AKWỤKWỌ OZI E DEGAARA NDỊ KỌLỌSI

1 Mụnwa bụ́ Pọl, onye ọ bụ uche Chineke ka m bụrụ onyeozi Kraịst Jizọs, na Timoti+ nwanna anyị, 2 na-edetara ọgbakọ dị na Kọlọsi akwụkwọ ozi a. Unu bụ ndị nsọ na ụmụnna a tụkwasịrị obi, ndị ha na Kraịst dị n’otu.

Ka Chineke Nna anyị meere unu amara, meekwa ka udo dịrị unu.

3 Mgbe ọ bụla anyị na-ekpe ekpere maka unu, anyị na-ekele Chineke bụ́ Nna nke Onyenwe anyị Jizọs Kraịst. 4 Ihe mere anyị ji ekele ya bụ na anyị nụrụ na unu kweere na Kraịst Jizọs, hụkwa ndị nsọ niile n’anya, 5 n’ihi na unu nwere olileanya inweta ihe e doweere unu n’eluigwe.+ Unu matara banyere olileanya a mgbe e ziri unu ozi ọma bụ́ eziokwu. 6 Ozi ọma a unu nụrụ na-amị mkpụrụ, na-agbasakwa n’ụwa niile,+ otú ahụ ọ na-amị mkpụrụ n’ime unu malite n’ụbọchị unu nụrụ nke bụ́ eziokwu gbasara amara Chineke, matakwa ya nke ọma. 7 Onye kụziiri unu eziokwu a bụ Epafras,+ ohu ibe anyị anyị hụrụ n’anya, onye ozi Kraịst a tụkwasịrị obi, onye na-anọchitekwa anya anyị. 8 Ọ gwakwara anyị na mmụọ nsọ na-enyere unu aka ịna-ahụ ndị ọzọ n’anya.

9 Ọ bụ ya mere na malite n’ụbọchị anyị nụrụ ya, anyị akwụsịbeghị ikpe ekpere maka unu,+ na-arịọ ka unu mara uche Chineke nke ọma,+ nweekwa amamihe, nakwa ka mmụọ nsọ na-eme ka unu na-aghọta ihe.+ 10 Anyị na-arịọkwa ka unu na-eme ihe otú ndị na-efe Jehova* kwesịrị ịna-eme iji na-eme ya obi ụtọ, ka unu na-eme ihe ọ bụla dị mma ma na-amụtakwu eziokwu gbasara Chineke.+ 11 Ihe ọzọ anyị na-arịọ bụ ka Chineke jiri ike ya dị ebube mee ka unu dị ike,+ ka unu wee na-atachi obi n’ihe niile, jirikwa ọṅụ na-edi ihe niile. 12 Ekpere anyị bụkwa ka unu na-ekele Nna anyị, onye mere ka unu ruo eruo inweta ihe o kwere ndị nsọ nọ n’ìhè ná nkwa.+

13 Ọ kpọpụtara anyị n’ọchịchịrị*+ ma kpọga anyị n’alaeze Ọkpara ya ọ hụrụ n’anya, 14 onye e si n’aka ya jiri ihe mgbapụta gbapụta anyị, nke pụtara na a gbagharala anyị mmehie anyị.+ 15 Onye a yiri Chineke, onye a na-enweghị ike ịhụ anya.+ Ọ bụkwa onye e bu ụzọ kee n’ime ihe niile e kere eke.+ 16 N’ihi na e si n’aka ya kee ihe ndị ọzọ niile dị ma n’eluigwe ma n’ụwa, ihe ndị e nwere ike ịhụ anya na ihe ndị a na-enweghị ike ịhụ anya,+ ma ọ̀ bụ ocheeze ma ọ bụ ndị isi ma ọ bụ ọchịchị ma ọ bụ ikike. E si n’aka ya kee ihe ndị ọzọ niile,+ e kekwara ha maka ya. 17 O bu ihe ndị ọzọ niile ụzọ malite ịdị.+ E sikwa n’aka ya mee ka ihe ndị ọzọ niile dịrị. 18 Ọ bụkwa onyeisi nke ahụ́ ya, ya bụ, ọgbakọ ya.+ Ọ bụ ya ka e ji malite ihe niile. Ọ bụ onye mbụ e si n’ọnwụ kpọlite.+ N’ihi ya, ọ bụ onye mbụ n’ihe niile. 19 N’ihi na Chineke chọrọ ka Kraịst zuo ezuo n’ihe niile.+ 20 O sikwa n’aka Kraịst mee ka ya na ihe ndị ọzọ niile dị ná mma,+ ma ihe ndị dị n’ụwa ma ihe ndị dị n’eluigwe. Ọ bụkwa ọbara+ Kraịst wụsịrị n’osisi ịta ahụhụ* ka Chineke ji mee ka ya na ihe ndị ọzọ niile dịrị n’udo.

21 N’eziokwu, e nwere oge unu bụ ndị iro Chineke, oge a na-enweghị ihe jikọrọ unu na ya n’ihi na uche unu dị naanị n’ihe ọjọọ. 22 Ma ugbu a, o ji maka ọnwụ onye ahụ ji anụ ahụ́ ya chụọ àjà mee ka unu na ya dị ná mma, ka unu wee dịrị nsọ n’anya ya, bụrụkwa ndị na-enweghị ntụpọ na ndị a na-anaghị ebo ebubo n’ihu ya.+ 23 Ma, unu ekwesịghị ịkwụsị inwe okwukwe na Chineke,+ kama, kwụsienụ ike na ntọala+ okwukwe unu, guzosiekwanụ ike,+ ka a ghara ime ka unu kwụsị inwe olileanya nke ozi ọma unu nụrụ mere ka unu nwee, nke e kwusakwara ebe niile n’ụwa.*+ Mụnwa bụ́ Pọl ghọkwara onyeozi maka izisa ozi ọma a.+

24 Ana m aṅụrị ọṅụ ugbu a n’agbanyeghị na m na-ata ahụhụ maka unu.+ Echere m na m ga na-ata ya na-aga ebe m so n’ahụ́ Kraịst. Ahụhụ a m na-ata bụkwa maka ọdịmma nke ahụ́ Kraịst,+ ya bụ, ọgbakọ ya.+ 25 M na-ejere ndị Chineke ozi n’ihi na ọ họpụtara m maka ozi a.+ Ọ bụkwa maka ọdịmma unu. Ọ bụ ya mere m ji na-eji ike m niile ekwusa okwu Chineke. 26 Ozi a m na-ezisa bụ ihe nzuzo dị nsọ+ e zoro kemgbe ụwa,*+ e meghịkwa ka ọgbọ ndị gara aga mara gbasara ya. Ma ugbu a, e meela ka ndị nsọ mara ya.+ 27 Ọ masịrị Chineke ime ka ndị mba ọzọ bụ́ ndị nsọ mara ihe nzuzo a dị nsọ,+ nke bụ́ akụ̀ dị ebube. Unu nwere olileanya ịdị ebube ka Kraịst+ n’ihi na unu na ya dị n’otu. 28 Anyị na-ekwusa gbasara Kraịst, na-adụ mmadụ niile ọdụ, jirikwa amamihe niile na-akụziri mmadụ niile ihe, ka anyị wee mee ka mmadụ niile, ndị ha na Kraịst dị n’otu, bụrụ ndị tozuru okè n’anya Chineke.+ 29 Ọ bụ ya mere m ji na-arụsi ọrụ ike, jiri ike Chineke nyere m+ na-agbasi mbọ ike.

2 Achọrọ m ka unu mata otú m si na-agbasi mbọ ike maka ọdịmma unu nakwa maka ọdịmma ndị bi na Leodisia+ na ndị niile na-ahụtụbeghị m.* 2 M na-agba mbọ a iji kasie unu niile obi,+ ka unu dịrị n’otu, hụkwa ibe unu n’anya,+ si otú ahụ nweta ezigbo akụ̀. Akụ̀ a bụ na unu ga-amata nnọọ ihe nzuzo dị nsọ gbasara Chineke, ghọtakwa ya nke ọma. Ihe nzuzo a bụ Kraịst.+ 3 Ọ bụ n’ime ya ka e zoro amamihe na ihe niile bara ezigbo uru a na-amụta amụta.+ 4 Ana m ekwu ihe a ka onye ọ bụla ghara iji ire ụtọ duhie unu. 5 Ọ bụ eziokwu na mụ na unu anọghị, obi m dị ebe unu nọ.* M na-aṅụrịkwa ọṅụ ka m na-ahụ otú unu si na-eme ihe n’usoro,+ nakwa otú okwukwe unu nwere na Kraịst si sie ike.+

6 N’ihi ya, ebe ọ bụ na unu na-eso ụzọ Onyenwe anyị Kraịst Jizọs, na-eruberenụ ya isi. 7 Na-emenụ ka okwukwe unu nwere na ya sie ike+ ka osisi gbanyesiri mgbọrọgwụ ike+ n’ala. Na-agbarịtanụ ibe unu ume otú ọ chọrọ. Kwụrụnụ chịm, na-ekelekwanụ Chineke mgbe niile.+ Ihe ndị a ka a kụziiri unu.

8 Na-echenụ nche ka a ghara inwe onye ga-eji amamihe ụwa na ihe ndị na-abụghị eziokwu mata unu n’ọnyà.*+ Ihe ndị a esighị na Kraịst, kama ha si n’ọdịnala ndị mmadụ nakwa n’otú ụwa si ele ihe anya.* 9 Ma, Kraịst nwere àgwà niile Chineke nwere.+ 10 Ọ bụ yanwa mere na o nweghị ihe kọrọ unu. Ọ bụkwa onyeisi ọchịchị niile na ikike niile.+ 11 E biri unu úgwù n’ihi na unu kweere na Kraịst. Ma, e bighị unu úgwù a otú ndị mmadụ si ebi úgwù, kama unu jụrụ ime ihe anụ ahụ́ unu chọrọ.+ Ọ bụkwa otú a ka e si ebi ndị na-eso ụzọ Kraịst úgwù.+ 12 E likọrọ unu na ya n’ihi na unu mere ụdị baptizim o mere.+ A kpọlitekwara unu na ya n’ọnwụ+ n’ihi na unu na ya dị ná mma, unu nwekwara okwukwe n’ihe niile e ji ike Chineke rụọ. Ọ bụ Chineke kpọlitere ya n’ọnwụ.+

13 Ọ bụkwa eziokwu na unu nwụrụ anwụ n’ihi mmehie unu na-eme, nakwa n’ihi úgwù a na-ebighị unu n’anụ ahụ́, Chineke mere ka unu na Kraịst dịrị ndụ.+ Ọ gbaghaara anyị mmehie anyị niile,+ 14 hichapụkwa iwu ahụ+ e ji aka dee,+ nke na-emegide anyị.+ Ọ bụ ọnwụ Kraịst nwụrụ n’osisi ịta ahụhụ* ka Chineke ji hichapụ iwu ahụ.+ 15 O ji osisi ịta ahụhụ* a gbaa ọchịchị na ikike dị iche iche ọtọ, gosi n’ihu ọha na o meriri ha emeri,+ na-edukwa ha agagharị iji gosi na o meriela ha.

16 N’ihi ya, unu ekwela ka onye ọ bụla kpee unu ikpe maka ihe unu na-eri na ihe unu na-aṅụ+ ma ọ bụ maka ememme ma ọ bụ ememme ọnwa ọhụrụ+ ma ọ bụkwanụ ụbọchị izu ike.+ 17 Ihe ndị ahụ nọchiri anya ihe ndị gaje ịbịa,+ ma onye ihe ndị ahụ ga-emezu n’isi ya bụ Kraịst.+ 18 Ụfọdụ ndị na-eme ka hà dị umeala n’obi, na-efekwa ndị mmụọ ozi. Ma unu ekwela ka ha mee ka unu ghara inweta ụgwọ ọrụ+ a ga-akwụ unu. Naanị ihe ha na-ejidesi aka ike bụ ihe ha ji anya ha hụ. Ha na-ejikwa ihe na-enweghị ihe ọ bụ anya isi n’ihi na uche ha niile dị n’ihe gbasara anụ ahụ́. 19 Ha anaghịkwa ejidesi onye bụ́ isi aka ike,+ onye na-enye ahụ́ niile ihe niile na-akpa ya, na-ejikọkwa ihe niile dị n’ahụ́, onye Chineke na-esikwa n’aka ya eme ka ahụ́ niile na-eto eto.+

20 Unu na Kraịst nwụrụ n’ihi na unu anaghị ele ihe anya otú ụwa si ele ihe anya.+ Gịnịzi mere unu ji na-ebi ndụ ka à ga-asị na unu ka bụ nke ụwa? Gịnịkwa mere unu ji na-erube isi n’iwu ndị a:+ 21 “Ewela ihe a, edetụla ihe a ire, ebitụla ihe a aka”? 22 Iwu ndị a bụ gbasara ihe ndị na-ala n’iyi ma e rie ha ma ọ bụ ma a ṅụọ ha. Ha bụ iwu ndị mmadụ na-enye na ihe ha na-akụzi.+ 23 Iwu ndị a yiri ihe na-eme ka mmadụ mara ihe, ma ha anaghị eme ka mmadụ ghara ịna-eme ihe na-agụ ya agụụ. Ndị mmadụ na-edebekwa iwu ndị a n’ihi na ha chọrọ iji aka ha na-ekpebi otú ha ga na-esi efe Chineke. Ha na-ata onwe ha ahụhụ+ n’ihi na ha chọrọ ka ndị mmadụ chee na ha dị umeala n’obi.

3 Ma, ọ bụrụ na Chineke kpọlitere unu na Kraịst n’ọnwụ,+ na-achọnụ ihe ndị dị n’eluigwe, ebe Kraịst nọ ọdụ n’aka nri Chineke.+ 2 Na-echenụ gbasara ihe ndị dị n’eluigwe,+ ọ bụghị ihe ndị dị n’ụwa.+ 3 Unu anwụọla, ma, ndụ unu dị Kraịst n’aka n’ihi na ọ bụ ihe Chineke chọrọ. 4 Mgbe Kraịst, bụ́ ndụ anyị,+ mere ka a hụ ebube ya,* a ga-emekwa ka a hụ ebube unu na ya.+

5 N’ihi ya, meenụ ka ahụ́ unu nwụọ+ n’ihe gbasara ịkwa iko,* adịghị ọcha, ejideghị onwe unu ma agụụ mmekọahụ gụwa unu,+ ihe ọjọọ ịgụ unu agụụ, na anyaukwu, nke bụ́ ikpere arụsị. 6 Chineke ga-ewesa ndị na-eme ihe ndị a iwe. 7 Unu na-emebu ihe ndị a mgbe unu na-agbanwebeghị.+ 8 Ma, ugbu a, unu kwesịrị ịkwụsị ihe ndị a: ọnụma, iwe, ihe ọjọọ,+ ịkparị mmadụ,+ na ikwu okwu rụrụ arụ.+ 9 Unu agharala ibe unu ụgha.+ Yipụnụ àgwà ochie unu na-akpabu,*+ 10 ma yirinụ àgwà* ọhụrụ,+ nke Chineke na-eme ka anyị na-akpa ma anyị mata ya nke ọma. Ọ bụ ya ga-eme ka àgwà anyị na-agbanwe, na-adị ka nke Chineke.+ 11 Ihe a gbasara ma onye Grik ma onye Juu, ma onye e biri úgwù ma onye a na-ebighị úgwù, ma onye mba ọzọ ma onye Sitia,* ma ohu ma onye nweere onwe ya. Ma, Kraịst bụ ihe niile, anyị na ya dịkwa n’otu.+

12 Ebe ọ bụ na Chineke họọrọ unu,+ unu abụrụkwa ndị dị nsọ na ndị ọ hụrụ n’anya, yirinụ àgwà ndị a ka uwe: obi ebere,+ obiọma, obi umeala,+ ịdị nwayọọ,+ na ndidi.+ 13 Na-edirinụ ibe unu ihe, na-agbagharakwanụ ibe unu kpamkpam+ ma e nwee onye ibe ya mejọrọ.+ Jehova* gbaghaara unu kpamkpam, unu kwesịkwara ịna-emere ibe unu otú ahụ.+ 14 E wezụga ihe ndị a niile, yirinụ ịhụnanya ka uwe,+ n’ihi na ịhụnanya na-eme ka mmadụ niile dịrị n’otu.+

15 Kwenụ ka udo nke Kraịst na-achị obi unu,+ n’ihi na Chineke kpọrọ unu ka unu bụrụ otu ahụ́, nọrọkwa n’udo. Gosikwanụ na obi dị unu ụtọ maka ihe e meere unu. 16 Kwenụ ka ihe Kraịst na-akụzi ju eju n’obi unu. Ọ ga-eme ka unu mara ihe. Jirinụ abụ ọma+ na abụ e ji eto Chineke, na nke e ji ekele ya, na-akụziri ibe unu ihe. Jirikwanụ ha na-agba ibe unu ume.* Jirinụ obi unu niile na-abụrụ Jehova* abụ.+ 17 Ihe ọ bụla unu na-eme, ma n’okwu ọnụ ma n’omume, na-emenụ ya n’aha Onyenwe anyị Jizọs. Sikwanụ n’aha ya na-ekele Chineke bụ́ Nna.+

18 Ndị nwunye, na-edonụ onwe unu n’okpuru di unu.+ Ọ bụ ihe Onyenwe anyị chọrọ. 19 Ndị bụ́ di, hụnụ nwunye unu n’anya mgbe niile.+ Unu ewesala ha iwe.*+ 20 Ụmụ, na-eruberenụ ndị mụrụ unu isi n’ihe niile,+ n’ihi na ọ na-amasị Onyenwe anyị. 21 Ndị nna, unu akpasula ụmụ unu iwe,+ ka ha ghara ịda mbà n’obi. 22 Ndị ohu, na-eruberenụ ndị nna unu ukwu* isi+ n’ihe niile. Unu erubela isi naanị ka ndị ọzọ hụ unu, ka obi dị ndị mmadụ ụtọ, kama jirinụ obi unu niile na-erubere ha isi iji gosi na unu na-akwanyere Jehova* ùgwù. 23 Jirinụ obi* unu niile na ike unu niile na-eme ihe ọ bụla unu na-eme, dị ka ùnu na-emere ya Jehova,*+ ọ bụghị mmadụ. 24 N’ihi na unu ma na ọ bụ Jehova* ga-akwụ unu ụgwọ ọrụ o kwere unu ná nkwa.+ Bụrụnụ ndị ohu Kraịst, bụ́ Nna unu ukwu. 25 N’eziokwu, a ga-akwụ onye na-eme ihe ọjọọ ụgwọ ihe ọjọọ ọ na-eme,+ n’ihi na Chineke anaghị ele mmadụ anya n’ihu.+

4 Ndị nna ukwu, na-emesonụ ndị ohu unu otú ziri ezi na otú dị mma, ebe unu ma na unu nwekwara Nna Ukwu n’eluigwe.+

2 Na-ekpenụ ekpere mgbe niile.+ Unu echefukwala ịna-ekpe ya. Na-ekelekwanụ Chineke.+ 3 Na-ekpekwanụ ekpere maka anyị+ ka Chineke megheere anyị ụzọ ka anyị na-ekwusa okwu ya na ihe nzuzo dị nsọ gbasara Kraịst, nke mere e ji tụọ m mkpọrọ.+ 4 Na-ekpekwanụ ekpere ka m na-ekwusa ya otú ndị mmadụ ga na-aghọta ya, dị ka m kwesịrị isi na-ekwusa ya.

5 Mgbe unu na ndị na-abụghị ụmụnna nọ, na-akpanụ àgwà otú na-egosi na unu ma ihe. Na-ejinụ oge unu eme ihe kacha mkpa.*+ 6 Ka okwu unu na-atọ ụtọ mgbe niile ka ihe e tinyere nnu.+ Ọ ga-eme ka unu mara otú unu ga-esi azaghachi onye ọ bụla.+

7 Tikikọs+ ga-agwa unu ihe niile gbasara m. Ọ bụ nwanna m m hụrụ n’anya na onye ozi a tụkwasịrị obi na ohu ibe m n’ihe gbasara Onyenwe anyị. 8 M na-ezitere ya unu ka ọ gwa unu otú anyị mere, kasiekwa unu obi. 9 M na-ezite ya na Onesịmọs+ nwanna m, onye a tụkwasịrị obi, onye m hụrụ n’anya, onye obodo unu. Ha ga-agwa unu ihe niile na-eme ebe a.

10 Arịstakọs,+ onye mkpọrọ ibe m, na-ekele unu. Mak,+ onye ikwu* Banabas, na-ekelekwa unu. (Mak a bụ onye m gwara unu ka unu nabata+ ma ọ bịa ịhụ unu.) 11 Jizọs, onye a na-akpọ Jọstọs, na-ekelekwa unu. Ndị a niile bụ ndị Juu.* Naanị ndị a bụ ndị ọrụ ibe m maka Alaeze Chineke. Ha na-akasikwa m nnọọ obi.* 12 Epafras,+ onye unu na ya nọbu, ohu Kraịst Jizọs, na-ekele unu. Ọ na-ekpesi ekpere ike mgbe niile maka unu, ka unu wee kwụrụ chịm n’ikpeazụ ka ndị tozuru etozu, na-ekwenyesikwa ike n’ihe niile gbasara uche Chineke. 13 M na-agba akaebe na ọ na-agba ezigbo mbọ maka unu nakwa maka ndị nọ na Leodisia na ndị nọ na Haịrapọlis.

14 Luk,+ onye anyị hụrụ n’anya, onye na-agwọ ọrịa, na-ekele unu. Dimas+ na-ekelekwa unu. 15 Keleerenụ m ụmụnna ndị nọ na Leodisia. Keleekwaranụ m Nimfa na ọgbakọ na-ezukọ n’ụlọ ya.+ 16 Unu gụchaa akwụkwọ ozi a, zigaranụ ya ọgbakọ ndị Leodisia ka ha gụọ.+ Gwakwanụ ha ka ha zitere unu nke m zigaara ha ka ununwa gụọ. 17 Gwakwanụ Akịpọs,+ sị: “Na-agba mbọ ka ị rụchaa ọrụ Onyenwe anyị gwara gị rụọ.”

18 Mụnwa bụ́ Pọl na-ekele unu. Ọ bụ m ji aka m na-ede+ ekele a. Burunụ mkpọrọ a tụrụ m+ n’uche. Ka Chineke meere unu amara.