

Ya bụ, Oké Osimiri Nnu.

Ya bụ, Oké Osimiri Mediterenian.

Ya bụ, Jeruselem.

Okwu Hibru a sụgharịrị nnukwu jakị n’ebe a pụtara jakị nke nne ịnyịnya na oké jakị mụtara.

Ma ọ bụ “ka o fee Eze, bụ́ Jehova nke ụsụụ ndị agha.”

Ma ọ bụ “Ite ọnụ ha sara mbara e ji esi nri.”

Ma ọ bụ “Ite ọnụ ya sara mbara e ji esi nri.”

O nwere ike ịbụ, “onye na-azụ ahịa.”

    Akwukwo Igbo (1984-2025)
    Pụọ
    Banye
    • Igbo
    • Ziga ya
    • Ịgbanwe Ihe
    • Copyright © 2025 Watch Tower Bible and Tract Society of Pennsylvania
    • Ihe Ị Ga-eme na Ihe Ị Na-agaghị Eme
    • Ihe Anyị Ji Ihe Ị Gwara Anyị Eme
    • Kpebie Ihe Ị Ga-agwa Anyị
    • JW.ORG
    • Banye
    Ziga ya