Ikete rya Kabiri ryandikiwe Abakorinto

1 Jewe Paulo intumwa+ ya Kristu Yezu biciye ku kugomba kw’Imana, na Timoteyo+ mwene wacu, turabandikiye mwebwe shengero ry’Imana riri i Korinto hamwe n’aberanda bose+ bari i Akaya+ hose:

2 Mugire ubuntu ata wari abukwiriye n’amahoro biva ku Mana Data wa twese no ku Mukama Yezu Kristu+.

3 Hahezagirwe Imana ikaba na Se+ w’Umukama wacu Yezu Kristu, Se w’imbabazi zuzuye ikibabarwe+ ikaba n’Imana y’uruhoza+ rwose, 4 iyiduhoza mu makuba yacu yose+, kugira ngo natwe dushobore guhoza+ abari mu makuba y’ubwoko bwose, biciye ku ruhoza Imana iduhoresha+. 5 Kuko, nk’uko imibabaro tubabazwa ku bwa Kristu igwiriye muri twebwe+, ni ko n’uruhoza turonka rugwira biciye kuri Kristu+. 6 Twaba rero turi mu makuba, ni ku bw’uruhoza rwanyu n’ubukiriro bwanyu+; canke twaba turiko turahozwa, ni ku bw’uruhoza rwanyu rukora kugira ngo rubafashe kwihanganira ya mibabaro nyene idushikira natwe+. 7 Icizigiro cacu rero ku biberekeye ntikinyiganyiga, narirya tuzi yuko muzosangira uruhoza nk’uko nyene musangira iyo mibabaro+.

8 Kuko tudashaka ko mutamenya, bene wacu, ivy’amakuba yadushikiye mu ntara ya Aziya+, yuko twari turemerewe bihebuje, birengeye inkomezi zacu, ku buryo twahagaritse umutima cane no ku vyerekeye ubuzima bwacu+. 9 Nkako, twiyumvisemwo ko twari twaciriwe urubanza rwo gupfa. Ivyo kwari ukugira ngo ntitwiyizigire ubwacu+, ahubwo twizigire ya Mana izura abapfuye+. 10 Ico kintu gihambaye nk’urupfu ni co yadukijije kandi ni co izodukiza+; kandi turizigiye ko izonabandanya kudukiza+. 11 Namwe murashobora gufasha biciye ku gutakamba mugira ku bwacu+, kugira ngo ugukenguruka+ kugirwe na benshi ku bwacu ku bw’ico duhanwa umutima ukunze bivuye ku gusenga kwa benshi+.

12 Kuko iki ari co twirata, ari na co ijwi ryacu ryo mu mutima rishingira intahe+: ni uko mw’isi, ariko na canecane kuri mwebwe, twagendeye mu bweranda no mu kutagira uburyarya gushimwa n’Imana, atari mu bukerebutsi bw’umubiri+, ahubwo mu buntu ata wari abukwiriye bw’Imana. 13 Kuko vy’ukuri ata bintu turiko tubandikira atari ivyo muzi neza kandi mwemera, ari na vyo nizigiye ko muzobandanya kwemera gushika kw’iherezo+, 14 nk’uko kandi mwemeye ku rugero kanaka yuko turi imvo ituma mwirata+, nk’uko namwe muzoyiba kuri twebwe ku musi w’Umukama wacu Yezu+.

15 Muri ukwo kujijuka rero ni ho nariko niyumvira kubanza kuza iwanyu+, kugira ngo muronke akaryo kagira kabiri+ ko kugira akanyamuneza, 16 hanyuma maze guhagarara iwanyu, nkaja i Makedoniya+, maze nkagaruka iwanyu mvuye i Makedoniya+, hanyuma mukamperekeza+ gatoyi nja i Yudaya. 17 None igihe nagira ico ciyumviro hari ukwanjanjwa nagize+? Canke ibintu nishingira, noba ndavyishingira nisunze umubiri+, kugira ngo kuri jewe habe “Ego, Ego” na “Oya, Oya+”? 18 Mugabo Imana irashobora kwizigirwa, yuko ijambo twababwiye atari Ego yamara ari Oya. 19 Kuko Umwana w’Imana+, Kristu Yezu, uwamamajwe muri mwebwe biciye kuri twebwe, ni ukuvuga biciye kuri jewe na Silivano na Timoteyo+, atabaye Ego yamara ari Oya, ahubwo Ego yabaye Ego ku bimwerekeye+. 20 Kuko uko imihango+ y’Imana ingana kwose, yabaye Ego biciye kuri we+. Rero, biciye muri we kandi ni ho “Amen+” ibwirwa Imana ku bw’ubuninahazwa biciye kuri twebwe. 21 Mugabo uwemeza ko mwebwe na twebwe turi aba Kristu, ari na we yaturobanuje amavuta+, ni Imana. 22 Yaradushizeko kandi ikidodo+ cayo yongera iduha icemeza+ c’ibizoza, ari co mpwemu+, mu mitima yacu.

23 Ubu ndasavye Imana imbere icabona+ kinyagiriza ubwanje, yuko kuba ntaraza i Korinto ari ukugira ngo muzigurizwe+. 24 Si uko ari twebwe tuganza+ ukwizera kwanyu, ahubwo turi abakozi+ bagenzi banyu ku bw’akanyamuneza kanyu, kuko ukwizera kwanyu+ ari kwo kubahagaritse+.

2 Kuko iyi ari yo ngingo jewe nifatiye: kutongera kuza iwanyu mu mubabaro+. 2 Kuko hamwe nobatera umubabaro+, ni nde wundi none yontera akamwemwe atari uwo nteye umubabaro? 3 Ni na co gituma nabandikiye ico kintu nyene, kugira ngo ninaza sinze ngire umubabaro+ bivuye ku bari gutuma nezerwa+; kuko ndabizigiye+ mwese yuko akanyamuneza mfise ari ko kanyu mwese. 4 Kuko mu makuba menshi n’umubabaro mwinshi wo mu mutima ari ho nabandikiye n’amosozi menshi+, atari kugira ngo mubabare+, ahubwo kugira ngo mumenye urukundo ndabafitiye bimwe bidasanzwe.

5 Nimba rero hari uwateye umubabaro+, ntiyawuteye jewe, ahubwo yawuteye mwese ku rugero kanaka—sinkare birenze urugero mu vyo mvuga. 6 Ukwo guhambarirwa+ na benshi kurahagije kuri uwo muntu, 7 ku buryo nyabuna ubu mwari mukwiye kumubabarira n’umutima mwiza+ mukongera mukamuhoza, kugira ngo uwo muntu ntahave amirwa n’umubabaro urenze+. 8 Ndabahimiriza rero ngo mumwereke ko mumukunda+. 9 Kuko ari na yo ntumbero itumye ndabandikira kugira mbone ikimenyamenya mutanga, ko mugamburuka muri vyose+. 10 Ico cose muhariye umuntu n’umutima mwiza, nanje ni ukwo+. Nayo jewe vy’ukuri, ico mpariye n’umutima mwiza cose, nimba hari ico mpariye n’umutima mwiza, ni ku bwanyu imbere ya Kristu; 11 kugira ngo ntidutsindwe na Shetani+, kuko tutayobewe imigabo yiwe+.

12 Igihe rero nashika i Tirowa+ kumenyesha inkuru nziza yerekeye Kristu, kandi nkugururirwa umuryango mu Mukama+, 13 nta gahengwe nigeze ndonka mu mutima kuko ntabonye Tito+ mwene wacu, mugabo narabasezeye ndaheza nja i Makedoniya+.

14 Mugabo hashimirwe Imana yo yama iturongora+ mu rugendo rw’intsinzi twifatanije+ na Kristu, kandi igatuma akamoto k’ubumenyi buyerekeye kumvikana ahantu hose biciye kuri twebwe+! 15 Kuko ku Mana turi akamoto keza+ ka Kristu mu bariko barakizwa no mu bariko barahona+; 16 kuri abo ba kabiri turi akamoto kava mu rupfu kaja mu rupfu+, ku ba mbere na ho akamoto kava mu buzima kaja mu buzima. Vyongeye, ni nde akwije neza ibisabwa ku bw’ivyo bintu+? 17 Ni twebwe; kuko tutari abagenda bacuruza ijambo ry’Imana+ nk’uko benshi bagira+, mugabo tuvuga ata buryarya, egome, nk’abarungitswe n’Imana, imbere y’Imana, twifatanije na Kristu+.

3 Mbega twongeye gutangura kwishimagiza ubwacu+? Canke kumbure nk’uko bamwebamwe bashaka, mbega twirirwa turakenera amakete+ adushimagiza kuri mwebwe canke avuye kuri mwebwe? 2 Mwebwe nyene ni mwe kete ryacu+, ryanditswe ku mitima yacu, rizwi kandi risomwa n’abantu bose+. 3 Kuko muboneka ko muri ikete rya Kristu ryanditswe na twebwe abasuku+, ritandikishijwe irangi, ahubwo ryandikishijwe impwemu+ y’Imana nzima, atari ku bisate vy’amabuye+, ahubwo ku bisate vy’inyama, ku mitima+.

4 Biciye kuri Kristu rero ni ho dufise mwene ukwo kujijuka+ ku Mana. 5 Si uko twebwe ku bwacu ari ho dukwije neza ibisabwa ngo hagire ico tubona ko kiva kuri twebwe+, ahubwo ugukwiza neza ibisabwa kwacu kuva ku Mana+, 6 yo yatugize koko abakwije neza ibisabwa kugira tube abasuku b’isezerano rishasha+, atari ab’amategeko yanditse+, ahubwo b’impwemu+; kuko ya mategeko yanditse aca urwo gupfa+, mugabo impwemu ikagira umuntu muzima+.

7 Vyongeye, nimba ya mategeko atanga urupfu+ kandi yasáruwe mu ndome mu mabuye+ yazananye ubuninahazwa+, ku buryo bene Isirayeli batashobora kwitegereza mu maso ha Musa kubera ubuninahazwa bwo mu maso hiwe+, ubuninahazwa bwabwirizwa gukurwaho, 8 kubera iki itangwa ry’impwemu+ ritorushiriza kugira ubuninahazwa+? 9 Kuko nimba ya mategeko atanga ugutsindwa n’urubanza+ yari n’ubuninahazwa+, itangwa ry’ubugororotsi+ ryoryo rirarushiriza kugwiza ubuninahazwa+. 10 Nkako, mbere n’icari carigeze kugirwa ic’ubuninahazwa carambuwe ubuninahazwa muri ivyo+, kubera ubuninahazwa bukirengeye+. 11 Kuko nimba icabwirizwa gukurwaho cazananywe ubuninahazwa+, ikigumaho coco corushirije kugira ubuninahazwa+.

12 Ko rero dufise mwene ico cizigiro+, turakoresha umwidegemvyo wo kuvuga, 13 tutagira nka ca gihe Musa yashira icitwikiro+ mu maso hiwe, kugira ngo bene Isirayeli ntibitegereze iherezo+ rya kimwe cabwirizwa gukurwaho. 14 Ariko ububasha bwabo bwo kwiyumvira bwarapfushe+. Kuko gushika uyu musi nya citwikiro nyene kigumaho igihe hasomwa isezerano rya kera+, kubera ko gikurwaho biciye kuri Kristu+. 15 Nkako, gushika uno musi, igihe cose ivyanditswe na Musa bisomwe+, icitwikiro kiguma ku mitima yabo+. 16 Mugabo iyo habaye uguhindukirira Yehova, ico citwikiro kirakurwaho+. 17 Yehova rero ni we Mpwemu+; kandi aho impwemu+ ya Yehova+ iri, ni ho haba umwidegemvyo+. 18 Kandi twese+, mu gihe twerekana nk’ivyirore ubuninahazwa bwa Yehova+ dufise mu maso hadatwikiriye, turahindurwa+ muri nya shusho nyene+ tukava mu buninahazwa tukaja mu buninahazwa+, neza na neza nk’uko bigirwa na Yehova+ we Mpwemu.

4 Ni co gituma tudaheba, kuko dufise ubu busuku+ nk’uko imbabazi twagiriwe ziri+; 2 mugabo twaranse ibintu vyo mu kinyegero biteye isoni+, tutagendana urwenge canke ngo tujoborore ijambo ry’Imana+, ahubwo riho mu gushira ahabona ukuri, turishimagiza kw’ijwi ryo mu mutima ry’umuntu wese imbere y’Imana+. 3 Nimba rero inkuru nziza tumenyesha itwikiriwe vy’ukuri, itwikiriwe mu bahona+, 4 muri bo imana y’iki gihe*+ ikaba yarahumye imizirikanyi y’abatemera+, ngo umuco+ wa ya nkuru nziza ininahaye+ yerekeye Kristu we shusho+ y’Imana, ntushobore kumenēra+. 5 Kuko tutiyamamaza ubwacu, ahubwo twamamaza Kristu Yezu ko ari Umukama+, natwe ko turi abashumba banyu+ ku bwa Yezu. 6 Kuko Imana ari yo yavuze iti: “Umuco nukayangane uvuye mu mwiza+,” kandi yakayanganiye imitima yacu ngo iyiboneshereze+ n’ubumenyi buninahaye+ bw’Imana imbere ya Kristu+.

7 Ariko dufise iryo tunga+ mu vyombo+ vy’ivu+, ngo ububasha+ burengeye ubusanzwe bube ubw’Imana+, ntibube ubuva kuri twebwe+. 8 Turatunatunwa mu buryo bwose+, mugabo ntitubura isaganirizo; turazazanirwa, mugabo ntitubura rwose icanzo+; 9 turahamwa, mugabo ntidusigwa mu kangaratete+; turakubitwa hasi+, mugabo ntidutikizwa+. 10 Hose mu mubiri wacu twama twihanganira amagorwa yica yatejwe Yezu+, ngo ubuzima bwa Yezu bubonekere kandi mu mubiri wacu+. 11 Kuko twebwe abariho twama dushirwa imbere y’urupfu+ ku bwa Yezu, ngo ubuzima bwa Yezu bubonekere kandi mu mubiri wacu upfa+. 12 Nuko rero, urupfu rukorera muri twebwe, ariko ubuzima bugakorera muri mwebwe+.

13 Ko rero dufise impwemu y’ukwizera nk’imwe handitswe ivyayo ngo: “Narizeye, ni co catumye mvuga+,” natwe turizera ari co gituma tuvuga, 14 tuzi yuko umwe yazura Yezu azotuzura na twebwe hamwe na Yezu kandi akazodushikiriza hamwe namwe+. 15 Kuko ibintu vyose bihari ku bwanyu+, kugira ngo ubuntu ata wari abukwiriye bwagizwe bwinshi bugwire bivuye ku gukenguruka kw’abandi benshi ku bw’ubuninahazwa bw’Imana+.

16 Ni co gituma tudaheba; ahubwo naho umuntu turi inyuma ariko arashira, mu vy’ukuri umuntu turi imbere+ aguma agirwa mushasha ku musi ku musi. 17 Kuko naho amakuba ari ay’akanya gato+ kandi ahwahutse, atuzanira ubuninahazwa bw’uburemere burushiriza kuba ubuhebuje kandi bw’ibihe bidahera+; 18 mu gihe tugumiza amaso yacu, atari ku biboneka, ahubwo ku bitaboneka+. Kuko ibiboneka ari ivy’igihe gito+, mugabo ibitaboneka bikaba ivy’ibihe bidahera+.

5 Kuko tuzi yuko inzu yacu yo kw’isi+, uru rusago+, niyaramuka isambutse+, tubwirizwa kuronka inyubakwa iva ku Mana, inzu itakozwe n’amaboko+, yamaho+ mw’ijuru. 2 Kuko muri iyi nzu yo kubamwo tuniha+ koko, tukipfuza cane kwambara imwe rwacu iva mw’ijuru+, 3 ku buryo nitwamara kuyambara vy’ukuri, tutazosangwa turi gusa+. 4 Nkako, twebwe abari muri uru rusago turaniha, tukaremerwa; kuko ico dushaka atari ukurwambura, ahubwo ni ukwambara rwa rundi+, ngo igipfa kimirwe n’ubuzima+. 5 Uwadutunganije rero ku bw’ico kintu nyene ni Imana+, yo yaduhaye icemeza+ c’ibizoza, ni co mpwemu+.

6 Twamana rero umutima rugabo tukamenya kandi yuko mu gihe tukiba mu mubiri, turi kure y’Umukama+, 7 kuko tugenda twisunga ukwizera, tutisunga ibiboneka+. 8 Mugabo turagira umutima rugabo kandi tugahimbarwa riho no kuba kure y’umubiri kugira ngo tuje kubana n’Umukama+. 9 Ni co gituma intumbero yacu kandi ari uko twemerwa na we+, twaba tubana na we canke tuba kure yiwe+. 10 Kuko twese dutegerezwa kugaragarizwa imbere y’intebe y’imanza ya Kristu+, ngo umwe wese aronke ivyo akwiriye ku bw’ibintu yakoreye mu mubiri, nk’uko ivyo yagiye arakora biri, vyaba vyiza canke ivy’agahomerabunwa+.

11 Ko rero tuzi ugutinya+ Umukama ico ari co, tuguma dufasha abantu kunyurwa+, mugabo twarashizwe ku mugaragaro ku Mana. Ariko ndizigiye ko twashizwe ku mugaragaro no kw’ijwi ryanyu ryo mu mutima+. 12 Ntituriko twongera kwishimagiza+ kuri mwebwe, ahubwo turiko tubaha akaryo ko kwirata mu bijanye natwe+, kugira muronke ico mwishura abiratira ibiboneka inyuma+, mugabo batiratira umutima+. 13 Kuko nimba twari twasaze+, hari ku bw’Imana; nimba turoranye mu muzirikanyi+, ni ku bwanyu. 14 Kuko urukundo Kristu afise rutugobera, kubera ko iki ari co twabonye, yuko umuntu umwe yapfiriye bose+; nuko rero, bose bari barapfuye; 15 kandi yapfiriye bose kugira ngo abariho ntibabe bakibaho ku bwabo+, ahubwo babeho ku bw’umwe+ yabapfira hanyuma akazurwa+.

16 Kuva ubu rero, nta muntu n’umwe tuzi ku mubiri+. Naho twamenye Kristu ku mubiri+, mu vy’ukuri ubu si ko tukimuzi+. 17 Nimba rero umuntu yunze ubumwe na Kristu, ni ikiremwa gishasha+; ivya kera vyaraheze+, ehe ibishasha biraje+. 18 Mugabo ibintu vyose biva ku Mana, yo yadusubije hamwe+ na yo biciye kuri Kristu ikongera ikaduha ubusuku+ bw’ugusubiza hamwe, 19 ni ukuvuga yuko Imana biciye kuri Kristu+ yariko yisubiza hamwe n’isi+ ntibaharureko amakosa yabo+, kandi yatujeje ijambo+ ry’ugusubiza hamwe+.

20 Turi+ rero abaserukira+ Kristu+ mu kibanza ciwe, nk’aho Imana yinginga biciye kuri twebwe+. Mu kibanza ca Kristu, turabinginga+ duti: “Nimusubize hamwe n’Imana.” 21 Umwe atari azi igicumuro+ yamugize igicumuro+ ku bwacu, kugira ngo ducike ubugororotsi bw’Imana+ biciye kuri we.

6 Ko dukorana na we+, turabinginga rero ngo ntimwemere ubuntu ata wari abukwiriye bw’Imana hanyuma ngo muhushe intumbero yabwo+. 2 Kuko ivuga iti: “Mu gihe c’ukwemerwa narakwumvise, kandi ku musi w’ubukiriro naragutabaye+.” Ehe! Ubu ni co gihe canecane c’ukwemerwa+. Ehe! Ubu ni wo musi w’ubukiriro+.

3 Ntidutanga mu buryo na bumwe igitsitaza na kimwe+, kugira ngo ubusuku bwacu ntibutorwe amahinyu+; 4 ahubwo muri vyose turishimagiza+ nk’abasuku b’Imana, mu kwihanganira vyinshi, mu makuba, mu bihe vy’umukeno, mu ngorane+, 5 mu bimoko, mu mabohero+, mu mivurungano, mu kubira akuya, mu kurara maso, mu kumara ibihe ata bifungurwa+, 6 mu butyoroke, mu bumenyi, mu kwiyumanganya+, mu buntu+, mu mpwemu nyeranda, mu rukundo ruzira ubwiyorobetsi+, 7 mu kuvuga ukuri, mu bubasha bw’Imana+; biciye ku birwanisho+ vy’ubugororotsi mu kuryo no mu kubamfu, 8 biciye mu buninahazwa no mu gateterwe, biciye mu kuvugwa nabi no mu kuvugwa neza; nk’abahendanyi+ yamara kandi b’imvugakuri, 9 nk’abatazwi yamara kandi bazwi+, nk’abariko barapfa yamara kandi, ehe turiho+, nk’abatojwe indero+ yamara kandi batatanzwe ngo bicwe+, 10 nk’abari n’agahinda yamara bama banezerewe, nk’aboro yamara batungisha benshi, nk’abadafise ikintu na kimwe yamara kandi batunze vyose+.

11 Akanwa kacu karabugurukiye yemwe Bakorinto, umutima wacu+ waragutse. 12 Ntimwagiwe muri twebwe+, ahubwo mwagiwe mu kibabarwe canyu bwite+. 13 Nuko rero, bwa mpembo—mvuga nk’uwubwira abana+—namwe nyene nimwaguke.

14 Ntimuboherwe ku ngǒgo* hamwe n’abatemera+ kandi bitajana. Kuko, ubugororotsi n’ubugarariji bihuriye ku ki+? Canke umuco usangiye iki n’umwiza+? 15 Bitayeko, Kristu na Beliyali bahuza bate+? Canke uwemera asangiye iki+ n’uwutemera? 16 Kandi urusengero rw’Imana ruhuza rute n’ibigirwamana+? Kuko turi urusengero+ rw’Imana nzima; nk’uko Imana yavuze iti: “Nzoba muri bo+ ngendere muri bo, kandi nzoba Imana yabo, na bo bazoba abantu banje+.” 17 “‘Nimuve muri bo rero, kandi mwitandukanye na bo,’ ni ko Yehova avuga, ‘kandi mureke gukora ku gihumanye+’”; “‘nanje nzobakira+.’” 18 “‘Kandi nzobabera so+, namwe muzombera abahungu n’abakobwa+,’ ni ko Yehova Mushoboravyose avuga+.”

7 Ko rero dufise iyo mihango+ ga bakundwa, twiyuhagire+ ubuhumane bwose bw’umubiri n’ubw’umutima+, tunonosore ubweranda mu gutinya Imana+.

2 Muduhe ikibanza+. Nta we twagiriye nabi, nta we twateye kwononekara, nta we twariye imitsi+. 3 Ivyo sindabivugiye kubatsindisha. Kuko nari maze kuvuga yuko muri mu mitima yacu, twaba dupfa canke tubaho+. 4 Ndi n’umwidegemvyo mwinshi wo kuvuga ku biberekeye. Ndi n’ukwirata kwinshi mu bijanye namwe+. Nduzuye uruhoza+, ndasesekaye akanyamuneza mu marushwa yacu yose+.

5 Nkako, igihe twashika i Makedoniya+, umubiri wacu nta gahengwe wigeze uronka+, ahubwo twashishikaye gutezwa amarushwa+ mu buryo bwose—inyuma hari intambara, imbere na ho ubwoba. 6 Yamara rero Imana, imwe ihoza+ abakubititse, yaraduhojeje biciye ku kuba Tito ari ho ari; 7 yamara si ku kuba ari ho ari gusa, mugabo no ku ruhoza yari yahoreshejwe n’ivyanyu, kuko yongeye kutwiganira+ icipfuzo gikomeye mufise, ukugandara kwanyu, umwete mumfitiye; ku buryo narushirije kunezerwa.

8 Ni co gituma ntavyicuza naho nabateye umubabaro n’ikete ryanje+. Naho ubwa mbere navyicujije (ndabona ko iryo kete ryabateye umubabaro, naho vyabaye ivy’akanya gatoyi), 9 ubu ndanezerwa, atari kubera ko mwatejwe umubabaro, mugabo kubera ko mwatejwe umubabaro utuma mwigaya+; kuko mwatejwe umubabaro uhuye n’ukugomba kw’Imana+, ngo ntihagire ico muhomba mu kintu na kimwe kubera twebwe. 10 Kuko umubabaro uhuye n’ukugomba kw’Imana utuma haba ukwigaya gushikana ku bukiriro ata wushobora kwicuza+; mugabo umubabaro w’isi uzana urupfu+. 11 Kuko, ehe ico kintu nyene, ni ukuvuga ukubabara kwanyu guhuye n’ukugomba kw’Imana+, ingene cabazanyemwo ubwira bwinshi, ingene cabazanyemwo ukwikurako ibara, ingene cabazanyemwo ishavu, ingene cabazanyemwo ubwoba, ingene cabazanyemwo icipfuzo gikomeye, ingene cabazanyemwo umwete, ingene cabazanyemwo ugusubiza ibintu mu buryo+! Muri vyose mwarerekanye ko mutanduye ku bijanye n’ico kibazo. 12 Mu vy’ukuri, naho nabandikiye, sinabigize ku bw’uwagize nabi+ canke ku warenganijwe, ahubwo nabigize kugira ngo ubwira mudufitiye buje ahabona muri mwebwe imbere y’Imana. 13 Ni co gituma twahojejwe.

Ariko rero, turetse uruhoza rwacu, twararushirije kunezerwa cane bivuye ku kanyamuneza ka Tito, kubera ko umutima wiwe+ waruhuriwe na mwebwe mwese. 14 Kuko nimba narirase imbere yiwe ku biberekeye, sinateterejwe; mugabo nk’uko twababwiye ibintu vyose mu kuri, ni ko n’ukwirata kwacu+ imbere ya Tito kwabaye ukw’ukuri. 15 Vyongeye, ikibabarwe abagirira kirushiriza kugwira, iyo yibutse ukugamburuka+ kwanyu mwese, ingene mwamwakiranye ugutinya n’ukujugumira. 16 Ndanezerwa n’uko mu buryo bwose nshobora kugira umutima rugabo kubera mwebwe+.

8 Turabamenyesha rero, bene wacu, ku bijanye n’ubuntu ata wari abukwiriye bw’Imana bwahawe amashengero y’i Makedoniya+, 2 yuko mu gihe c’ikigeragezo gikomeye bari mu marushwa, akanyamuneza kabo kenshi be n’ubworo bwabo bwinshi vyatumye ubutunzi bw’ubutanzi bwabo bwa cane bugwira+. 3 Kuko ivyo vyabaye nk’uko ubushobozi bwabo koko bungana+, emwe, ndavyemeza, mbere vyari birengeye ubushobozi bwabo koko, 4 mu gihe baguma batwinginga bashimitse rwose bibiviriyeko ngo baterwe agateka ko gutanga n’umutima ukunze, vyongeye ngo bagire uruhara mu busuku bugenewe aberanda+. 5 Kandi si nk’uko twari tuvyizigiye vyonyene, mugabo babanje kwihereza Umukama+ natwe biciye ku kugomba kw’Imana. 6 Ivyo vyatumye turemesha Tito+ yuko yosozera ukwo gutangana umutima ukunze muri mwebwe, nk’uko ari we yari yarabitanguje muri mwebwe. 7 Yamara rero, nk’uko muriko muragwira muri vyose+, mu kwizera no mu majambo no mu bumenyi+ no mu bwira bwose no muri uru rukundo tubakunda, abe ari na ko mugwira muri ukwo gutanga n’umutima ukunze.

8 Sindiko ndabategeka+, mugabo ndabivuga ndavye ubwira abandi bafise, no kugira nsuzume yuko urukundo rwanyu ari urw’ukuri. 9 Kuko muzi ubuntu ata wari abukwiriye bw’Umukama wacu Yezu Kristu, yuko naho yari umutunzi yacitse umworo ku bwanyu+, kugira ngo mube abatunzi+ biciye mu bworo bwiwe.

10 Kandi muri ivyo ndatanga iciyumviro+: ico kintu vy’ukuri ni ngirakamaro kuri mwebwe+, kuko ubu hamaze guca umwaka mutanguye kubikora, mugabo si ukubikora gusa, ariko kandi n’ugushaka kubikora+; 11 ubu rero nimurangize n’ukubikora, kugira ngo nk’uko mwagize umutima ukunze wo gushaka gukora, abe ari na ko haba ukubirangiza, mukuye ku vyo mufise. 12 Kuko iyo habanje kuba umutima ukunze, vyemerwa canecane hisunzwe ivyo umuntu afise+, si ivyo umuntu adafise. 13 Kuko ntashaka ko abandi boroherwa+ mugabo mwebwe bikabagora; 14 ahubwo nshaka yuko biciye ku kunganya, umusesekara wanyu ubu wokwuzuriza ugukehanirwa kwabo, kugira ngo umusesekara wabo na wo uze kwuzuriza ugukehanirwa kwanyu, kugira habe ukunganya+. 15 Nk’uko vyanditswe ngo: “Uwa vyinshi ntiyagize umurengera, n’uwa bike ntiyakehaniwe+.”

16 Hashimirwe Imana rero kubona yarashize mu mutima wa Tito ubwo bwira nyene ku bwanyu+, 17 kuko yitabiriye koko iyo ndemesho, mugabo kubera ari umunyabwira cane, araje iwanyu bimwiviriyeko. 18 Mugabo tumurungikanye na mwene wacu yashimagijwe mu bijanye n’inkuru nziza, bigakwiragira mu mashengero yose. 19 Si ivyo gusa, mugabo kandi yaragenywe+ n’amashengero ngo abe uwo dusangira ingendo mu bijanye n’iyi ngabirano itanganywe umutima mwiza, iyo tubwirizwa kwitwararika ku bw’ubuninahazwa+ bw’Umukama ikaba n’ikimenyamenya c’umutima ukunze dufise+. 20 Gutyo turirinda ko hagira umuntu n’umwe adutora amahinyu+ mu bijanye n’iyi ntererano+ nyinshi tubwirizwa kwitwararika. 21 Kuko “tugira indinganizo zigororotse, atari gusa mu maso ya Yehova, mugabo no mu maso y’abantu+.”

22 Vyongeye, tubarungikanye na mwene wacu twagerageje kenshi muri vyinshi dusanga ni umunyabwira, mugabo ubu ho akaba arushirije kuba umunyabwira kuko abizigira cane. 23 Mugabo nimba hari ikibazo na kimwe ku vyerekeye Tito, ni uwufatanije nanje akaba n’umukozi mugenzanje+ ku bw’inyungu zanyu; canke nimba ari ku vyerekeye bene wacu, ni intumwa z’amashengero bakaba n’ubuninahazwa bwa Kristu. 24 Nimubereke rero ikimenyamenya c’urukundo rwanyu+ n’ic’ivyo twirase+ ku biberekeye, imbere y’amashengero.

9 Ku vyerekeye rero ubusuku+ bugirirwa aberanda, ntibikenewe ko nirirwa ndabandikira, 2 kuko nzi umutima ukunze mufise, uwo nirata ku Banyamakedoniya ku biberekeye, yuko intara ya Akaya ubu imaze umwaka yiteguye+, kandi umwete wanyu warakabuye benshi muri bo. 3 Mugabo ndungitse bene wacu, kugira ngo muri ivyo ukwirata kwacu ku vyerekeye mwebwe ntikuboneke ko ari ukw’ubusa, mugabo kugira ngo mube abiteguye vy’ukuri+, nk’uko nahora ndabivuga. 4 Ahandiho, hamwe Abanyamakedoniya bozanana nanje bagasanga mutiteguye, twebwe—si ukuvuga mwebwe—hari ukuntu twoteterwa muri uku gushira amazinda kwacu. 5 Niyumviriye rero ko ari nkenerwa kuremesha bene wacu kuza iwanyu hakiri kare ngo bategure hakiri kare ingabirano yanyu itanzwe ata kwitangira itama mwari mwarasezeranye+, gutyo ibe iteguwe bwa ngabirano itanzwe ata kwitangira itama, ntibe nk’ikintu kinyazwe+.

6 Mugabo muri ivyo, uwubiba isorosoro+ azoshwabura isorosoro; uwubiba vyinshi+ na we azoshwabura vyinshi. 7 Umwe wese nagire nk’uko yavyiyemeje mu mutima wiwe, atabigiranye umwikomo+ canke ngo abigire agoberewe, kuko Imana ikunda uwutangana akamwemwe+.

8 Vyongeye, Imana irashoboye kugwiza kuri mwebwe ubuntu ata wari abukwiriye bwayo bwose, kugira ngo naho mwama mufise ibibakwiye muri vyose, mugire vyinshi ku bw’igikorwa ciza cose+. 9 (Nk’uko vyanditswe ngo: “Yaratanze cane, yarahaye aboro, ubugororotsi bwiwe bubandanya ibihe bidahera+.” 10 Umwe rero avotororera umubivyi imbuto n’umukate wo kurya+ azotanga yongere agwize imbuto kugira ngo mubibe, kandi azokwongereza ivyimburwa vy’ubugororotsi bwanyu+.) 11 Muri vyose muriko muratungishwa kubera ubutanzi bwa cane bw’ubwoko bwose, biciye kuri twebwe bukaba buzana ugukengurukira Imana+; 12 kuko ubusuku bw’ico gikorwa gikorerwa abantu atari gusa kuronsa cane aberanda ivyo bakeneye+, mugabo ni n’ukuba abatunzi mu gukengurukira Imana kwinshi. 13 Biciye ku kimenyamenya ubu busuku butanga, baraninahaza Imana kubera yuko muyobokera inkuru nziza yerekeye Kristu+, nk’uko muvyatura icese, no kubera yuko muri abatanzi ba cane mu kuntu mubaha intererano mukaziha n’abandi bose+; 14 kandi baratakamba ku bwanyu bashashaye kubabona kubera ubuntu buhebuje+ bw’Imana buri kuri mwebwe.

15 Hashimirwe Imana ku bw’ingabirano yayo ya gusa itagira uko yovugwa+.

10 Jewe Paulo rero ndabinginga biciye ku bwitonzi+ n’ubuntu+ bwa Kristu, naho mboneka ko nciye bugufi+ muri mwebwe, ariko iyo ntahari nkabatinyuka+. 2 Ndabinginga koko, ngo igihe nzoba ndahari sinze nkoreshe ubutinyutsi hamwe na kwa gushira amazinda nizigiye gukoresha mu gufatira ingingo za ruhasha+ bamwebamwe batubona nk’aho tugenda twisunga ico turi mu mubiri. 3 Kuko naho tugenda mu mubiri+, ntiturwana intambara twisunga ico turi mu mubiri+. 4 Kuko ibirwanisho vy’intambara yacu atari ivy’umubiri+, mugabo bigirwa ivy’ububasha n’Imana+ kugira dutembagaze ibintu bihamangiye. 5 Kuko dutembagaza ivyiyumviro n’ikintu cose gihanitse gihagurukirijwe kurwanya ubumenyi bw’Imana+; kandi iciyumviro cose turakigira imbohe kugira kigamburukire Kristu; 6 kandi turiteguriye guhana ubugambarazi bwose+, ubugamburutsi bwanyu nibwamara gushitswa rwose+.

7 Mwebwe muraba ibintu mwisunze ukuntu biboneka inyuma+. Nimba hari uwiyumvamwo ko yegukira Kristu, niyongere arimbure iki kintu ubwiwe: yuko, nk’uko yegukira Kristu, na twebwe ari ukwo nyene+. 8 Kuko naho nokwirata+ kanini ku vyerekeye ububasha Umukama yaduhaye bwo kububaka atari ubwo kubasambura+, sinoteterwa, 9 ngo sinse n’uwushaka kubatera ubwoba biciye ku makete yanje. 10 Kuko bavuga ngo: “Amakete yiwe araremereye kandi ari n’ubukomezi, mugabo iyo ari* ng’aha ubwiwe aboneka ko ari goyigoyi+, n’imvugo yiwe ikaba iyigayitse+.” 11 Umuntu mwene uyo narimbure ibi: yuko ico turi mw’ijambo tuvuga biciye mu makete iyo tutahari, ari na co tuzoba mu bikorwa nitwaba ari ho turi+. 12 Kuko tutubahuka kwishira muri bamwebamwe canke ngo twigereranye na bamwebamwe bishimagiza+. Abo mu vy’ukuri, mu kwipima kuri bo nyene ubwabo no mu kwigereranya na bo nyene ubwabo, nta bwenge bagira+.

13 Nayo twebwe tuzokwirata, atari inyuma y’imbibe twashingiwe+, ahubwo twisunze urubibe rw’icibare Imana yadukebeye ku rugero, ikagishikana n’iwanyu+. 14 Mu vy’ukuri, ntituriko turirehūra birenze nk’aho twoba tutashitse iwanyu, kuko twabaye aba mbere mu gushika n’iwanyu tumenyesha inkuru nziza yerekeye Kristu+. 15 Oya, ntituriko twirata inyuma y’imbibe twashingiwe, ngo twirate mu kuya uwundi muntu yabize+, ahubwo turafise icizigiro c’uko tuzogirwa abahambaye muri mwebwe ku bijanye n’icibare cacu+, kuko ukwizera kwanyu kuriko kuragwizwa+. Ni ho tuzorushiriza kugwira, 16 ngo tumenyeshe inkuru nziza ibihugu vyo hirya yanyu+, kugira ngo ntitwirate mu cibare c’uwundi aho ibintu bimaze gutegurwa. 17 “Mugabo uwirata, niyirate muri Yehova+.” 18 Kuko uwishimagiza atari we ashimwa+, ahubwo hashimwa uwo Yehova+ ashimagiza+.

11 Icompa mukanyihanganira mu busazi bwanje bukeyi+. Mugabo nkako, muranyihanganira! 2 Kuko ndi n’ishari ku bwanyu, ishari riva ku Mana+, kuko ubwanje nasezeranye kubashingira ku mugabo umwe+ kugira ndabashikirize Kristu+ muri umwigeme w’isugi atanduye+. 3 Mugabo nka kumwe ya nzoka yaryosharyosha Eva+ ikoresheje urwenge rwayo, ndatinya yuko hari ukuntu imizirikanyi yanyu yohava yononekara+ ikava ku kutagira uburyarya n’ukutandura bibereye Kristu+. 4 Kukaba nkako, iyo haje umuntu akamamaza uwitwa Yezu atari umwe twebwe twamamaje+, canke mukaronka impwemu itari iyo mwaronse+, canke inkuru nziza+ itari iyo mwemeye, muramwihanganira bitagoranye+. 5 Kuko niyumvira yuko ntabonetse mu kintu na kimwe yuko ndi munsi+ ya za ntumwa zanyu z’agahebuza+. 6 Ariko naho ntari umuhanga mu kuvuga+, si ko ndi vy’ukuri mu bumenyi+; mugabo mu buryo bwose twarabiberetse muri vyose+.

7 Canke noba narakoze igicumuro mu kwicisha bugufi+ kugira ngo mwebwe mushirwe hejuru, kubera ko nabamenyesheje inkuru nziza y’Imana mpimbawe, ata co murishe+? 8 Ayandi mashengero narayambuye mu kwemera imfashanyo yayo kugira ngo nkorere mwebwe+; 9 yamara igihe nari kumwe namwe ngakena, nta n’umwe nabereye umuzigo+, kuko bene wacu bavuye i Makedoniya+ bandonkeje cane ivyo nari mpajije. Emwe, naririnze kubabera umuzigo mu buryo bwose kandi nzobandanya gutyo+. 10 Ni ukuri+ kwa Kristu nk’uko kuri muri jewe: nta kizohagarika ukwo kwirata+ kwanje mu ntara za Akaya. 11 Kubera iki? Kubera yuko ntabakunda? Imana irazi ko ndabakunda+.

12 Ico ndiko ndakora rero nzobandanya kugikora+, kugira nkureho urwitwazo rw’abarondera urwitwazo rwo kuboneka ko bangana natwe mw’ibanga biratira. 13 Kuko mwene abo bantu ari intumwa z’ikinyoma, abakozi b’abahendanyi+, bihindura intumwa za Kristu+. 14 Kandi ivyo ntibitangaje, kuko na Shetani ubwiwe aguma yihindura umumarayika w’umuco+. 15 Ntibitangaje rero ko n’abasuku biwe+ na bo nyene baguma bihindura abasuku b’ubugororotsi. Ariko iherezo ryabo rizohwana n’ibikorwa vyabo+.

16 Ndongeye kubivuga: ntihagire uwiyumvira ko ndi imburabwenge. Ariko nimba vy’ukuri muvyiyumvira, nimunyemere naho noba mboneka nk’imburabwenge, kugira ngo nanje nirate gatoya+. 17 Ico mvuga ndakivuga ntisunze akarorero k’Umukama, ahubwo ndakivuga nk’aho ndi mu busazi, muri uku kwihagararako kw’umuntu yirata+. 18 Ko benshi bariko barirata bisunze umubiri+, na jewe nzokwirata. 19 Kuko mwihanganira abantu b’imburabwenge muhimbawe, kubera ko muri abanyabwenge. 20 Nkako, murihanganira uwo wese abagira abaja+, uwo wese arotsa ivyanyu, uwo wese asahura ivyanyu, uwo wese yishira hejuru yanyu, uwo wese abakubita mu maso+.

21 Ivyo ndabivuze kugira duteterwe, nk’aho ikibanza cacu cabaye goyigoyi.

Mugabo nimba hari uwundi yerekana ubutinyutsi mu kintu kanaka—ndiko mvuga nk’uwutagira ubwenge+—na jewe nderekana ubutinyutsi muri co. 22 Ni Abaheburayo? Na jewe ndi we+. Ni Abisirayeli? Na jewe ndi we. Ni uruvyaro rwa Aburahamu? Na jewe ndi rwo+. 23 Ni abasuku ba Kristu?—nishura nk’umusazi—ndabarusha kuba umusuku+: ndabarusha kubira akuya+, ndabarusha kuja mu mabohero+, mu gukubitwa birenze, mu kugarukira ku cobo kenshi+. 24 Incuro zitanu narakubiswe n’Abayuda inkoni mirongo ine+ ziburamwo imwe, 25 incuro zitatu narakubiswe ingage+, incuro imwe naratewe amabuye+, incuro zitatu imeri yaransabiyeko+, namaze ijoro n’umurango mw’igezi; 26 mu ngendo kenshi, mu kaga k’inzuzi, mu kaga k’abambuzi+, mu kaga k’abo mu bwoko bwanje bwite+, mu kaga k’amahanga+, mu kaga mu gisagara+, mu kaga mu gahinga, mu kaga mu kiyaga, mu kaga muri bene wacu b’ikinyoma, 27 mu kubira akuya no mu gucumukura, mu kurara maso+ kenshi, mu nzara n’inyota+, mu kubura ibifungurwa+ kenshi, mu bukanye no mu kugenda gusa.

28 Turetse ivyo bintu vyo hanze, hariho ikindi kinsugereza uko bukeye uko bwije: amaganya ku bw’amashengero yose+. 29 Ni nde agoyagoya+ nanje singoyagoye? Ni nde atsitara nanje sindurumbe ishavu?

30 Nimba ari ngombwa ngo habe ukwirata, nzokwirata+ ibijanye n’ubugoyagoye bwanje. 31 Ya Mana ari na yo Se w’Umukama Yezu, Imwe mbere ibwirizwa gushemezwa ibihe vyose, irazi ko ntariko ndabesha. 32 I Damasiko buramatari agabwa na Areta umwami yari acunze igisagara c’Abadamaseni kugira amfate+, 33 mugabo nururukirizwa mu giseke+ ncishijwe mw’idirisha mu ruhome, ndamuva mu vyara.

12 Mbwirizwa kwirata. Ariko nta co bimaze; mugabo ngira ntandukire ivyo kubonekerwa+ be n’uguhishurirwa n’Umukama. 2 Ndazi umuntu ari mu bumwe na Kristu, haraciye imyaka cumi n’ine—nimba hari mu mubiri sindabizi, canke hatari mu mubiri sindabizi; bizi Imana—yatwawe+ ari ukwo mw’ijuru rya gatatu. 3 Egome, ndazi uwo muntu—nimba hari mu mubiri canke hatari mu mubiri+, sindabizi, bizi Imana— 4 yuko yatwawe mw’iparadizo+ akumva amajambo atavugika, ayo ata muntu yemerewe kuvuga. 5 Ivy’uwo muntu nzovyirata, mugabo sinzokwirata ivyanje, atari ku bijanye n’ubugoyagoye bwanje+. 6 Kuko ndamutse nshatse kwirata+, sinoba ndi imburabwenge, kuko noba mvuga ukuri. Mugabo ndabiretse, kugira ngo ntihagire uwunshirako iciza kiruta ico abona ko ndi canke anyumvana, 7 kubera gusa umurengera w’uguhishurirwa.

Nuko rero, kugira ngo sinirate birenze urugero+, narahawe ihwa mu mubiri+, umumarayika wa Shetani, ngo agume ankubita, kugira sinirate birenze urugero. 8 Ku bw’ivyo, naringinze Umukama gatatu+ ngo rimvemwo; 9 yamara vy’ukuri yambwiye ati: “Ubuntu ata wari abukwiriye bwanje burahagije+ kuri wewe; kuko ububasha bwanje buriko butunganirizwa mu bugoyagoye+.” Nzopfuma rero nirata mpimbawe rwose ku bijanye n’ubugoyagoye bwanje+, ngo ububasha bwa Kristu bugume kuri jewe nk’ihema. 10 Ndahimbarirwa rero ubugoyagoye, ibitutsi, ibihe vy’umukeno, uruhamo n’ingorane, ku bwa Kristu. Kuko iyo ngoyagoya ari ho ngira ububasha+.

11 Ncitse imburabwenge. Ni mwe mwangobereye+ kumera gutyo, kuko nabwirizwa kuba narashimagijwe namwe. Kuko ntabonetse ko ndi munsi y’izo ntumwa zanyu z’agahebuza+ mu kintu na kimwe, naho ata co ndi+. 12 Mu vy’ukuri, ibimenyetso biranga intumwa+ vyarerekanywe muri mwebwe biciye ku kwihangana kwose+, be no ku bimenyetso n’ibitangaza be n’ibikorwa vy’ububasha+. 13 Kuko, ni igiki mwarushijwe n’ayandi mashengero, uretse ko jewe ntababereye umuzigo+? Ndabinginze mumbabarire ico kibi.

14 Raba! Iri ni irigira gatatu+ niteguriye kuza iwanyu, yamara sinzobabera umuzigo. Kuko ntariko ndondera ivyo mutunze+, ahubwo ndondera mwebwe; kuko abana+ atari bo babwirizwa kuziganiriza abavyeyi babo, ahubwo abavyeyi ni bo baziganiriza abana babo+. 15 Nayo jewe nzotanga ivyo mfise vyose mpimbawe rwose nongere nitange wese ku bwanyu+. Nimba ndabakunda birushirije, ni jewe nokundwa buhoro? 16 Mugabo uko biri kwose, sinababereye umuzigo+. Yamara rero, muvuga ko nari “umunyarwenge” be n’uko nabifatiye “ku mayeri+.” 17 Nayo ku vyerekeye uwo ari we wese mu bo natumye kuri mwebwe, mbega nararondeye kubungukirako biciye kuri we? 18 Nahimirije Tito, ndamurungikana n’urya mwene wacu. None Tito yararondeye kubungukirako+? Mbega ntitwagendeye mu gatima kamwe+? Ntitwagendeye mu makanda amwe?

19 Mbega mumaze ico gihe cose mwiyumvira yuko turiko twiregura kuri mwebwe? Turiko tuvugira imbere y’Imana ku bijanye na Kristu. Mugabo ga bakundwa, vyose tubigira ku bw’ukwubakwa kwanyu+. 20 Kuko ntinya yuko ninashika+ nzohava nsanga mutameze nk’uko nipfuza, nanje nkababera nk’uko mutipfuza, ahubwo riho hagahava haba ugushihana, ishari+, ugushavura, amahane, ukwambikana ibara, ukuvuga ubwongoshwe, ukwivyimvya, imivurungano+. 21 Kumbure ninagaruka, Imana yanje izohava intetereza muri mwebwe, nanje ngahava ngandarira benshi mu bari baracumuye+ mugabo batigaye ubuhumane bwabo n’ubusambanyi+ be n’ubushirasoni*+ bagize.

13 Iri ni irigira gatatu+ nje iwanyu. “Ikintu cose gitegerezwa kwemezwa bivuye ku ntahe ishinzwe* n’ivyabona bibiri canke bitatu+.” 2 Ndamaze kubivuga, kandi nk’aho noba ndahari irigira kabiri yamara ubu nkaba ntahari, mbaye ndabwira abacumuye be n’abandi bose, yuko ninaramuka ngarutse ata n’umwe nzoziguriza+, 3 kuko muriko murondera ikimenyamenya c’uko Kristu avugira muri jewe+, Kristu umwe atagoyagoya kuri mwebwe mugabo akaba umunyabubasha muri mwebwe. 4 Egome ni vyo yaramanitswe+ bivuye ku bugoyagoye+, mugabo ni muzima bivuye ku bubasha bw’Imana+. Egome ni vyo kandi turagoyagoya hamwe na we, mugabo tuzobanaho na we+ kubera ko ububasha bw’Imana+ buri kuri mwebwe.

5 Gume musuzuma yuko muri mu kwizera, gume mwerekana ico mwebwe ubwanyu muri+. Canke ntimuzi yuko Yezu Kristu yunze ubumwe namwe+? Kiretse nimba mutemewe. 6 Ndizigiye ntakeka ko muzomenya yuko tutari abatemewe.

7 Dusaba+ Imana rero yuko mutokora ikibi na kimwe, atari kugira ngo twebwe tuboneke ko twemewe, mugabo kugira ngo mukore ivyiza, naho twebwe twoboneka ko tutemewe. 8 Kuko ata na kimwe twokora ngo dushobore kurwanya ukuri, atari gusa ugushigikira ukuri+. 9 Emwe, turanezerwa igihe cose tugoyagoya mugabo mwebwe mukaba abanyabubasha+; kandi ico dusaba Imana+ ni uko mubogorwa. 10 Ni co gituma nanditse ibi bintu ntahari, kugira ngo ninahaba, simpambare+ nisunze ububasha Umukama yampaye, bwo kwubaka+ atari gusambura.

11 Ubwa nyuma, bene wacu, mubandanye kunezerwa, kwemera kubogorwa, guhozwa+, kwiyumvira muhuza+, kubaho mu mahoro+; kandi ya Mana y’urukundo n’amahoro+ izobana namwe. 12 Muramukanishe ugusomana kweranda+. 13 Aberanda bose barabaramutsa.

14 Ubuntu ata wari abukwiriye bw’Umukama Yezu Kristu n’urukundo rw’Imana be n’ugusangira impwemu nyeranda bibane namwe mwese+.