යෙරෙමියා

46 විවිධ ජාතීන් ගැන අනාගතවක්තෘ යෙරෙමියාට යෙහෝවා දෙවිගෙන් පණිවිඩ ලැබිණ.+ 2 මුලින්ම ලැබුණේ ඊජිප්තුවේ යුධ හමුදාව ගැන පණිවිඩයයි.+ ඒ කාලයේදී කර්කෙමිෂ්හි+ යුප්‍රටීස් ගඟ අසලදී බැබිලෝනියේ රජු වූ නෙබුකද්රෙෂර් විසින් ඊජිප්තුවේ රජු වූ නෙකෝ නමින් හැඳින්වූ පාරාවෝගේ+ යුධ හමුදාව පරාජයට පත් කරන ලදි. ඔහු එසේ කළේ යොෂියාගේ පුත්‍රයා වූ යූදාහි රජු වූ යෙහෝයාකිම් පාලනය කළ හතරවන අවුරුද්දේදීය.+ යෙරෙමියාට දෙවිගෙන් ලැබුණු පණිවිඩය මෙයයි. 3 “ජනයෙනි, කුඩා පලිහත් විශාල පලිහත් රැගෙන සටනට යෑමට සූදානම් වෙන්න.+ 4 අසරුවෙනි, අශ්වයන්ව යුද්ධයට සූදානම් කරන්න. යුධ ඇඳුමින් සැරසී+ හිස්වැසුම් පැළඳගන්න. හෙල්ලයේ තුඩ හොඳින් උල් කරගෙන අශ්වයන් පිට නැඟී පෙළට සිටින්න.

5 “යෙහෝවා දෙවි මෙසේ පවසන්නේය. ‘මා දකින්නේ කුමක්ද? ඔවුහු තැතිගෙන හැරී යන්නෝය. ඔවුන්ගේ බලවන්තයෝ අන්ත පරාජයක් අද්දැක පසුපස නොබලා පලා දුවන්නෝය.+ භීතිය දසත පැතිරී ගොසින්ය.+ 6 එබැවින් වේගයෙන් දිවීමට හපන් සියල්ලෙනි, පලා යෑමට තැත් නොකරන්න. බලවන්තයෙනි, බේරී යෑමට උත්සාහ නොකරන්න.+ උතුරු දෙසින්+ පිහිටා ඇති යුප්‍රටීස් ගඟ අසලදී ඔබ සියලුදෙනාම වැටී යනු ඇත.’+

7 “දෙගොඩ තලා ගලා යන නයිල් ගංගාව මෙන්ද රැලි නංවමින් වේගයෙන් ඉදිරියටම ඇදී යන ගංගාවන් මෙන්ද පැමිණෙන මේ තැනැත්තා කවුද?+ 8 ඒ වෙන කවුරුත් නොවෙයි, ඊජිප්තුවේ යුධ හමුදාවයි. ඔවුන් දෙගොඩ තලා ගලා යන නයිල් ගංගාව මෙනි.+ රැලි නංවමින් වේගයෙන් ඇදී යන ගංගාවන් මෙනි.+ ඔවුහු වේගයෙන් ඉදිරියට ගමන් කරති. ‘අපි ගොස් මුළු පොළොවම යටත් කරගනිමු. අපි නගරයත් එහි වැසියන්වත් විනාශ කිරීමට ඉක්මනින් යමු’+ කියා ඔවුහු එකිනෙකා අතරේ කතා කරගනිති. 9 අශ්වයෙනි, වේගයෙන් දිව යන්න. අශ්ව රථ සේනාවෙනි, සියල්ල සුනුවිසුනු කරගෙන ඉදිරියට යන්න. නිර්භීත හේවායෙනි, පසු නොබසින්න. පලිස් හොඳින් හසුරුවන කූෂ්වරුනි,+ පූට්වරුනි,+ ඉදිරියටම යන්න. දක්ෂ ලෙස දුනු හසුරුවන ලූදිම්වරුනි,+ පසු නොබැස ඉදිරියටම යන්න.

10 “ස්වර්ගයේ සේනාවල අධිපතිද විශ්වයේ පාලකයාද වන යෙහෝවා දෙවි තම සතුරන්ට දඬුවම් කරන දවස එයයි.+ කඩුව සියලුදෙනාට පහර දී තෘප්තියට පත් වනු ඇත. පිපාසය සන්සිඳෙන තුරුම එය ඔවුන්ගේ ලේ පානය කරනු ඇත. මන්ද ස්වර්ගයේ සේනාවල අධිපතිද විශ්වයේ පාලකයාද+ වන යෙහෝවා දෙවි, උතුරු දේශයේ යුප්‍රටීස් ගංගාව අසල+ එදින පූජාවක් සූදානම් කර ඇත.+

11 “ඊජිප්තු දියණිය,+ ගිලියද් දේශයට ගොස් බෝල්සම් තෛලය ලබාගන්න.+ ඔබ සුවය ලබාගැනීමට කොතරම් උත්සාහ දැරුවත් ඉන් කිසිම පලක් නැත. කිසිවකින් ඔබට සුවයක් නොලැබේ.+ 12 ඔබ අද්දුටු ලැජ්ජාසහගත තත්වය ගැන ජාතීන්ට ආරංචි වී ඇත.+ ඔබේ වැලපීමේ හඬ මුළු දේශය පුරාම පැතිරී ගොස් ඇත.+ එක් බලවන්තයෙකු තවත් බලවන්තයෙකු සමඟ ගැටී+ දෙදෙනාම එකට ඇද වැටුණෝය.”

13 ඊජිප්තු දේශයට පහර දීමට පැමිණෙන බැබිලෝනියේ රජු වන නෙබුකද්රෙෂර් ගැන අනාගතවක්තෘ යෙරෙමියාට යෙහෝවා දෙවි පැවසූ දේ මෙයයි.+ 14 “ජනයෙනි, මෙය ඊජිප්තු දේශයේ ප්‍රකාශ කරන්න. මිග්දෝල්හිද+ නොෆ්හිද+ තාහ්පනේස්හිද+ මෙය දැනුම් දෙන්න. ‘ඔබ අවට ඇති සියල්ල කඩුවෙන් විනාශ වීමට නියමිත නිසා+ එයට මුහුණ දීමට සූදානමින් සිටින්න.+ 15 දිය පහරකට ගසාගෙන යන්නාක් මෙන් ඔබේ බලවන්තයෝ විනාශ වී ගියෝය.+ යෙහෝවා දෙවිම ඔවුන්ට පහර දුන් නිසා+ ඊට මුහුණ දීමට ඔවුන්ට නොහැකි විය. 16 ඔවුන්ගෙන් බොහෝදෙනෙක් බිමටම ඇද වැටුණෝය. ඔවුහු එකිනෙකා අතරේ මෙසේ කියාගත්තෝය. “අපිට තවදුරටත් සතුරාගේ මාරාන්තික කඩුවට මුහුණ දෙන්න බැහැ. ඒ නිසා අපි අපේ සෙනඟ වෙතටත් අපේ ඥාතීන්ගේ දේශය වෙතටත් පලා යමු.”’ 17 ඔවුහු මෙසේ පැවසුවෝය. ‘ඊජිප්තුවේ රජු වන පාරාවෝ පුරසාරම් දොඩන්නෙකු පමණයි.+ ඔහු අපිට තිබුණු උත්සව කාලයන් නැති කර දැමුවා.’+

18 “ස්වර්ගයේ සේනාවල අධිපති වන යෙහෝවා යන නමින් හඳුන්වන+ රජ මෙසේ පවසන්නේය. ‘ඔහු අනිවාර්යයෙන්ම පැමිණෙන බව ජීවමාන දෙවි වන මම පවසමි. ඔහුගේ පැමිණීම කොතරම් තේජාන්විතද කිවහොත් එය කඳු අතරින් කැපීපෙනෙන තාබෝර් කන්ද+ මෙන් වන්නේය. මුහුද අසල පිහිටි කර්මෙල් කඳුවැටිය+ මෙන්ද වන්නේය. 19 ඊජිප්තු දියණිය,+ කදමලු බැඳගෙන වහල්කමට යෑමට සූදානම් වන්න.+ නොෆ් නගරයේ+ කිසිම වැසියෙකු ඉතුරු නොවන ලෙස එය ගින්නෙන් දැවී විනාශ වී යන්නේය.+ එයට සිදු වන දේ දකින සියලුදෙනා පුදුමයට පත් වන්නෝය. 20 ඊජිප්තුව ශෝභමාන වැස්සියක මෙන් සිටින්නීය. නමුත් ඇයව විනාශ කර දැමීමට මදුරුවෙක් උතුරු දෙසින් පැමිණෙන්නේය.+ 21 ඇය කුලියට ගත් යුධ භටයන්, තර වස්සන් මෙනි.+ නමුත් ඔවුන් පිටට විපත්ති පැමිණෙන දවසේදී ඔවුහු සියලුදෙනා ඊට මුහුණ දීමට නොහැකිව+ පලා දුවන්නෝය.+ ඔවුන්ට දඬුවම් කරන කාලයේදී+ එය දරාගත නොහැකිව ඔවුහු පසුබසින්නෝය.’

22 “‘සතුරු සේනාවක් ගස් කපන්නන් මෙන් පොරෝ අතැතිව ඇය වෙතට පැමිණෙන නිසා ඇය සර්පයෙකු මෙන් නිහඬව පලා යනු ඇත.’+ 23 යෙහෝවා දෙවි මෙසේද පවසන්නේය. ‘ඇතුල් වීමට නොහැකි තරමට ගනව වැඩුණු ඇගේ වනළැහැබ ඔවුහු කපා දමනු ඇත.+ ඔවුන්ගේ ගණන පළඟැටියන්ගේ ගණනටත් වඩා වැඩිය.+ එය කිසිවෙකුට ගණන් කළ නොහැකිය. 24 ඊජිප්තු දියණිය+ නිසැකවම ලැජ්ජාවට පත් වනු ඇත. උතුරු දේශයෙන් පැමිණෙන සෙනඟගේ අතට ඇයව භාර දෙනු ලැබේ.’+

25 “ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෙසේ පවසන්නේය. ‘නෝ* නගරයේ+ දෙවියා වන ආමොන්ටත්+ ඊජිප්තුවට හා ඇගේ දෙවිවරුන්ටත්+ ඇගේ රජවරුන්ටත්+ පාරාවෝටත් ඔහු කෙරෙහි විශ්වාස තබන සියලුදෙනාටත්+ මම දඬුවම් කරන්නෙමි.’

26 “යෙහෝවා දෙවි තවදුරටත් මෙසේ පවසන්නේය. ‘ඔවුන්ගේ ජීවිත විනාශ කර දැමීමට සොයන අයගේ අතටත් බැබිලෝනියේ රජු වන නෙබුකද්රෙෂර්ගේ අතටත්+ ඔහුගේ සේවකයන්ගේ අතටත් මම ඔවුන්ව හසු කර දෙන්නෙමි. නමුත් කලක් ගත වූ පසු නැවතත් සෙනඟ ඊජිප්තු දේශයේ පෙර මෙන් ජීවත් වනු ඇත.’+

27 “‘නමුත් මාගේ සේවක යාකොබ්, භය නොවන්න. ඊශ්‍රායෙල්, අධෛර්යයට පත් නොවන්න.+ මන්ද ඈත දේශයක සිටින ඔබව මම බේරාගන්නෙමි. වහල්භාවයේ සිටින ඔබේ දරුවන්ව මම ගලවාගන්නෙමි.+ යාකොබ් නැවත පැමිණ කිසිවෙකුගෙන් කරදරයක් නැතුව සුරක්ෂිතව ජීවත් වනු ඇත.’+ 28 යෙහෝවා දෙවි තවදුරටත් මෙසේ පවසන්නේය. ‘මාගේ සේවක යාකොබ්, මා ඔබ සමඟ සිටින නිසා කිසි දෙයකට භය නොවන්න.+ ඔබව විසුරුවාහැරිය දේශවල සිටින සියලු ජාතීන්ව මම සහමුලින්ම විනාශ කර දමන්නෙමි.+ මම ඔවුන්ට එසේ කළත් ඔබට නම් එසේ නොකරමි.+ නමුත් මම ඔබට දඬුවම් නොකර සිටින්නේද නැත.+ සුදුසු ප්‍රමාණයට මම ඔබට අවශ්‍ය හික්මවීම දෙන්නෙමි.’”+