AKWỤKWỌ OZI E DEGAARA NDỊ HIBRU

1 Ogologo oge gara aga, Chineke si n’ọnụ ndị amụma gwa nna nna anyị hà okwu ọtụtụ mgbe, o sikwa n’ọtụtụ ụzọ gwa ha ya.+ 2 Ma n’ọgwụgwụ oge ndị a, o si n’ọnụ Ọkpara ya gwa anyị okwu,+ onye ọ họpụtara ka o keta ihe niile,+ onye o sikwa n’aka ya kee ihe ndị dị n’eluigwe na n’ụwa.*+ 3 Ọ bụ onyinyo ebube Chineke.+ O yikwara nnọọ Chineke,+ ọ na-ejikwa okwu ya dị ike eme ka ihe niile na-adị. Mgbe ọ sachapụchara mmehie anyị,+ ọ nọdụrụ ala n’aka nri Onye Ukwu ahụ, n’ebe dị elu.+ 4 N’ihi ya, ọ kala ndị mmụọ ozi mma,+ ebe ọ bụ na o nwetala* aha ka nke ha mma.+

5 Dị ka ihe atụ, ònye n’ime ndị mmụọ ozi ka Chineke gwatụrụla, sị: “Ị bụ ọkpara m. Abụrụla m nna gị taa”?+ ma ọ bụ “M ga-abụ nna ya, ọ ga-abụkwa ọkpara m”?+ 6 Ma gbasara oge Chineke ga-ezite Nwa Mbụ ya+ ọzọ n’ụwa,* ọ sịrị: “Ka ndị mmụọ ozi niile nke Chineke kpọọrọ ya isiala.”

7 O kwukwara banyere ndị mmụọ ozi, sị: “Ọ na-eme ka ndị mmụọ ozi ya sie ike, na-emekwa ka ndị ozi ya*+ bụrụ ire ọkụ.”+ 8 Ma o kwuru banyere Ọkpara ya, sị: “Ọ bụ Chineke nyere gị ikike ịchị*+ ruo mgbe niile ebighị ebi, mkpanaka Alaeze gị bụkwa mkpanaka ezi omume.* 9 Ị hụrụ ezi omume n’anya, ị kpọkwara mmebi iwu asị. Ọ bụ ya mere Chineke, bụ́ Chineke gị, ji tee gị mmanụ+ ma mee ka ị na-aṅụrị ọṅụ karịa ndị ibe gị.”+ 10 E kwukwara, sị: “Onyenwe anyị, ị tọrọ ntọala ụwa ná mmalite, ọ bụkwa gị kere eluigwe. 11 Ha ga-ala n’iyi, ma ị ga na-adị ndụ. Ha niile ga-aka nká ka uwe. 12 Ị ga-afụkọtakwa ha ka ákwà mgbokwasị, a ga-agbanwekwa ha ka uwe. Ma ị ka bụ onye ị bụ, e nweghịkwa mgbe ị ga-akwụsị ịdị ndụ.”+

13 Ma ònye n’ime ndị mmụọ ozi ka ọ gwatụrụla, sị: “Nọdụ ala n’aka nri m ruo mgbe m ga-eme ka ndị iro gị bụrụ ihe i ji agbakwasị ụkwụ”?+ 14 Ọ̀ bụ na ha niile abụghị ndị mmụọ na-eje ozi dị nsọ,*+ ndị e zipụrụ ka ha jeere ndị a ga-azọpụta ozi?

2 Ọ bụ ya mere anyị ji kwesị ichebara ihe ndị anyị nụrụ echiche karịa otú anyị na-eme,+ ka a ghara inwe mgbe anyị ga-akpafu.+ 2 N’ihi na ọ bụrụ na okwu e si n’ọnụ ndị mmụọ ozi+ kwuo mezuru, ọ bụrụkwa na a tara onye ọ bụla dara iwu na onye ọ bụla nupụrụ isi ahụhụ kwesịrị ya,+ 3 olee otú a ga-esi ghara ịta anyị ahụhụ ma ọ bụrụ na anyị leghaara nnukwu ihe Chineke mere ka e wee zọpụta anyị anya?+ Ọ bụ Onyenwe anyị malitere ikwu banyere nnukwu ihe a.+ Ndị nụrụ ihe o kwuru gbakwara akaebe na ọ bụ eziokwu. 4 Chineke sokwa gbaa àmà. O ji ihe àmà na ihe ịtụnanya na ọrụ ebube dị iche iche+ nakwa mmụọ nsọ ya o nyere ndị na-ejere ya ozi otú o si chọọ gbaa àmà a.+

5 N’ihi na ọ bụghị ndị mmụọ ozi ka o mere ka ha bụrụ ndị ga-achị ụwa* nke ga-abịa,+ nke anyị na-ekwu banyere ya. 6 Ma otu onye gbara àmà n’otu ebe, sị: “Gịnị ka mmadụ bụ nke mere i ji na-echeta ya? Ma ọ bụ, gịnị ka nwa nke mmadụ bụ nke mere i ji na-elekọta ya?+ 7 I mere ka ndị mmụọ ozi katụ ya. I ji ebube na nsọpụrụ chọọ ya mma, meekwa ka o lekọtawa ọrụ aka gị. 8 I mere ka ihe niile dịrị n’okpuru ya.”+ Ebe ọ bụ na Chineke mere ka ihe niile dịrị n’okpuru ya,+ e nweghị ihe ọ bụla ọ na-emeghị ka ọ dịrị n’okpuru ya.+ Ma, anyị ahụwabeghị ka Jizọs na-achị ihe niile.+ 9 Ma anyị na-ahụ Jizọs, onye e mere ka ndị mmụọ ozi kara,+ ka e ji ebube na nsọpụrụ chọọ ya mma maka na ọ nwụrụ.+ N’ihi amara Chineke, ọ nwụrụ maka mmadụ niile.+

10 Onye ahụ ihe niile dị n’ihi ya, onye ihe niile sikwa n’aka ya dịrị, nọ na-eme ka ọtụtụ ụmụ ya dị ebube.+ N’ihi ya, o kwesịrị ekwesị na o mere ka Nnukwu Onye Ndú e si n’aka ya zọpụta ha+ taa ahụhụ, ka ahụhụ ọ tara wee mee ka o zuo okè.+ 11 N’ihi na ma onye mere ka ha dị nsọ ma ndị e mere ka ha dị nsọ+ sicha n’otu onye.+ N’ihi ya, ihere anaghị eme ya ịkpọ ha ụmụnna ya,+ 12 otú o kwuru, sị: “M ga-akọsara ụmụnna m aha gị. M ga-eji abụ too gị n’ime ọgbakọ.”+ 13 O kwukwara, sị: “M ga-atụkwasị ya obi.”+ Ọ sịkwara: “Leenụ mụ na ụmụaka Jehova* nyere m.”+

14 N’ihi ya, ebe ọ bụ na “ụmụaka” ahụ bụ ụmụ mmadụ ndị nwere anụ ahụ́ na ọbara, ọ ghọkwara mmadụ nke nwere anụ ahụ́ na ọbara,+ ka o wee si n’ọnwụ ya bibie Ekwensu,+ onye nwere ikike ịkpata ọnwụ+ 15 nakwa ka o wee tọhapụ ndị niile egwu ọnwụ mere ka ha bụrụ ndị ohu ná ndụ ha niile.+ 16 N’ihi na ọ bụghị ndị mmụọ ozi ka ọ na-enyere aka n’eziokwu, kama ọ bụ ụmụ* Ebreham+ ka ọ na-enyere aka. 17 Ọ bụ ya mere o ji dị ka “ụmụnna” ya n’ụzọ niile,+ ka o wee bụrụ nnukwu onye nchụàjà dị obi ebere, onye a tụkwasịkwara obi n’ozi ọ na-ejere Chineke, nakwa ka o wee chụọ àjà+ maka mmehie ụmụ mmadụ nke ga-eme ka ha na Chineke dị n’udo.+ 18 Ebe ọ bụ na ọ tara ahụhụ mgbe a na-anwa ya ọnwụnwa,+ ọ ga-enyeliri ndị a na-anwa ọnwụnwa aka.+

3 N’ihi ya, ụmụnna m ndị dị nsọ, ndị so ná ndị a kpọrọ òkù ịga eluigwe,+ cheenụ echiche banyere onyeozi na nnukwu onye nchụàjà, onye anyị na-ekwusa banyere ya, ya bụ, Jizọs.+ 2 O rubeere Onye họpụtara ya isi+ otú Mosis rubere isi mgbe ọ na-eje ozi n’ụlọ Onye ahụ.+ 3 N’ihi na e weere na o* ruru eru ka e nye ya otuto+ karịa Mosis, ebe ọ bụ na a na-akwanyere onye rụrụ ụlọ ùgwù karịa ụlọ ọ rụrụ. 4 N’eziokwu, ụlọ ọ bụla nwere onye rụrụ ya, ma onye rụrụ ihe niile bụ Chineke. 5 Mgbe Mosis na-eje ozi n’ụlọ Onye ahụ, o rubere isi ka onye ozi. Ozi o jere gbara akaebe banyere ihe ndị a ga-emecha kwuo okwu ha. 6 Ma Kraịst rubere isi ka ọkpara+ na-elekọta ụlọ Chineke. Anyị bụ ụlọ Onye ahụ+ ma ọ bụrụ na anyị ejiri obi ike na-ekwu okwu ma na-enwe olileanya ahụ anyị ji anya isi ruo n’ọgwụgwụ.

7 N’ihi ya, dị ka e si n’ike mmụọ nsọ kwuo,+ sị: “Taa, ọ bụrụ na unu egee ntị n’olu ya, 8 unu akpọchila obi unu otú nna nna unu hà mere mgbe ha kpasuru m ezigbo iwe, otú ha mere n’ụbọchị ha nwara m n’ala ịkpa,+ 9 bụ́ ebe nna nna unu hà nọ nwaa m ọnwụnwa, leekwa m ule n’agbanyeghị na ha hụrụ ihe ndị m mere ruo afọ iri anọ.+ 10 Ọ bụ ya mere ihe ọgbọ a ji wee m iwe. M wee sị: ‘Ha na-eme isi ike, na-eme naanị ihe dị ha n’obi, ha amatabeghịkwa m.’ 11 M wee jiri iwe ṅụọ iyi, sị: ‘Ha agaghị eso m zuo ike.’”+

12 Ụmụnna m, lezienụ anya ka onye ọ bụla n’ime unu ghara ịhapụ Chineke dị ndụ,+ nke ga-eme ka onye ahụ nwee ajọ obi na-enweghị okwukwe. 13 Ma, na-agbanụ ibe unu ume kwa ụbọchị ebe ọ bụ na anyị ka bi n’oge ahụ a kpọrọ “Taa,”+ ka onye ọ bụla n’ime unu wee ghara ikwe ka ike dị aghụghọ nke mmehie mee ka obi ya kpọchie. 14 N’ihi na, n’eziokwu, anyị ga-eketa ihe Kraịst ketara naanị ma anyị na-enwe obi ike anyị nwere ná mmalite ruo n’ọgwụgwụ.+ 15 Dị ka e kwuru, sị: “Taa, ọ bụrụ na unu egee ntị n’olu ya, unu akpọchila obi unu otú nna nna unu hà mere mgbe ha kpasuru m ezigbo iwe.”+

16 N’ihi na olee ndị nụrụ olu ya ma kpasuo ya oké iwe? Ọ̀ bụ na ọ bụghị ndị niile Mosis si n’Ijipt dupụta?+ 17 Oleekwa ndị nọ na-akpasu Chineke iwe ruo afọ iri anọ?+ Ọ̀ bụ na ọ bụghị ndị ahụ mere mmehie, ndị nwụrụ n’ala ikpa?+ 18 Oleekwa ndị ọ ṅụrụ iyi na ha agaghị eso ya zuo ike? Ọ̀ bụ na ọ bụghị ndị ahụ nupụrụ isi? 19 N’ihi ya, anyị ahụla na ha enweghị ike iso ya zuo ike maka na ha enweghị okwukwe.+

4 N’ihi ya, ebe ọ bụ na Chineke kwuru na anyị ka nwere ike iso ya zuo ike, ka anyị lezie anya* ka a ghara inwe onye ọ bụla n’ime anyị na-agaghị eru eru iso zuo ike ahụ.+ 2 N’ihi na e zikwara anyị ozi ọma+ otú e ziri ha. Ma okwu ha nụrụ abaraghị ha uru n’ihi na ha enweghị ụdị okwukwe ndị rubere isi nwere. 3 N’ihi na anyị ndị nwere okwukwe so na-ezu ike. Ma o kwuru banyere ndị nupụrụ isi, sị: “M wee jiri iwe ṅụọ iyi, sị, ‘Ha agaghị eso m zuo ike,’”+ n’agbanyeghị na ọ na-ezu ike kemgbe a tọrọ ntọala ụwa, mgbe ọ rụchara ọrụ ya.+ 4 N’ihi na e kwuru n’otu ebe n’Akwụkwọ Nsọ banyere ụbọchị nke asaa, sị: “Chineke zuru ike n’ụbọchị nke asaa mgbe ọ rụchara ọrụ ya niile.”+ 5 O kwukwara ọzọ, sị: “Ha agaghị eso m zuo ike.”+

6 Ndị e bu ụzọ zie ozi ọma ahụ esoghị ya zuo ike maka na ha nupụrụ isi.+ Ma, ụfọdụ ndị ka nwere ike iso ya zuo ike. 7 N’ihi ya, mgbe ogologo oge gachara, Chineke kwuru n’abụ ọma Devid otú e kwuburu ya, sị, “Taa, ọ bụrụ na unu egee ntị n’olu ya, unu akpọchila obi unu.”+ O si otú a wepụtaghachi ụbọchị a kpọrọ “Taa.” 8 N’ihi na ọ bụrụ na Joshụa+ du ha gaa n’ebe ha so Chineke zuo ike, Chineke agaraghị emecha kwuo banyere ụbọchị izu ike ọzọ. 9 N’ihi ya, a ka nwere ụbọchị izu ike dịịrị ndị Chineke.+ 10 N’ihi na onye so Chineke ezu ike ezuokwala ike n’ọrụ nke ya otú Chineke zuru n’ọrụ ya.+

11 N’ihi ya, ka anyị gbalịsie ike ka anyị soro ya zuo ike ahụ, ka e wee ghara inwe onye ga-enupụ isi otú ha nupụrụ.+ 12 N’ihi na okwu Chineke dị ndụ ma na-akpa ike.+ Ọ dịkwa nkọ karịa mma agha ọ bụla nwere ihu abụọ.+ Ọ na-amabadị n’ime ime wee kewaa mkpụrụ obi* na mmụọ,* na-ekewakwa nkwonkwo na ụmị ha. O nwekwara ike ịchọpụta ihe mmadụ na-eche na ihe mmadụ bu n’obi. 13 E nweghịkwa ihe e kere eke e zoro ezo n’anya ya,+ kama ihe niile gba ọtọ, gherekwa oghe n’anya onye ahụ anyị ga-aza ajụjụ.+

14 N’ihi ya, ebe anyị nwere nnukwu onye nchụàjà kachanụ nke banyere n’eluigwe, ya bụ, Jizọs Ọkpara Chineke,+ ka anyị na-ekwusa banyere okwukwe anyị nwere na ya.+ 15 N’ihi na nnukwu onye nchụàjà anyị nwere abụghị onye na-agaghị aghọtali* na anyị adịghị ike,+ kama a nwalere ya n’ụzọ niile otú e si anwale anyịnwa, ma o mehieghị.+ 16 N’ihi ya, ka anyị bịa nso n’ocheeze Chineke onye na-eme amara ma jiri obi ike na-ekpe ekpere,+ ka e wee meere anyị ebere, anyị enwetakwa amara ya n’oge kwesịrị ekwesị.

5 Mmadụ ọ bụla a họpụtara ka ọ bụrụ nnukwu onye nchụàjà, a họpụtara ya ka ọ na-ejere ndị mmadụ ozi n’ihe gbasara ofufe ha na-efe Chineke,+ ka o wee na-ewetara Chineke onyinye ha dị iche iche, na-achụkwa àjà maka mmehie ha.+ 2 Ọ na-emetere ndị na-eme mmehie ebere,* ya bụ, ndị na-eme mmehie maka na ha amaghị ihe ziri ezi, ebe ọ bụ na yanwa na-emekwa mmehie. 3 N’ihi ya, ọ na-achụ àjà maka mmehie nke ya otú ọ na-achụ maka mmehie ndị ọzọ.+

4 Mmadụ anaghị ahọpụta onwe ya ka ọ bụrụ nnukwu onye nchụàjà, kama ọ bụ Chineke na-ahọpụta mmadụ, otú ọ họpụtara Erọn.+ 5 Otú ahụ ka ọ dịkwa Kraịst. O toghị onwe ya+ ma jiri aka ya họpụta onwe ya ka ọ bụrụ nnukwu onye nchụàjà, kama ọ bụ Onye nyere ya otuto gwara ya, sị: “Ị bụ ọkpara m. Abụrụla m nna gị taa.”+ 6 Dịkwa ka o kwuru n’ebe ọzọ, sị: “Ị bụ onye nchụàjà dị ka Melkizedek, ị ga-abụkwa onye nchụàjà ruo mgbe ebighị ebi.”+

7 Mgbe Kraịst nọ n’ụwa, o kpesiri ekpere ike, besie ákwá ike ma jiri anya mmiri rịọ+ Onye nwere ike ịzọpụta ya n’ọnwụ arịrịọ. A nụkwara ekpere ya n’ihi na ọ na-atụ egwu Chineke. 8 N’agbanyeghị na ọ bụ ọkpara, o si n’ahụhụ ọ tara mụta irube isi.+ 9 Mgbe e mechara ka o zuo okè,+ ọ ghọrọ onye a ga-esi n’aka ya zọpụta ndị niile na-erubere ya isi. Ọ ga-azọpụta ha ruo mgbe ebighị ebi,+ 10 n’ihi na Chineke ahọpụtala ya ka ọ bụrụ nnukwu onye nchụàjà dị ka Melkizedek.+

11 Anyị nwere ọtụtụ ihe anyị ga-ekwu banyere Kraịst, ịkọwa ihe ndị ahụ sikwara ike n’ihi na unu aghọọla ndị ntị ike.* 12 N’eziokwu, unu ekwesịla ịbụ ndị na-akụziri ndị ọzọ ihe ugbu a, ma onye ọzọ ka ga-ebido n’isi kụziwere unu ihe ndị na-ataghị akpụ+ e dere n’okwu dị nsọ nke Chineke. Ọ bụzi mmiri ara ka a ga-enye unu, ọ bụghị nri siri ike. 13 N’ihi na onye nọgidere na-aṅụ mmiri ara amatabeghị okwu Chineke* n’ihi na ọ bụ nwatakịrị.+ 14 Ma nri siri ike bụ maka ndị tozuru etozu, ya bụ, ndị na-echebara ihe echiche nke ọma. Ha na-esi otú a azụ onwe ha* ka ha mata ihe dị iche n’ihe ọma na ihe ọjọọ.

6 N’ihi ya, ebe anyị mụtarala ihe ndị mbụ a kụziiri anyị+ banyere Kraịst, ka anyị jisie ike na-eme nke ọma ruo mgbe anyị tozuru etozu.+ Ka anyị ghara ịlaghachi azụ mụwa ihe ndị mbụ a kụziiri anyị,* ya bụ, ịmụ banyere isi n’ọrụ na-abaghị uru* chegharịa, inwe okwukwe na Chineke, 2 ụdị baptizim dị iche iche, ibikwasị mmadụ aka n’isi,+ ịkpọlite ndị nwụrụ anwụ n’ọnwụ,+ nakwa ihe Chineke kpebiri nke ga-adịru mgbe ebighị ebi. 3 Anyị ga-etozu etozu ma ọ bụrụ uche Chineke.

4 N’ihi na ndị e merela ka ha ghọta eziokwu,+ ndị detụrụ onyinye si n’eluigwe e nyere n’efu ire, ndị nwetarala mmụọ nsọ, 5 ndị detụrụ okwu Chineke nke dị ezigbo mma ire, detụkwa ihe ọma ndị ga-eme n’ọdịnihu ire,* 6 ma ha adapụ n’okwukwe,+ e nweghị ike ime ka ha chegharịa ọzọ n’ihi na ha na-akpọgide Ọkpara Chineke n’osisi ọzọ ma na-eme ka ihere mee ya n’ihu ọha.+ 7 Chineke na-eji mmiri na-ezo ugboro ugboro agọzi ala n’ihi na ala na-amịrị mmiri ozuzo ma puoro ndị kọrọ ihe na ya ihe ha kọrọ. 8 Ma, o puo ogwu na uke, e nweghịzi ihe a na-eji ya eme. Obere oge a ga-abụ ya ọnụ. E mechaakwa, a ga-esu ya ọkụ.

9 Ma unu ndị anyị hụrụ n’anya, obi siri anyị ike na unu ka ndị dapụrụ n’okwukwe mma, unu na-emekwa ihe ga-eme ka a zọpụta unu, n’agbanyeghị na anyị na-ekwu ihe a. 10 N’ihi na Chineke abụghị onye ajọ omume. Ọ gaghị echefu ọrụ unu na otú unu si gosi na unu ji aha ya kpọrọ ihe*+ n’ihi na unu jeere ndị nsọ ozi ma ka na-ejere ha ozi. 11 Ma anyị chọrọ ka onye ọ bụla n’ime unu na-arụsi ọrụ ike otú ahụ, ka obi wee sie unu ike ruo ọgwụgwụ+ na unu ga-enweta ihe unu na-atụ anya ya.+ 12 Anyị achọghị ka unu dịrị umengwụ,+ kama na-emenụ ka ndị ahụ, bụ́ ndị okwukwe ha na ndidi ha mere ka e kwe ha nkwa.

13 N’ihi na mgbe Chineke kwere Ebreham nkwa, o ji onwe ya ṅụọ iyi+ ebe ọ bụ na e nweghị onye ka yanwa. 14 Ọ sịrị: “N’eziokwu, m ga-agọzi gị. N’eziokwu, m ga-eme ka ị dị ọtụtụ.”+ 15 Ọ bụ mgbe Ebreham nwechara ndidi ka e kwere ya nkwa a. 16 Ndị mmadụ na-eji onye ka ha aṅụ iyi, iyi ha na-aṅụ na-emekwa ka esemokwu bie n’ihi na ọ na-egosi na ihe ha kwuru bụ eziokwu.+ 17 Chineke mekwara ihe yiri ya. Mgbe o kpebiri ime ka o dokwuo ndị ga-eso nweta ihe ahụ e kwere ná nkwa+ anya na nzube ya* anaghị agbanwe agbanwe, ọ ṅụrụ iyi wee gosi na ihe o kwuru bụ eziokwu. 18 Ihe abụọ a Chineke mere* anaghị agbanwe agbanwe, Chineke emekataghịkwa ghaa ụgha.+ Ihe ndị a na-eme ka obi sie anyịnwa ndị gbabara n’ime ya ike, ka anyị wee ghara ịkwụsị inwe olileanya anyị nwere. 19 Olileanya a anyị nwere+ ji ndụ* anyị otú nko e ji ejide ụgbọ mmiri* si ejide ụgbọ mmiri. O siri ike, e jikwa ya n’aka. Ọ na-edu anyị agafe ákwà mgbochi ahụ,+ 20 nke onye bu anyị ụzọ gaferela n’ihi anyị, ya bụ, Jizọs,+ onye ghọrọ nnukwu onye nchụàjà dị ka Melkizedek, ọ ga-abụkwa onye nchụàjà ruo mgbe ebighị ebi.+

7 N’ihi na Melkizedek a, eze Selem, onye bụ́kwa onye nchụàjà Chineke Onye Kacha Elu, zutere Ebreham mgbe Ebreham gbuchara ndị eze lọtawa, o wee gọzie Ebreham.+ 2 Ebreham nyere ya otu ụzọ n’ụzọ iri n’ihe niile ọ kwatara n’agha. Aha nwoke a pụtara “Eze Ezi Omume.” Ọ bụkwa eze Selem, ya bụ, “Eze Udo.” 3 A maghị onye bụ́ nna ya na onye bụ́ nne ya nakwa agbụrụ o si. A maghịkwa mgbe a mụrụ ya na mgbe ọ nwụrụ. Ma, ebe e mere ka ọ dị ka Ọkpara Chineke, ọ bụ onye nchụàjà mgbe niile.+

4 Nwoke a, onye Ebreham onyeisi ezinụlọ anyị* nyere otu ụzọ n’ụzọ iri n’ihe ndị kacha mma ọ kwatara n’agha, bụ nnukwu mmadụ.+ 5 N’eziokwu, Iwu* kwuru na ụmụ Livaị+ ndị ga-abụ ndị nchụàjà ga na-anata ndị ọzọ,+ ya bụ, ụmụnne ha, otu ụzọ n’ụzọ iri, n’agbanyeghị na ụmụnne ha bụ ụmụ Ebreham.* 6 Ma nwoke a, onye na-esighị n’ezinụlọ Livaị, natara Ebreham otu ụzọ n’ụzọ iri ma gọzie Ebreham, onye Chineke kwere nkwa.+ 7 O doro anya na ọ bụ onye ukwu na-agọzi onye nta. 8 Ụmụ Livaị ndị na-anata otu ụzọ n’ụzọ iri na-anwụ anwụ, ma a gbara àmà na nwoke a na-adị ndụ.+ 9 E nwedịrị ike ikwu na Livaị, onye na-anata otu ụzọ n’ụzọ iri, si n’aka Ebreham kwụọ otu ụzọ n’ụzọ iri, 10 n’ihi na nna nna ya Ebreham amụbeghị ya* mgbe Melkizedek zutere Ebreham.+

11 Ọ bụrụ na ọrụ nchụàjà ndị Livaị na-arụ ga-emeli ka mmadụ zuo okè+ (n’ihi na ọrụ a so n’Iwu ahụ* e nyere ha), ọ̀ ka ga-adị mkpa ka e nwee onye nchụàjà ọzọ, onye e kwuru na ọ dị ka Melkizedek,+ ọ bụghị ka Erọn? 12 Ebe ọ bụ na a na-agbanwe ndị nchụàjà, e kwesịkwara ịgbanwe Iwu ahụ.*+ 13 N’ihi na nwoke a na-ekwu ihe ndị a gbasara ya si n’ebo ọzọ, nke a na-enwebeghị onye si na ya rụrụla ọrụ n’ebe ịchụàjà.+ 14 O doro anya na Onyenwe anyị si n’ebo Juda,+ ma e nweghị mgbe Mosis kwuru na ndị nchụàjà ga-esi n’ebo ahụ.

15 Ihe a edokwuola anyị anya ugbu a ebe ọ bụ na e nweela onye nchụàjà ọzọ,+ onye dị ka Melkizedek,+ 16 onye ghọrọ onye nchụàjà, ọ bụghị n’ihi ebo o si otú iwu kwuru, kama n’ihi na o nwere ike nke na-enye ya ndụ a na-enweghị ike ibibi ebibi.+ 17 N’ihi na a gbara àmà banyere ya, sị: “Ị bụ onye nchụàjà dị ka Melkizedek, ị ga-abụkwa onye nchụàjà ruo mgbe ebighị ebi.”+

18 N’ihi ya, a kagburu iwu mbụ ahụ maka na ọ rụzuchaghị ihe a chọrọ ka ọ rụọ, ọ bakwaghị oké uru.+ 19 N’ihi na Iwu ahụ* emeghị ka ihe ọ bụla zuo okè,+ ma olileanya ka mma+ anyị nwere ugbu a mere ka ihe zuo okè. Anyị sikwa na ya na-abịaru Chineke nso.+ 20 Ebe ọ bụ na Chineke ṅụrụ iyi mgbe ọ họpụtara Jizọs ka ọ bụrụ onye nchụàjà 21 (n’ihi na e nwere ndị nchụàjà Chineke na-aṅụghị iyi tupu e mee ha ndị nchụàjà, ma tupu onye a abụrụ onye nchụàjà, Chineke ṅụrụ iyi banyere ya, sị: “Jehova* aṅụọla iyi, ọ gaghịkwa agbanwe obi ya,* ‘Ị bụ onye nchụàjà ruo mgbe ebighị ebi’”),+ 22 Jizọs bụzi onye a ga-esi n’aka ya mee ka ọgbụgba ndụ ka mma nwee isi.+ 23 Ọtụtụ ndị ghọkwara ndị nchụàjà, onye pụọ ibe ya anọchie,+ maka na ọnwụ ekweghị ka ha nọgide na-arụ ọrụ ha. 24 Ma, ebe ọ bụ na ọ na-adị ndụ ruo mgbe ebighị ebi,+ e nweghị onye ga-anọchi ya n’ọrụ nchụàjà ọ na-arụ. 25 N’ihi ya, ọ ga-azọpụtali ndị si n’aka ya na-abịakwute Chineke, ebe ọ bụ na ọ na-adị ndụ mgbe niile ịrịọrọ ha arịrịọ.+

26 N’ihi na ọ bụ ụdị nnukwu onye nchụàjà a ka anyị kwesịrị inwe, onye jisiri Chineke aka ike, onye aka ya dị ọcha, onye a na-emerụghị emerụ,+ onye dị iche ná ndị mmehie, onye e mekwara ka ọ dị elu karịa eluigwe.+ 27 Ọ dịghị ka nnukwu ndị nchụàjà ahụ, ndị na-achụ àjà kwa ụbọchị,+ ha buru ụzọ chụọ maka mmehie nke ha, ha achụzie maka mmehie ndị ọzọ.+ Ọ chụrụ àjà a naanị otu ugboro mgbe o nyefere onwe ya.+ 28 N’ihi na ndị Iwu ahụ* na-ahọpụta ka ha bụrụ nnukwu ndị nchụàjà bụ ndị na-eme mmehie,+ ma iyi a ṅụrụ+ mgbe e nwechara Iwu ahụ* họpụtara otu Ọkpara, onye e mere ka o zuo okè+ ruo mgbe ebighị ebi.

8 Isi ihe anyị na-ekwu bụ na anyị nwere ụdị nnukwu onye nchụàjà a.+ Ọ nọdụkwala ala n’aka nri ocheeze Onye Ukwu ahụ n’eluigwe.+ 2 Ọ na-eje ozi* n’ebe nsọ*+ nakwa n’ezigbo ụlọikwuu nke Jehova* rụrụ, ọ bụghị mmadụ. 3 N’ihi na a na-ahọpụta nnukwu onye nchụàjà ọ bụla ka ọ na-enye Chineke onyinye dị iche iche e wetaara ya nakwa ka ọ na-achụrụ Chineke àjà. Ọ bụ ya mere onye a ji kwesịkwa inwe ihe ọ ga-achụ n’àjà.+ 4 A sị na ọ nọ n’ụwa, ọ garaghị abụ onye nchụàjà,+ ebe ọ bụ na e nweela ndị nchụàjà ndị na-enye Chineke onyinye dị iche iche e wetaara ya otú Iwu* kwuru. 5 Ozi dị nsọ ha na-eje bụ ihe atụ, ọ nọchikwara anya+ ihe ndị dị n’eluigwe.+ Ihe gosiri nke a bụ ihe Chineke nyere Mosis n’iwu mgbe ọ chọrọ ịrụ ụlọikwuu ahụ. Chineke sịrị ya: “Hụ na ị rụrụ ihe niile ka ha dị ka ihe ndị e gosiri gị n’ugwu.”+ 6 Ma ugbu a, e nyela Jizọs ozi ka nnọọ mma* n’ihi na ọ bụkwa onye ogbugbo+ nke ọgbụgba ndụ ka mma.+ Iwu Chineke kwadoro ọgbụgba ndụ a, o hiwekwara isi ná nkwa ndị ka mma.+

7 A sị na e nweghị ihe dị njọ n’ọgbụgba ndụ nke mbụ, a garaghị ekwuwe okwu ọgbụgba ndụ nke abụọ.+ 8 N’ihi na ọ hụrụ na ndị Izrel na-eme ihe na-adịghị mma. Ọ bụ ya mere o ji sị: “Jehova* kwuru, sị, ‘Oge na-abịa mgbe mụ na ndị Izrel na ndị Juda ga-agba ọgbụgba ndụ ọhụrụ. 9 Ọ gaghị adị ka ọgbụgba ndụ ahụ mụ na ndị nna nna ha gbara n’ụbọchị m seere ha n’aka si n’Ijipt kpọpụta ha+ n’ihi na ha hapụrụ ọgbụgba ndụ m, m wee kwụsị ilekọta ha.’ Ọ bụ ihe Jehova* kwuru.

10 “Jehova* kwukwara, sị: ‘Ọgbụgba ndụ mụ na ndị Izrel ga-agba mgbe oge ahụ gachara bụ na m ga-etinye iwu m n’uche ha, m ga-edekwa ya n’obi ha.+ M ga-abụ Chineke ha, ha ga-abụkwa ndị m.’+

11 “‘A gaghịzi enwe onye ga-akụziri nwa amaala ibe ya na nwanne ya, sị: “Mara Jehova.”* N’ihi na ha niile ga-ama m, malite n’onye kacha nta n’ime ha ruo n’onye kacha ukwuu. 12 N’ihi na m ga-agbaghara ha ajọ omume ha, agaghịzi m echeta mmehie ha.’”+

13 Mgbe ọ sịrị “ọgbụgba ndụ ọhụrụ,” o meela ka nke mbụ bụrụ nke ochie.+ Ọ fọrọ obere ka ihe ahụ mere ochie, nke oge ya na-agafekwa, gharazie ịdị.+

9 N’ọgbụgba ndụ nke mbụ ahụ, e nwere iwu na-achị ozi dị nsọ a na-eje,+ ụlọikwuu* ya dịkwa n’ụwa. 2 A rụrụ ụlọikwuu a ka o nwee nkebi abụọ. Ihe ndị dị ná nkebi nke mbụ bụ ihe e ji adọsa ọkụ,*+ tebụl, na achịcha a na-enye Chineke.+ A na-akpọ nkebi a Ebe Nsọ.+ 3 Ma, nkebi nke abụọ nke ụlọikwuu a dị n’azụ ákwà mgbochi nke abụọ.+ A na-akpọ ya Ebe Kacha Nsọ.+ 4 Ihe dị ná nkebi a bụ ihe e ji ọlaedo mee e ji etinye insens*+ nakwa igbe ọgbụgba ndụ+ nke e ji ọlaedo machie ahụ́ ya niile.+ Ihe ndị dị n’ime igbe ọgbụgba ndụ ahụ bụ ite ọlaedo nke mana dị n’ime ya,+ mkpanaka Erọn nke wara okooko,+ na mbadamba nkume abụọ+ e dere ihe Chineke na ndị Izrel gbara ná ndụ. 5 N’elu igbe ahụ, e nwere ndị cherob dị ebube, ndị ji nku ha sachie okwuchi igbe ahụ.*+ Ma ihe a abụghị oge a ga-ekwucha ihe niile gbasara ihe ndị a.

6 Mgbe a rụchara ihe ndị a otú a, ndị nchụàjà na-abanye ná nkebi nke mbụ n’ụlọikwuu a mgbe niile na-eje ozi dị nsọ.+ 7 Ma, ọ bụ naanị nnukwu onye nchụàjà na-abanye ná nkebi nke abụọ. Ọ na-abanye na ya otu ugboro n’afọ.+ O mekataghị banye ma ọ bụrụ na o jighị ọbara+ o ji achụ àjà maka mmehie ya+ nakwa maka mmehie ndị Izrel+ mere n’amaghị ụma. 8 Mmụọ nsọ si otú a mee ka o doo anya na e mebeghị ka a mata ụzọ e si abanye n’ebe nsọ mgbe ụlọikwuu nke mbụ ka dị.+ 9 Ụlọikwuu a bụ ihe atụ maka oge a.+ A ka na-enyekwa onyinye ma na-achụ àjà otú e kwuru ka a na-eme.+ Ma, ihe ndị a anaghị emeli ka akọnuche onye na-eje ozi dị nsọ zuo okè.+ 10 E nweghị ihe ọzọ dị n’onyinye na àjà ndị ahụ ma ọ́ bụghị naanị okwu gbasara ihe oriri na mmanya na ụzọ dị iche iche e si eme ka ihe dị ọcha.*+ Ha bụ iwu e nyere gbasara ahụ́.+ A chọkwara ka a na-edebe ha ruo oge a ga-eme ka ihe ka mma.

11 Ma, mgbe Kraịst bịara ka nnukwu onye nchụàjà, o wetara ihe ọma ndị dị ugbu a. Ọ banyekwara n’ụlọikwuu ka ukwuu a na-ejighị aka rụọ, nke kakwa zuo okè, ya bụ, nke na-adịghị n’ụwa a. 12 O jighị ọbara ewu na nke oké ehi banye, kama o ji ọbara nke ya banye n’ebe nsọ ahụ.+ Ọ banyere naanị otu ugboro ma napụta* anyị. Nnapụta a na-adịru ebighị ebi.+ 13 N’ihi na ọ bụrụ na ọbara ewu na nke oké ehi+ na ntụ ehi e fesara ndị na-adịghị ọcha na-edo ha nsọ ma mee ka ahụ́ ha dị ọcha,+ 14 o doro anya na ọbara Kraịst ga-eme ihe karịrị ihe ọbara ndị ahụ mere.+ Mmụọ ebighị ebi duziri ya, ya enyefee Chineke onwe ya ka àjà a na-emerụghị emerụ. Ọbara ya na-asachapụ ọrụ dị iche iche na-abaghị uru* n’akọnuche anyị+ ka anyị wee na-ejere Chineke dị ndụ ozi dị nsọ.+

15 Ọ bụ ya mere o ji bụrụ onye ogbugbo nke ọgbụgba ndụ ọhụrụ,+ ka e wee kwe ndị a kpọrọ nkwa na ha ga-enweta ngọzi* na-adịru mgbe ebighị ebi.+ Ihe niile a nwere isi n’ihi ọnwụ ya nke e si na ya gbapụta ha+ ma tọhapụ ha ná mmehie ndị ha na-eme n’ọgbụgba ndụ mbụ ahụ. 16 N’ihi na ọ bụrụ na mmadụ na Chineke agbaa ndụ, mmadụ ahụ ga-anwụrịrị ka ọgbụgba ndụ ahụ nwee isi. 17 N’ihi na ọ bụ ọnwụ na-eme ka ọgbụgba ndụ nwee isi. Ọ naghị enwe isi ma ọ bụrụ na onye kwesịrị ịnwụ ka nọ ndụ.* 18 N’ihi ya, ọ bụkwa ọbara ka e ji mee ka ọgbụgba ndụ mbụ ahụ nwee isi. 19 N’ihi na mgbe Mosis gwachara ndị Izrel niile ihe niile e kwuru n’Iwu ahụ, o weere ọbara oké ehi na nke ewu, gwakọta ha na mmiri, jirizie owu na-acha uhie uhie e kere n’okporo osisi hisop fesa ọbara ahụ n’akwụkwọ* ọgbụgba ndụ, fesakwa ya ndị Izrel niile, 20 wee sị: “Ihe a bụ ọbara nke na-eme ka ọgbụgba ndụ unu na Chineke nwee isi. Ọ chọrọ ka unu debe ọgbụgba ndụ a.”+ 21 O fesakwara ọbara ahụ+ n’ụlọikwuu na n’arịa niile e ji eje ozi dị nsọ.* 22 Dị ka Iwu ahụ* kwuru, ọ fọrọ obere ka ọ bụrụ na e ji ọbara eme ka ihe niile dị ọcha.+ A naghị agbaghara mmehie ma ọ bụrụ na a wụpụghị ọbara.+

23 N’ihi ya, o kwesịrị ekwesị na e si otú a mee ka ihe ndị nọchiri anya+ ihe ndị dị n’eluigwe dị ọcha.+ Ma, ọ bụ àjà ka mma ka e ji mee ka ihe ndị dị n’eluigwe dị ọcha. 24 N’ihi na Kraịst abanyeghị n’ebe nsọ e ji aka rụọ,+ nke bụ́ ihe atụ nke ezigbo ebe nsọ,+ kama ọ banyere n’eluigwe,+ nke mere o ji pụta ugbu a n’ihu Chineke maka anyị.+ 25 Ọ bụghị ka ọ na-achụ onwe ya n’àjà ugboro ugboro otú nnukwu onye nchụàjà si eji ọbara na-abụghị nke ya abanye n’ebe nsọ kwa afọ.+ 26 Ma ọ́ bụghị ya, ọ ga na-ata ahụhụ mgbe mgbe malite mgbe a tọrọ ntọala ụwa. Ma ugbu a, ọ pụtara naanị otu ugboro n’ọgwụgwụ oge a* ka o si n’àjà o ji onwe ya chụọ wepụ mmehie.+ 27 Otú ahụ ọ bụ na ihe na-echere ụmụ mmadụ bụ ịnwụ naanị otu ugboro, e mechaa, e kpee ha ikpe, 28 ọ bụkwa otú ahụ ka a chụrụ Kraịst n’àjà naanị otu ugboro ka o buru mmehie ọtụtụ ndị.+ Mgbe ọ ga-apụta nke ugboro abụọ, ọ gaghị abụ ka o wepụ mmehie, ndị na-achọsi ya ike ka a zọpụta ha ga-ahụkwa ya.+

10 Iwu ahụ* nọchiri anya+ ihe ọma ndị na-abịa abịa,+ ma ọ bụghị ya bụ ihe ọma ndị ahụ. N’ihi ya, o nweghị* ike iji àjà ndị a na-achụ mgbe niile kwa afọ mee ka ndị na-abịakwute Chineke zuo okè.+ 2 A sị na o nwere ike ime ka ha zuo okè, ọ̀ bụ na a garaghị akwụsị ịchụ àjà ndị ahụ maka na obi agaghịzi na-ama ndị na-efe Chineke ikpe ma e mehaala ka ha dị ọcha otu ugboro? 3 Ma àjà ndị ahụ na-echetara ndị mmadụ kwa afọ+ na ha bụ ndị mmehie, 4 n’ihi na ọbara oké ehi na ọbara ewu enweghị ike iwepụ mmehie.

5 N’ihi ya, mgbe ọ bịara n’ụwa, ọ sịrị: “‘Ihe ị chọrọ abụghị àjà na onyinye, kama ị kwadebeere m ahụ́. 6 I nweghị mmasị n’àjà a na-esucha ọkụ nakwa n’àjà mmehie.’+ 7 M wee sị: ‘Lee, abịala m ime uche gị, Chineke+ (e dere banyere m n’akwụkwọ mpịakọta).’” 8 Mgbe o kwuchara, sị: “Ihe ị chọrọ abụghị àjà na onyinye, i nweghịkwa mmasị n’àjà a na-esucha ọkụ nakwa n’àjà mmehie,” ya bụ, àjà ndị Iwu* kwuru ka a na-achụ, 9 o kwuziri, sị: “Lee, abịala m ime uche gị.”+ O wepụrụ ihe nke mbụ ka o wee webata nke abụọ. 10 Ọ bụ “uche”+ Chineke a mere e ji jiri àjà e ji ahụ́ Jizọs Kraịst chụọ naanị otu ugboro mee ka anyị dị nsọ.+

11 Onye nchụàjà ọ bụla na-eguzo kwa ụbọchị na-eje ozi dị nsọ*+ ma na-achụ otu ụdị àjà ugboro ugboro,+ bụ́ àjà ndị na-enweghị ike iwepụcha mmehie.+ 12 Ma nwoke a chụrụ otu àjà maka mmehie, bụ́ àjà ga-adịru mgbe niile, nọrọzie ala n’aka nri Chineke.+ 13 Malite mgbe ahụ gawa, ọ nọ na-eche ruo mgbe a ga-eme ka ndị iro ya bụrụ ihe o ji agbakwasị ụkwụ.+ 14 N’ihi na ọ bụ otu àjà ọ chụrụ ka o ji mee ka ndị a na-edo nsọ zuo okè+ mgbe niile. 15 Mmụọ nsọ na-agbakwara anyị àmà na ọ bụ eziokwu, n’ihi na mgbe o kwuchara, sị: 16 “‘Ihe a bụ ọgbụgba ndụ mụ na ha ga-agba mgbe oge ahụ gachara,’ ka Jehova* kwuru. ‘M ga-etinye iwu m n’uche ha, m ga-edekwa ya n’obi ha,’”+ 17 o kwuziri, sị: “Agaghịzi m echeta mmehie ha na omume ọjọọ ha.”+ 18 Ebe ọ bụ na a gbagharala ha mmehie ha, e nweghịzi àjà a ga-achụ maka mmehie.

19 Ụmụnna m, ebe ọ bụ na ọbara Jizọs na-eme ka obi sie anyị ike isi n’ụzọ e si abanye n’ebe nsọ*+ ahụ na-abanye, 20 bụ́ ụzọ ọhụrụ o megheere anyị nke na-eduba ná ndụ, nke e si n’ákwà mgbochi ahụ abanye,+ ya bụ, ahụ́ ya, 21 ebe ọ bụkwa na anyị nwere onye nchụàjà ukwu na-elekọta ụlọ Chineke,+ 22 ka anyị jiri ezi obi na-abịa Chineke nso ma nwee okwukwe siri ezigbo ike, ebe ọ bụ na e meela ka obi anyị dị ọcha ka anyị ghara inwe akọnuche ọjọọ,+ e jirikwa mmiri dị ọcha sachaa ahụ́ anyị.+ 23 Ka anyị nọgidesie ike na-ekwupụta olileanya anyị n’ihu ọha n’amaghị jijiji,+ n’ihi na onye kwere anyị nkwa kwesịrị ka a tụkwasị ya obi. 24 Ka anyị na-echebakwara ibe anyị echiche n’ihi na ọ ga-eme ka anyị na-ahụrịta ibe anyị n’anya ma na-arụ ezigbo ọrụ.+ 25 Ka anyị ghara ịhapụ nzukọ anyị+ otú ụfọdụ ndị na-emekarị, kama ka anyị na-agbarịta ibe anyị ume+ ma na-emekwu ihe ndị a ebe anyị na-ahụ ụbọchị ahụ ka ọ na-eru nso.+

26 N’ihi na ọ bụrụ na anyị akpachara anya na-eme mmehie mgbe anyị matachara eziokwu nke ọma,+ e nweghịzi àjà ọ bụla fọrọ a ga-achụ maka mmehie anyị,+ 27 kama ihe ga-echere anyị bụ ikpe dị egwu na iwe Chineke na-enwu ka ọkụ nke ga-erepịa ndị na-emegide ya.+ 28 Onye ọ bụla dara Iwu Mosis, a na-egbu ya n’emetereghị ya ebere* ma mmadụ abụọ ma ọ bụ atọ gbaa akaebe na o mere otú ahụ.+ 29 Ọ̀ bụ na unu echeghị na ahụhụ a ga-ata onye zọrọ Ọkpara Chineke ụkwụ ga-aka njọ, bụ́ onye na-ejighị ọbara ọgbụgba ndụ+ e ji doo ya nsọ kpọrọ ihe, onye ledakwara mmụọ nke amara Chineke anya ma mejọọ ya?+ 30 N’ihi na anyị ma Onye kwuru, sị: “Ọ bụ m ga-abọ ọbọ. M ga-akwụ ụgwọ.” E dekwara, sị: “Jehova* ga-ekpe ndị ya ikpe.”+ 31 Mmadụ daba n’aka Chineke dị ndụ, nke ya agwụla.

32 Ma, na-echetanụ ụbọchị ndị gara aga, bụ́ mgbe e mechara ka unu hụ ìhè.+ N’oge ahụ, unu tachiri obi mgbe unu nọ na-atagbu onwe unu n’ahụhụ. 33 N’oge ụfọdụ, a kparịrị unu n’ihu ọha* ma kpagbuo unu. N’oge ụfọdụkwa, unu so ndị e mere ụdị ihe ndị a taa ahụhụ.* 34 N’ihi na unu meteere ndị nọ n’ụlọ mkpọrọ ebere, unu akwụsịghịkwa inwe ọṅụ mgbe e bukọọrọ ihe unu,+ ebe unu ma na unu nwere ihe ka mma, nke na-adịgide adịgide.+

35 N’ihi ya, unu akwụsịla inwe obi ike,* ebe ọ bụ na unu ga-enweta ụgwọ ọrụ dị ukwuu.+ 36 N’ihi na unu kwesịrị ịtachi obi,+ ka unu wee nweta ihe Chineke kwere ná nkwa mgbe unu mechara uche ya. 37 N’ihi na ọ ka fọrọ “obere oge,”+ ‘onye ahụ nke na-abịa ga-abịarute, ọ gaghịkwa egbu oge.’+ 38 “Ma onye nke m nke na-eme ezi omume ga-adị ndụ maka na o nwere okwukwe,”+ ‘ọ bụrụkwa na o si n’ebe m nọ laa azụ, ihe ya agaghị amasị m.’*+ 39 Ma anyị abụghị ụdị ndị na-ala azụ ka e wee bibie anyị,+ kama anyị bụ ndị nwere okwukwe ka e wee chebe ndụ* anyị.

11 Okwukwe bụ ezigbo obi ike e nwere na ihe ndị a na-ele anya ha ga-emezu.+ Ọ bụ ihe àmà doro anya na ihe ndị a na-anaghị ahụ anya dị adị n’eziokwu. 2 Ọ bụ ụdị okwukwe a ndị oge ochie* nwere mere e ji gbaara ha àmà.*

3 Ọ bụ okwukwe mere anyị ji aghọta na ọ bụ okwu Chineke ka e ji kee ihe ndị dị n’eluigwe na n’ụwa.* Chineke si otú ahụ si n’ihe ndị anyị na-anaghị ahụ anya mee ihe ndị anyị na-ahụ anya.

4 Ọ bụ okwukwe ka Ebel ji chụọrọ Chineke àjà ka nke Ken mma.+ Ọ bụkwa okwukwe ahụ mere e ji gbaara ya àmà na ọ bụ onye ezi omume n’ihi na Chineke nabatara onyinye ya.+ Ọ bụ eziokwu na ọ nwụrụ, ọ ka si n’okwukwe ya na-ekwu okwu.+

5 Ọ bụ okwukwe Ịnọk+ mere e ji wepụ ya ka ọ ghara ịnwụ otú ndị ọzọ si anwụ, e nweghịkwa ebe a hụrụ ya n’ihi na Chineke wepụrụ ya.+ N’ihi na tupu e wepụ ya, a gbaara ya àmà na o mere ihe dị Chineke ezigbo mma. 6 Ọ bụrụkwa na mmadụ enweghị okwukwe, ọ gaghị emeli ihe dị Chineke ezigbo mma, n’ihi na onye ọ bụla na-abịakwute Chineke ga-ekwetarịrị na ọ dị adị nakwa na ọ na-akwụ ndị na-achọsi ya ike ụgwọ ọrụ.+

7 Ọ bụ okwukwe mere Noa+ ji tụọ egwu Chineke ma rụọ ụgbọ+ a ga-eji zọpụta ezinụlọ ya mgbe Chineke dọchara ya aka ná ntị banyere ihe ndị a na-ahụbeghị anya.+ Ọ bụkwa okwukwe a ka o ji gosi na ikpe mara ụwa,+ e wee kpọọ ya onye ezi omume n’ihi okwukwe ya.

8 Ọ bụ okwukwe mere Ebreham+ ji rube isi mgbe a kpọrọ ya, o wee gaa n’ebe Chineke kwere nkwa na ọ ga-enye ya. Ọ gawara, n’agbanyeghị na ọ maghị ebe ọ na-aga.+ 9 Ọ bụ okwukwe mere o ji gaa bụrụ onye mbịarambịa n’ala nkwa ahụ,+ birikwa n’ụlọikwuu,+ ya na Aịzik na Jekọb, ndị e kwere ha na ya otu nkwa ahụ.+ 10 N’ihi na ọ nọ na-echere obodo nwere ezigbo ntọala, nke Chineke sere otú ọ ga-adị, rụọkwa.+

11 Ọ bụkwa okwukwe mere ka Sera nwee ike ịdị ime* mgbe ọ gaferela oge ịmụ nwa,+ n’ihi na o kwetara na e kwesịrị ịtụkwasị Onye kwere nkwa ahụ obi. 12 Ọ bụ ya mere e ji si n’otu nwoke, onye e weere ahụ́ ya ka nke nwụrụla anwụ,+ mụta ụmụ dị ọtụtụ+ ka kpakpando dị n’eluigwe, ndị a na-enweghịkwa ike ịgụta ọnụ ka ájá dị n’akụkụ oké osimiri.+

13 Ndị a niile nwere okwukwe ruo mgbe ha nwụrụ, n’agbanyeghị na nkwa ndị ahụ emezughị n’oge ha.+ Ma, ọ dị ha ka à ga-asị na ha ahụla ka nkwa ndị ahụ mezuru+ ma nabata ha. Ha kwusakwara n’ihu ọha na ha bụ ndị mbịarambịa na ndị bịara ịnọ obere oge n’ala ha bi. 14 N’ihi na ndị na-ekwu ihe ndị a na-egosi na ha na-achọsi ebe ga-abụ nke ha ike. 15 Ma, a sị na ha nọ na-echeta ebe ha hapụrụ,+ ha gaara achọta ihe ga-eme ka ha laghachi. 16 Ma, ha na-achọ ka ha nweta ebe ka mma, ya bụ, nke eluigwe. N’ihi ya, ihere anaghị eme Chineke na ha na-arịọ ya ka o nyere ha aka ebe ọ bụ Chineke ha*+ n’ihi na ọ kwadeberela ha otu obodo.+

17 Ọ bụ okwukwe Ebreham mere o ji fọ obere ka ọ chụọ Aịzik n’àjà mgbe a nwalere ya.+ Nwoke a, onye ji obi ụtọ nabata nkwa ndị e kwere ya, chọrọ iji ọkpara ọ mụrụ naanị ya chụọ àjà,+ 18 n’agbanyeghị na Chineke gwara ya, sị: “Ọ bụ Aịzik ga-amụta ndị a ga-akpọ ụmụ* gị.”+ 19 Ma o kwetara na Chineke ga-akpọliteli nwa ya n’ọnwụ, o nwetaghachikwara nwa ya. Ihe a merenụ bụ ihe atụ.+

20 Ọ bụ okwukwe mere ka Aịzik gọzie Jekọb+ na Ịsọ+ ma gwa ha ihe ndị ga-emecha mee.

21 Mgbe ọ fọrọ obere ka Jekọb nwụọ,+ ọ bụ okwukwe mere ka ọ gọzie ụmụ nwoke abụọ Josef mụrụ+ ma dabere n’isi mkpara ya kpọọrọ Chineke isi ala.*+

22 Mgbe ọ fọrọ obere ka Josef nwụọ, ọ bụ okwukwe mere ka o kwuo na ndị Izrel ga-esi n’Ijipt pụọ. O nyekwara iwu ka a chịrị ọkpụkpụ ya pụọ n’ebe ahụ.*+

23 Ọ bụ okwukwe mere ndị mụrụ Mosis ji zoo ya ruo ọnwa atọ a mụchara ya,+ n’ihi na ha hụrụ na nwatakịrị ahụ mara mma,+ ha atụghịkwa iwu eze nyere egwu.+ 24 Mgbe Mosis toro,+ ọ bụ okwukwe mere na o kweghị ka a kpọọ ya nwa ada Fero.+ 25 Ọ họọrọ ka e megbuo ya na ndị Chineke kama ime mmehie nke ga-emetụ ya obi ụtọ obere oge, 26 n’ihi na o weere mkparị a kparịrị ya dị ka Onye E Tere Mmanụ* ka akụ̀ karịrị akụ̀ niile dị n’Ijipt maka na ọ nọ na-atụsi anya ụgwọ ọrụ a ga-akwụ ya ike. 27 Ọ bụ okwukwe mere ka ọ hapụ Ijipt,+ ọ bụghị na ọ na-atụ ụjọ na eze na-ewe iwe,+ n’ihi na ọ nọ na-atachi obi ka à ga-asị na ọ na-ahụ Onye a na-anaghị ahụ anya.+ 28 Ọ bụ okwukwe mere o ji mee Ememme Ngabiga, fesakwa ọbara n’awara ụzọ, ka onye mbibi ghara igbu ụmụ ha e bu ụzọ mụọ.+

29 Ọ bụ okwukwe mere ha ji si n’Oké Osimiri Uhie gafere ka à ga-asị na ọ bụ ala nkịtị.+ Ma mgbe ndị Ijipt nwara isi n’osimiri ahụ gafere, mmiri riri ha.+

30 Ọ bụ okwukwe ndị Izrel mere ka mgbidi Jeriko daa mgbe ha gbachara ya gburugburu ụbọchị asaa.+ 31 Ọ bụ okwukwe mere ka Rehab, bụ́ nwaanyị akwụna, ghara iso ndị nupụụrụ Chineke isi nwụọ, n’ihi na o ji obiọma nabata ndị bịara inyopụta otú obodo ahụ dị.+

32 Gịnị ọzọ ka m ga-ekwu? N’ihi na oge ga-agwụnahụ m ma m kọwa banyere Gidiọn,+ Berak,+ Samsịn,+ Jefta,+ Devid,+ na Samuel+ na ndị amụma ndị ọzọ. 33 Ọ bụ okwukwe ha mere ka ha merie alaeze dị iche iche,+ mee ka ndị mmadụ mewe ezi omume, mee ka e kwee ha nkwa dị iche iche,+ meekwa ka e mechie ọnụ ọdụm.+ 34 Okwukwe ha mekwara ka ọkụ ghara ime ha ihe ọ bụla,+ mee ka ha gbalaga ka a ghara iji mma agha gbuo ha,+ mee ka ha dị ike mgbe ha na-adịghị ike,+ mee ka ha bụrụ ndị dike n’agha,+ mee ka ha chụlaa ndị bịara ịlụso ha agha.+ 35 A kpọliteere ụmụ nwaanyị ndị nwụnahụrụ ha,+ ma e mekpọrọ ụfọdụ ọnụ maka na ha ekweghị eme ihe na-adịghị mma ka e wee hapụ ha, ka ha wee nweta mbilite n’ọnwụ ka mma. 36 A nwakwara ndị ọzọ mgbe e ji ha mee ihe ọchị ma pịa ha ihe. N’eziokwu, e mere ha nke ka njọ. E kere ha agbụ,+ tụọkwa ha mkpọrọ.+ 37 A tụrụ ha nkume,+ a nwara ha ọnwụnwa, a kwọbiri ha abụọ, e ji mma agha gbuo ha,+ ha na-eyi akpụkpọ atụrụ na akpụkpọ ewu.+ E nwere mgbe ha nọ n’ụkọ, a kpagburu ha,+ e megburu ha.+ 38 Ha ekwesịghịkwa ụwa. Ha gagharịrị n’ọzara na n’ugwu, zookwa n’ọgba+ nakwa n’oghere ndị dị n’ala.

39 Ma ndị a niile enwetaghị ihe ahụ e kwere ná nkwa n’agbanyeghị na okwukwe ha mere ka a gbaara ha àmà dị mma, 40 n’ihi na Chineke ebula ụzọ hụ ihe ga-akara anyị mma,+ ka e wee ghara ime ka ha zuo okè, a hapụ anyị.

12 N’ihi ya, ebe ọ bụ na anyị nwere oké ìgwè ndị àmà a gbara anyị gburugburu, ka anyị tụfuo ibu arọ ọ bụla na mmehie ahụ nke na-ekegidekarị anyị.+ Ka anyị jirikwa ntachi obi na-agba ọsọ anyị na-agba,+ 2 ebe anyị na-elegidesi Jizọs anya ike, bụ́ Nnukwu Onye Ndú nke okwukwe anyị na Onye na-eme ka okwukwe anyị zuo ezuo.+ N’ihi ọṅụ a ga-eme ka o nwee n’ọdịnihu, o diri ọnwụ ọ nwụrụ n’osisi ịta ahụhụ,* o kweghịkwa ka ihere mee ya. Ọ nọdụla ala n’aka nri ocheeze Chineke.+ 3 N’eziokwu, chesienụ echiche ike banyere onye ahụ diri ụdị mkparị ahụ ndị mmehie, ndị mere onwe ha ihe ọjọọ, kparịrị ya,+ ka ike wee ghara ịgwụ unu, unu* adaa mbà.+

4 Na mgba unu na mmehie ahụ na-agba, unu agbabeghị ya ruo na nke ịnwụ anwụ. 5 Unu echefuchaakwala ndụmọdụ ahụ Chineke nyere unu ka ụmụ ya, sị: “Nwa m, eledala aka ná ntị Jehova* na-adọ gị anya, adakwala mbà mgbe ọ na-abara gị mba; 6 n’ihi na ọ bụ ndị Jehova* hụrụ n’anya ka ọ na-adọ aka ná ntị. N’eziokwu, ọ na-apịa onye ọ bụla o weere ka nwa ya ihe.”+

7 Unu kwesịrị ịna-atachi obi ma were ya na e si otú a na-adọ unu aka ná ntị.* Chineke na-emeso unu ka ụmụ ya.+ Ka è nwere nwa nna ya na-anaghị adọ aka ná ntị?+ 8 Ma ọ bụrụ na ọ dọbeghị unu niile aka ná ntị a, unu abụghị ụmụ ya n’eziokwu, kama unu bụ ụmụ onye ọzọ. 9 Ndị nna mụrụ anyị na-adị adọ anyị aka ná ntị, anyị na-akwanyekwara ha ùgwù. Ọ̀ bụ na anyị ekwesịghị ido onwe anyị n’okpuru Nna nke ji mmụọ nsọ ya họpụta anyị ka anyị wee dị ndụ?+ 10 N’ihi na ha na-adọ anyị aka ná ntị ruo obere oge otú ha chere dị mma, ma Chineke na-adọ anyị aka ná ntị ga-abara anyị uru ka anyị wee dị nsọ ka ya.+ 11 N’eziokwu, e nweghị ịdọ aka ná ntị na-eme mmadụ obi ụtọ mgbe a na-adọ ya onye ahụ, kama ọ na-ewute ewute. Ma e mechaa, ọ na-abara ndị e ji ya zụọ ezigbo uru. Ha ga na-eme ezi omume, obi eruokwa ha ala.

12 N’ihi ya, meenụ ka aka kụdara akụda na ikpere na-adịghị ike dị ike,+ 13 na-emekwanụ ka ụzọ unu na-aga na ya kwụrụ ọtọ,+ ka ebe na-esighị ike n’ahụ́ unu ghara ikwokapụ, kama ka a gwọọ ya. 14 Na-agbanụ mbọ ka unu na mmadụ niile na-adị n’udo,+ na-adịkwanụ nsọ+ n’ihi na mmadụ agaghị ahụ Onyenwe anyị ma ọ bụrụ na onye ahụ adịghị nsọ. 15 Na-elezinụ anya ka a ghara inwe onye ọ bụla n’ime unu na-agaghị enweta amara Chineke, ka mgbọrọgwụ ọjọọ ọ bụla ghara ipulite n’etiti unu ma kpata nsogbu, merụọkwa ọtụtụ ndị.+ 16 Leziekwanụ anya ka a ghara inwe onye ọ bụla n’ime unu na-akwa iko* ma ọ bụ onye ọ bụla na-ejighị ihe dị nsọ kpọrọ ihe ka Ịsọ, onye nyefere onye ọzọ ihe o kwesịrị inweta dị ka ọkpara ka o wee nweta otu efere nri.+ 17 N’ihi na unu ma na mgbe o mechara chọọ ka a gọzie ya, a jụrụ ya. N’agbanyeghị na ọ gbalịsiri ike ime ka ọ gbanwee obi ya,* anya mmiri agbaakwa ya,+ o nwetaghị ihe ọ bụla.

18 Unu abịaghị nso n’ihe e nwere ike imetụ aka,*+ nke ọkụ na-ere na ya,+ nke ígwé ojii na oké ọchịchịrị kpuchiri, nke oké ifufe na-efekwa na ya,+ 19 nke ụda opi si na ya na-ada,+ a na-anụkwa olu si na ya na-ekwu okwu.+ Mgbe ndị Izrel nụrụ olu a, ha rịọrọ ka a ghara ịgwa ha okwu ọ bụla ọzọ.+ 20 N’ihi na ha tụrụ ezigbo ụjọ maka iwu e nyere, sị: “Ọ bụrụgodị na ọ bụ anụmanụ zọrọ ụkwụ n’ugwu a, a ga-eji nkume tụgbuo ya.”+ 21 Ihe ha hụrụ dịkwa egwu nke na Mosis sịrị: “Egwu ji m, m na-amakwa jijiji.”+ 22 Kama, unu bịara nso n’Ugwu Zayọn+ nakwa n’obodo Chineke dị ndụ, bụ́ Jeruselem nke eluigwe,+ na ọtụtụ iri puku ndị mmụọ ozi ndị 23 zukọrọ n’ìgwè,+ bịakwa nso n’ọgbakọ ndị e bu ụzọ mụọ, bụ́ ndị e dere aha ha n’eluigwe, bịakwa Chineke nso bụ́ Onye na-ekpe mmadụ niile ikpe,+ bịakwa ndị ezi omume nso bụ́ ndị mmụọ nsọ na-edu,+ ndị e mekwara ka ha zuo okè.+ 24 Unu abịakwala Jizọs nso bụ́ onye ogbugbo+ ọgbụgba ndụ ọhụrụ,+ nakwa ọbara e fesara anyị, nke na-ekwu okwu otú dị mma karịa ọbara Ebel.+

25 Hụnụ na unu na-ege onye ahụ na-ekwu okwu ntị. N’ihi na ọ bụrụ na a tara ndị na-egeghị onye ahụ dọrọ ndị mmadụ aka ná ntị* n’ụwa ahụhụ, o doro anya na a ga-atakwa anyị ahụhụ ma anyị gbakụta onye si n’eluigwe na-ekwu okwu azụ.+ 26 N’oge ahụ, olu ya mere ka ụwa maa jijiji,+ ma o kwere nkwa ugbu a, sị: “M ka ga-eme ọzọ ka ụwa na eluigwe maa jijiji.”+ 27 Ma okwu bụ́ “m ka ga-eme ọzọ” na-egosi na a ga-ewepụ ihe ndị e mere ka ha maa jijiji, bụ́ ihe ndị Chineke na-ekeghị, ka ihe ndị a na-emeghị ka ha maa jijiji wee dịgide. 28 N’ihi ya, ebe ọ bụ na anyị ga-eketa Alaeze a na-enweghị ike ime ka ọ maa jijiji, ka anyị na-ekwe ka amara Chineke baara anyị uru, nke anyị ga-esi na ya jiri egwu Chineke na-ejere ya ozi dị nsọ nke ọ na-anabata. 29 N’ihi na Chineke anyị bụ ọkụ na-erechapụ ihe.+

13 Nọgidenụ na-ahụ ibe unu n’anya ka ụmụnne.+ 2 Unu echefula ịna-ele ndị ọzọ ọbịa*+ n’ihi na ọ bụ ile ọbịa mere ka ụfọdụ ndị lee ndị mmụọ ozi ọbịa n’amaghị na ha bụ ndị mmụọ ozi.+ 3 Na-echetanụ ndị nọ n’ụlọ mkpọrọ*+ ka à ga-asị na unu na ha nọ n’ụlọ mkpọrọ+ nakwa ndị a na-emegbu emegbu, ebe ọ bụ na unu na ha nọ n’otu ahụ́.* 4 Ka mmadụ niile na-akwanyere alụmdi na nwunye ùgwù, ka a gharakwa imerụ alụmdi na nwunye,+ n’ihi na Chineke ga-ekpe ndị na-akwa iko* ikpe, kpeekwa di ma ọ bụ nwunye na-akwa iko ikpe.+ 5 Ka otú unu si ebi ndụ gosi na unu ahụghị ego n’anya,+ kama ka ihe ndị dị ugbu a ju unu afọ.+ N’ihi na o kwuru, sị: “E nweghị ihe ga-eme ka m hapụ gị, e nweghịkwa ihe ga-eme ka m gbakụta gị azụ.”+ 6 Ka anyị wee nwee obi ike ma sị: “Jehova* bụ onye na-enyere m aka. Agaghị m atụ egwu. Gịnị ka mmadụ ga-emeli m?”+

7 Na-echetanụ ndị na-eduzi unu,+ bụ́ ndị gwara unu okwu Chineke, nweekwanụ ụdị okwukwe ha nwere* mgbe unu na-ahụ uru omume ọma ha bara.+

8 Jizọs Kraịst anaghị agbanwe agbanwe. Onye ọ bụ ụnyaahụ ka ọ ka bụ taa, ọ ga-abụkwa ya ruo mgbe ebighị ebi.

9 Unu ekwela ka e jiri ozizi dị iche iche si ebe ọzọ duhie unu, n’ihi na ọ ka mma ka ọ bụrụ amara Chineke ga-eme ka obi sie unu ike kama nri* ga-eme ka obi sie unu ike. Nri anaghị abara ndị ji ya kpọrọ oké ihe uru.+

10 Anyị nwere ebe ịchụàjà nke ndị na-eje ozi dị nsọ n’ụlọikwuu na-enweghị ikike iri ihe dị na ya.+ 11 N’ihi na a na-akpọ ozu anụmanụ ọkụ n’azụ ebe a mara ụlọikwuu,+ nnukwu onye nchụàjà ejiri ọbara anụmanụ ndị ahụ chụọ àjà mmehie n’ebe nsọ. 12 Ọ bụkwa ya mere Jizọs ji taa ahụhụ n’azụ obodo*+ ka o wee jiri ọbara ya mee ka ndị mmadụ dị nsọ.+ 13 N’ihi ya, ka anyị gakwuru ya n’azụ ebe a mara ụlọikwuu ma die mkparị o diri,+ 14 n’ihi na anyị enweghị obodo nke na-adịgide adịgide n’ebe a, kama anyị na-echeresi nke na-abịa abịa ike.+ 15 Ka anyị si n’aka ya na-achụrụ Chineke àjà otuto mgbe niile,+ ya bụ, okwu ọnụ+ anyị nke na-akọsa aha Chineke n’ihu ọha.+ 16 Unu echefukwala ịna-eme ihe ọma na ịna-enye ndị ọzọ ihe+ n’ihi na ụdị àjà ndị a na-adị Chineke ezigbo mma.+

17 Na-eruberenụ ndị na-eduzi unu isi,+ na-edokwanụ onwe unu n’okpuru ha,+ n’ihi na ha na-eche unu* nche ebe ọ bụ na ha ga-aza Chineke ajụjụ.+ Ime otú a ga-eme ka ha jiri ọṅụ na-arụ ọrụ a ma ghara ịna-ama ọsụ, n’ihi na ọ ga-emebiri unu ihe.

18 Na-ekperenụ anyị ekpere n’ihi na obi siri anyị ike na akọnuche anyị dị ọcha,* anyị chọkwara ịna-akwụwa aka ọtọ n’ihe niile.+ 19 Ma m na-agba unu ume karịchaa ka unu na-ekpe ekpere ka m bịakwute unu n’oge na-adịghị anya.

20 Ka Chineke nke udo, onye si n’ọnwụ kpọlite Onyenwe anyị Jizọs, bụ́ nnukwu onye ọzụzụ atụrụ+ nke wetaara Chineke ọbara ọgbụgba ndụ ebighị ebi, 21 nye unu ihe ọma niile ga-eme ka unu na-eme uche ya. Ka o si n’aka Jizọs Kraịst mee ka anyị na-eme ihe dị ya mma. Ka otuto dịrị ya ruo mgbe niile ebighị ebi. Amen.

22 Ụmụnna m, m na-agba unu ume ka unu wetuo obi gee ntị n’okwu agbamume a, n’ihi na m detaara unu akwụkwọ ozi dị nkenke. 23 Achọrọ m ka unu mara na a hapụla nwanna anyị Timoti. Ọ bụrụ na ọ bịa n’oge na-adịghị anya, mụ na ya ga-eso bịa hụ unu.

24 Keleerenụ m ndị niile na-eduzi unu nakwa ndị nsọ niile. Ndị nọ n’Ịtali+ na-ekele unu.

25 Ka Chineke meere unu niile amara.